Genesis 32
32
Jako sivôravlune tuksiarpoᴋ Gûdemiglo pânikpoᴋ.
1Jakole apᴋutimigut ingergavoᴋ, Gûdiblo engelingita pârpât.
2Takoleramigillo, oᴋarpoᴋ: Tamadja Gûdib kattimgajoᴋsoaᴋotingit; nunalo tamanna taivâ Mahanaimik.
3Jakole sivunermigut kivgartortuksanik tillikliutjivoᴋ Esauemut angajuminut, Seirib nunanganut, Edomib naternanganut.
4Perᴋovaillo oᴋarlune: Imâk oᴋauseᴋaritse angajoᴋâmnut Esauemut: kivgat Jako imâk oᴋautjivoᴋ: Tujormiangovlunga Labaneme mulluvunga mâna tikkidlugo,
5Perᴋuteᴋarpungalo tuktuvangnik, siuterᴋortojuniglo, saukaniglo, kivganiglo angutinik, kivganiglo arnanik, tillikliutjivungalo, angajoᴋâra ᴋaujititsomavlugo, ijîngnut saimaneᴋserᴋovlunga.
6Tillijaujut Jakomut utterput oᴋarlutik: Angajungnut Esauemut tikkipogut; aulalerêrpoᴋ pâriartorlutit, angutit 400 illagivlugit.
7Tagva Jako erᴋsidlalerpoᴋ kapiasuklune, avikpaillo inuit illagijane, saukallo tuktuvaillo kamêlillo kattimajut, maggoilivlugit,
8Oᴋarlune: Esauib kattimajut aipaingit tikkilugit pidlaralloarpagit, aipaingit tagva ᴋemâjungnarniarput.
9Jakolo oᴋarivoᴋ: Nâlegaᴋ, atâtama Abrahab Gûdinga, atâtamalo Isaab Gûdinga, oᴋartotit uvamnut: nunangnut utterit illangnullo, ajungitulivigijomavagit,
10Nalopᴋotijutigivakka pitsiarnerit tamaita nertornarnerillo tamaita kivgarnut saᴋᴋertitatit. Jordane una ikârapko, ajaupiara pituarivara, mânale kattimajut magguit pivakka.
11Piulilaungatôᴋ angajuma agganginit, Esauib agganginit, sivôragigapko, tikkidlaroarmat pidlarlunga arnallo sorrutsillo.
12Oᴋaravit: Ajungitulivigijomavagit, kinguvâksatillo unuksivalliatitsomavakka siorᴋatitut imarbiksûb sikjangane, unumut kitiksaujungnairtilugit.
13Unnuarmelo tamattomane tagvanêpoᴋ, piminillo najortaminit tiguvait, angajuminut Esauemut tujûtiksane:
14Tuktungajut 200 angusaluillo 20, saukat 200 angusaluillo 20.
15Kamêlillo sârliat 30 nochangillo, tuktuvaillo 40 angusaluillo 10, siuterᴋortojullo arnait 20 nochaillo 10
16Tâpkoa kivgame agganginut pitipait, kattimajut ingmikôrlugit, oᴋautivaillo kivgane: Sivunipkut ingerganiarpose, kattimajut ingmigolingajut akkuneᴋartilugit.
17Sivorlerlo perᴋovâ oᴋarlune: Angajuma Esauib pârpatit apertsorlutillo oᴋarpat: Kimut ilingavêt? namungarᴋêllo? ungortatillo tamakkoa kia perᴋutigivagît? —
18Oᴋartuksauvotit tagva: Kivgavit Jakob perᴋutingit tamakkoa, tujûtigivait angajoᴋâmnut Esauemut, taggalo malikpâtigut.
19Taimaktauᴋ aipanga perᴋovâ, pingajuaglo, ilûnaitalo kattimajunik ungortut, oᴋautilaitalo: Taimak Esaue oᴋautijaksarivase, naipilerupsiuk.
20Oᴋartailiniarasele: Tagga, kivgavit Jakob malikpâtigut. Issumaᴋarame: tujûtinut sivunimnêtunut saimartitsomavara, kingorngagullo takojomavara, imaᴋâ illaliorniarpânga.
21Tujûtiksat tagva sivorlerput, nangminerle kattimajoᴋotine illagivait unnuarme tamattomane.
22Unnuarmelo tamattomane makilerpoᴋ, nuliângnelo kivgâglo arnâk ᴋitornganelo 11 tiguvait, Jabokib ikârtorviagut ikârtiniarlugit.
23Tiguvlugit kôb akkianut ikârtinamigit, perᴋutinelo tamaita ikârtinamigit,
24Jako kissimetôlerpoᴋ. Tagvane angutib pâvâ ᴋaulersiarivlugo.
25Missigivlune sâlagivlugo ajoramiuk, sibviangagut aktorpâ, Jakoblo sibvianga uniortitauvoᴋ, pângmanik.
26Oᴋarporlo: Sapkunga, ᴋaulermat. Kiovâle: Sapkoniangilagit, kissiane saimauserumga.
27Oᴋautivâle: Kinauvêt? Kiovâ: Jakôvunga.
28Oᴋarporlo: Kingorngagut Jakomik atteᴋarungnairlutit, Israelemik atteᴋartuksauvotit, Gûdemullo inungnullo sorsugavit sâlaᴋarlutillo.
29Jakoblo aperivâ oᴋarlune: Attît tussarlago-ai? Oᴋautivâ: Sôᴋ attera aperᴋutigiviûk? Tagvanelo saimauserpâ.
30Jakoblo nuna tamanna atserarpâ Pnielemik, oᴋarlune: Gûde takogapko kênarsivlugo, tarnigalo piulijauvoᴋ.
31Pnielemillo aularmat, seᴋinerub nuilervigivâ, tussiakporlo sibviamigut.
32Tamanna pivlugo Israêlikut sibviab nukkinga nerᴋiksaringilât uvlomemut aglât, Jako aktormago sibviangata nukkingagut.
Currently Selected:
Genesis 32: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
