Genesis 33
33
Jakolo Esauelo naipiutivuk.
1Jakolo takojaksarsiorame, sunaubva, Esaue takolerpâ aggertoᴋ angutit 400 illagivlugit. Kitorngane tagva aviutipait, Leamullo Rahelemullo kivgângnullo arnângnut pitilugit.
2Kivgâglo arnâk ᴋitorngangillo sivorliotipait, Lealo ᴋitorngangillo tâpkoa kingornganêtipait, Rahelelo Josefelo kingorliotipak;
3Nangminerle sivorlerpoᴋ nunamullo okkolerpoᴋ 7ertorlune, angajune tikkitsiarivlugo.
4Esauele aᴋpangerpoᴋ pâriartorlugo, nagligivlugolo erᴋipâ kuniklâlo; tamarmiglo ᴋugviolerpuk.
5Takosarlune arnat ᴋitorngangillo takogamigit, oᴋarpoᴋ: Kikkût ingergaᴋatitit ukkoa? Kiovâ: Kitorngakka tamadja, Gûdib tunijangit kivgarnut.
6Arnâglo kivgâk ᴋitorngangitalo sângeriartorpât okkovlutik;
7Amma Leab ᴋitorngangitalo sângeriartorpât okkovlutik; kingorngagut Josefib Raheliblo sângeriartorpâk okkovlutik.
8Oᴋarporlo: Kattimajut ipkoa tamaita naipitakka suksarivigît? Kiovâ: saimaneᴋserᴋovlunga angajoᴋâma sângane.
9Esauib oᴋautivâ: Perᴋuteᴋatsiarpunga, nukâk, perᴋutitit pigituinakkit.
10Jakob kiovâ: Aukagle saimaneᴋsiguma sângne, piliutikka tigulaukit aggamnit, imâk pivlugo, kênat takogapko, Gûdib kênanga takolugo sorlo, illalioramgalo.
11Piliutikka, illingnut ᴋaitaujut tigulaukittôᴋ; Gûdib pilingmanga, tamainik peᴋatsiarpunga. Sâlagingmagolo, tiguvait.
12Oᴋarporlo: Aularluta ingergarnialerta, illagijomavagit.
13Kiovâle: Angajoᴋâra nellungilaᴋ, sorrutsit annajanarmatta, saukaniglo sârlianik illaᴋarama tuktuvangniglo; uvlorme atausênarme piluarlutik ungortaugunik, nergjutit ilûnatik toᴋonajarput.
14Angajoᴋâra ingergalauletôᴋ kivgame sivorngagut, uvanga sukkaitomik ingergarniarpunga iluserivaktaptut, nergjutit sorrutsillo pissugungnarningit maliklugit, tikkiniarlungalo Seiremut angajoᴋâmnut.
15Esauib oᴋautivâ: Tagva inuᴋotima illangit illingnêrᴋojomavakka. Kiovâle: Sujût? Saimaneᴋsituinarlanga angajoᴋâma sângane.
16Tagva Esaue uvlorme taipsomane utterpoᴋ apᴋutimigut Seiremut.
17Jakolo Suggotemut aularpoᴋ igloliorlunelo ingminut, nergjuteᴋotiminullo iniksaliorlune. Tamanna pivlugo nuna tamanna Suggotemik taivâ.
18Jakole ᴋanoengitsiarlune Mesopotâmiamit tikkigame, iglugasangnut Siggememut pivoᴋ, Kânaanib nunanganêtunut, iglugasaillo sângane tangmârpoᴋ.
19Nunalo tâmna tuppervigijane pissiarivâ Hemorikunit, Siggemib atâtanganit, ᴋetsitanik (kênaujanik) 100nik akkilerlugo.
20Tunerguserviliorporlo tagvane, atserarlugo Gûdib, Israêlib Gûdingata (tunerguserviᴋotinganik).
Currently Selected:
Genesis 33: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
