Genesis 34
34
Dina idluituliviovoᴋ; ᴋattangutingita idluitulijoᴋ akkiniarpât.
1Dina, Leab panninga, erniarilauᴋtanga Jakomut, anivoᴋ nunab inungita panningit takojartorlugit.
2Tâmna Siggemib takogamiuk, Hemorib Heviterib nunab attanertangata erningata, tiguvâ tuttiklugolo nachonartipâ.
3Tarningatalo ungagivâ Dina Jakob panninga, uigasuglo nagligivâ, tussarnertunik oᴋauseᴋarvigivlugo.
4Siggemiblo atâtane Hemore oᴋarvigivâ oᴋarlune: uigasungmik tâpsominga nuliaksarsilaunga.
5Jakolo tussaumalerpoᴋ pannime Dinab nachonartitauninganik; erningille naternamêngmatta nergjuteᴋotine, Jako niplialungilaᴋ taipkoa tikkitsiarivlugit.
6Hemorele, Siggemib atâtanga aningmat Jakomut oᴋarvigijomavlugo,
7Jakob erningit angerarput naternamit, tussatuaramitsuk. Angutillo sinaungagivlugo ningaumajâdlarput, kangunartoᴋsoarmik taimna piniarmat Israêleme, Jakob panninga tuttinamiuk; taimailiortoᴋartuksaungimat.
8Hemorib tagva oᴋarvigivait oᴋarlune: Ernima Siggemib tarningata pannise ungagidlarpâ, nuliangotilauᴋsiuk tâpsomunga.
9Ningaugijigêlauᴋta: pannise tunivlugit uvaptingnut, pannivullo tiguvlugit illipsingnut;
10Nunaᴋatigêklutalo. Nuna atuinauvoᴋ illipsingnut, nunaginiarlugo ingergaviginiarlugolo igloliorvigisiuk.
11Siggemiblo Dinab atâtanga ᴋattangutingillo oᴋautivait: Saimaneᴋsilaulangatôᴋ sâpsingne, pijomajapsingnik tunitjijomavunga.
12Tunergutiksat piliutiksallo angidlarᴋotuinarsigik; ᴋanoᴋ oᴋautiniarapsinga tunitjivigijomavapse, kissiane uigasuk nuliangotisiuk uvamnut.
13Jakoble erningita Siggeme atâtangalo Hemore kiovakit terliarlugik, najangat Dina nachonartingmago;
14Oᴋautilugiglo: Taimak sapperpogut, najavut tunivlugo angumut kippisimangitomut; tamanna kangunarajarpoᴋ uvaptingnut.
15Imâk kissiane pijomajaptingnik ᴋippilugomangilagut: Uvaptitut ilingalerupse, angutise tamaita kippijaurᴋogupsigik,
16Tagva pannivut tunijomavavut illipsingnut, panniselo tiguvlugit uvaptingnut, nunaᴋaᴋatigivluselo inôᴋatigêngojomârpogut atausît.
17Tamattomingale nâlagomangikuptigut, kippijaujomangikupselo, tagva pannivut naksarlugo aularomavogut.
18Oᴋautsit tamakkoa Hemorib erningatalo Siggemib idluarivait.
19Inôsuktorlo tâmna taimailiosâlerpoᴋ, Jakob panninga ungagigamiuk. Nertortauluarporlo tamainit atâtame inuᴋotinginit.
20Hemorelo erningalo Siggeme iglugasait itertarvianut tikkinamik, iglugasait inungit oᴋarvigivait oᴋarlutik:
21Inuit taipkoa ulapirᴋsauteᴋarasuarput uvaptingnut; nuna nunagivlugo aulavigilitsuk! Takkoitse, nuna inekilualungilaᴋ taipkununga, panningit nuliarijomavavut, pannivullo taipkununga tunivlugit.
22Imâgle kissiane angutit taipkoa angervigijomavâtigut, nunaᴋaᴋatigijomavluta inôᴋatigijomavlutalo, angutivut ilûnatik kippijaulerpatta, sorlo taipkoa kippimangmatta.
23Kattimajoᴋotingit perᴋutingillo nergjuteᴋotingillo tamaita pigileromângilavût, angervigituinaruptigik nunaᴋaᴋatigivlugillo?
24Tagva ilûnatik iglugasait itertarvingatigut aniâjut Hemore erningalo Siggeme nâlekpakit, angutillo tamaita kippijautipait, tamaita iglugasait itertarvingatigut aniâjut.
25Pijoᴋarporlo: Uvlut pingajuane ânialiumingmatta, Jakob ernîgik, Simeonelo Levilo, Dinab anîgik, tamarmik saviksoarmik tigusivuk, iglugasangnullo iterpuk nangiartuilutik, angutillo tamaita toᴋopait.
26Hemoretauᴋ erningalo Siggeme toᴋopakik saviksûb kênangagut, Dinalo tiguvâk Siggemib iglunganit aularlutiglo.
27Tagva Jakob erningita toᴋotaumajut tikkipait, iglugasaillo asserorpait, najatik nachonartingmatsuk.
28Saukallo tuktuvaillo siuterᴋortojullo tiguvait iglugasaksoarnêtut naternamêtullo.
29Perᴋutingillo tamaita ᴋitorngangillo tamaita nuliangillo aularutivait, sunatuinaillo iglunêtut asserorpait.
30Jakole Simeonemut Levimullo oᴋarpoᴋ: Piluᴋoserpaptinga, ominarsitinaptinga nunab inunginut Kânaanemiunullo Feresiterinullo. Uvangale inuᴋotikkalo unuktôngilagut. Taipkoale kattileromârput unatadlarvigivlunga nungutidlarlungalo uvangalo inuᴋotikkalo.
31Kiovâk: Najavut anguniarpaktotut iliorvigijaksarigalloarpatsûk?
Currently Selected:
Genesis 34: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
