Genesis 35
35
Jako ingergavoᴋ Bêtelemut Hebronemullo.
1Gudiblo Jako oᴋautivâ: Parngnailerit Bêtelemullo ingergalerit, taikane nunaᴋarlutit, taikanelo tunerguserviliorlutit Gûdemut, illingnut saᴋᴋersimajomut taipsomane, angajungnit Esauemit ᴋemâgavit.
2Jakob tagva iglomioᴋatine illagijanelo tamaita oᴋautivait: Tujormiangovigijapta gûdingoaᴋotingit akunapsingnêtut pêrsigik, sujungaititsiluselo, assinginik anorârluse.
3Parngnailerlutalo ingergalauᴋta Bêtelemut, taikane tunerguservilioromagama Gûdemut, tâpsoma tussarmanga kapiasungnima nelliuningane, illagingmangalo apᴋome ingergarvigijamne.
4Tagva tujormiangovigijamik gûdingoaᴋotingit tamaita pigijatik tunivait Jakomut, siumiutatiglo arngoat. Jakoblo sauvait napârtoᴋsûb Siggememêtub atânut.
5Tagva aulalerput. Kakkilârnerublo, Gûdemit pijub, iglugasait tamattoma erᴋânêtut tikkipait, udlaniktailitilugit Jakokunik.
6Jakoblo Luse tikkipâ, Kânaanib nunangaᴋnêto, tagva Bêtele, inuᴋotine tamaita illagivlugit.
7Tagvanelo tunerguserviliorpoᴋ, nuna atserarlugo El-Bêtelemik, Gûdib tagvane saᴋᴋervigilaungmago taipsomane, ᴋemâgame angajuminit.
8Deboralo, Rebekkab pairijigilauᴋtanga, toᴋovoᴋ, iluvertauvorlo Bêtelib nallâne, napârtoᴋsûb atânut, atserarpâlo “Napârtomik ᴋeavingmik.”
9Gudiblo Jako amma saᴋᴋervigigivâ, Mesopotâmiamit tikkingmat, saimauserpâlo.
10Gûdiblo oᴋautivâ: Jakomik atteᴋarpotit; kingorngagulle Jakomik atteᴋarungnairlutit Israêlemik atteᴋartuksauvotit. Atserarpâlo Israêlemik.
11Gûdiblo oᴋautivâ: Uvanga Gûdeovunga ajugaᴋangitoᴋ. Kinguvâktâᴋattarit unuksivalliavlutit; inôᴋatigêt, illa inôᴋatigêksuit illingnit pijomârput, attanîllo makkitingnit pijomârput.
12Nunalo, tunijara Abrahamut Isaarmullo, tunivara illingnut, kinguvâksarnullo kingunikkut tunijomârpara nuna.
13Gûdelo ᴋongmuarpoᴋ oᴋauseᴋarvigijaminit tâpsomunga.
14Jakole inuksuliorpoᴋ tagvane, (Gûdib) oᴋauseᴋarvigijangane tâpsomunga, inuksumik ujaramik, imiksamiglo tunergutaujomik koverivâ, orᴋsumiglo koverivlugo.
15Jakoblo Gûdib oᴋauseᴋarvigijanga tamanna Bêtelemik atserarpâ.
16Betelemit tagva aularput. Tikkikassalungimatta sulle Efratemut, Rahele ernisulerpoᴋ, ernisuklunelo siorniudlarpoᴋ.
17Ernisuklune taimak siorniudlarmat, ernisuksêjub oᴋautivâ: Sivôraniarnak, tamattomûna ernertârmigavit.
18Anernangileramele toᴋolerlune, Benonimik atserarpâ, atâtangatale Benjamimik atserarpâ.
19Rahelelo toᴋovoᴋ, iluvertauvorlo apᴋosinerme Efratemut, tagva Betlehemut ilingajome.
20Jakoblo nellunaikutaᴋ nappartipâ iluvingata ᴋânganut, tamadja Rahelib iluvingata nellunaikutanga sulle uvlome.
21Israelelo tagvangat aularpoᴋ tangmârlunelo Ederib nuvugusingata ungatâne.
22Pijoᴋarporlo, Israêle nuname taipsomane igloᴋartilugo, Rubenib Bilha, atâtame panervganga, itervigingmago tuttiklugolo. Israêliblo tussaumavâ.
23Jakoble erningit 12ovut. Leab erningit: Ruben, erniangoᴋârtoᴋ Jakomut, Simeonelo Levilo Judalo Isassarelo Sebulonelo.
24Rahelib ernîgik: Josefelo Benjamilo.
25Bilhab, Rahelib kivgangata, ernîgik: Danelo Naftalilo.
26Silpab, Leab kivgangata, ernîgik: Gadelo Asserelo. Tamadja Jakob erningit, erniangomajut tâpsomunga Mesopotâmiame.
27Jakoblo atâtane Isaaᴋ tikkipâ Mamrime, Kiriat-Arabame, tagva Hebroneme, Abrahablo Isaablo tujormiangovigijangangne.
28Isaarlo jâreᴋarpoᴋ 180nik.
29Isaarlo anernangerlune toᴋovoᴋ, sivorliminullo illaliutjauvoᴋ, îtôvlune nâmaksimariklunelo. Ernîkitalo Esauib Jakoblo illijartorpâk.
Currently Selected:
Genesis 35: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
