Lukase 11
11
Tuksiartuksaunermik ᴋanok. Jêsusib akkiorninganik anititsinek Sâtanasinik pivlugo. Farisêerit suartauninginik Jêsusemut, nerrimârtilugit.
1Iniminelo tikitamine tuksiarpok. Sorairmallo, ilinniartingita ilangata oᴋautivâ: Nâlegak, tuksiarnermik ajoᴋertortigut, sorlo Johannesib ilinniartine ajoᴋertormagit.
2Oᴋautivaille: Tuksiarupse, imâk oᴋaritse: Atâtavut ᴋilangme! Atît nertortaule. Nâlegauvît ᴋailaule. Pijomajat piniartaule nuname sorlo ᴋilangme.
3Uvlome piksaptingnik tunitjivigitigut.
4Idluinivut issumagijungnaikit, sorlo uvagut idluitulivigijivut issumagijungnaivigigaptigik. Oktortaulungnermut pitinata. Piulitigulle ajortunit.
5Oᴋautivaillo: Akunapsingnêtut naliat ilannârijaᴋartok, tâpsomunga unnuab ᴋeterarningane ainajarpat oᴋautivlugolo: Nagliktara ilannârijara, tauktiliksarsilaunga niaᴋôjanik pingasunik;
6Ilannârijama apᴋosinermit tikingmanga, pitaᴋangilangalo manijaksamik tâpsomunga;
7Kamanêtorlo kionajarpat oᴋarlunelo: Ulapitaujomangilanga, upkuak parngnanairsimangmat, ᴋitorngârsukkalo ilangivlunga sinigvingmêngmatta; taimâk pivlugo makitsungnangilanga tunitjivigivlutit:
8Oᴋaupapse: Makitsomangiᴋalloarune tunitjivigilugo ilannârigamiuk; tagva makilârpok, iktôriktailune tuksiarvigingmago sorairane, pijomajanganiglo ajortanganik tunitjivigilârpâ.
9Oᴋaupapsetauk: Tuksiaritse, tunitjivioniarpose tagva: ᴋeneritse, nennisiniarpose tagva; avilortaritse, upkuêrutjauniarpose tagva.
10ᴋenujok tigusiniarmat, ᴋenâjok nagvârniarmat, avilortartorlo upkuêrutjauniarmat.
11Kia illapse, atâtane erningata ᴋakᴋôjamik tuksiarvigikpago, ujarᴋamik tunitijiviginajarpaûk? Mingeriamiglônêt tuksiarvigikpago, mingeriangongitomik ᴋuglugiamik tunitjiviginajarpaûk?
12Manningmiglônêt tuksiarvigikpago, kingupaujârtimik tunitjiviginajarpaûk?
13Ilipse ajoralloartose ᴋitorngase tunergutinik ajungitunik tunitjivigijungnarapsigik, piluardlune ilâ Atâtab ᴋilangmêtub tuksiarvigijine tunitjiviginiarpait Anernermik ajunginermik.
14Sâtanasemiglo oᴋarungnangitomik anititsivok. Sâtanaselo aningmat, oᴋarungnangitok oᴋalerpok. Inuillo tataminialerput.
15Tâpkoale ilangit oᴋarput: Sâtanasit anitipait Beelzebubekut, Sâtanasit ataningatigut.
16Assingitale ôktorpât, takotitserᴋojomavlugolo nalunaikutamik ᴋilangmit.
17Jêsusible issumangit ᴋaujigamigit, oᴋautivait: Ataniovît naliat ingminut illagêgungnairune, nunguniarpok, iglolo ingminut akkerartortok ochoniarpok.
18Sâtanasetaûk ingminut akkerartorune, ᴋanok atanioninga soᴋosinginajarᴋâ? Oᴋarapse, sâtanasit anitikapkit Beelzebubekut.
19Uvangale sâtanasit anitikupkit Beelzebubekut, kinakut ᴋitorngapse anitipatigîk? Tamanna pivlugo erᴋartortigijomârpase.
20Sâtanasit Gûdib aggangitigut anitikupkit, Gûdib nâlegauvingata tagva tikipâse.
21Sangijoksûb sakkuliub iglune saputikpago, perᴋutingit pijauniatsangilat.
22Sanginersable tikikuniuk, sâlagiguniuglo, sakkunginik tatigijanginik aᴋsâdlarpâ, aᴋsârnigavinîllo aitûtigivait.
23Ilagijigingitima akkerartorpânga; katersoiᴋatigingitaralo siamartitsivok.
24Anernerle maᴋojungnartok inungmit anigame, ingergavok sunaᴋangitoᴋut, merngoerserviksarsiorlune, nagvâranelo; oᴋarpok tagva: Iglumnut ᴋemalauktamnut uteromavunga.
25Tikinamiuglo, sannersimajok ânanausijorlo naipipâ.
26Tagva ailerpok anernernik assiminik 7 nik, ingminit ajornersaujunik illaksarsivlune, iteramiglo, tagvanêtualerput; kingorngagullo inuk taimna ajulualerpok sivornganemit.
27Jêsuselo taimâk oᴋartilugo, arnak nippeᴋalerpok inuit akurngane, oᴋautivlugolo: Piloridlarpok ilingnik singailauktok ilingniglo amâmaktitsilauktok.
28Kiovâle: Ila, piloridlarput Gûdib oᴋausinginik tussartut torᴋorlugillo.
29Inuille katimalermatta, tagva oᴋalerpok: Ukkua uivêtôvut; nelunaikutamik takojomavut; tunitsivioniangilalle nalautaijub Jônasib nalunaikutangata assianik.
30Sorlo Jônase nalunaikutaulaungmat Ninivemiunut, taimâk Inûb Erninga itsomârivok kinguvângoᴋatigênut ukkonunga.
31Uvluksame erᴋartuivingme kinguvângoᴋatigêt ukkua ilagilugit ataniub nulianga ângat pijok sakᴋeromârpok, erᴋartorlugit; nunamit ungasiktomêtomit pigame, Salomonib silatuninga tussaromavlugo. Ahâglo tamânêtoᴋarpok Salomonemit anginersaujomik.
32Ninivemiut uvluksame erᴋartuivingme kinguvângoᴋatigêt ukkua ilagivlugit sakᴋeromârput, erᴋartorlugillo; Jônasib oᴋâlaningata kingorngagut ᴋaᴋialeramik. Ahâglo, tamânêtoᴋarpok Jônasemit anginersaujomik.
33Nennergoamik ikitsijokangilak ijeriartorlugo, ᴋattaujab atânullônêt; nennergoarvingmulle ilivâ, itertunut takojauᴋovlugo nennergoak.
34Timib ije ᴋaumanerivâ. Ijît taututsiarpat, timît ilûnane ᴋaumaniarpok. Ijît taututsiangipat, timît ilûnane târniarpok.
35Tamanna pivlugo, udsertorit, ᴋaumajok ilungnêtok tâᴋserᴋonago.
36Timît ilûnane ᴋaumakpat, mikijomiglônêt tâktoᴋarane, tagva ilûnane ᴋaumaniarpok, ᴋaumarsarniarpâtillo, sorlo ᴋolliub ᴋaumarsarmatit akisungnerminut.
37Taimâk oᴋartilugo, Farisêerit ilangata innapâ nerreᴋatigijomavlugo ᴋeterarsiumik. Jêsuselo iterpok ingidlunelo nerrimârvingmut.
38Ubvarsimanane nerrijomangmat, Farisêerib takogamiuk, tataminiarpok.
39Nâlekable oᴋautivâ: Ilipse Farisêerit, ermgusiarsuit pôgutallo silatingitigut sujungaitikalloarpase, ilusele tattadlarput kassênermik arᴋtaisungunermiglo.
40Silaitose, silatânik sanalauktub, ilua sanalaungilaûk?
41Ahâk, perᴋutipsingnit tunijiniaritse (Aklujunut), ilûnatik sujungaijutiksauniarput tagva ilipsingnut.
42Kappianamêgle ilipse Farisêerit, tippitsiariksaullo makpatâvaillo sunatuinait tallimaujungit tunigapsigik, erᴋartuinerle (idluartok) naglingnerlo Gûdemik senerᴋopase (issumaginagiglo). Makkoa piniaraksarivase, ipkoalo iperarnagit.
43Kappianamêk ilipse Farisêerit, katimavingne issukliovluse iksivajomagapse, salutitaujomavluselo inungnut niuvervingme.
44Kappianamêk ilipse, aglangnik illisimajut Farisêerillo, takkormôrtose, iluvertitut saumajutitun-inapse; inuit ᴋângitigut pisukput ᴋaujimanagit.
45Tagva aglangnik ilisimajut ilangata kiovâ oᴋautivlugo: Ajoᴋertuijok, oᴋautsinut tamakkonunga uvaguttauk suangavaptigut.
46Kiovâle: Kappianamêk ilipsetauk, aglangnik ilisimajut inuit erᴋsugaksanik erᴋsuktaujungnangitunik ilijivigigapsigik, ilipsele nangminek tamakkoa aktoromangilase, aggangmut atautsemullônêt.
47Kappianamêk ilipse; nelautaijut iluviliorpase, angajoᴋâpsele toᴋolaukpait.
48Tagva sakᴋertitsivose, angajoᴋâpse piniarnerilauktangit idluiginginapsigik; ipkoa nelautaijut toᴋolaukpait, ilipsele iluviliorpase.
49Tamanna pivlugo Gûdib silatuninga oᴋarpok: Nelautaijut Apostelillo tilijomavakka tâpkonunga; taipkoa ilangit toᴋotsomârpait, ilangillo unangmivlugit.
50Nelautaijut ilûnarsoangita aungit kinguvângoᴋatigênut tâpkonunga akkiniartaukovlugit, silaksûb tunganilijauninganit kovijaumajut,
51Abelib aunganit Zacharîasib aunga tikidlugo toᴋotaujub tunerguserviub tempeliblo akorngangne. Ilâ oᴋaupapse: Kinguvângoᴋatigênut ukkununga akkiniartaujomârput.
52Kappianamêk ilipse, aglangnik ilisimajut, ilisimanartub pêrutânik peᴋarapse. Ilipse iterniangilase, iteromajullo agviarpase.
53Taimagle oᴋautingmagit, aglangnik ilisimajut Farisêerillo piniarpalliadlarpât, aperᴋusiksanut sunatuinarnut oᴋausiksairutsomavlugo,
54Nautsertorpâllo, oᴋausinginit pasitiksaᴋaromavlutik tâpsomunga.
Currently Selected:
Lukase 11: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
