Lukase 12
12
Ilinniartine udsertorᴋovait takkormôrnermik, inungniglo sivôranermik pijomatudlarnermiglo. Nertornarᴋojaunermik pigârᴋojaunermiglo. Okpertut nangianartomêninginik unangmijauninginiglo. Nelliunerub nelunaikutanginik.
1Tagvanêtilugo inugasaksuit tikipât, tausendeoᴋattartullo katimalerput ingmingnut tuttijarᴋattautivlutik. Tagva Jêsusib ilinniartine oᴋautilerpait; Piluartomik Farisêerit ᴋakᴋôjangita pudjusautinganik ilimasugitse, tamadja takkormôrniongmat.
2Sagvangitoᴋangilarle sakᴋertitauniangitomik, angigutjuteᴋangilarlo ᴋaujijauniangitomik.
3Tamanna pivlugo tâktome oᴋauserilauktase ᴋaumajome tussartaujomârput, iglomelo issibjutigilauktase oᴋautaujomârput iglut ᴋângine.
4Oᴋaupapsele ilannârijakka: Erᴋsiginiarasigik timinik toᴋotsijut, kingornganelo sumik piniarungnarungnaitut.
5Sivôragijaksapsingnigle oᴋautijomavapse: Tâmna erᴋsigisiuk, toᴋotsijarêrune, pitsartuneᴋarmijok egitsinermik ânianartovingmut. Ilâ oᴋaupapse, tâmna erᴋsigisiuk.
6Kutsertat tallimat kênaujârsungnik maggûngnik akkeᴋarpangilât? Gûdible taipkoa ilangallônêt puigungilâ.
7Nujasetauk ilûnatik kitisimagivut niaᴋupsingne. Tamanna pivlugo erᴋsiniarase, kutsertavaksoarnit akkitugijaunersaugapse.
8Oᴋaupapsele: Uvamnik oᴋausilik inungnut, tâmna Inûb Erningata oᴋautigijomârivâ Gûdib Engelinginut.
9Inungnulle misiutilik uvamnik, tâmna misiutaujomârivok Gûdib Engelingita sângane.
10Oᴋautsemiglo Inûb Erninganut akkerartortomik oᴋautilik issumaᴋarviojungnairomârpok; Anernermigle ajunginermik oᴋauserlûtilik issumagijaujungnainiangilaᴋ.
11Katimavingmingnulle, atanersoarnullo ataniojunullo âpase issumajâruteᴋarniarase ᴋanok sumiglônêt oᴋausiksaᴋarniarmangâpse kigusiksaᴋarmangâpselônêt.
12Anernerub ajunginerub ajoᴋertorniarmase stundeme taipsomane oᴋauseᴋariaᴋarniksapsingnik.
13Inuille ilangata angutib oᴋautivâ: Ajoᴋertuijok, angajuga oᴋautiuk, kingormgutijaksaptingnik avikserᴋovlunuk.
14Oᴋautivâle: Inuk, kia aviksititsijuksautilaukpângâ kingormgutijaksapsingnîk?
15Oᴋautivaillo: Akluitsomanermik udjertoritse; inûb perᴋutivaksuit inôgutigingimagit.
16Adsiujomiglo pivait oᴋarlunelo: Anguteᴋalaukpok akluitomik, tâpsoma perorsêvinga perorlorigviovok.
17Issumaksarsiorporlo oᴋarlunelo: ᴋanok piniarlungâ? Perorsiakka katitaksakka iniksaᴋangimatta.
18Oᴋarlunelo: Imailioromavunga; ᴋematulivikka serᴋomitsomavakka, angijorortilugillo, perorsiakkalo tamaita perᴋutikkalo katitsomavakka taᴋamunga.
19Tarnimnullo oᴋaromavunga: Nagliktara tarniga, piksaᴋavaksoadlarpotit jârinik unuktunik, ᴋikalerit, nerrilutillo imerlutillo ᴋuviasugit.
20Gûdible oᴋautivâ: Silaitotit, unnuarme tamattomane tarningilârpotit; kialo katersulauktatit piksariniarpagît?
21Taimâk ilingavut perᴋutinik katersoijut, akluinatiglo Gûdeme.
22Ilinniartinele oᴋautivait: Tamanna pivlugo oᴋaupapse: Inôsise pivlugo siaklerniarase, nerᴋiksapsingniglônêt, timipselônêt annorâksanginik.
23Inôsek ivlernarnersauvok nerᴋiksanit, timelo ivlernarnersauvok annorânit.
24Tulugat nautsertorsigik: karngasoingilat, katersoinatiglo ᴋematuliveᴋaratiglotauk iliorᴋaveᴋangilallônêt; taimaigalloartilugit Gûdib nerritipait, Ilipsele tingmitjanit ivlernarnersaungijaidlarpose ilâ!
25Nelise ingminik uiguksarsijungnarᴋâ tallertut atautsetut takitigijomik, siaklerutigigalloaruniûk?
26Mingnek ajorupsiuk, sôk assia siaklerutigivisiûk?
27Paunaujaujârtut naternamêtit, ᴋanok perortut takunârsigik; sanangilat, pergaingilallônêt. Oᴋaupapsele, Salomolônêt ânanaunermine ilûnâne annorârsimalaungilak taipkoa ilangatitut.
28Iviksukat nunamêtut Gûdib taimâk pinnarnarsitinamigit, uvlome perortut, ᴋaupallo kiaksaumut egitaksaujut piluartomik ilipse annorârtitsomavâse, okpernikitose!
29Tamanna pivlugo erᴋaginiarasiuk sumik nerᴋiksaᴋarniarmangâpse, sumiglônêt imiksaᴋarniarmangâpse, issumajârniaraselo.
30Makkoa tamaita silaᴋsûb inungita okpingitut nelojullo pinasuagatuarivait: Atâtapsele ᴋilangmêtub ᴋaujimavâse taimaitomik ajoᴋsarapse.
31Gûdible nâlegauvinga pinasuarᴋârsiuk, tagva tamakkoa tamaita pilârpase.
32Erᴋsiniarase, ilagêktuarsuit: Atâtapse idluaringmago tunitsivigivluse nâlegauvingminik.
33Perᴋutise niorvgutigisigik tunergutigivlugillo. Pôksiniaritse pitoᴋauniangitunik, perᴋutitârniardluselo ᴋilangme asserojuitunik, tigliguillo sapertanginik, ᴋaurulillo asserorungnangitanginik.
34Perᴋuteᴋarvipsingne ômatise tagvanêniarivut.
35Makitipsigut tapserusijaritse nennergoaselo ikomaᴋarlit.
36Inuit adsigisigik nâlekamingnik neriuktut, nuliarêlitainartut nerrimârvinganit ᴋailerpat; tikipat avilortalerpallo upkuêrutisâlârpât.
37Kivgat taimaitut piloridlarput, Nâlekab tikipagit, pigârtut. Âhamarik oᴋaupapse: nerrimârvingme iksivaᴋojomârpait, sailitserlunelo, nangminerlo kivgartoromarpait.
38Pigârviub aipangane, pigârvîllônêt pingajuangne tikipagit taimailiortut, kivgat tâpkoa piloridlarput.
39Tamannale nalojungnairaksarivase: Iglub inuata tigliktub tigligiartorvia ᴋaujimaguniuk, pigârajarpok, iglominut itertoᴋarᴋonago.
40Tamanna pivlugo ilipsetauk opalungaisimatitse; Inûb Erninga tikitsomârmat uvlub stundingane neriugvigingitapsingne.
41Pêtrusible oᴋautivâ: Nâlegak, adsiujomik mattominga kissipta pivitigût, tâpkoalônêt tamaita pivigît?
42Nâlegarle oᴋarpok: Pimaklertok silatovlunelo nertornartok pijariaᴋortojok, Nâlekab pairsijungortitanga kivgaᴋotiminut, tunijerᴋovlugo piksanginik naliutijarangat.
43Kivgak taimna pilorikpok, taimailiortok, Nâlegangata tikipago.
44Âhamarik oᴋautivapse: Perᴋutiminik tamainik pimaklertungortitsomârpâ.
45Kivgarle taimna ômamigut issumalerpat: Nâlegara tagvainak tikiniangilak; kivgallo angutit arnallo annaudlalerpagit, nangminek nerrilune imilarmelo taladlarlune,
46Kivgab taipsoma nâleganga tikitsomârpok uvlorme ipsoma neriugvigingitangane, stundemelo ᴋaujimangitangane, asserorlugolo piniarpâ, okpingitullo ilaliudlugit âkᴋivigijomârpâ.
47Kivgarle nâlekame perᴋojanganik ᴋaujimajok, pinialauranelo, perᴋojangalo malingnago, unuktunik annaujaujomârpok.
48Perᴋojanganigle ᴋaujimangitok, pinialauralloarame annaujaujutiksamik, ikitunik annnaujaujomârpok, Unuktunik tinitjiviojok, tâmna unuktunik ᴋenerviojomârpok; unuktuniglo perᴋojaujok, tâmna unuktunik ᴋaitserᴋojaujomârpok.
49Ikomamik ikitsijartorpunga nunamut; suna pijomanersarivigô ikoalajarêrninganît?
50Sivorngagulle baptijumut baptitaujariaᴋarpunga; sivôradlarpungale nâmakserᴋârtinago.
51Ulapirsaumik ᴋaitsilunga nunamut tikinasugivisingâ? Oᴋarpunga: Aukak, akkerartortigêngnermigle.
52Mattoma kingorngagut tallimat iglome atautseme ingmingnut akkerartûtijomârput; pingasut maggûngnut, maggûglo pingasunut.
53Atâta akkerartoromârpok ernerminut, ernerlo atâtaminut; anânalo paningminut, paniglo anânaminut; sakke ukoaminut, ukuarlo sakkiminut.
54Oᴋarporle inungnut: Nuvujamik takojarangapse unangat nikovitomik, oᴋarsaraipose: Silarnerludlarniarpok; taimailerporlo.
55Uarngniluamik takojarangapse oᴋarpose: Kitjidlarniarpok; taimailerporlo.
56Takkormôrtose, nunalo ᴋilaglo ᴋanoeniarmangângnik ilisimavase; sôkle neliutok tamanna ilisimangipisiûk?
57Sôkle nangminipsingnik erᴋartungipisê idluartomîk?
58Ilingnulle akkerartortok aiparigungne atanermut, ingergarlutik saimarsarniaruk, pititauᴋonak erᴋartuijomut; erᴋartuijomullo unertûtauᴋonak pitlarniktomut, pitlarniktomullo egitauᴋonak parngnanairsimavingmut.
59Oᴋaupagit: tagvangat anititauniangilatit, akkiliksarpît kingorlerpârâsunganik akkilêrᴋârtinak.
Currently Selected:
Lukase 12: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
