Lukase 13
13
Sâgiartuksaunermik. Adsiujunik napârtok paungatannaᴋarpaktok Gudiblo nâlegauvia pivlugik. Arnab âᴋiktauninganik Sabbateme. Iternermik itervikitoᴋut. Jêsusib kigusinganik Herôdese pivlugo, kiksarninganiglo Jêrusalemiut pivlugit.
1Taipsomane najûtijut ilangita oᴋautivât Galilêamiunik, Pilatusib taipkoa aungit akkulaungmagit tunergutinginut (toᴋodlugit).
2Jêsusiblo kiovait oᴋautivlugillo: Galilêamiut ipkua idluitulinersaunasugivisigîk Galilêamiunit assinginit tamainit, taimâk pidlartaungmattâ?
3Aukârpunga; sâgiarniangikupsele, tamapsetauk taimâk asseroromârivose.
4Ipkoalônêt 18 it nuvugoseksûb Siloamêtub ochovigijangit toᴋodlugillo, inungnit assinginit tamainit Jerusalemêtunit ajornersaunasugivisigîk?
5Aukârpunga; sâgiarniangiᴋupsele tamapsetauk taimâk asseroromârivose.
6Adsiujomigle mattominga oᴋautivait: Napârtoᴋoteᴋartoᴋalaukpok paungatannaktaliksamik ilijaumajomik perorsêvingminut vaineliksatalingmut; paungaksioriartoramiuglo, nagvângilak.
7Tagva vaineliksatalingmik perorsêvilerijomut oᴋarpok: Ahâk, jârine pingasune jârit tamaita napârtok tâmna nelipsaᴋattardlugo paungaksioriatulaukpara, nagvârnangalo; kipiuk, sôk nunamik agviarᴋâ?
8Taipsomale kiovâ oᴋautivlugo: Nâlegak, taimailingalaule sulle jâreme tamattomane; ivjo avatânnêtok poagijarᴋârlugo perorsaijuksalijomavara,
9Kingorngagut paungaᴋarniangimangât, peᴋangipalle, tâva kipiuk.
10Ajoᴋertuivorlo katimavît ilangane Sabbateme.
11Ahâglo, arnak tagvanêpok, ᴋanimanartomik anernilik jârit 18 it nâvlugit, oᴋungainarlune isivijungnangitok.
12Jêsusible takogamiuk, ᴋaiᴋovâ oᴋautivlugo: Arnak, ᴋanimanernit pijungnairit!
13Aggangminullo patingmivâ; tagvainarlo isivilerpok Gûdelo nakoridlarpâ.
14Tagva katimaviub angajoᴋânga ningalerpok, Jêsuse Sabbateme pijungnaititsingmat, inuillo oᴋautivait: Uvlut pingasojortôvut senaviksaujut; uvlune taipkonane âᴋiktaujartoritse sabbatemeungitorle.
15Tagva Nâlekab kiovâ oᴋarlune: Takkormôrtotit, ilipse tamapse tuktuvaᴋotise, siuterᴋortojullo pitûdjârpangilasê nerᴋevinginit, aluktitsartorlugillo sabbatemê?
16Tagva tâmna, Abrahâb panigigalloarmago, pitûdjârtaujariaᴋangilâᴋ pitûtamit tamattomangat, Sâtanasib ᴋelaksulauktanga jârine 18 inê?
17Taimâk oᴋautingmagit akkerartortingit ilûnatik kangusuktitaulerput; inuit ilûnatik tatamnartitangit ânanaudlartut tamaita ᴋuviasûtigivait.
18Jêsusele oᴋarpok: Gûdib nâlegauvingata suna adsigivaûk? Sumullônêt adsiutitaksarivigô?
19Mustardib karngasûtiksatangatut-ipok; inuk tâpsominga tigusivok egidlugolo perorsêvingminut; perolerporlo napârtôlerdlunelo angijok, tingmitjallo ᴋilaub atânêtut ineᴋalerput akerungita akorngane.
20Ama oᴋarivok: Sumût Gûdib nâlegauvia adsiutitaksarivigô?
21ᴋakᴋôjat pudjusautingatun-ipok; arnak tâpsominga tigusivok akkudlugolo sanaugarmut, ôktût pingasuertorlugo, pudjutipâlo ilûnât.
22Mattoma kingorngagut iglugasaksoatigut iglugasaktigullo ingergavok ajoᴋertuivlunelo, ingergarlarmelo Jerusalemut.
23Inuille ilangata oᴋautivâ: Nâlegak, ikitut piulijauniarasugivigît? Oᴋautivaille:
24Ilungertoritse, itervikitoᴋut iterniarᴋovluse; oᴋaupapse: unuktut pinasuarniarput iteromavlutik, iterungnarniaratiglo.
25Taimangat, iglub inuata nikovidlune upkuak parngnanairpago, tagva ilipse silatâne nangernialerivose, avilortarluselo upkuamut, oᴋarluselo: Nâlegak, upkuêrutitigut! Kiojomârpâsele oᴋautivluse: Nakit pingmangâpse, ilitaringilapse.
26Tagva oᴋaleromârpose: Nerreᴋatigivlutillo imeᴋatigilaukpaptigit, apᴋosiniâluptingnelo ajoᴋertulaukpaptigut.
27Kiojomârporlo; Oᴋaupapse, ilitaringilapse, nakit pingmangâpse; tamapse ᴋemaksinga, idluitulijose!
28Tagvane ᴋeavaksoadlarneᴋaromârpok aglerulârneᴋarlunelo; Abrahalo, Isaarlo, Jâkolo, nalautaijullo tamaita Gûdib nâlegauvingane takojomârapsigik, ilipsele silatânut pingujartaumajose.
29Inuillo unangat, pângallo, ângallo, avangallo tikitsomârput, Gûdib nâlegauvingane nerrimârvingme iksivajomârtut.
30Ahâglo, kingorliojoᴋarpok sivorliojomârtunik, Sivorliojoᴋarlarmelo kingorliojomârtunik.
31Uvlorme taipsomane Farisêerit ilangita oᴋautijartorpât: Aularit, tamanna ᴋemaguk; Herôdesib toᴋotsomangmatit.
32Oᴋautivaillo: Terrianiak taimna oᴋautijartorsiuk: Ahâk, sâtanasit anitipakka, inûlikleriartorlarmalo uvlome ᴋaupallo, uvluglo pingajuangne naggaserniarpunga.
33Uvlomelo, ᴋaupallo, ungardlinganelo arvertariaᴋarpunga; nalautaijok Jerusalemib assiane toᴋotaulerpangimat.
34Jerusalem, Jerusalem, nalautaijunik toᴋotsijotit, ilingnullo tilijanik ujarᴋanut milorniktotit: ᴋitorngatit katititsomaᴋattalauralloarpakka, sorlo arnaungub piarᴋane katitingmagit esarᴋominut; pijomalaungitosele!
35Ahâk igluse (katimavise) inuêrutjaujomârpok. Oᴋaupapse: Takoniangilapsinga, neliuterᴋârtinago oᴋarvise: Nakoridlartaule Nâlekab atingane tikitok!
Currently Selected:
Lukase 13: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
