Mututo 13

Ku fitiswa kwa baeli ni maizibulo

1Muñ'a Bupilo a li ku Mushe, 2#Lipa 3.13; Luk 2.23 “U ni ketele baeli ni maizibulo kaufela. Mweli ufi ni ufi wa Maisilaele wa mushimani ki wa ka. I ka ba mutu kamba folofolo ki ya ka.”

Mukiti wa lico ze si ka umelwa

3Mushe a li kwa batu, “Mu hupule lizazi le mu zwile ka lona mwa naha ya Egepita, mwa ndu ya butanga, kakuli Muñ'a Bupilo u mi zwisize mwateñi ka maata a matuna. Ku si ke kwa ciwa lico ze umezwi. 4Kacenu le, ili ka kweli ya Abibi, mwa zwa mwa Egepita. 5Muñ'a Bupilo u sepisize bo kukw'a mina, ka ku itama, kuli u ta mi fa naha ya Makanana, Mahiti, Maamori, Mahivi ni Majebusi. Ki naha ye nde ye nunile. H'a ta mi fitisa mwa naha yeo, mu swanezi ku eza sebelezo ya kupuzo yeo ka yona kweli ye. 6Mu swanezi ku ca lico ze si ka umelwa ka mazazi a supile, mi ka la busupa mu ezeze Muñ'a Bupilo mukiti. 7Lico ze si ka umelwa li ta ciwa ka mazazi a supile. Ku si ke kwa ba ni lico ze na ni mumela, kamba ona mumela kasibili, mwa naha ya mina kaufela. 8Ka lona lizazi leo, wena Muisilaele u taluseze mwan'a hao, u li, ‘Zeo kamukana li ezahala kabakala z'a ni ezelize Muñ'a Bupilo ha ni zwa mwa Egepita.’ 9Sebelezo ye, i ta ba sina poniso fa lizoho la hao, kamba liswayo fa pata ya hao, ku ku hupulisa kuli u zwelepili ku bulela ka za Mulao wa Muñ'a Bupilo, kakuli yena u ku zwisize mwa Egepita ka maata a matuna. 10U ezange sebelezo yeo ka nako ye tomilwe ka silimo ni silimo.”

Mwana wa mweli

11Muñ'a Bupilo u ta ku tisa mwa naha ya Makanana, y'a n'a sepisize bo kukw'a hao. U ta ku fa yona. 12#Mut 34.19-20; Luk 2.23 Mwateñi u swanezi ku itumela ku Muñ'a Bupilo ka mwana wa pili wa mushimani ni ka folofolo ya hao ya maizibulo, ili ye tunanyana. Ni yona i ta ba ya Muñ'a Bupilo. 13Kono haiba ki mbongolo, u ka i cinca ka ngunyana. Ha u sa lati ku i cinca, u i lobe mulala. U swanezi ku liulula mwan'a hao wa mushimani wa mweli. 14Haiba mwan'a hao a ka ku buza ka nako ye taha, a li, “Se kanti si talusañi?” u mu alabe, u li, ‘Muñ'a Bupilo u lu zwisize mwa Egepita, mwa ndu ya butanga, ka maata a matuna. 15Faro ha n'a itatafalize pilu, mi a lu hanisa ku zamaya, Muñ'a Bupilo a bulaya baeli ni maizibulo kamukana mwa Egepita, ili ba batu ni limunanu cwalo. Ki lona libaka ha ni fitisa mwana wa mweli wa mushimani ku Muñ'a Bupilo, kono na mu liulula.’ 16Sebelezo ye i ta ba kupuzo ye swana sina poniso ye fa lizoho la hao kamba liswayo fa pata ya hao, kakuli Muñ'a Bupilo u lu zwisize mwa Egepita ka maata a matuna.”

Maisilaele ba zamaiswa ki lilu ni mulilo

17Faro ha s'a lukuluzi batu, Mulimu h'a si ka ba isa ka nzila ye ya kwa Mafilisita, nihaike ne i puma hahulu. Mulimu a hupula, a li, “Ha ni lati kuli batu ba cince mihupulo ya bona, mi ba kutele kwa Egepita ha ba ta bona ndwa ye ba ka y'o lwana.” 18Kono a ba zamaisa ka nzila ye potoloha mwa lihalaupa, ku y'o fita kwa Liwate le Lifubelu. Maisilaele ne ba lwezi lilwaniso.

19 # Sim 50.25; Josh 24.32 Mushe a lwala masapo a Josefa, sina Josefa ha n'a kupile Maisilaele ku sepisa kuli ba ta eza cwalo. Josefa n'a ize, “Kaniti Mulimu u ta mi tusa. Cwalehe ha mu zwa mo, mu lwale ni masapo a ka.”

20Ba zwa mwa Sukoti, mi ba y'o tibelela mwa Etami, ili kwa makalelo a lihalaupa. 21Musihali, Muñ'a Bupilo n'a ba etelela, a li mwa lilu, ku ba bonisa nzila. Mi busihu n'a ba etelela, a li mwa malimi a mulilo ku ba monyehela, kuli ba kone ku zamaya busihu ni musihali. 22#But 10.17; 18.3 Kamita lilu le li yemi nonga ne li li fapil'a sicaba musihali, mi mulilo o yemi nonga n'o ba etelela busihu.

Currently Selected:

Mututo 13: Lozi09

Highlight

Copy

Compare