Mututo 3

Mulimu u biza Mushe

1Mushe n'a lisa lingu ni lipuli za mukwenyan'a hae Jetero, muprisita wa Midiani. A isa mutapi mwa naheñi, mane a y'o fita kwa Lilundu la Mulimu le li bizwa Horebe. 2#Lik 7.30-34 Lingeloi la Muñ'a Bupilo la iponahaza ku yena ka sibupeho sa lulimi lwa mulilo lo lu zwa mwahal'a sicacani. Mushe a talima, mi a bona kuli sicacani sa tuka, kono ha si ci. 3Kih'a hupula, a li, “Ni ta sutelela, ni bone hande pono ye komokisa ye. Kikabakalañi sicacani ha si sa ci?”

4Muñ'a Bupilo h'a bona kuli n'a sutelela, a mu biza a nz'a li mwahal'a sicacani, a li, “Mushe! Mushe!”

Yena a alaba, a li, “Ki na yo, shangwe.”

5Mulimu a li, “U si ke wa sutelela hape. Tubula likatulo za hao, kakuli u yemi fa sibaka se si kenile. 6Ki na Mulimu wa ndat'aho, Mulimu wa Abrahama, Mulimu wa Isaka ni Mulimu wa Jakobo.” Mushe a kwahela pata ya hae, kakuli n'a saba ku talima Mulimu.

7Cwale Mulena a li, “Ni se ni boni hande mo ba nyandisezwa batu ba ka mwa Egepita. Ni ba utwile ha ba lilela tuso kabakala banyandisi ba bona. Ee, ni lemuhile hande manyando a bona. 8Ni til'o ba lukulula kwa Maegepita, ni ku ba zwisa mwa naha yeo, ku ba isa mwa naha ye tuna ye nunile. Ki ye nde ye nunile luli, mi ka nako ye ku inzi Makanana, Mahiti, Maamori, Maperizi, Mahivi ni Majebusi. 9Ni utwile sililo sa Maisilaele, mi ni boni mo ba nyandisezwa ki Maegepita. 10Mi cwale, ni ta ku luma ku Faro ku y'o zwisa sicaba sa ka, bona Maisilaele, mwa Egepita.”

11Mushe a li ku Mulimu, “Ki na mañi, kuli ni ye ku Faro ku y'o zwisa Maisilaele mwa Egepita?”

12Mulimu a alaba, a li, “Ni ta ba ni wena, mi se si ta bonisa kuli ni ku lumile ki se. Ha u ta zwisa sicaba sa ka mwa Egepita, mu ka t'o ni lapela kaufela hona fa lilundu le.”

13 # Mut 6.2-3 Mushe a li ku Mulimu, “Cwale ha ni ka ya kwa Maisilaele ni y'o ba bulelela, ni li, ‘Ni lumilwe ki Mulimu wa bo kukw'a mina,’ ba ta ni buza kuli, ‘Libizo la hae ki mañi?’ Cwale na, ni ka ba bulelela cwañi?”

14 # Sin 1.4,8 Mulimu a li ku Mushe, “Ki na Ya li teñi, Muñ'a Bupilo. S'o swanezi ku bulelela Maisilaele ki se, u li, ‘Ya li teñi, Muñ'a Bupilo, u ni lumile ku mina.’ ” 15Mulimu a bulelela Mushe hape, a li, “S'o swanezi ku bulelela Maisilaele ki se, u li, ‘Muñ'a Bupilo, Mulimu wa bo kukw'a mina, Mulimu wa Abrahama, Mulimu wa Isaka ni Mulimu wa Jakobo u ni lumile ku mina.’ Le, ki lona libizo la ka kuya kuile. Ki lona mw'a ka ni bizeza masika kamukana a sa taha. 16Zamaya, u y'o kopanya bahulu ba Isilaele hamoho, mi u ba bulelele, u li, ‘Muñ'a Bupilo, Mulimu wa bo kukw'a mina, Mulimu wa Abrahama, Isaka ni Jakobo, u iponahalize ku na, mi a ni laela ku t'o mi bulelela cwana, kuli, Ni tile ku mina kakuli ni boni mo ba mi ezeza Maegepita. 17Ni se ni lelile kuli ni mi zwise mwa Egepita, mo ba mi nyandisa, ni mi ise kwa naha ya Makanana, ya Mahiti, ya Maamori, ya Maperizi, ya Mahivi ni ya Majebusi. Ki naha ye nde ye nunile.’ ”

18“Ba ta utwa z'o ta ba bulelela. Ku zwa fo, u ye ku mulena wa Maegepita, wena ni bahulu ba Isilaele, u y'o li ku yena, ‘Muñ'a Bupilo, Mulimu wa Maheberu, u tile ku luna. Cwale lu kupa ku ya mwa naheñi, mazazi a malalu, lu y'o ezeza Muñ'a Bupilo Mulimu wa luna litabelo.’ 19Na ziba hande-nde kuli mulena wa Egepita h'a na ku mi lumelela ku ya, konji h'a ka hapelezwa ku eza cwalo. 20Kihona ni ta bonisa maata a ka, ni utwise Egepita butuku ka limakazo ze ni ta eza mwateñi. Mi mwamulaho, Faro u ta mi tuhela mu zamaye.

21 # But 10.17; Mut 12.35-36 “Ni ta eza kuli Maegepita ba kuteke sicaba sa ka, kuli ha mu ya, mu si ke mwa ya mazoho-zoho. 22Musali kaufela u ta kupa ku musali ya ina ni yena mwa ndu, kamba ya bapani ni yena, liapalo ni lika za silivela kamba za gauda. Mu ta apesa bana ba mina ba bashimani kapa ba basizana lika zeo, mi kamukwaocwalo, mu ta uzweza Maegepita.”

Currently Selected:

Mututo 3: Lozi09

Highlight

Compare

Copy