Luku 10

1Popele panuma yafintu ifyo, ŵaSikulu ŵalisalulwile naŵambi aŵantu amakumi asanu naaŵili, nekuŵatuma ŵaŵili ŵaŵili aŵakuŵatanjilila kumisi yonse nakoko konse uku ŵali apepi ukufika aŵene. 2Naŵo ŵalilaŵile kuli ŵo ati: Ukutewula kukulu, sombi aŵamilimo ŵace; pakuti pali fyefyo, kamutembelela Aŵene wakutewula ati ŵatume aŵamilimo mukuteŵula kwaŵo. 3Kamuyeni: umfweni-ko, ndukumutumeni koti ŵana ŵambelele pakati kamimbulu. 4Tekupinta neli kafukuta kandalama, neli litumba, neli niŋkwawilo: tekuŵasekela aŵantu munsila neli umo. 5Peŋka muŋanda syonse umo mukenjila, mukataŋge mukalaŵile ati: Uŵutende bwikale muli yiyi-nanda. 6Lomba, kani emwali umwana waŵutende, uŵutende bwenu ŵukalukwikele pali ye; sombi kani tamuli, ŵukabwelela kuli mweŵo. 7Peŋka mukalukwikele mopele umo muŋanda, nekulukulya nekunwa ifyo-fintu ifi ŵakapela; pakuti umupyunjisi alielelwe ukulambulwa kwakwe. Tekulukutantaka'mananda, 8Nakaŵili mumi si yonse umo mukenjila, neŵantu naŵo nekumupokeni, mukalukulya fyopele'fyo-fintu ifi ŵakalukumutekeleni. 9Mukalukuŵusya neŵalwele aŵali-mo, nekulaŵila kuli ŵo ati, Uŵufumu bwaŵaLesa bwapalamina apepi pali mweŵo. 10Sombi mumisi yonse umo mukenjila, neŵantu nekuŵulo'kumupokeni, mukaye mumiseŵo yakuko, nekulaŵila ati, 11Nekuŋgu lyonse ilyamumusi mwenu, ililukwimina mumakasa esu, ilyo tulukulisumuna kuli mweŵo; naŋgawe'fyo mufiisiŵe'fi ati Uŵufumu bwaŵaLesa bwapalamina. 12Ndukumuŵuleni ati pakasuŵa ako fikaŵa fyansuminino kuSodoma ukucila napali woyo-musi!

13Ulisyeme, weKolasini! Ulisyeme, weBesaida! Pakuti imilimo iyo ikulu, iyacitilwe muli mweŵo, ŋga yalicitilwe muTulo namuSidono, ŋga kale ŵasasile, nekulukwikele mufyacikundulu namumatoi. 14Naŋgawe'fyo, pampindi yakusololola fikaŵa fyansuminino kuTulo nakuSidono ukucila napali mweŵo. 15Naweŵo, weKapanaumi, kani ukasuntwilwa kwiulu? Ukatulwa pansi paSyeoli. 16Uyo ulukumumfweni mweŵo, alukunumfwa naneŵo; nawoyo ulukumukaneni mweŵo, alukuŋkana naneŵo; nawoyo ulukuŋkana neŵo, alukuŵakana neŵantumine.

17Naŵo amakumi asanu naaŵili ŵalibwelele nekusemba, nekulaŵila ati: MweŵaSikulu nefiŵanda nafyo filikomekelwe kuli fweŵo mwisina lyenu. 18Naŵo ŵalilaŵile kuli ŵo ati: Nalimubwene Satana ukupona kwiulu koti kampesimpesi. 19Woneni-ko, namupeleni mweŵo amakosa akunyanta-po pansoka napali ŵaŋkalanoŋgo, neŵukulu pamakosa onse akapondo; kaŵili pape'fintu neli cimo ifikamusomesyeni neli panini. 20Naŋgawe'fyo, tekulukusemba pakuti pali fifi, ati imipasi ilikomekelwe kuli mweŵo; sombi mulukusemba pakuti amasina enu alilembelwe kwiulu.

21Impindi iyo yopele ŵaYesu ŵalisembele muMupasi Uswetelele, nekulaŵila ati: Ndukumutoteni, mweŵaTata, mweŵaSikulu ŵaKwiulu necalo capansi, pakuti mwalifisile ifyo-fintu kuli ŵaŵo aŵamano nekalaŋgo, nekufibwenesya kuncece; icine mweŵaTata, pakuti ifyo fyalielelwe pamenso enu. 22Fyonse ifintu fyalipelwe neŵo kuli ŵaTata: lomba papo'muntu neli umo, umwisi Umwana, sombi niŵaTata weŋka: neli uŵesi ŵaTata, sombi Mwana eŋka, nawoyo ualukufwaya Umwana ukuŵabwenesya. 23Peŋka ŵalialucile kuŵasambile, nekulaŵila kumpelo ati: Alisyucile amenso ayo alukuŵona ifintu ifi ifi mulukuŵona mweŵo; 24pakuti ndukulaŵila kuli mweŵo ati: A ŵakusimika aŵenji nemfumu isinji syalukufwayo'kufiŵona ifi-fintu ifi mulukuŵona mweŵo, sombi tasyafibwene-po; nekufwayo'kufyumfwa ifi-fintu ifi mulukumfwa mweŵo, sombi tasyafyumfwile-po.

25Lomba umuntu umbi uwamilaŋgwe iyamumafunde aliimine nekuŵesya ati: MweŵaSambisi, ncite'ndo neŵo mukupyana umweo wamuyayaya? 26Naŵo ŵalimwasucile ati: Mbafindo ifyalembelwe mumafunde? Ulukupenda syani? 27Naye nekwasuka ati: Utemwe ŵaSikulu Lesa woŵe nemutima woŵe wonse, nemupasi woŵe wonse, nemakosa oŵe onse, nemilaŋgwe yoŵe yonse, nekutemwa nemuŵyoŵe koti kulitemwa wemwine. 28Kumfwa ŵalaŵila kuli ye ati: Waasuka bwino: ulukucite' fyo, peŋka wakulukwikala nemweo. 29Sombi naye, pakuti pakufwayo'kulilunjika, alilaŵile kuli ŵaYesu ati: Mbaninani umuŵyanji?

30Kumfwa waYesu kaŵaasuka ati: Umbi umuntu alukuya kuJeliko ukufuma kuJelusalemi; lomba alikumene newano, aŵamufulile nekumupuma, peŋka nekukumbuluka, nekumusya koti ufwile. 31Lomba paliŵele ati umbi umupapatilisi ŋgaapite mopele umo; peŋka, pakumuŵona, alipitilile ukumusesya. 32Nakaŵili fyopele'fyo nemwina-Lefai naye, pakufika peŋka'po nekumuŵona, alipitilile ukumusesya. 33Sombi umbi umuSamalya, ili alukwenda, alificile uko ukwali: peŋka, pakumuŵona, aliŵele neŋkumbu, 34nekuya kuli ye, nekumukaka-po napafiweŋga fyakwe, ili aitile-po amafuta nemfaina; nekumwikalika panama yakwe umwine, nekumufisya kunanda yakulala-mo aŵensu, nekulukumulama, 35Ŋgamailo, aliŵulile amakobili aŵili, nekumupela umwine wananda, nekulaŵila ati: Ŋgamumulame bwino; lomba fyonse'fyo ifi mwakuposa nafimbi, neŵo, pakubwela, ŋkamulambuleni.

36Mbaninani pali ŵaŵo ŵotatu, uyu ulukulaŋguluka ati aliŵele muŵyakwe kuli woyo uwakumene newano? 37Naye ati: Uyo uwamucitile iŋkumbu. Kumfwa ŵaYesu kaŵalaŵila kuli ye ati: Koya, ukalukucita fyopele'fyo.

38Lomba, ili ŵalukwenda, ŵa Yesu ŵaliinjile mumusi umbi; peŋka umwanakasi umbi isina lyakwe niMalita, aliŵapokelele muŋanda yakwe. 39Naye ali nemukwaŵo, isina lyakwe niMaliya, uwaikele muceni caŵaSikulu, nekuliumfwa nesiwi lyaŵo. 40Sombi Malita naye alipaŋgatile nekutaŵataŵa ukwinji; nekuya kuli ŵo, nekulaŵila ati: MweŵaSikulu, tamulukundaŋgulucila neŵo ati umukwasu andeka ati ndukutaŵataŵa neŋka? Mumuŵule lomba ati aŋgofwe-ko, 41Sombi ŵaSikulu ŵalimwasucile ati: Malita, Malita, ulukuŵamba mumutima nekulikatasya pafintu ifinji, 42sombi icintu cimo ceŋka ecilukufwaiwa; Maliya asalulula icintu icakwaŵanya iciweme; lombe'co teti cikapokololwe kuli ye.

Currently Selected:

Luku 10: AAL59

Highlight

Copy