Luku 11

1Lomba, ili ŵalukutembela pambi ŵaYesu, pakucileka, umbi umusambile waŵo alilaŵile kuli ŵo ati: MweŵaSikulu, mutusambisye ukutembela, koti nifyopele'fyo Yoane ifi alukusambisya aŵasambile ŵakwe. 2Naŵo nekuwawula ati: Pakutembela mulaŵile ati: MweŵaWisifwe, isina lyenu licindikwe. Uŵufumu bwenu bwise. 3Mulukutupela insiku nansiku ifyakulya fyansiku. 4Mulukutufitulucila ifyakuŵifya fyesu; pakuti nafweŵo fweŵene tulaŵafitulucila aŵantu ŵonse aŵali nemilandu kuli fweŵo. Kaŵili tekututwala kufyakutwesya.

5Peŋka ŵalilaŵile kuli ŵo ati: Pali mweŵo mbaninani uli neciŵusa, nekuya kuli co pakati kaŵusiku, nekulaŵila kuli co ati: Wemwame, iŋgauŋgapwisye ŵasiŋkwa ŵatatu; 6pakuti iciŵusa canji cimbi canyendela, sombi nsikwete-po ifyakuciteŵeta; 7naceco icili mukati nekwasuka ati: Wiŋkatasya; pamulyaŋgo paliiselwe, neŵana ŵanji naŵo ŵali paŵulo naneŵo; nsiisi ukuŵuka ukukupela? 8Ndukumuŵuleni ati naŋgawa ati tacikaŵuka ukumupela pakuti pali ŵuciŵusa bwakwe, naŋgawe'fyo pakuti pacitala cakwe, cikaŵuka nekumupela fyonse'fyo ifi alukufwaya. 9Ndukumuŵuleni mweŵo ati: Mulukulomba, peŋka fikapelwa kuli mweŵo; mulukufwaya-fwaya, peŋka mukaŵona; mulukukoŋkonsya, peŋka pakamwisucileni. 10Pakuti aŵantu ŵonse ulomba, alapoka; neufwaya-fwaya euŵona; nawoyo ukoŋkonsya-po pakamwisucila. 11Nakaŵili pali mweŵo mba ninani, uli nemwana, umwana wakwe alombe siŋkwa, peŋka akamupele'bwe? Neli kulomba isaŵi, naye nekumupela insoka pamupunda wesaŵi? 12Neli kulomba isana, naye nekumupela ŋkalanoŋgo? 13Popele kani mweŵo, mweŵakuŵifya, muliisi ukuŵapela impese isiweme aŵana ŵenu, tanje cine ŵaWisinwe awa Kwiulu eŵakaŵapela Umupasi Uswetelele aŵo aŵalukuŵalomba.

14Peŋka'po ŵalukucifumya iciŵanda icacisinsi. Lomba, ili cafumine-mo iciŵanda, paliŵele ati ico-cisinsi nekulaŵila; popele nemaŵumba aŵantu nao nekukaŋkamana. 15Sombi ŵambi naŵo ŵalilaŵile ati: Kuŵukulu bwakwe Balasebubi, imfumu yafiŵanda, alukufifumya ifiŵanda. 16Naŵambi naŵo, ili ŵalukuŵesya, ŵalifwaile kuli ŵo akesiŵilo akakwiulu. 17Sombi naŵo ŵaliisiŵile ukulaŋguluka kwaŵo, nekulaŵila kuli ŵo ati: Uŵufumu ŵonse, uŵuli nemupaka uwakulukulwa, ŵulaŵa nekonalwa; nakaŵili nenanda, ili nemupaka uwakulukulwa, ilawa. 18Kani Satana naye ali nemupaka uwakulukulwa, mboŵufumu bwakwe ŵukalukwikala syani? Pakuti mulukulaŵila mweŵo ati: Ulukufifumya ifiŵanda kuwukulu bwakwe Balasebubi. 19Kani neŵo ndafifumya ifiŵanda kuŵukulu bwakwe Balasebubi, mbanikuwukulu bwakwe nani aŵana ŵenu ŵafifumya? Pakuti pali fyefyo, ŵo eŵakaŵa ŵakusololola ŵenu. 20Sombi kani neŵo kumunwe waŵaLesa ndafifumya ifiŵanda, peŋka Uŵufumu bwaŵaLesa kale bwaisa pali mweŵo. 21Lomba umuntu ukosele, uli nefyakulifunako ifyakukumana, ili alukulama iŋanda yakwe, amaŵoni akwe ali neŵutende; 22sombi, pakwisa umbi naye, umucilile ye amakosa, nekumukomeka, uyo-ye nekumupokolola ifyakulilama-ko fyonse ifyo ifi alukupema-mo, nekwaŵanya ifyakutapa fyakwe. 23Uyo utaali naneŵo, mupate wanji; nawoyo utaalukuloŋgela naneŵo, eulukupalaŋganya.

24Umupasi uŵipile, ili wafumine mumuntu, ulapita apakuŵula'menda, ili ufwaya-fwaya apakutusisya; peŋka, ili tawabwene-po neli pamo, uleŵa ati: Nakubwelela kunanda yanji iyo iyi nafumine-mo. 25Lomba pakufika, ulaiŵona ipyanjilwe iyansicilwe. 26Peŋka wo nekuya, nekuwuŋganya imipasi imbi isanu naiŵili iŵipile iyakucila napawine; nayeyo nekwinjila-mo, nekulukwikele mopele umo; lomba ukwikala kwamuntu uyo ukwakupela-ko, kulaŵa kuŵipile ukwakucila napali koko ukwakutaŋga.

27Lomba, ili ŵalaŵile'fyo, umwanakasi umbi uwamwiŵumba aliŵilicisye nekulaŵila kuli ye ati: Mulisyucile munda umo umu mwafyelwe, nemaŵele ayo aya mwaoŋkele mweŵo! 28Sombi naŵo ati: Tanje cine ŵalisyucile aŵo aŵomfwa amasiwi aŵaLesa, nekulukwalama.

29Lomba ili alukuwuŋganina amaŵumba kuli ŵo, ŵalitaticile ukulaŵila ati: Icitentekwa ici ciliŵipile; cilafwaya-fwaya akesiŵilo; sombi takakapelwa-po kuli co akesiŵilo, sombi keŋka'ko-kesiwilo kakwe Jona. 30Pakuti koti nifyopele' fyo ifi Jona aŵele kesiŵilo kuŵaNinife, fyopele'fyo neMwana waMuntunsi naye akaŵa kesiŵilo kucitentekwa cino. 31Imfumu yanakasi iyakusaufu ikeminina pampindi yakusololola pamo neŵantu aŵacitentekwa cino, nekuŵasinina; pakuti yalifumine ukupelele icalo capansi mukumfwa amano akwe Solomoni; sombi ŵoneni, umbi umucilile Solomoni epwali pano. 32AŵakuNinefe naŵo ŵakeminina pampindi yakusololola pamo necitentekwa cino, nekucisinina; pakuti ŵo ŵalialulucile pakumfwa ukuŵulisisya kwakwe Jona; sombi ŵoneni, umbi umucilile Jona epwali pano.

33Papo'muntu uwaambusya-po inyale, nekwiŵika umufiseme, neli nipansi pacitundu, sombi pacakuteka-po, ati aŵo aŵakwinjila ŵaŵone ukutuŵa. 34Inyale yamuŵili linso; popele kani ilinso lyoŵe liliweme, nemuŵili woŵe wonse nawo ulukwisula ukutuŵa; sombi kanililiŵipile, nemuŵili woŵe wonse nawo ulukwisula imfinsi, 35Pakuti pali fyefyo kolaŋguluka kani ukutuŵa ukuli muli weŵo nimfinsi lukoso. 36Kani umuŵili woŵe wonse uliswile ukutuwa, uwakuŵula apali imfinsi, ukesula icine ukutuŵa, koti nifyefyo ifi inyale nekutuŵa kwaiyo ukuwaŋgele ikutuŵisya.

37Lomba ili ŵacilaŵila, umbi umuFalisi aliŵetile mukulya nakwe: naŵo ŵaliinjile nekusamina ukulukulya. 38Lomba uyo-muFalisi, ili afibwene'fyo, alikaŋkamene pakuti ŵaYesu taŵatanjile ukusamba ili tawaŋgalya. 39Sombi ŵaSikulu ŵalilaŵile kuli ye ati: Lomba mweŵaFalisi mulaswesya pesonde paŋkomeci napambale; sombi mukati muli mweŵo muliiswile ifyakwiŵa newuŋgwa, 40Mweŵatumpile, kansi aŵo awaleŋgele ifyapesonde, tawalileŋgele-po nefyamukati nafyo? 41Naŋgawe'fyo kamupela ifyalukoso ifyo-fintu ifili mukati; lomba fyonse nekusweta kuli mweŵo.

42Sombi mulisyeme, mweŵaFalisi, pakuti mulafumya-po pekumi ukuposa kuli ŵaLesa iminta napegano nensaŋgu syonse, sombi mulaciluka-po pakusololola neŵutemwe bwaŵaLesa; ifyo icine ukumwelelweni ukuficita; sombi tekwelelwa ukufileke'fi nafyo. 43Mulisyeme, mweŵaFalisi! pakuti mulatemwa imipando iyakucila uŵuleme mumasunagoge, nekusekela konse pamansa syakuulila-po. 44Mulisyeme! pakuti muli koti filende ifyakuŵulo'kuŵoneka; neŵantu naŵo aŵalukwenda-po taŵafiisi-po.

45Lomba umbi uwamilaŋgwe yamumafunde, aliŵaasucile ati: MweŵaSambisi, pakulukulaŵile'fyo, mulukututoŋgala nafweŵo. 46Naŵo ati: Namweŵo mulisyeme, mweŵamafunde! pakuti mulatwika aŵantu ifipinto ifikatesye, sombi mweŵo mweŵene tamukuma-ko kufipinto neli munwe umo. 47Mulisyeme! pakuti muleŵaka ifyapafilende fyaŵakusimika; sombi niŵawisinwe eŵaŵepeye. 48Pakuti pali fyefyo mweŵo emwemboni mulasumina imilimo yaŵawisinwe; pakuti ŵo ŵaliŵepeye, namweŵo mulaŵeŵacila.

49Napakuti pali fyefyo kaŵili amano aŵaLesa alilaŵile ati: Ŋkatuma kuli ŵo aŵakusimika nentanjisi; lomba ŵambi ŵakaŵepaya nekulukuŵakululusya; 50ati imilopa yaŵakusimika ŵonse, iyapokomokele ukufuma kumpindi yakuleŋgwa kwacalo, ikafwailwe kucitentekwa cino; 51ukutatika kumilopa yakwe Ebeli, nekufika kumilopa yakwe Sakaliya, uwafwilile pakati paconto icamilambu nemulenda uswetelele; icine, ndukumuŵuleni ati ikafwailwa kucitentekwa cino. 52Mulisyeme, mweŵamafunde! pakuti mwalipokolwele ulufuŋgulo lwakwisiŵa; mweŵene tamwainjile-mo, naŵaŵo aŵati ŵakenjile-mo mwalukuŵacicila.

53Lomba, ili ŵafumine mulya, aŵalembesi neŵaFalisi ŵalitaticile ukuŵakakatisyo'kwakuti, ati ŋgaŵalaŵile ifintu ifinji; 54ili ŵaŵaŵelamina ukuŵasempa kumasiwi.

Currently Selected:

Luku 11: AAL59

Highlight

Copy