Luku 12

1Impindi iyo yopele, ili awuŋgene amaŵumba aŵantu amasausande aenji, fyopele'fyo ŵalukunyantansyanya, ŵalitaticile ukulaŵila tanje kuwasambile ŵaŵo ati: Kamucenjelela umusuŋga waŵaFalisi, uwakutumpaika. 2Sombi tapali-po icintu icifimbilwe icitacikaŵoneka, neli cifisilwe icitacikesibwa. 3Peŋka fyonse'fyo ifi mwalaŵile mumfinsi, fikomfwanika mukutuwa; nakaŵili nafyefyo ifi mwatepetele pakutwi mufipinda fyamukati, fikatulika pamitenje yamananda. 4Nakaŵili ndukulaŵila kuli mweŵo, mweŵame, ati: Tekuŵatina aŵo aŵepaya umuŵili, sombi taŵesi-po ukucita nafimbi. 5Sombi ndukumucenjesyeni ifya Ŵaŵo aŵa muŋgatina; kamulukuŵatina'ŵo aŵali nemakosa, pakumwipayeni, akumuposeni muGeena; icine, ndukulaŵila kuli mweŵo ati: Mulukuŵatina aŵo! 6Utuseŵa tusanu kansi tatulolwa utukobili tuŵili? lomba neli kamo takalubwa-ko pamenso aŵaLesa. 7Sombi nemisisi yonse iyamumitwi yenu ilipendelwe. Tekutina, mweŵo muli ŵamakweŵo akucila napatuseŵa utwinji.

8Kaŵili ndukumuŵuleni ati: Aŵantu ŵonse ukansumina neŵo pamenso aŵantu, uyo-ye neMwana waMuntunsi naye akamusumina pamenso aŋkalamba syaŵaLesa. 9Sombi ukaŋkana neŵo pamenso aŵantu, uyo eukakanwa pamenso aŋkalamba syaŵaLesa. 10Lomba aŵantu ŵonse ukamwefya Umwana waMuntunsi, fikafitulucilwa kuli ye; sombi kuli woyo ukaucoŵola Umupasi Uswetelele tafikafitulucilwa-po.

11Peŋka ili ŵakamutwaleni kumasunagoge, nakuŵekalicisi, nakuŵakulu, tekulukuŵamba mumitima ifyafyefyo ifi mukaasuka neli kulaŵila: 12pakuti Umupasi Uswetelele ukamusambisyeni impindi iyo yopele ifyafyefyo ifyelelwe mweŵo ukulaŵila.

13Lomba umbi uwapeŵumba alilaŵile kuli ŵo ati: MweŵaSambisi, mumuŵule umukwasu ati aaŵanye uŵupyani naneŵo. 14Sombi naŵo kaŵalaŵila kuli ye ati: Wemuntu, mbaninani uwambicile neŵo wakusololola neli kwaŵanya pali mweŵo? 15Kaŵili ŵalilaŵile kuŵantu ati: Cenjeleni, mulukulikanya fyonse ifyawuŋkumbwamawoni; pakuti umweo wamuntu tauli mukufula kwafintu ifyo ifi akwete.

16Lomba ŵalilaŵile nekupalanya kuli ŵo ati: Umusili wamuntu umbi umusambasi walukumesya ukwakuti; 17peŋka alialakenye mumutima wakwe ati—Ŋkacite'ndo, pakuti nsikwete-po umwakufiloŋgela ifyakulya fyanji? 18Lomba alilaŵile ati: Ŋkacite'fi: ŋkatowolola amatala anji, nekwiŵaka ambi acilile uŵukulu; peŋka emo ŋkaloŋgela ifyakulya fyanji fyonse nemaŵoni anji. 19Popele ŋkalaŵila kumutima wanji ati: Wemutima wanji, uli nemaŵoni aenji aŵicilwe akukumana imyaka iinji; kotusya, ulukulya nekunwa, nekulukusaŋgalala. 20Sombi ŵaLesa ŵalilaŵile kuli ye ati: Weutumpile, uŵusiku ŵuno umutima woŵe wakufwaikwa ukufuma muli weŵo; lomba ifintu ifyo ifi mwaansika fikaŵa fyakwe nani? 21Fyopele'fyo ewoyo uliŵicila' maŵoni, sombi taalukuŵila kuli ŵaLesa.

22Peŋka ŵalilaŵile kuŵasambile ŵaŵo ati: Pakuti pali fyefyo, ndukumweŵeni ati: Tekulukuŵamba mumitima pakuti pamweo, ifyafyefyo ifi mwakulukulya; neli nipakuti pamiŵili yenu ifyafyefyo ifi mwakulukufwala. 23Pakuti umweo ulicilile pafyakulya, nemuŵili nawo pafyakufwala. 24Kamulaŋguluka ifyawacikwaŋgala, ati taŵaŵyala-po, neli kuteŵula-po; ŵopele taŵakwete-mwakuloŋgela neli ŵutala; sombi ŵaLesa ŵalaŵateŵeta! Kansi mweŵo tamulicilile ukwakuti amakweŵo napafyuni! 25Nakaŵili pali mweŵo mbaninani, pakulukuŵamba mumutima, uwisi ukulunda-po pamweo wakwe ikubita? 26Peŋka mweŵo kani tamwisi ukucita icintu ico icicepele lukoso, mbanindo mulukuŵamba mumitima ifyafintu fimbi ifisyeleko? 27Kamulaŋguluka ifyaŵalendya ifyakumena kwaŵo: tawapyuŋga-po, neli kupika; naŋgawe'fyo ndukumuwuleni ati, neli ni Solomoni wonse muŵuleme bwakwe ŵonse, taafwite-po koti liluŵa ilyakuŵe'fyo. 28Sombi kani ŵaLesa ŵalafwike'fi ifyani fyamumpaŋga, ifiikele lelo, ŋgamailo nekuposwa mwisiko; tanje cine ŵakamufwikeni mweŵo, mweŵakucetekela kunini. 29Lomba tekulukufifwaya-fwaya ifyo ifi mukalya, neli nifyefyo ifi mukanwa; kaŵili tekulukuŵamba mumitima. 30Pakuti ifi-fintu fyonse imikoka yaŵantu ŵapansi pano ilafifwaisya: sombi ŵaWisinwe ŵaliisi ati mulukufipeŋgele'fi-fintu. 31Naŋgawe'fyo kamuŵufwaisya Uŵufumu bwaŵo, peŋka nefintu ifi nafyo fikalundwa-po kuli mweŵo. 32Tekulukutina, wetaŋga lini ni; pakuti ukumupeleni mweŵo Uŵufumu ekutemwa kwaŵaWisinwe. 33Kamufiula ifyo ifi muli nafyo, nekufipela lukoso; kamulicitila iŋkomwe syandalama isyakuŵulo'kufwa, uŵuŵoni ubwamwiulu ubwakuŵulo'kusila, apakuŵulo'kupalamina awano neli umo, neli kuŵonala kuŵusumfi. 34Pakuti uko ukuli amaŵoni enu, ekuli nemitima yenu.

35Kumunda syenu iŋguwo ŋgasitukusunswa; nenyale syenu ŋgasilukwaka; 36namweŵo mweŵene ŋgamwikale koti ŵantu aŵalukumupembelela wisikuluŵo, ili akabwela ukufuma kucitenje caŵuufi; ati, pakwisa ye nekukoŋkonsya, ŵakapulilile ukumwiswila-ko. 37Ŵalisyucile aŵapyunjisi aŵo aŵa akasaŋga, pakubwela ye, ŵalukupembelela; icinenene ndukumuŵuleni ati akalisunsa nekuŵekalika mukulukulya, nekwisa nekuŵataŵataŵila. 38Lomba kani akesa pakati kaŵusiku, kani nikucinyamaca, nekuwasaŋga fyopele'fyo, ŵalisyucile ŵo. 39Sombi isiŵeni ifi ati umwine wananda ŋga aliisiŵile impindi iyo iyakwisa silumfundi ŋga alipembelele, nekuŵulo'kusya iŋanda yakwe ukutiŵulwa. 40Ŋgamulukupembelela namweŵo; pakuti pampindi iyo iyi tamukalaŋguluka Umwana waMuntunsi akesa.

41Peŋka Petilo nekweŵa ati: MweŵaSikulu, mulukulaŵila ukupalanya uku kuli fweŵo fweŋka, kani nakuŵantu ŵonse? 42Kumfwa ŵaSikulu ati: Mbaninani kalama uwakucetekelwa uwamano, uyu ŵawisikulu ŵakekalika paŵamuŋanda yaŵo ati akaŵapele ifyakulya fyaŵo pampindi'syelelwe? 43Alisyucile umupyunjisi uyo uyu ŵawisikulu, pakwisa, ŵakasaŋga alukucita fyopele'fyo. 44Icine ndukumuŵuleni ati ŵakamwikalika pafintu fyonse ifi ŵali nafyo. 45Sombi kani umupyunjisi uyo akalaŵila mumutima wakwe ati: Wasikulu ŵanji ŵalukukokola ukwisa; peŋka nekuta tika ukupama aŵapyunjisi aŵalalume neŵanakasi, nekulukulya, nekulukunwa, nekulukupendwa; 46ŵawisikulu umuntu uyo ŵakesa pakasuŵa ako akakuwulo'kulaŋguluka ye, napampindi iyo iyakuŵulo'kwisiŵa ye, nekumupinika pakati, nekumwaŵanisisya pamo naŵaŵo aŵakwaluka.

47Nakaŵili umupyunjisi uyo, uwaisiŵile ukufwaya kwaŵawisikulu, nekuŵulo'kwansika neli kucita koti kufwaya kwaŵo, uyo akapamiwa apenji. 48Sombi uyo naye utaesiŵile, sombi uwacitile ifintu ifyelelwe ukupamwa, uyo akapamiwa apace. Nakaŵili uwapelwe ifinji, kuli woyo ifinji fikafwailwa-ko; nawoyo, uŵasisisye ifinji, kuli ye ŵakacetekela-ko ifyaku cila-po.

49Naliisile mukuposo'mulilo pacalo capansi; peŋka mbefyo mfwaye'ndo pakuti waaka'kale? 50Sombi ndi nekuŵatisya, uku niŋgawatisiwa-ko; kaŵili ndifundeme ukwakuti, ili takuŋgakonsiwa. 51Kani mulukulaŋguluka ati ndiisile mukupela uŵutende mucalo capansi? Ndukumuŵuleni ati: Koku; sombi tanje cine mupaka! 52Pakuti, ukufuma kumpindi yaŵukumo, muŋanda imo aŵantu ŵasanu ŵakalukulekene, ŵatatu ukuŵucila ŵaŵili, ŵambi naŵo ŵaŵili ukuŵucila ŵatatu. 53Ŵakalekana; ŵawisi ŵakamuŵucila umwana waŵo umwalalume, nemwana naye nekuŵaŵucila ŵawisi; ŵanyina naŵo ŵakamuŵucila umwana waŵo umwanakasi, nemwana na ye nekuŵaŵucila ŵanyina: ŵanyinafyala naŵo ŵakamuŵucila umulokasi waŵo, nemulokasi naye nekuŵaŵucila ŵanyina-fyala.

54Nakaŵili ŵalilaŵile kumaŵumba aŵantu ati: Mweŵo, pakuŵona ikumbi lilukutulila kumbonsi, mulapulililo'kulaŵila ati: Akafula kalukwisa! Fyopele' fyo kalesa. 55Nakaŵili, pakulukupupa icipupu icakusaufu, mulalaŵila ati: Pakaŵa neciŵe icakulukuŵaŵula. Fyopele'fyo palaŵa! 56Mweŵakutumpaika, muliisi ukupenda pamenso acalo, napamenso amwiulu; sombi mbanindo tamwisi ukupenda impindi ino? 57Kaŵili mbanindo tamulukulaŋgulucila ifiluŋgeme mweŵene? 58Pakuti ili ulukuya nemupate woŵe kumusololwesi, koesya pansila ukuluŵuka kuli ye; eŋgesa mukukutwala kumusololwesi, naye umusololwesi nekukuposa kucilolo, naco icilolo nekukuposa mwikati. 59Ndukukuŵula ati, Tokafuma-mo mulya neli panini, ili tauŋgafuta nekaŵoni akakupela-ko.

Currently Selected:

Luku 12: AAL59

Highlight

Copy