Luku 13

1Impindi iyo yopele epo ŵali ŵambi aŵaŵaŵulile ifyaŵaGalili, imilopa yaŵaŵo eyo Pilati asaŋkenye pamo nemilambu yaŵo. 2Naŵo ŵaliŵaasucile ati: Kani mulukulaŋguluka ati aŵaGalili aŵo ŵakuŵifya ukwakucila napaŵaGalili ŵonse, pakuti ŵalisomenwe'fyo-fintu? 3Ndukumuŵuleni ati, Koku; sombi kani tesi mukaaluluke, mwense mukonalwa koti nifyopele'fyo! 4Neli fyaŵaŵo ikumi naŵasanu muli ŵasanu naŵatatu, pali ŵo epo yawilile iŋanda itali iyakuSiloami nekuŵepaya, mulukulaŋguluka ati aŵoŵo nimbifi isyakucila napaŵantu ŵonse aŵalukwikala muJelusalemi? 5Ndukumuŵuleni ati, Koku; sombi kani tesi mukaaluluke, mwense mukonalwa koti nifyopele'fyo!

6Peŋka ŵalilaŵile ukupalanya uku ati: Umuntu umbi ali nemukuyu uwalimbilwe mwiŵala lyakwe ilyamifaina; lomba aliisile ili afwaye'fisepo palya, sombi taafibwene-po neli cimo. 7Popele alilaŵile kumulimi wamifaina ati: Wona, ino-myaka itatu ndesa ili mfwaye'fisepo pamukuyu uyu, nekusaŋga takuli neli cimo; uteme; mbanindo kaŵili wonawila umusili? 8Sombi uyo alimwasucile ati: Sikulu, ŋgamuuleke nemwaka uno kaŵili, tanje ndime ponse pali wo, nekuŵika-mo intimba. 9Peŋka kani ukalukwikate'fisepo, ciweme; sombi kani taukekate-po, mukauteme.

10Peŋka'po ŵaYesu ŵalukusambisya mumbi mwisunagoge pakasuŵa kasabata. 11Lomba mwali nemwanakasi, uwali nemupasi uwakulwala-lwala imyaka ikumi naisanu muli isanu naitatu; alioŋgomene, taesiŵile-po ukwinuka neli panini. 12Lomba ŵa Yesu, ili ŵamubwene, ŵalimwitile, nekulaŵila kuli ye ati: Wemwanakasi, wakakululwa kukulwala-lwala koŵe! 13Peŋka ŵalitintilepo iminwe yaŵo pali ye; naye, impindi iyo yopele, alilunjicilwe, nekulukulemya ŵaLesa. 14Lomba icilolo icamwisunagoge caliŵele nekufitwa, pakuti ŵa Yesu ŵaliŵusisye pali sabata, nekulaŵila kumaŵumba aŵantu ati: Pali insiku sisanu nakamo, isyelelwe ukucite'milimo aŵantu; peŋka pali syesyo mukai ukwisa mukuŵusiwa; tekwisa pakasuŵa kasabata! 15Sombi ŵaSikulu ŵalicasucile ati: Mweŵakutumpaika, mweŵo mwense pakasuŵa kasabata tamukakululapo iŋombe neli nimboŋgolo iyamucipata nekwitwala kumenda? 16Sombi uyumwanakasi, umwana wakwe Ablaamu, uyu Satana akacile imyaka ikumi naisanu muli isanu naitatu, kansi tafilielelwe ukumukakulula kucakukake'ci pali sabata? 17Ili ŵalaŵile'fyo, aŵapate ŵaŵo ŵonse ŵaliŵele nensoni; neŵumba lyonse nalyo lyalisembele pakuti pafintu fyonse ifyaŵuleme ifyacitilwe kuli ye.

18Peŋka ŵalilaŵile ati: MboŴufumu bwaŵaLesa ŵulipalene nendo? Syani nakuŵupalanya? 19Ŵuli koti lusaŋgu lwasinapi, lopele umuntu aŵulile, nekuposa mwiŵala lyakwe; peŋka lwalimenene, nekuŵa muti ukulu; nefyuni fyamwiulu fyalukwikala kufinsokela fyalulo. 20Nakaŵili ŵalilaŵile ati: Mbafindo ifi nakupalanya neŴufumu bwaŵaLesa? 21Wuli koti musuŋga, wopele umwanakasi aŵulile, nekufisa mufyakwesya fitatu ifyaŵuŋga, ili tafiŋgafimba fyonse.

22Lomba ŵaliile ili ŵapitana pamisi napali tumisi, nekulukusambisya ili ŵenda ukulukuya kuJelusalemi. 23Peŋka umbialilaŵilekuli ŵo ati: MweŵaSikulu, kani ŵace lukoso eŵakapuluka? Naŵo nekuŵeŵa ati: 24Kamwesyo'kwakuti ukwinjila pamulyaŋgo uce; pakuti ndukumuŵuleni ati aŵenji ŵakafwayo'kwinjila-mo, sombi taŵakesiŵa-po. 25Ili ŵaima'kale aŵene wananda, nekwisalako kumulyaŋgo, namweŵo nekutatiko' kwimakana posonde, nekulukukoŋkonsya paciŵi, nekulaŵila ati: MweŵaSikulu, twiswileni-ko! naŵo nekumwasukeni ati: Nsimwisini-po uku mwafumine! 26Peŋka mukatatiko'kulaŵila ati: Twalukulya nekulukunwa pamenso enu, namweŵo mwalukusambisya mumiseŵo yesu! 27Sombi naŵo ŵakalaŵila ati: Nsimwisini-po uku mwafumine; fumeni-po pali neŵo, mweŵo mwense mweŵakucite'fiŵipile! 28Pakaŵa nemisowa apo, nekulukusumanya ameno, ili mukaŵona Ablaamu, nalsaci naYakobi neŵakusimika ŵonse muŴufumu bwaŵaLesa, sombi namweŵo mweŵene muliposelwe poso nde. 29Kaŵili ŵakesa aŵakufuma kumutulesuŵa nakumbonsi nakunofu nakusaufu, nekulukwikele muŴufumu bwaŵaLesa. 30Lomba umfweni, pali neŵapelele-ko aŵakaŵa ŵakutaŋga, newakutaŋga aŵakaŵa ŵakupe la-ko.

31iyo-mpindi yopele ŵaliisile neŵaFalisi ŵambi, nekulaŵila kuli ŵo ati: Fuma-po, koya kumbi: pakuti Elode alukufwayo'kukwipaya! 32NaWo nekuŵaasuka ati: Kamuyeni, mukalaŵile kuli mumbwe uyo, ati: Ŵona, ndukufifumye'fiŵanda nekuŵaŵusya aŵantu lelo namailo, lomba masosi ŋkakonsiwa! 33Naŋgawe'fyo ukwelelwa neŵo ukuyo' lwendo lwanji lelo namailo namasosi; pakuti tekwelelwa uwakusimika ukufwila kumbi ukutakuli nikuJelusalemi. 34Welelusalemi, wejelusalemi, wewipaya aŵakusimika, nekuŵaposa'mabwe aŵo aŵatuminwe kuli weŵo! Liŵili liŵili nalukufwavo'kuwuŋganya aŵana ŵoŵe, koti nifyopele'fyo nenseke ifi iŵuŋganya utwana twaiyo mumapindo; lomba mwalikene! 35Ŵoneni, iŋanda yenu ilisyele kuli mweŵo koti yamumasala; sombi ndukumuŵuleni ati, tamukambona liŵili, ili tamuŋgalawila ati—Alicindeme uyo ulukwisa mwisina lyaŵaSikulu!

Currently Selected:

Luku 13: AAL59

Highlight

Copy