Luku 14
14
1Kambi akasuŵa kasabata, ili ŵainjile muŋanda yacilolo cimbi icaŵaFalisi mukulukulya, ŵalukuŵaceta. 2Lomba epwali pamenso aŵo umuntu umbi uwalukutenda ififimbwafimbwa. 3Peŋka ŵaYesu ŵalilaŵile kuŵamafunde neŵaFalisi ati: Kani ukwelelwa ukuŵusya pakasuwa kasabata, kani tekwelelwa? 4Sombi naŵo ŵaliikele celele. Peŋka ŵalimwikete, nekumuŵusya, nekumutuma; 5nekuŵeŵa ati: Apa pali mweŵo mbaninani ukalukuli nemboŋgolo kani niŋombe iyakuponena-mo mumukalo, utaakapulilila ukuyaŵula pakasuŵa kasabata? 6Naŵo taŵaisiŵileukwasuka pali fyefyo-fintu.
7Peŋka ŵalilaŵile ukupalanya kuli ŵaŵo aŵetilwe, ili ŵabwene ifi ŵasalulwile imipunda iyakucilo'ŵuleme, ati: 8Pakwitwa weŵo kumuntu umbi ukwisa kucitenje caŵuufi, tekwikala pamupunda uwakucilo'ŵuleme; eŋgesa-kwitwa kuli ye umbi umuntu uwaŵuleme uŵucilile napali weŵo, 9nawoyo uwamwitileni mweŵilo nekwisa nekulaŵila kuli weŵo ati: Umupele uyu umupunda! lomba naweŵo nekuupoka nensoni umupunda ucepele. 10Sombi pakwitwa, uye, wikale pamupunda ucepele; ati uyo uwakwitile, pakwisa, alaŵile kuli weŵo ati: Wemwame, telela kuntanjile! Peŋka ukaŵa neŵuleme pamenso aŵantu ŵonse aŵo ulukulya naŵo. 11Pakuti aŵantu ŵonse, ulicindika, akapufiwa; neulipufya naye akacindikwa.
12Peŋka ŵalilaŵile nakuli woyo uwaŵetile ati: Pakwansika ifyacitenje icakasuŵa neli camulalilo, tekufiita ifiŵusa fyoŵe, neli ŵakwanu, neli ŵena ŵoŵe, neli ŵaŵyoŵe aŵaŵile koku; ŵeŋgesa mukukwita naweŵo, fyopele'fyo nekukubwesesya. 13Sombi pakwansika ifyacitenje, uŵete awapeŋgele nefilema neŵalukusunta nempofu; 14eli ukasyuka: pakuti ŵo taŵakwete ifyakukubwesesya; pakuti weŵo ukalambulwa pampindi yakuŵuka pamfwa awaluŋgeme.
15Popele umbi uwasamine naŵo ukulukulya, ili aumfwile'fyo, alilaŵile kuli ŵo ati: Alisyucile uyo ukalya muŵufumu bwaŵaLesa. 16Peŋka ŵalilaŵile kuli ye ati: Umbi umuntu aliansicile ifyamulalilo ifinji, nekuŵeta aŵenji; 17peŋka alitumine umupyunjisi wakwe pampindi yakulya mukuŵaŵula aŵo aŵaitilwe ati: Iseni, pakuti ifintu filiteyanisiwe limo. 18Lomba ŵonse aŵo ŵali nemutima umo, nekutatika ukufutulula amasiwi. Uwatanjile alilaŵile kuli ye ati: Naliulile iŵala, peŋka ukwelelwa neŵo ukuya mukuliŵona: napapata ati mundaŵilile-ko. 19Naumbi naye ati: Naliulile iŋombe ikumi, peŋka ndukuya mukusyesya: napapata ati mundaŵilile-ko. 20Naumbi naye ati: Naliupile umwanakasi, popele tesi'nje neŵo!
21Peŋka naye umupyunjisi uyo alificile nekuŵaŵula ŵawisikulu ifyafyefyo. Peŋka'po, umwine wananda alikalipile, nekulaŵila kumupyunjisi wakwe ati: Koya bwaŋgu mumiseŵo nensila isyamumusi, uŵenjisye muno awapeŋgele nefilema nempofu neŵakusunta! 22Lomba uyo-mupyunjisi alilaŵile ati: Sikulu, ifyo ifi mwalaŵila fyacitwa; sombi naŋgawe'fyo epo icili imipunda. 23Lomba ŵawisikulu ŵalilaŵile kumupyunjisi ati: Koya mumiseŵo iyakutali namufinsokela, uŵapanjile ati ŵenjile, ati iŋanda yanji iisule. 24Pakuti ndukukuŵula ati: Aŵantu aŵo ŵonse aŵetilwe taŵakafiumfwa-po neli umo ifyamulalilo wanji.
25Eli aile naŵo amaŵumba aŵantu aŵenji; naŵo ŵalialucile, nekulaŵila kuli ŵo ati: 26Aŵantu ŵonse ulukwisa kuli neŵo, utaafitilwa-po ŵawisi naŵanyina, nemukasi wakwe, neŵana ŵakwe, neŵakwaŵo, neŋkasi syakwe, icine nemweo wakwe umwine, uyo tesi akaŵe musambile wanji. 27Aŵantu ŵonse utaapinta-po umutaliko wakwe umwine ukulukundonda, tesi akaŵe-po musambile wanji. 28Pakuti, pali mweŵo mbaninani, pakufwayo'kwiŵaka iŋanda itali, utaataŋgo'kwikala ukulukupenda ifyamakweŵo ati kani ifi ndi nafyo fyakukumana ukwikonsya? 29eŋgesa-kwiŵaka ica pansi ceŋka nekufilwa ukwisilisya; naŵaŵo aŵalukutamba nekutatika ukumuseka, 30ati: Uyu-muntu alitaticile ukwiŵaka, sombi taesiŵile ukwikonsya!
31Neli mbaisa-mfumu, pakuya mukulwa nemfumu imbi iŋkondo, itaitango' kwikala nekwalakanya ati, kani ndiisi neŵantu amasausande ikumi ukwicila iyo ilukwisa kuli neŵo neŵantu amasausande amakumi aŵili? 32Kani tesi iicile-po, ili icili ukutali iyo imbi, yakutuma iŋkalamba nekwipusya umulandu waŵutende. 33Peŋka pakuti pali fyefyo, pali mweŵo mwense utaaleka-po ifintu fyakwe fyonse, tesi akaŵe musambile wanji. 34Umucele lomba uliweme, sombi kani umucele waleka ukukuma kwauo, mbanikundo ukakumisiwa? 35Toelelwe iŵala neli mupili waŵufumba; ŵalauposa lukoso. Uyo uli nematwi akumfwa ŋgaomfwe.
Currently Selected:
Luku 14: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
