Aposel 1
1
1 # Lu 1:3 Alupinai Tiofilus, buk anama fowa' ae' anda'anai#Luk nanda' basef amama ma amam aposel manda' maol Godi. Ea' nanda' anona buk fowa' nali' nanda'anai nafe'ma Tiofilus, buk anama basef bu'wami Luk nanda'ami.
anda' basefa amamaga hiami Jisas nanda'ami nawalipa esis amam nematawa 2#Mk 16:19; Lu 24:49-51ma dambadamba nali' nanda'am ea' nafi'i natagama nemaf anama God nofa'ana nalata gani heven ilif. Fowa' Jisas owa' ata' nolata heven ilif, Anan nali' nase'ama basef amama na'ipam mehipa maol amam aposel amama Anan nandandepami. Anan nase'ama maol amama pepel anama Ambal Bu'unai Godi. 3#Lu 24:36-49; Ap 10:41Fowa' saha Jisas nefa' nimanimi lu'wami naga' ea' notanima nohafel wapoti' nafe' natagama alupumi ananimi. Ea' nape aon si'inai tu'waninai nanda' pepel hianai ma nihi'ambam mogawa endilisi anan nofa' ambal namunai nape. Nimeguf amama Anan nawalipasa epes hiesi siowis wambota Godi numafias. 4#Lu 24:49; Jo 14:16-17; Ap 2:33Anan ata' nape nalomam na'ipam mehip na'i, “Ipe' dei' ina pekwaha Jerusalem ulal, owa'. Pepe pehafa amamaga amama Ahalome na'i endilisi niesi'ipami. Amama fowa' ae' a'ipipami.
5 # Mt 3:11 Fowa' Jon napisi' amam nematawa hiesi embel. Ea' ipe' nambimb God nonda' baptaisimipa Ambal Bu'unai Ananinai.”
6 # Lu 24:21 Nemaf anama amam alupumi Jisasi mandatama etifigin mahali'ana ma'i, “Dembinai, a'i nambimb nogota anae' ine' nenda' ape' mofa' agof lu'wami ma motofa esis naumbih ma afa' atofa umafi wambel hiagoma afa'ima?”
7 # Mk 13:32 Ea' anan na'ipam na'i, “Amama ina amamaga ipe'imi ma pegawa nogota anama ma nimeguf Ahalome nandandepami, owa'. Anan atona numafi amama. 8#Mt 28:19; Lu 24:48; Ap 2:32; 3:15; Ap 5:32Ea' basef ipe'imi amama. Nambimb Ambal Bu'unai Godi nifi'mai ipe', nemaf anama pefa' pepel Ananinai, pewalapa basef Ae'ami Jerusalem ea' ganima etap hiagoma Judia ea' ganima etap hiagoma Samaria, ea' pefe' anama etap wambel hiagoma hi'ilagon.”
Jisas nalata heven
(Mk 16:19-20; Lu 24:50-53)
9 # Jo 6:62 Jisas na'i basef amama hi'alam, esis ata' saitu satiligini etin, sati Anan nandegia nakwaha etap nalata ilif. Ea' anom elagw mofa'ana mafe' ea' ina satolona wapoti', owa'. 10#Lu 24:4Anan nafe' ea', esis ata' saitu satologon etin ilif otaga, ea' dei' atef anom amam biam mola klos afitimi mondokwama mataga malomas maitu. 11#Mt 26:64; Lu 21:27Ea' ma'ipas ma'i, “Ipe' amam nematawa Galilipei, ipe' ina pitu piti otaga ilif, owa'. Jisas anama dei' God nofa'ana nakwahipa ea' nofa'ana nalata heven ilif. Anona nemaf notanima nifi'i petolona na'ama etin si'i dei' paitu patolona nalata heven ilif.”
Esis sandandepa anona aman noho'ofa Judas
12 # Lu 24:50-53 Ea' esis sakwaha halaf anama lawah oliv motawama, sotanima safe' Jerusalem. Halaf anama ina laogona Jerusalem, owa', felefele'. Kilomita atotona si'i esis Juda safe' safi'i nemaf anama sabat sapoma noma'wanai. 13#Mt 10:2-4Esis sotanima safi'i Jerusalem, safe' sawis ipat ea' safe' sape ipat ilif esis sapeinai. Agof amamumi amama. Pita naloma Jems naloma Jon a Andru a Filip naloma Tomas naloma Bartolomyu Matyu ea' Jems, Alfius nogalomana, Judas, Jems nogalomana ea' Saimon anan wambota Seloti.#Basef amama wabota esis Seloti, niti futnot Matyu 10:4.
14 # Jo 6:42; 7:5 Amam alupumi Jisasi mandatama etifigin nimeguf hiami la'ela'ef ama manda' beten maloma anowa nematawa saloma akwa'w Maria Jisas mama'wana saloma owapana Jisasi wapoti'. Esis hiesi sape sanda' beten etifigin.
15Anom nimeguf mafe'ma ea', esis Kristen 120-peleis hiesi sandatama etifigin sape ea' Pita nohafel naitu na'i, 16“Sahin owan ae'ipei, anom basef mail buk Baibel fowa' gani Ambal Bu'unai Godi na'ipa dembinai king Devit ma'iam na'ama ma'i aman anama Judas anona nemaf nonda' waf aonai ma nihi'amba Jisas naumbih Ananimi. Eaf ina naso', owa'. Nagal. Basef amama mataga alihim. God atona na'i, dei' basef amama mataga mandawalap. Fowa' Judas ina dei' nanda' waf aonai nawalapa Jisasa amam, ata' owa', nogota anama 17Jisas nandandepana anan alupunai afa'inai nanda' maol anama Jisasi naloma afa'.”
18“Moni Judas nofa'ana waf anama aonai ananinai natala anona etap. Anan nafe' etap anama nowa opaf pe'ana kolo'alanai hi'alana afuna. 19Ea' epes hiesi sape Jerusalem sogawa amama. Ea' diga asasinai sofala anama agiliguma sa'i Akeldama. Ape' ma'i etap anama esimbel kolo'alami ma'oma.”
20Dei' main, Pita na'i basef amama mape Buk Song ma'i,
“ ‘Ipat ananinai anan nope wafina. Ina anona aman napaina, owa'.’
Ea' anom basef mape Buk Songi ma'i wapoti' ma'i,
‘Anona aman anona nemaf noho'ofana nofa' maol ananinai.’
21-22Ea' dei' ape' mondandepa anona aman ape'inai noho'ofana ma mowalipasa basef amama Jisas notanima nohafel wapoti'. Ape' mondandepa anona ma amam amama mape maloma ape' ma nemaf anama Dembinai Jisas nape nalomapa. Nemaf anama Jon nawalipasa basef Godi napisi' amam nematawa embel nafi'i nafi'i nataga ma nemaf anama God nofa' Jisas nalata heven ilif nakwahepa.”
23Pita na'iam na'ama, ea' esis Kristen sandandepa amam biam. Anona Josep, agel wa'ana Barsabas, ea' agel wa'ana wapoti' sa'i Jastus. Ea' anona Matias. 24Ea' esis sanda' beten na'ama sa'i, “Dembinai, ine' negawa ukup epes hiesi. Ine' nendandepa amam amama biam nihi'ambapa maina aman 25nofa' maol aposel noho'ofa aman anama Judas. Anan nakwaha maol anama nafe' wambel aonai ma God nogwamana waf aonai ananinai.”
26Ea' esis sanda' agof amam biam mail otamba biam. Ea' sala otamba amama mala anona malep si'i tin sakoto'mam sati otam nali' nataga agel Matias. Ea' sanda' anan nanda' maol naloma amam aposel 11-peleima monda' maol Godi.
Currently Selected:
Aposel 1: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
