Luk 12

Umbamehepama waf baso'mainai ma pie'i basefa malogof biam

(Mt 10:26-27)

1Nemaf anama do'ok enis amam nematawa hiesi endilisi safi'i sonduwa'anima endilisi sandafofo'asanama etin bo'wagah asasimi. Ea' Jisas nali' na'ipa alupumi ananimi na'i, “Ipe' pindumafuma andeande'ma yis amama amam Farisi. Basef ofagema ma yis amama ma'i waf baso'mainai ma'i malogof biam. 2Amamaga mape mandambahi'i, anona nemaf motaga alihim. Amamaga mandambaho' mape, anona nemaf hiesi sotolom alihim. 3Ea' basef hiami ipe' panda'am owambi anona nemaf sotolom alip. Ea' basef ipe' pa'iam so'uso'umbili ifagw nomoni, nambimb sotoma ifagw ilif sowalapam alihim.

Ipe' umbamohepama Dembinai atona

(Mt 10:28-31)

4Ipe' alupipei ae'ipei, ae' a'ipipa na'ama. Ipe' owa' umbamohepama esis soha alop atona neaga'i ea' anona nemaf esis ina la'ifisa sonda' anom amamaga wapoti', owa'. 5Ea' ae' ata' i'ipipa aman ipe' umbamiehipamanai. Anama nohepa peaga'i, ea' anona nemaf wapoti' la'ifinai ma neakwahipa pefe' wambel aonai hel. Ae' a'ipipa, ipe' umbamiehipamanai, aman anama atona.

6Ipe' pegawa, epes satala amiguf sa'umi wanom biam otamba 2 toea. Ea' God ina okom mase'ana anona amil sa'unai na'amainai, owa'. 7Endilisi, Anan neambam auf malo balagah ipe'imi God neambam dondo' hi'alam. Ipe' owa' umbamehepa. Anan okom napoma ipe' pikila' amiguf hiami amama sa'umi.

Waf mowalapa agel Jisasi

(Mt 10:32-33; 12:32; 10:19-20)

8Ae' a'ipipa, ae' ataga epen endilisiwei. Emi egafis sewalapa agel Ae'anai ma amam nematawa hiesi, anona nemaf ae' ewalapa agof epes isima ma naep amam ensel Godi. 9Ea' emi egafis sowa' alafugaha Ae'i naep amam nematawai, anona nemaf ae' ewa' alafuga esis ma naep amam ensel Godi. 10Emi egafis seanda' anom basef awami findiwama ae' ataga epen endilisiwei, nambimb God nokwahomasa awami esis sanda'ami. Ea' emi egafis sanda' basef findiwama Ambal Bu'unai Godi, anona nemaf God owa'etin endilisi ma neakwaha findiwa anama aonai ma epes isima. 11Nambimb esis sofa' ipe' pefe' piowis ifagw amama esis Juda sa'i basef sapeimi o sofa'epa pefe'ma naep amam dembemi gavman moloma agufumi monda'mepa kot, ipe' ina umbamohepa, owa'. Ipe' ina pi'i, ‘Nambimb ape' mi'i basef mi'imama? Nambimb mi'i maim basef?’ Owa'. 12Dei' main, nogota anama atona Ambal Bu'unai Godi nihi'ambepa maim basef atuwasi peagwami.”

Basef womun etina anona aman otamba hiamunai okom nahaga nagaoli

13Anona aman atotona ma amam nematawa hiesi anan na'ipa Jisas na'ama na'i, “Dembinai, ae' a'i ine' ni'ipa sahalome ae'anai nowaloga amamaga amama ahalomafai nese'e amamaga wa'am.”

14Ea' Jisas na'ipana na'i, “Ae' andaiwa'! Emi nandandepa ae' ma epe eawaloga amamaga ma ipe'? Owa'etin.”

15Ea' anan na'ipas na'i, “Ipe' pindumafuma andeande'ma ipe' ina kowalepama anom amamaga. Epen amamaga hiamini endilisi, ina nefa' ambal namunai ma amamaga amama ananimi, owa'.”

16Ea' nase'asa anom basef womun etin na'i, “Aof anona aman otamba hiamunai nola gwa'aimi hiami. 17Aman anama okom napoma anan atona na'i, ‘Dei' ae' ata' enda'am i'imama? Ae' ifagw a'e ma etama gwa'aimi ae'ami hiami imbe'am mea'ome.’

18Ea' na'i, ‘Ae' enda'am na'ama. Etala ifagw ae'ami ea' ila' dambaimi lu'wami mikila' fowa'imi. Ama nambimb ikolasom ewa'aniam gwa'aimi wit hiami moloma amamaga hiami bu'wami ae'ami mo'oh ifagw amama. 19Ea' i'ipa ae' i'i, “Ine' nape andeande'. Amamaga hiami bu'wami mape mondahama afagof hiami. Ea' dei' nepoma noma'w nea' gwa'aimi embel nendanifel nepe.” ’

20Ea' God na'ipana na'i, ‘Ine' aman nahaga nagouli! Dei' owamb anae' igi ambal ine'inai nega'. Ea' amamaga amama hiami ine' nanda'am nandondombam ma'ihi, amama nambimb emi nefa'am?’

21Amama na'ama etin si'i epes satama amamaga hiami asasimi atom sambe'am ma'oh. Esis amamaga a'asa naep Godi.”

Ukup matamea ma hiahaom

(Mt 6:25-34)

22Ea' Jisas na'ipa alupumi ananimi na'i, “Ae' a'ipipa, ipe' ina ukup motamea mefe' ma ambagof ipe'imi ea' pi'i, ‘Ape' ata' mea' main?’ Owa'. Ipe' ina ukup motamea ma alop ipe'inai pi'i, 'Nambimb ape' monda' main mombahe' alop ape'inai?’ Owa'. 23Dei' main, ambagof afa'imi ina gwa'aimi atom. Ea' alop ina luwaguf atom, owa'. 24Ipe' ukup mopoma amiguf. Amiguf owa' mowa gwa'aimi, mola' gwa'aimi. Ea' owa' mefa' gwa'aimi membe'am ifagw amamumi. God atona nase'am gwa'aimi. Ea' ipe' epes pikila' amiguf amama endilisi. 25Ipe' emi atuwasi la'ifina okom natanea nawis niwatania anona nemaf wapoti' ma ambal ananai nope nogota laona wapoti'? Owa'etin. 26I'i ipe' owa' la'ifipama penda' anom amamaga sa'usa'umi na'ama, dei' maina ipe' ukup ipe'imi motamea ma anom amamaga mamumami wapoti'?

27Ipe' ata' ukup mopoma afis. Amam ina manda' maol ina manda' luwaguf maim, owa'etin. Ea' ae' a'ipipa, fowa' gani anona aman amamaga hiamunai Solomon nanda' sosaf hianai ma luwaguf ananimi, sosaf ananinai ina bo'ona si'i afis amama, owa'etin. 28Otalef amama dei' ata' motawa aof ama naman atef sotopa'am sokwahom mefe' nif. Otalef amama awami God nofalo'mam. Ea' ipe' amam nematawa pikila' otalef amama. Ea' dei' ipe' pembale'efa basef Godi, bale'ef ipe'inai ina la'ifina, ipe' pegawa endilisi anan numafipa andeande' wapoti'. 29Ea' ipe' ina ukup motamea pi'i, ‘Nambimb mea' gwa'aimi embel eti?’ Owa'. Ipe' ina ukup aom motamea ma amamaga amama, owa'. 30Epes sololama Godi ukup matamea mafe' endilisi ma sogolopa amamaga amama hiami. Ea' ahalomepa ipe'inai nape heveni anan nogawa ea' amamaga amama a'ipei. 31Ipe' ata' ukup mili' pegolopa waf bu'unai noloma piwis wambota Godi numafipa pili', ea' nese'epa amamaga amama ipe' wapoti'.

Pekolasa amamaga bu'wami atom gani heven ilif

(Mt 6:19-21)

32Ipe' epes si'i sipsip kwaie'umi ina umbamohepa, owa'. Ahalomepa ipe'inai okom bo'ona ma ipe' piowis wambota ananinai numafipa. 33Ipe' pese'asa amamaga hiami ipe'imi ma enis epes sotalomepam, ea' pefa' otamba pewalogam pese' isima kwahusi pigiambamas. Ipe' penda' maol pegolopa paos otambaimi anona nemaf owa' motaga aom. Ipe' pekolasa otamba wiga maim amamaga bu'wami atom heven ilif nemaf owa' hegilialami. Anama sakowalefi ina suwis sokowalopam, owa'. Sopafowa maim owa' meatotopa'am hiahaom, owa'. 34Dei' main, maina wambel amamaga bu'wami ipe'imi ma'oma, wambel anama atona anona nemaf ukup ipe'imi wapoti' meapoma.

Amam manda' maoli mundumafuma mope

35Ipe' penda' luwaguf ipe'imi bandam, pewaho' legw, ea' pekata lamifah pendondombol pindumafuma pepe. 36Ipe' pepe si'i epes sape sahafa aman dembinai asasinai na'i nokwaha gwa'aimi lu'wami sandase'amai notanima nifi'i. I'i nifi'i noha uta ipat ananinai, esis suwisi'manana mehip. 37Andeande'ma amam manda' maoli mundumafuma mope miti dembinai amamunai nifi'i notoloma mondanifel. Ae' a'ipipa endilisi, nambimb dembinai nili' nowaho' lowaf bandana nowaho' let, ama nonda'mam gwa'aimi. Ea' ni'ipam motoma tebol ea' anan nifi'i nease'am gwa'aimi. 38Anan nifi'i amaneta la'afina o noloma awatagw muli' meanda'am, o maina nogota, ma nieti amam mundumafuma mope, amam mondanifel.

39Ipe' ukup mopoma anom basef womun etin. I'i ofagenama ipati nili' nogawa nogota nanda' wali neafi'ianai ma nundumafuma nope, nanda' wali ina nambimb nifi'i nupusila ipat ananinai nuwis nomon, owa'etin. 40Ipe' wapoti' pundumafuma pepen. Dei' main? Ae' ataga epen endilisiwei, ifi'i anona nemaf ipe' ina pegawa pi'i ifi'i ulal nemaf anama, owa'.”

Basef womun etina amam manda' maoli anom bu'wami maloma anom awami

(Mt 24:45-51)

41Ea' Pita na'i, “Dembinai, basef amama womun etini ine' nase'afam afa' atofa, o esis amam nematawa hiesi wapoti'?”

42Ea' Dembinai na'i, “Emi egafis gawaisi sape sanda' maol andeande' panda' waf bu'unai? Epes isima dembinai asasinai nambimb nondandepas ma sumafi ananimi manda' maoli ma sease'ama gwa'aimi amam nogota dembinai na'ianai. 43Anona nemaf dembinai asasinai notanima nifi'i ma nieti esis isima sanda' maol andeande', esis isima sendanifel. 44Ae' a'ipipa endilisi, dembinai ananinai anona nemaf nondandepasa sope dambesi sumafi amamaga ananimi hiami. 45Ea' i'i epes isima ukup mapoma opalef asasimi atom ea' si'i, 'Dembinai ape'inai ina nambimb nifi'i ulal, owa'etin.’ Ama esis sohafel soha enis amam nematawa sanda' maoli, sa' gwa'aimi embel da gwa' sonda' spak sape. 46Esis i'i sonda'am na'ama, dembinai asasinai nambimb notanima nifi'i anona nemaf esis isima ina nambimb si'i dembinai nifi'i ulal, ata' owa'. Dembinai nifi'i nogota anama esis ukup mease'asanama. Nifi'i nohambombaga esis isima endilisi, ea' nonda'asa sope soloma epes owa' seambale'efa Godi seapoma.

47Emi egafis sanda' maola anani, esis segawa ea' ma okom dembinai asasinai, ea' esis owa' seandondomba amamaga siela nomonas dembinai, anona nemaf dembinai nohas mehip endilisi. 48Ea' emi egafis sanda' maoli owa' seagawa okom dembinai asasinai ma seanda' waf nendahama esis sefa' nimanimi, nambimb dembinai nohas sa'ombel. Ea' emi egafis enis sease'asa amamaga hiami, anona nemaf epes isima si'ipas sogwamasam amamaga wapoti'. Ea' emi egafis enis sease'asa amamaga hiami sase'as sumafiami, anona nemaf epes isima si'ipas sogwamasam wapoti' mikila' fowa' sali' sase'asami.

Maol Jisasi nawaloga esis amam nematawa sataga biefis

(Mt 10:34-36)

49Ae' afi'i ma ekata nif etap anae' ea' a'i nif amama dei' fendom lu'um. Owa', ata' owa'. 50Ea' ae' okom na'i efa' anom baptais. Dei' ae' owa' ata' efa'am, okom ae'anai aona endilisi ma ehafa efa' baptais amama. 51Ipe' pa'i ae' afi'i ma indiwa wandaf hianai netaga etap anae' ma hiesi sope opalef awanem? Owa'. Ae' a'ipipa, ae' afi'i ma ewala epes esis amam nematawa hiesi. 52Ama dei', anona nemaf wapoti' epes wanis bias sope ipat atotona wambota atotona sondawaloga biefis. Wenis soloma bias sifitap ea' bias soloma wenis sifitap ea' na'ama etin. 53Nambimb esis sondawaloga, anona aman noloma ahalomana ananinai mondawaloga biefim, ea' ano'w nemata'w koloma mama'wakw ondawaloga biefiwa, ea' mefi'makw ako'ukwi koloma ma'makw kwandagi'mokwi ondowaloga biefiwa.”

Waf ape' mogawa nogota anama amamaga amama meataganai

(Mt 16:2-3; Mk 8:11-13)

54Ea' Jisas na'ipa esis amam nematawa wapoti' na'i, “Ipe' pati otaga natefi gani aon newalama, mehip ipe' pa'i, ‘Atuwasi asaf a' nelai’ ea' asaf a' nalai. 55Ea' ipe' pati uf la'ifinai naluwi aon natopa'ima wa'ol nataga, ipe' pa'i, ‘Atuwasi owaf a' nuluwi la'ifina.’ Endilisi, naluwi la'ifina na'ama etin. 56Ipe' epes pa'i malogof biamipei! Ipe' pati ikwaf hianai ilifanai etapanai andeande', ea' dei' ipe' owa' peagawa ikwaf nogota anae' andeande'.”

Enis epes ukup mi'i sonda' kotima ape'

(Mt 5:25-26)

57“Dei' maina ipe' owa' powaloga waf bu'unai? 58Nemaf anama ipe' pefe' peloma epen inima na'i nenda' kotimipei, ipe' ata' pefe' eaf, nogota anama pese'ana okom pewalapa amama pi'iam peloman. Na'ama epen inima nenda'epa penda' basefa amama ma jas nonda'epa pefe'ma polisman ea' monda'epa penda' kalabus. 59Ae' a'ipipa, ipe' ina nambimb pekwaha ipat anama sanda' kalabusanai ulal, owa'. Ama peagwa amamaga lu'wami sa'umi ma wiaf ipe'inai hi'ilana, pefe'.”

Currently Selected:

Luk 12: aojF

Highlight

Copy