Matyu 23

Jisas na'ipa epes hiesi ma waf aonai amam dambami mogawa mi'uli Godi maloma amam Farisi manda'anai

(Mk 12:38-39; Lu 11:43,46, 20:45-46)

1Ea' Jisas nase'asa basef esis amam nematawa hiesi saloma amam alupumi 12-peleim ananimi. 2Na'iam na'ama na'i, “Amom mawalipasa mi'uli Godi maloma amama Farisi amam maho'ofa Mosesa mawalipasa mi'uli Godi la'ifim. 3Andeande'ma pila basef hiami amam ma'ipipami, ea' ipe' ina penda' waf amam manda'anai, owa' hapainai. Dei' main, amam ma'ipasa basef hiami, ea' amam atom ina mailam, owa'. 4Amam mowatania basef amamumi mawalipasama sielam si'i basef wafimi anom awolef wafimi lu'wami mawamonam matoma ikeguf asasimi, ea' amam ina magiambamas mofa'am ma lagof amamumi, owa'. 5#Mt 6:1; Eks 13:9; Diu 6:8; Nam 15:38-39Amamaga hiami manda'ami manda'am etina epes sotolom sinifelom. Amam mala egip#23:5 Basef ofagema ma egip lu'unai ma amam manda' beten mape na'ama. Amam maila waf esis Judai fowa'inai ea' manda' bokis sa'usa'umi ma anona pepa basef Baibeli mailanai. Amam manda'am na'ama ma epes hiesi sotolom sinifelom. lu'unai nail lagof balagah amamumi ma manda' beten ea' manda' sosaf launai nape sagwegw amamumi da'malifima. 6#Mt 6:5; Lu 14:7Amam ukup ma'i siaifah amama motawa mali'i atom dambami atom mapoma, ma nemaf anama sanda' gwa'aimi lu'wami o anama ifagw esis Juda sa'i basef sapeimi. 7Amam ma'i hiesi sotoloma sondalalimam sosa'ma agof amamumi anama sandatama sapoma ma ma'i sofalam si'ipam si'i, ‘Dambami tisa’.

8Ea' enis epes ina sofala ipe' si'i ipe' dembipei, owa'. Dei' main, ipe' tisa dembinai ipe'inai atotona ea' ipe' hipei pape si'i sahin owan wambota atotona. 9Ipe' ina pefala enin epen nape etap anae' pi'i Ahalomepa ipe'inai, owa'. Dei' main, aman anama atotona anan Ahalomepa ipe'inai, nape ilif heveni. 10Ea' esis ina sofalepa si'i dembipei tisa, owa'. Dei' main, Dembinai tisa ipe'inai Krais atotona, God nandandepana nasapa'ana nafi'i. 11#Mt 20:26; Mk 9:35; Lu 22:26Ea' emi egafis nambimb sotaga dembesi ipe'isi, dei' ata' sili' sope sonda' maol sope owina ipe'. 12#Jop 22:29; Pro 29:23; Esi 21:26; Lu 14:11, 18:14Ea' na'ama etin, emi egafis sefela agof asasimi atom, epes isima anona nemaf agof a'as. Ea' emi egafis sonda' agof asasimi mefe' owin, anona nemaf esis sefa' agof lu'wami.”

Jisas na'i basef maila amam Farisi maloma amam mawalipasa mi'uli Godi ma waf aonai amam manda'anai

(Mk 12:40; Lu 11:39-42,44,52, 20:47)

13“Ipe' amam dembipei pawalipasa mi'uli Godi paloma Farisi, ae' ati uwahipipa ma nimanimi lu'wami anona nemaf meatagamipei. Ipe' amam malogof biamipei! Ipe' pewalo uta ma naep esis amam nematawa ma ina nambimb siowis kingdom heveni, owa'. Dei' main, ipe' ina pafe' pawis nomon, ea' esis amam nematawa sa'i sefe' siwis nomon, isima ipe' pasopamas eafa sefe' siowis. [ 14Ipe' amam dembipei pawalipasa mi'uli Godi paloma Farisi, ae' ati uwahipipa ma nimanimi lu'wami anona nemaf meatagamipei. Ipe' malogof biamipei. Ipe' pawis ifagw amama nematawa alifiwai, pawis pakawalopom amamaga awoumi. Panda'am na'ama panda' beten launai etina esis sitilipa si'i ipe' bu'wipei. Anona nemaf God newaloga epes hiesi, enis epes owa' seanda' waf aonai na'amainai sofa' nimanimi kwawie'um, ea' ipe' pefa' nimanimi lu'wami endilisi.]

15Ipe' amam pawalipasa mi'uli Godi paloma Farisi, ae' ati uwahipipa ma nimanimi lu'wami anona nemaf meatagamipei. Ipe' malogof biamipei! Ipe' pafe' hi'agoma naoh etap wambel hiagoma, pifa'ai anona epena notaga alupunai ipe'inai nila basef ipe'imi. Anan ea' nataga alupunai ipe'inai, ea' ipe' panda' anan aona endilisi nikila' ipe' na'ama. Ipe' aopei ma peafe' wambel aonai hel nif fandumi mapoma. Ea' ipe' panda' epen anama nikila' ipe' nenda' waf aonai endilisi nandahama nefe' wambel aonai hel.

16Ae' ati uwahipipa ma nimanimi lu'wami anona nemaf meatagamipei. Ipe' naep masi'ipei pa'i pihi'ambasa eaf enis epes. Ipe' pawalipas na'ama pa'i, ‘I'i emi egafis si'i agola ipat anama lu'unai Godi sanda' lotuwanai ma si'i sonda' basef asasimi motaga la'ifim, amama falafumi. Ea' emi egafis si'i agola gol amama bu'wami sofalo'ma ipat anama ma si'i senda' basef asasimi motaga la'ifim, senda'am sila basef si'i sa'i.’

17Ipe' pahaga pagaoli ukup mololaepai ea' naep masi'ipei! Main de'im mape lu'um mikila'? Gol amama sofalo'ma ipat anama amam lu'um o ipat anama bu'unai nanda' gol amama mataga bo'oma naep Godi? Ea' dei' ipat anama atona nikila' gol. 18Ea' ipe' pawalipas wapoti' pa'i, ‘I'i emi egafis si'i balata sofa' mafis saso' Godanai ma si'i sonda' basef asasimi motaga la'ifim, amama falafumi. Ea' emi egafis si'i ofa mafis satoma balata ilifa senda' basef asasimi motaga la'ifim, esis silam si'i sa'iam.’

19Ipe' naep masi'ipei! Maim amamaga mape lu'um? Ofa mafis mape lu'um o balata nanda' ofa anama nataga bo'ona ma naep Godi, dei' nataga lu'una? Ea' dei' balata nikila' ofa. 20Na'ama dei' emi egafis si'i agel balata anama ma si'i sonda' basef asasimi motaga la'ifim, isima senda' basef amama la'ifima amamaga matoma balata ilif maloma balata wapoti'. 21Ea' emi egafis si'i agel ipat lu'unai Godi ma si'i sonda' basef asasimi motaga la'ifim, isima sanda' basef asasimi la'ifima ipat anama naloma Anan nape ipat anama. 22Ea' emi egafis si'i heven ilifa sonda' basef asasimi motaga la'ifim, isima sa'i sonda' basef asasimi la'ifima balata bu'unai Godi naloma Aman anama natoma balata anama.

23Ipe' amam pawalipasa mi'uli Godi paloma Farisi, ae' ati uwahipipa ma nimanimi lu'wami anona nemaf meatagamipei. Ipe' amam malogof biamipei! Ipe' pawaloga nambawa maloma lombo maloma akwal mamumami hiami pase'ana tu'wanim God. Panda'am na'ama ma akwal amama hiami agofuma amama min, dil, kumin. Ea' ipe' pindihi'ama basef amama hiami ma mi'uli God na'iami ma waf bu'unai ma pigiambama epes, piti esis uwahipis, penda' amamaga andeande' ma waf endilisinai. Waf anama hianai neloma waf pindilali pese'ana amamaga maim Godanai, anama pekolasana pihapilana etin pilana. 24Ipe' naep masi'ipei, pa'i pihi'ambasa eaf enis epes! Ipe' panda' maola patofa afi'awa amama sa'umi mail maloh nembawa, ea' mafin anama lu'unai kamel ea' pewalo'ana nalomam.

25Ipe' amam dembipei pawalipasa mi'uli Godi paloma Farisi, ae' ati uwahipipa ma nimanimi lu'wami anona nemaf meatagamipei. Ipe' amam malogof biamipei! Ipe' pandombasa kap plet ande'ama atom bo'om. Ea' nomon owa'. Ipe' opalef si'ipama waf sanda' walanai naloma waf anama alop atonai aonai. 26Ipe' Farisi, naep masi'ipei! Ipe' ata' pili' pendombasa kap malep nomonam muli' ma nambimb ande'ema wapoti' meataga bo'om.

27Ipe' amam pawalipasa mi'uli Godi paloma Farisi, ae' ati uwahipipa ma nimanimi lu'wami anona nemaf meatagamipei. Ipe' epes malogof biamipei! Ipe' pandahama si'i ifagw sa'umi sawa epes saga'i hi'agilif sanda' pen afitinai saofam. Ea' ande'ama bo'om ma satolom, ea' nomonama si'ima amamaga awami folo'alami mala maloma bihiguf balagah epes saga'i alialimi. 28Ipe' pape na'ama etin. Esis epes sati alop ipe'inai ande' sa'i ipe' panda' waf bu'unai. Ea' nomon waf aonai baso'omunai ma malogof biagufi patopa' basef anai ma mi'uli Godi amama mape si'ima ipe'.

Jisas na'ipa amam amama mawalipasa mi'uli Godi maloma amam Farisi anona nemaf amam mofa' nimanimi awami

(Lu 11:47-51)

29Ipe' amam pawalipasa mi'uli Godi paloma Farisi, ae' ati uwahipipa ma nimanimi lu'wami anona nemaf meatagamipei. Ipe' amam pa'i malogof biamipei. Ipe' panda' hi'agilif amam profet maga'i ea' pefalo'ma ifagw epes isima bu'wasi saga'i sapeimi. 30Ea' ipe' pa'i, ‘I'i afa' fowa' gani ope si'i akusafa afa'isi, afa' ina wiegiambama esis oha amam profet afum, owa'.’ 31Ama basef amama atom ipe' pawalapami ofagema ipe'imi atom, pa'i ipe' akusas pagi' patagai saha profet maga'i. 32Ea' ipe' piwatani waf anama aonai esis akusipa sanda'anai hi'ilana!

33Ipe' si'i iguf awami pataga iguf awami mahasi! Anona nemaf God nonda'masa basef lu'wami ea' ni'ipipa pefe' pepe wambel aonai hel. Dei' penda'am pi'imama ma nambimb pefe'ma basef amama? Owa'etin. 34Na'ama Ae' asapa'o anom profet molomago anom amam ukup bu'wami mapeimi molomago anom gawaimi ma Baibeli amam mofo'o motagamepa. Anona nemaf ipe' peham moga', ea' anom ipe' piunda lawah usi'imi tu'wanaimi, anom pepe pela'am nomon ifagw pa'i basef papeimi. Ea' ipe' penda'am petofam anona wambel taun lu'unama ea' petofam mofa' mefe' anona taun ea' petofam pegolopam etin pefe'. Ipe' anona nemaf penda' waf aonai anama. 35Ea' dei' epes isima sape bu'wasi hiesi ma enis sahas saga', ofagema amama hiami anona nemaf mopoma ipe'. Nali'i Abel anan aman bu'unai nafi'i nafi'i natagama aman akutainai profet Sakaraia, Berekia nogalomana, anama akusipa sahana afuna la'afena ipat lu'unai Godi naloma balata saofa mafis saso' Godanai. Amama ofagema anona nemaf mila ipe' etipa. 36Ae' a'ipipa endilisi ipe'. Amamaga nimanimi awami ofagema anona nemaf mopoma ipe' epes hipei amam nematawa dei' papani.

Jisas nalopa wambel Jerusalem

(Lu 13:34-35)

37O ipe' Jerusalem, Jerusalem, ipe' paha amam profet afumi, pakwaha otamba paha amam God nasapa'am mafi'mai ipe' maga'. La'ela'ef ae' a'i ekolasa ipe' epes hipei si'i awata numa'inai nowa'ani nogami nakolasam mawis mail behenagof ananimi. Owa'etin, ipe' pandaiwa'. 38Ipe' peme'! Dei' wambel ipe'inai anona nemaf aona wafina nope. 39Ae' a'ipipa, ipe' nambimb ina petolowe wapoti' ma nambimb pi'i, ‘Ape' ma'i God nofalo'ma aman anama nafi'i agel Dembinai ma nonda'ana nondanifel.’ ”

Currently Selected:

Matyu 23: aojF

Highlight

Copy