Yeremi-aq 18
18
Tso-au Saí Su É Yhûm Mâ É Hkyô
1Yeremi-aq chyáng haû Yhûmsîng Garaî chyáng mâ é mungdang jé é gi, 2“Toq mù, tso-au saí su é yhûm má gyó ê àq; haú má, Ngò, nang lé Ngá é dang shit kyo râ nghut lhê.” gâ ri. 3Haû mù, ngò gi, tso-au saí su é yhûm má gyó e é nghut lhê; haú hkûn, yhang gi, au saí zòng lhing nyi é lé ngò ê myang ri. 4Nghut kôlhang, tsohtung lé yhang saî nyi é tso-au gi, yhâng é lòq má htên byùq é nghut mù, tso-au saí sû gi, yhang je gè bê ga myìt é dông haú lé gótû tso-au dum saí bê nghut ri.
5Haú hkûn, haû Yhûmsîng Garaî é mungdang ngá chyáng jé é gi, 6“Isira-elaq a-myû up ê, Ngò gi, tso-au saí sû shí yùq su, núngmòq lé a wó kut é nghut lhê lhú?” gâ ri; haû gi, Yhûmsîng Garai taî pyo ri. “Isira-elaq a-myû up ê, tsohtung gi, tso-au saí su é lòq má nghut nyi é su, núngmòq le Ngá é lòq má nghut nyi ri. 7Byù myû ra-myû nghut nghut, mîngdán ralhum nghut nghut lé, nùt pyám râ, hpyoq hpyi pyám râ eq lhoqhtên pyám râ nghû, Ngò hkâ-nhám taî pyo é nghut le, 8byù myû haû, yhûmsing é agè ashop hkyô mai myìt lhîng wó é nghut jáng, Ngò gi, myìt htaî pyám mù, yhángmòq ahtoq má jé nhâng râ nghû hen tô é byò dàn byò sho hkyô lé, yhángmòq chyáng a jé nhâng lo râ nghut lhê. 9Gótû byù myû lé nghut nghut, mîngdán lé nghut nghut xuq to mù, hô tô râ matú, ngò radàm dum taî pyo é nghut jáng, 10Ngá é myòq hí má yhángmòq agè ashop hkyô kut mù, Ngá é jì-no a gyo kô é nghut le gi, Ngò, yhángmòq lé kut byi râ nghu é jeju kut byi râ a nghut.
11Haû mù, ahkuî, Yudaq byu pé eq Yerusalem wà mó má nyi é bang lé, ‘Haû Yhûmsîng Garai taî le, “Wú keq! Ngò gi, núngmòq é matú byò dàn byò sho hkyô hen to byi mù, núngmòq lé mara dam byi râ matú htung to bê nghut lhê. Haû mù, yùq hkangmó gi, yhûmsing é agè ashop hkyô pé mai lhing tau mù, yhûmsing é hkyô pé eq yhûmsîng kut é hkyô pé lé htaî lhik pyám lo keq.” gâ ri.’ nghû taí aq. 12Nghut kôlhang, yhángmòq gi, ‘Haû hai a-kyû a bò. Ngá-mòq gi, yhûmsîng htung tô é múzó pé lé xoq kut râ nghut mù, ngá-mòq é agè ashop é myìt htân hkyô má za cháng râ nghut lhê.’ ga tû taí kôrâ nghut lhê.” gâ ri.
13Haû mù, haû Yhûmsîng Garai shî su ga taî é gi,
“Gótû byù myû wuì lé myî gôn wú keq;
shî sû é hkyô lé ó yùq wó gyô wú ri lhú?
Isira-elaq nghut é zo-myi gyíng gi,
chaq gyùq hpo mó kut bê nghut ri.
14Lebanon bùm mâ é gyo gi,
lùqgòk bùm pé mai a byùq byùq râ nghut lhê, a nghut lhú?
We we mai yui é gú é wuì haû gi,
kân byùq râ nghut lhê lhú?
15Nghut kôlhang, Ngá é byu pé gi, Ngo lé tô-myhî pyám bekô nghut ri;
yhángmòq gi, a-kyû a bo é hparà hpôlhô pé lé namngón jung nyhê nhông byi kômù,
góhkûn mai sô é yhángmòq é hkyô pé má htûng lèqbàt kôluî,
a htông tô é hkyô pé shut sô nghoq wang lé bum akô nghut ri.
16Yhángmòq é maumyî gi, chamchyuîyuì gyùq chiq jowò dùt byùq mù,
ayang rhoî dang taí jang dùt byùq râ nghut lhê;
haú mai laî ló é bang bànshoq gi,
wú maú ngha byùq kômù,
ulhîng he bùm kôrâ nghut lhê.
17Ngò gi, buìhtoq hkyam mâ é laì lé su,
yhángmòq é gye pê hí má yhángmòq lé hkat pyo pyám râ nghut lhê;
Ngò gi, yhángmòq byò dàn byò sho huî é buìnyì má,
yhángmòq lé myòqdong a tûn shit é za, Ngá é nùnghkûng shèq tûn shit râ nghut lhê.” gâ ri.
18Haú hkûn, yhángmòq gi, “Lé keq; Yeremi-aq lé htuqhtíng râ hpàqchyî htoq sháng; hkyangjông pé mai târâ mhoq byî é hkyô le, hpàqchyî bò bang mai hpàqchyî byî é hkyô le, myìqhtoî pê é myìqhtoi dang le, nô byùq râ a nghut; haû mù, ngá-nhûng é nhutshô mai yhang lé htuqhtíng sháng; yhang taî é dang haî lé le a gyo byi kut sháng.” ga taî akô nghut ri.
19Yhûmsîng Garai ê, ngá é dang lé gyo byi laq;
ngo lé mara hûn bâng é dang lé gyô wú aq!
20Gè hkyo é matú, agè ashop hkyô wó tau byi râ lhú?
Nghut kôlhang, yhángmòq gi, ngá é matú dong dû to bekô nghut ri.
Yhángmòq chyáng mai Náng é nhikmó-yo hkyô lhing ló byùq râ matú,
ngò, Náng é hí má yàp mù, yhángmòq é gùnglik dông dáng nyo é lé myìtbun byi laq.
21Haû mù, yhángmòq é zodù wuì mùtmó gyó é hui zo kó sháng gàq;
yhángmòq yhang sham èq shî kó sháng gàq;
yhángmòq é yhûmsîng myhî pé gi, baùdung dung mù, chuimó myhî pé dùt byùq kó sháng gàq;
yhángmòq é yùqgè wuì sat pyâm é hui zo mù,
yhángmòq é zorâm wuì majan má sham èq sat pyâm é hui zo kó sháng gàq.
22Yhángmòq lé htim râ byu pé, byò dàn htik Nàng nhang kat é hkûn,
yhángmòq é yhûm pé mai wùt ngau myhîng é htê htoq sháng gàq;
hkâsu mù gâ le, yhángmòq gi, ngo lé châng hkat chyup râ matú dong dû to kômù,
ngò e ló é hkyô má lhaí htung to bekô nghut ri.
23Nghut kôlhang, Yhûmsîng Garai ê,
ngo lé sat râ matú yhángmòq haq htung é hkyô bànshoq lé Nàng sê lhê.
Yhángmòq kut shut é mara lé hkâ tô-myhî pyám byi;
yhángmòq é yubàk mara lé Náng é myòq hí mai hkâbùt sut pyám byi ô.
Yhángmòq gi, Náng é hí mai tu mhuq pyâm é hui zo kó sháng gàq;
Nàng nhikjum yô é hkûn, yhángmòq lé jéyáng aq.
Currently Selected:
Yeremi-aq 18: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.