Yeremi-aq 34
34
Zedeki-a Lé Sidìq Byî É Hkyô
1Babelon hkóhkâm Nebuhkatneza, yhâng é gyèzô pé bànshoq, yhang ùp é mîngdán bànshoq eq a-myû wuì bànshoq èq, Yerusalem wà mó lé le, hau é awui ayàm mâ é wà pé bànshoq lé le, majan lé zân nyì kô é hkûn, Yeremi-aq chyáng haû Yhûmsîng Garaî chyáng mâ é mungdang jé é gi, 2“Isira-elaq é Garai Gasang, haû Yhûmsîng Garai shî su ga taî ri; Yudaq hkóhkâm Zedeki-a chyáng ê mù, yhang lé, ‘Haû Yhûmsîng Garai taî le, “Ngò gi, wà shî lé, Babelon hkóhkam é lòq má àp byî pyám râ nghut mù, yhang gi, wà shî lé nyhê hkyô pyám râ nghut lhê. 3Nàng gi, yhâng é lòq mai wó hpang lùt râ a nghut; gè gè yhang, nang lé chyup yù mù, yhâng é lòq má àp byî pyám kôrâ nghut lhê. Nàng gi, náng é myòq èq yhang, Babelon hkóhkâm lé myàng râ nghut mù, yhang eq myòqdong hkyúm dang nyô râ nghut lhê. Haû mù, nàng gi, Babelon wà mó shut ló râ nghut lhê.” gâ ri.
4Nghut kôlhang, Yudaq hkóhkâm Zedeki-a ê, haû Yhûmsîng Garai mai nang lé danghtum htûm tô é lé gyo aq; nàng eq séng luî haû Yhûmsîng Garai shî su ga taî ri; nàng gi, sham èq shî râ a nghut; 5nàng gi, nguì ngón é eq shi ló byùq râ nghut lhê. Náng é hí má up laî lo é îchyí îwa hkóhkam pê é matú, mingbyû wuì mai yhángmòq lé hkúnggâ é dông namngón shôm nyhê nhông byi kô é su, náng lé le hkúngga kô é dông nyhê nhông byi kôluî, “Goì ê, yhûmsîng ê!” ga iyon yôn ngaù kôrâ nghut lhê. Dang shî lé Ngò yhang taî é nghut lhê ga haû Yhûmsîng Garai taî pyo ri.’ nghû taí aq.” gâ ri.
6Haû mù, myìqhtoi Yeremi-aq gi, Yerusalem wà mó má nyi é Yudaq hkóhkâm Zedeki-a lé haú pé bànshoq taî kyô ri. 7Haú u gi, Yerusalem wà mó lé le, Yudaq mau mâ é gótû gingtíng wà mó za nghut é Lahkisha eq Azeka wà lé le, Babelon hkóhkam é gyè hpûng èq majan zân nyi é ahkyíng nghut ri. Yudaq mau má myìt gyó tô é gingtîng é wà gi, haû í wâ za nghut ri.
Jun Pê É Matú Lùt Hkyô
8-9Mingbyû wuì yùq hkangmó gi, yhûmsing é jùn myhí jùn hpó lé lùt hkyô byi mù, htângnùng má Hebre gu-mang yhangchang a jùn zô lhum lo râ nghut lhê ga, jun pê é matú lùthkyô lé taî pyô râ matú, Yerusalem wà mó má nyi é byù bànshoq bang eq Yudaq hkóhkâm Zedeki-a dangshikaq chôm tô tô é htâng má, Yeremi-aq chyáng haû Yhûmsîng Garaî é mungdang jé ri. 10Haû mù, yhûmsing é jùn myhí jùn hpô pé lé nhang pyám mù, a dum jùn zo lo râ nghut lhê ga dangshikaq haú lé myìt hui yín yu é, zaugun wuì eq mingbyû wuì bànshoq gi, yhángmòq lé lùthkyô byi bekô nghut ri. 11Nghut kôlhang, yhángmòq gi, a myáng má myìt dum lhîng kômù, yhángmòq lhut kat bê nghut é jùn pé lé dum shuî taû yù kôluî, jùn dum kut yû bekô nghut ri.
12Haû mù, Yeremi-aq chyáng haû Yhûmsîng Garaî é mungdang jé é gi, 13“Isira-elaq é Garai Gasang, haû Yhûmsîng Garai shî su ga taî ri; Ngò gi, núngmòq é îchyí îwâ pé lé, yhángmòq jùn dùt é Egutuq ming mai shuî htoq lo é hkûn, yhángmòq eq dangshikaq tô to bê nghut lhê. Ngò gi, 14‘Nyhit zân jé hkangmó, núngmòq yùq hkangmó gi, núngmòq lé, yhûmsing gùng lé ung byî tô é Hebre gu-mang wuì lé lhut pyám ra kôrâ nghut lhê. Núngmòq lé hkyuq zân dójaú é htâng má yhángmòq lé lùthkyô byî pyám ra kôrâ nghut lhê.’ nghû yhángmòq lé taî é nghut lhê. Nghut kôlhang, núngmòq é îchyí îwâ pé gi, Ngá é dang lé a gyo kut kô é eq nohpyo xaû pyâm akô nghut ri. 15Núngmòq kúm gi, ahkuî myìt lhîng kômù, Ngá é myòq hí má jo têng é hkyô kut bekô nghut ri. Núngmòq yùq hkangmó gi, yhûmsing é byu pé lé lùthkyô byi râ matú taí bekô nghut ri; núngmòq gi, Ngá é myìng wun é yhúmhkaû Ngá é hí má Ngò eq dangshikaq lháng to bekô nghut ri. 16Nghut kôlhang, ahkuî, núngmòq gi, myìt dum lhîng kômù, Ngá é myìng lé agòt a-û kut pyám kô é eq yhángmòq kâm é shut e ló râ matú núngmòq nhang kat bê nghut é, jùn myhí jùn hpô pé lé dum shuî taû yù kôluî, núngmòq é jùn pé dum zìk kut yû bekô nghut ri.
17Haû mù, haû Yhûmsîng Garai shî su ga taî ri; núngmòq gi, Ngá é jì-no a gyo kó; núngmòq gi, yhûmsing é byu pé lé lùthkyô byi râ matú a taí kó nghut ri. Haû mù, Ngò gi, shâm, wúm mó gyó é eq mùtmó gyó é èq núngmòq shî byùq râ nghut é ‘Lùthkyô’ lé, núngmòq é matú taî pyô râ nghut lhê; haû gi, Yhûmsîng Garai taî pyo ri. Ngò gi, núngmòq é yánmai, myìdàm htoq mâ é mîngdán bànshoq lé gyùq nghâ nhâng râ nghut lhê. 18-19Yudaq byu pé eq Yerusalem wà mó mâ é ushuq pé, zaugun wuî, hkyangjông pé, no zo lé í hkyam hkoq mù hau é gyoro mai sô laî é mingbyû bànshoq gi, Ngá é hí má yhángmòq tô tô é dangshikaq mâ é hkyô pé lé a cháng kô é za, Ngá é dangshikaq lé lhoqhpyoq pyám bekô nghut mù, Ngò gi, yhángmòq mai no zo lé í hkyam hkoq mù, hau é gyoro mai sô lai kô é su, yhángmòq lé kut pyám râ nghut lhê. 20Ngò gi, yhángmòq lé sat pyám nau é yhángmòq é gye pê é lòq má, yhángmòq lé àp byî pyám râ nghut lhê. Yhángmòq é màng pé gi, nghoqzô pé eq yòsô zè pê é zoshuq dùt byùq râ nghut lhê.
21Ngò gi, Yudaq hkóhkâm Zedeki-a eq yhâng é zaugun wuì lé, yhángmòq lé sat pyám nau é yhángmòq é gye pê é lòq má le, núngmòq chyáng mai razùp zo byam zùt taû ló é, Babelon hkóhkam é gyèzô pê é lòq má le, àp byî pyám râ nghut lhê. 22Ngò gi, yhángmòq lé hkunmó hkyó mù, wà shî má yhángmòq lé shuî taû lò râ nghut mù, yhángmòq gi, wà shî lé htim luî, wó zân ung yù mù, wà shî lé nyhê hkyô pyám kôrâ nghut lhê. Ngò gi, Yudaq mâ é wà pé lé, ó le a wó nyî loshoq chamchyuîyuì kut pyám râ nghut lhê; haû gi, Yhûmsîng Garai taî pyo ri.” gâ ri.
Currently Selected:
Yeremi-aq 34: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.