Yeremi-aq 36
36
Yeremi-aq É Laiká Ding Lé Yehoi-akim Nyhê Hkyô Pyâm É Hkyô
1Yosi-a é yhang zo Yehoi-akim Yudaq hkóhkâm kut é myí zan zàn má, Yeremi-aq chyáng haû Yhûmsîng Garaî chyáng mâ é mungdang jé é gi, 2“Laiká ding yù mù, Yosi-a ùp é hkûn, Ngò, nang lé dáng nyo é mai ahkuî jé shoq, Isira-elaq a-myû, Yudaq a-myû eq gótû a-myû wuì bànshoq eq séng luî, Ngò, nang lé taî é dang bànshoq kâ to aq. 3Yudaq byu pé gi, Ngò, yhángmòq chyáng jé nhâng râ nghu é wuîhke jamjau hpuzô é hkyô hkat hkangmó lé wó gyo kôjáng, yhángmòq é agè ashop hkyô pé mai lhing taû lò kó âbe; haú hkûn, Ngò gi, yhángmòq é agè ashop hkyô pé eq yhángmòq é yubàk mara pé lé, mara hkyut pyám byi râ nghut lhê.” gâ ri.
4Haû mù, Yeremi-aq gi, Neri-a é yhang zo Baruk lé ji yu é nghut mù, Baruk gi, Yeremi-aq lé haû Yhûmsîng Garai taî é dang bànshoq lé, Yeremi-aq taî kyô é má cháng luî, laiká ding má kâ to bê nghut ri. 5Hau htâng, Yeremi-aq gi, Baruk lé, “Ngò gi, hkûm zing tô é hui bê; ngò gi, haû Yhûmsîng Garaî é noqkuq yhûm má ê râ ahkáng a wó nghut ri. 6Haû mù, nàng gi, zoshuq tûm é buìnyì má haû Yhûmsîng Garaî é yhûm má ê mù, ngò taî kyô é eq rajung za nàng kâ tô é haû Yhûmsîng Garaî é dang pé lé, laiká ding mai shiwa byu pé lé nghap kyo aq. Yhángmòq é wà pé mai lé lo é Yudaq byu pé bànshoq lé, haú pé nghap kyo aq. 7Yhángmòq yùq hkangmó gi, haû Yhûmsîng Garaî é hí má dûng tôngbán mù, yhûmsing é agè ashop hkyô mai lhing taû lò kó âbe; hkâsu mù gâ le, byù shí bang lé haû Yhûmsîng Garaî èq taî htuqhtîng é nhikjum yo hkyô eq nhikmó-yo hkyô gi, gyai yhang htan é nghut ri.” ga taî kyô ri.
8Neri-a é yhang zo Baruk gi, yhang lé myìqhtoi Yeremi-aq taî é dang bànshoq lé châng kut ri; yhang gi, haû Yhûmsîng Garaî é noqkuq yhûm má, Yhûmsîng Garaî é dang pé lé laiká ding mai nghap kyô ri. 9Yudaq hkóhkâm Yosi-a é yhang zo Yehoi-akim ùp é ngó zan èq gau hkyap hkyap má, Yerusalem wà mó mâ é byù bànshoq eq Yudaq wà pé mai Yerusalem wà mó má lé jé é bang lé, haû Yhûmsîng Garaî é hí má zoshuq túm râ ahkyíng taî kyô akô nghut ri. 10Baruk gi, noqkuq yhûm mâ é Hkum Sik gâ é hkum nâm mâ é ahtoq wânghkaû má nyi é, kâ xûm hpó Shahpan é yhang zo Gemari-a é wàp mai, haû Yhûmsîng Garaî é noqkuq yhûm má nyi tô é shiwa byù bànshoq lé, laiká ding mâ é Yeremi-aq é dang pé lé nghap kyô ri.
11Shahpan é yhang shu, Gemari-a é yhang zo Mihkai-a gi, laiká ding mâ é, haû Yhûmsîng Garaî é dang bànshoq lé wó gyo jáng, 12zaugun wuì bànshoq nghut é, kâ xûm hpó Elishama, Shemai-a é yhang zo Delai-a, Akbora é yhang zo Elinahtan, Shahpan é yhang zo Gemari-a, Hanani-a é yhang zo Zedeki-a eq gótû zaugun wuì zung tô é, hkóhkâm wâng mâ é kâ xum é wàp má gyó e ri. 13Laiká ding mai shiwa byu pé lé Baruk nghap kyô é jung hkangmó lé, Mihkai-a wó gyô yu é eq rajung za, yhángmòq lé taî kyô é htâng, 14zaugun wuì bànshoq bang gi, “Nàng, shiwa byu pé lé nghap kyo bê nghut é laiká ding lé yu chûng mù, lé lô àq.” ga Baruk lé ê taí nhâng râ matú, Hkushi é yhâng shuké, Shelemi-a é yhâng gashu, Nehtani-a é yhang zo Yehudi lé nhang kat akô. Haû mù, Baruk gi, laiká ding lé yu chûng mù, yhángmòq chyáng ê bê nghut ri. 15Haú hkûn, yhángmòq gi, yhang lé, “Zùng aq; ngá-mòq lé haû nghap kyo aq.” ga taî akô nghut ri.
Haû mù, Baruk gi, yhángmòq lé haû nghap kyo bê nghut ri. 16Yhángmòq gi, dang haú pé bànshoq lé wó gyo kôjáng, gyùq é myìt mai rayùq eq rayùq tu wú lhum kômù, Baruk lé, “Ngá-mòq gi, hkóhkâm lé dang shí pé bànshoq taî kyo ra râ nghut lhê.” ga taî akô. 17Hau htâng, yhángmòq gi, “Ngá-mòq lé taî kyô wú aq; dang shí pé bànshoq lé nàng hkâsu kut wó kâ htoq tô é lhú? Nang lé, Yeremi-aq taî kyô é a nghut lhí?” ga Baruk lé myî akô nghut ri.
18Haû jáng, Baruk gi, “Nghut lhê; yhang mai ngo lé dang shí pé bànshoq taî kyo luî, ngò gi, kâ jung chî èq laiká ding má tsing kâ tô é nghut lhê.” ga tû taî ri.
19Haû jáng, zaugun wuì gi, Baruk lé, “Ló mù, nàng le, Yeremi-aq le ê haq nyi byùq lo keq; ó yùq lé le, núngnhik nyi é jowò hkâsé nhâng kó.” ga taî akô nghut ri.
20Yhángmòq gi, laiká ding haú lé, kâ xûm hpó Elishama é wàp má kat to kô é htâng, wânghkaû má nyi tô é hkóhkam chyâng ê kômù, yhang lé lhúnglháng ê taî kyo bekô nghut ri. 21Haû mù, hkóhkâm hpó gi, laiká ding haû ê yû râ matú Yehudi lé nhang kat jáng, Yehudi gi, kâ xûm hpó Elishama é wàp mai laiká haú lé ê yu lò mù, hkóhkâm hpó eq yhâng é nàm má yàp tô bum é zaugun wuì bànshoq lé nghap kyô ri. 22Haú u gi, lha-mó gau hkyap hkyap nghut mù, hkóhkâm hpó gi, gyòq nám má lúng é yhûm má zung tô é nghut luî, yhâng é hí mâ é myi au má myi gyúng tô ri. 23Laiká ding mâ é sum myi yán lé Yehudi nghap hkangmó, hkóhkâm hpó gi, laiká ká bâng é shâmhtô èq haú lé yâm cheq yû mù, myi au má dú nyhê pyám pyám kut luî, laiká ding haû bànshoq nyé gyó pyám bê nghut ri. 24Hkóhkâm hpó eq dang haú pé bànshoq lé wó gyô é yhâng é duìnhâng zoshâng wui gi, ó yùq le a gyùq kó; yhûmsing é mèbu lé le a lâng cheq kó nghut ri. 25Elinahtan, Delai-a eq Gemari-a pé gi, laiká ding haú lé a nyhê pyám râ matú hkóhkâm hpó lé hpyê shi-kùt wú kôlhang, yhang gi, yhángmòq é dang lé a gyo byi nghut ri. 26Hau htoq agó, hkóhkâm hpó gi, laiká ká sû Baruk eq myìqhtoi Yeremi-aq lé chyup yû râ matú, yhang zo Yeramela, Aziri-ela é yhang zo Serai-a eq Apdela é yhang zo Shelemi-a pé lé hkunmó hkyô ri. Nghut kôlhang, haû Yhûmsîng Garai gi, yhángnhik lé haq pyám bê nghut ri.
27Yeremi-aq taî kyo luî, Baruk mai kâ tô é laiká ding lé, hkóhkâm hpó nyhê hkyô pyâm é htâng má, Yeremi-aq chyáng haû Yhûmsîng Garaî é mungdang jé é gi, 28“Laiká ding gótû lé yù mù, Yudaq hkóhkâm Yehoi-akim nyhê hkyô pyâm é laiká ding má kâ tô é dang bànshoq lé, haú má kâ kat to aq. 29Hau htoq agó, Yudaq hkóhkâm Yehoi-akim lé, ‘Haû Yhûmsîng Garai shî su ga taî ri; nàng gi, laiká ding lé nyhê hkyó mù, “Babelon hkóhkâm gi, gè gè yhang, shí mau lé lé lhoqhtên pyám luî, byù eq shigu gaunyhaû pé lé shí mau mai lhoqhtûm pyám râ nghut lhê nghû, haî mù haú má kâ tô é lhú?” ga taí bê nghut ri. 30Haû mù, Yudaq hkóhkâm Yehoi-akim eq séng luî haû Yhûmsîng Garai shî su ga taî ri; yhang gi, Dawiq é hkóhkâm tángmyhâng má zùng râ byù wó râ a nghut lo; yhâng é màng lé gi, nyí lé buì nyé é má, myín lé nghânhpyû jòq é má, dú pyâm to râ nghut lhê. 31Ngò gi, yhâng lé le, yhâng é zodù wuì lé le, yhâng é duìnhâng zoshâng wuì lé le, yhángmòq é agè ashop hkyo é matú mara dam byi râ nghut lhê; Ngò gi, Ngá é dang lé yhángmòq a gyo kô é yánmai, yhángmòq é ahtoq má le, Yerusalem wà mó má nyi é bang eq Yudaq mau mâ é byu pê é ahtoq má le, Ngò taî tô é byò dàn byò sho hkyô bànshoq lé jé nhâng râ nghut lhê.’ nghû taî kyo aq.” gâ ri.
32Haû mù, Yeremi-aq gi, laiká ding gótû yù mù, Neri-a é yhang zo laiká ká sû Baruk lé byî ri; Baruk gi, Yeremi-aq taî kyô é eq rajung za, Yudaq hkóhkâm Yehoi-akim èq myi má nyhê hkyô pyâm é laiká ding mâ é dang bànshoq lé, laiká ding haú má kâ to bê nghut ri. Dang haú pé eq du é dang myo myo lé le, haú má kâ jàt kat to bê nghut ri.
Currently Selected:
Yeremi-aq 36: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.