Yeremi-aq 38
38
Yeremi-aq Wuì Tíng Dong Má Hkyô Hâng Kat Pyám Huî É Hkyô
1Ahkuî, Matan é yhang zo Shehpati-a, Pashura é yhang zo Gedali-a, Shelemi-a é yhang zo Yehuhkala eq Malikiya é yhang zo Pashura pé gi, shiwa byù bànshoq lé Yeremi-aq taî kyô nyi é dang, 2“Haû Yhûmsîng Garai shî su ga taî ri; ‘Wà mó shî má nyi gyó tô é ó yùq nghut kôle, shâm, mùtmó gyó é eq wúm mó gyó é èq shi byùq kôrâ nghut lhê; nghut kôlhang, Babelon byu pê chyáng e ló é sû ó yùq nghut kôle, chyungxe wó duî râ nghut lhê. Yhángmòq gi, chyungxe wó hpang lùt mù, chyungxe wó dui nyì kôrâ nghut lhê.’ gâ ri. 3Haû Yhûmsîng Garai shî su ga le taî ri; ‘Wà mó shî gi, gè gè yhang, Babelon hkóhkam é gyè hpúng lé àp byî pyâm é hui râ nghut mù, yhángmòq gi, wà shî lé zân ung yù kôrâ nghut lhê.’ gâ ri.” gâ é lé wó gyô bum akô nghut ri.
4Haú hkûn, zaugun wuì gi, hkóhkâm hpó lé, “Shí yùq lé sat pyám râ dùt ri. Yhang gi, wà mó shî má nyi gyó tô é gyèzô pé lé le, shiwa byù bànshoq bang lé le, yhang taî nyi é dang pê èq myìt wum lhoqhkyui byî nyi ri. Byù shí yùq gi, byù shí bâng é gè hkyô lé a htung é za, yhángmòq lé lhoqhtên pyám râ hkyô shèq rû htung nyi ri.” ga taî akô nghut ri.
5Haû jáng, Hkóhkâm Zedeki-a gi, “Yhang, núngmòq é lòq má nghut nyi ri; hkóhkâm hpó gi, núngmòq kut nau é hkyô lé wó hkûm pyám râ a nghut.” ga tû taî ri.
6Haû mù, yhángmòq gi, Yeremi-aq lé shuî yù mù, chyungxe zúng bâng é wânghkaû má jòq é, hkóhkam é yhang zo Malikiya é wuì tíng dong má tui mai hkyô hâng kat akô; dong haú má wuì a bo to, ga-po baú nghut mù, Yeremi-aq gi, ga-po má nòp lúng to bê nghut ri.
7Nghut kôlhang, hkóhkâm wâng má nyi é zaugun hpó, Hkusha byù Ebet Melek gi, Yeremi-aq lé wuì tíng dong má kat to kô é hkyô lé wó gyo jáng, hkóhkâm hpó Ben-yamin Hkum má zung tô é u, 8hkóhkâm wâng mai htoq ê mù, yhang lé, 9“Ngá yhûmsîng hkóhkâm ê, byù shí bang myìqhtoi Yeremi-aq lé kut é hkyô bànshoq gi, agè ashop é dông chyat kut bekô nghut ri. Yhángmòq gi, yhang lé wuì tíng dong má dú hâng kat pyám bekô nghut ri; wà má mùk a jòq byùq lô é yánmai, yhang gi, haú má mùt shi byùq râ za nghut lhê.” ga taî ri.
10Haú hkûn, hkóhkâm hpó gi, “Shî mai byù sum xê yùq lé shuî chûng mù, myìqhtoi Yeremi-aq wuì tíng dong má a shi byùq shi-má ê lâng toq yû keq.” ga, Hkusha byù Ebet Melek lé hkunmó hkyô ri.
11Haû mù, Ebet Melek gi, byù haú bang lé shuî chûng mù, hkóhkâm wâng mâ é sùtdò a-ô mâ é wàp má wang ê luî, haú mâ é mè-pyâng eq mèbu axau pé lé yù mù, tui mai, wuì tíng dong má lúng tô é Yeremi-aq chyáng hkyô kat byî akô. 12Hkusha byù Ebet Melek gi, Yeremi-aq lé, “Mè-pyâng eq mèbu axau haú pé lé náng é gochyok ô má nyham mù, tui tuî tap àq.” ga taí jáng, Yeremi-aq le haû eq rajung za kut bê nghut ri. 13Haû mù, yhángmòq gi, Yeremi-aq lé tuî èq lâng toq mù, wuì tíng dong mai yhang lé lâng htoq yû bekô nghut ri. Hau htâng, Yeremi-aq gi, chyungxe zúng bâng é wânghkaû má xoq nyi nyi ri.
Yeremi-aq Lé Zedeki-a Dangmyi Dum Myî É Hkyô
14Htâng má, Hkóhkâm Zedeki-a gi, byù nhâng mù, haû Yhûmsîng Garaî é noqkuq yhûm mâ é sum dáng nghut é hkum má myìqhtoi Yeremi-aq lé ê shuî lò nhâng luî, yhang lé, “Ngò, nang lé dangmyi rahkat myi râ; ngá chyáng mai haî le hkâ-nghop to.” ga taî ri.
15Yeremi-aq gi, Zedeki-a lé, “Nang lé ngò tû taî é nghut jáng, nàng, ngo lé a sat pyám kut râ nghut lhê lhú? Ngò, nang lé hpàqchyî byi kôlhang, nàng, ngá é dang lé gyo râ a nghut.” ga taî ri.
16Nghut kôlhang, Hkóhkâm Zedeki-a gi, “Ngá-nhúng lé kângsoq byî é haû Yhûmsîng Garai rû dui nyì nyì, ngo gi, nang lé sat râ a nghut; nang lé sat naû bâng é lòq má àp byî pyám râ le a nghut.” ga, Yeremi-aq lé haq dâkam ri.
17Haû mù, Yeremi-aq gi, Zedeki-a lé, “Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai Gasang shî su ga taî ri; ‘Nàng gi, Babelon hkóhkam é zaugun wui htâng ê dàp byùq é nghut jáng, náng é chyungxe wó lùt mù, wà shî le nyhê hkyô pyâm é a hui râ nghut lhê; nàng le, náng é yhûmbyù wuì le, chyungxe wó dui nyì kôrâ nghut lhê. 18Nghut kôlhang, nàng gi, Babelon hkóhkam é zaugun wui htâng a ê dàp é nghut jáng, wà shî gi, Babelon byu pê é lòq má àp byî pyâm é hui mù, yhángmòq gi, wà shî lé nyhê hkyô pyám kôrâ nghut lhê. Nàng yhang le, yhángmòq chyáng mai wó hpang lùt râ a nghut.’ gâ ri.” ga taî ri.
19Haú hkûn, Hkóhkâm Zedeki-a gi, Yeremi-aq lé, “Ngò gi, Babelon byu pê chyáng bo ló byùq bê é Yudaq byu pé lé gyùq ri; Babelon byu pé gi, ngo lé, yhángmòq é lòq má àp byî pyám mù, yhángmòq gi, ngo lé rhoî jihkyoî lhom kut kó âbe.” ga taî ri.
20Haû jáng, Yeremi-aq gi, yhang lé, “Yhángmòq gi, nang lé àp byî pyám râ a nghut; ngò, nang lé taî kyô é lé châng kut é dông haû Yhûmsîng Garaî é jì-no gyo aq. Haû jáng, nàng nyì ngón yùqyò mù, náng é chyungxe wó dui nyì râ nghut lhê. 21Nghut kôlhang, yhángmòq chyáng nàng a ê dàp é nghut jáng, haû Yhûmsîng Garai mai ngo lé shî su ga tûn shit ri; 22Yudaq hkóhkâm wâng má nyi gyó tô é myiwe wuì gi, Babelon hkóhkam é zaugun wuì chyáng shuî htoq ló byùq é hui kôrâ nghut lhê. Haú hkûn, myiwe wuì haú bang gi, nang lé,
‘Náng é buìnùm wuì gi, nang lé mhuî yù kômù,
nang lé hkyô shuî nghoq bekô nghut ri.
Náng é hkyî gi, ga-po yò má nòp byùq bê nghut mù,
náng é buìnùm wuì gi, nang lé tô pyâm to bekô nghut ri.’ ga taí kôrâ nghut lhê.
23Náng é yhûmsîng myhî pé eq zodù wuì bànshoq gi, Babelon byu pê chyáng shuî ló byùq é hui kôrâ nghut lhê. Nàng yhang le, yhángmòq é lòq mai a wó hpang lùt mù, Babelon hkóhkam èq chyup yu é hui zo râ nghut lhê. Haû mù, wà shî le nyhê hkyô pyâm é hui râ nghut lhê.” ga tû taî ri.
24Haú hkûn, Zedeki-a gi, Yeremi-aq lé, “Ó yùq lé le dang shî hkâsé nhâng, haû a nghut jáng, nàng shî râ nghut lhê. 25Nàng eq ngò dáng nyo lhûm é hkyô lé, zaugun wuì wó gyo kômù, yhángmòq gi, náng chyáng lé luî, nang lé, ‘Nàng, hkóhkâm lé taî é dang eq, hkóhkâm èq nang lé taî é dang, ngá-mòq lé taî kyo aq; ngá-mòq chyáng mai haú lé hkâ-nghop to; haû a nghut jáng, ngá-mòq gi, nang lé sat pyám râ nghut lhê.’ ga taí kôjáng, 26yhángmòq lé, ‘Ngò gi, Yonahtan é yhûm má ló shi byùq râ matú ngo lé hkâtaû dé kat nghû, hkóhkâm hpó lé dûng tôngbán é nghut lhê.’ nghû za taí aq.” ga taî ri.
27Zaugun wuì bànshoq bang gi, Yeremi-aq chyáng lé kômù, yhang lé myi kôjáng, Yeremi-aq gi, yhang lé hkóhkâm hpó hkunmó hkyó luî taí nhang é bànshoq, yhángmòq lé taî kyô ri. Haû mù, yhángmòq gi, yhang lé a dum myi lo kó nghut ri; hkâsu mù gâ le, hkóhkâm eq yhang taî lhûm é dang lé, ó yùq le a wó gyo kó nghut ri.
28Yeremi-aq gi, Yerusalem wà mó lé wó zân ung yu pyám byi kô é buìnyì jé shoq, chyungxe zúng bâng é wânghkaû haú má xoq nyi nyi ri.
Yerusalem Wà Mó Htên Byòq Byùq É Hkyô
Yerusalem wà mó lé zân ung yu é hkyô gi, a-ô mâ é eq rajung za nghut ri.
Currently Selected:
Yeremi-aq 38: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.