Yeremi-aq 40
40
Yeremi-aq Wó Lùt Byùq É Hkyô
1Chyungxe zúng gyèzau hpó Nebuzaradan gi, Babelon wà mó shut chyup shuî ló râ nghut é Yerusalem wà mó eq Yudaq mau mâ é shúm byû bànshoq má Yeremi-aq le toqjâng hut tô é lé myàng mù, yhang lé Rama wà má lhoqlhut kat ri; Yeremi-aq lhoqlhut kat é huî é htâng, yhâng chyáng haû Yhûmsîng Garaî chyáng mâ é mungdang jé ri. 2Chyungxe zúng gyèzau hpó gi, haû Yeremi-aq lé shuî yù mù, yhang lé, “Náng é Garai Gasang nghut é, haû Yhûmsîng Garai gi, shí jowò má, byò dàn byò sho hkyô shî lhoqhtoq é nghut ri. 3Haû Yhûmsîng Garai gi, Yhang kut râ ga taî tô é eq rajung za, byò dàn byò sho hkyô shî jé nhâng bê nghut ri; byù núngmòq mai haû Yhûmsîng Garai lé mara kut shut luî, Yhâng é jì-no a gyo kô é yánmai, shí pé bànshoq dùt htoq é nghut ri. 4Nghut kôlhang, ahkuî, ngò gi, náng é lòqyìn mâ é toqjâng lé hkyut pyám byî lhê; ngò eq rahá Babelon wà mó shut châng ló naû jáng, cháng aq; ngò, nang lé rago wú gon râ nghut lhê; nàng a kâm châng é nghut jáng, hkâcháng; wú aq; ra-mau gón náng é hí má nghut bê; nàng kâm e é shut e ló aq.” ga taî ri. 5Nghut kôlhang, Yeremi-aq ló râ hen é hkûn, Nebuzaradan xoq taî é gi, “Babelon hkóhkam èq Yudaq mau mâ é wà pé lé ùp râ matú wò byî tô é, Shahpan é yhang shu, Ahikam é yhang zo Gedali-a chyáng taû ló mù, náng é byu pé eq rahá ló nyi é nghut nghut, nàng kâm e é shut e é nghut nghut, kut àq.” gâ ri.
Hau htâng, zau hpó gi, yhang lé zoshuq pé eq chyûnghuq byi luî, pûn kat bê nghut ri. 6Haû mù, Yeremi-aq gi, Mizipa wà má nyi é Ahikam é yhang zo Gedali-a chyáng ê luî, haú mau má nyi myìt gyó tô é byu pê chyáng, yhang eq rahá nyi nyì bê nghut ri.
Gedali-a Sat Pyám Huî É Hkyô
7Yòsô mau má nyi tô é Yudaq mau gyèzaû pé eq yhángmòq é gye hpúng mó gi, Babelon hkóhkam èq Ahikam é yhang zo Gedali-a lé haú mau má ùp râ zau ayá byi mù, Babelon wà mó shut shúm byû dông a chyup shuî ló é eq haú mau má nyi é asho awui dùt dik é yùqgè, myiwe eq zoshâng wuì lé yhâng é lòq má àp byî to bê nghut é hkyô lé wó gyo kôjáng, 8Mizipa wà má nyi é Gedali-a chyáng lé bum akô nghut ri; haú bang gi, Nehtani-a é yhang zo Ishima-elaq, Kare-a é yhang zo Yohanan eq Yonahtan nhik, Tan-humet é yhang zo Serai-a, Netohpat byù Ehpai é yhang zô pé, Mahkahti byu é yhang zo Yazani-a eq, yhángmòq é byu pé nghut akô. 9Haû mù, Shahpan é yhang shu, Ahikam é yhang zo Gedali-a gi, yhángmòq eq yhángmòq é byu pê èq lùm râ matú dakâm dang taî ri; haû gi, “Babelon byu pé lé dójaú râ matú hkâ-myìt gyùq kó; shí mau má nyì mù, Babelon hkóhkâm lé dójaú keq; haû jáng, núngmòq nyì ngón yùqyò kôrâ nghut lhê. 10Ngò gi, Mizipa wà má nyi nyì mù, ngá-nhûng chyáng lé lo é Babelon byu pê é hí má núngmòq é gùnglik dông yàp râ nghut lhê; nghut kôlhang, núngmòq gi, tsibyiq wing lé le, buìlúm nám é shi pé eq tsanlun xû pé lé le shû yù mù, núngmòq é yambú pé má hkong to keq; haû mù, núngmòq wó sing yu é wà pé má nyi nyì keq.” gâ ri.
11Moba mau, Ammon mau, Edom mau pé má nyi é Yudaq byù bànshoq bang eq gótû mîngdán pé má nyi é bànshoq bang gi, Babelon hkóhkâm mai Yudaq mau má byù ra-am nyhi hkyô to mù, haú bang lé ùp râ matú, Shahpan é yhang shu, Ahikam é yhang zo Gedali-a lé zau ayá byî tô bê nghut é hkyô lé wó gyo kôjáng, 12yhángmòq byo myín tô bum é mîngdán bànshoq mai, lhúnglhâng bang Yudaq mau má taû lò kômù, Mizipa wà má nyi é Gedali-a chyáng lo jé akô nghut ri. Yhángmòq gi, haú má, tsibyiq wing eq buìlúm nám é shi pé agùn agó myang shû yù bekô nghut ri.
13Yòsô mau má nyi tô ashî nghut é Kare-a é yhang zo Yohanan eq gyèzaû pé bànshoq bang gi, Mizipa wà má nyi é Gedali-a chyáng lé jé kômù, 14yhang lé, “Ammon byu pê é hkóhkâm Balisi gi, náng é chyungxe yù râ matú, Nehtani-a é yhang zo Ishima-elaq lé nhang kat bê nghut é lé, nàng a sé lhú?” ga taî akô. Nghut kôlhang, Ahikam é yhang zo Gedali-a gi, yhángmòq lé a lhom jíng byi nghut ri.
15Haû mù, Kare-a é yhang zo Yohanan gi, Mizipa wà má, Gedali-a lé, “Nehtani-a é yhang zo Ishima-elaq lé ngò sat pyám râ ahkáng byi aq; haú hkyô lé ó yùq le sé râ a nghut. Haî mù, yhang gi, nang lé sat pyám luî, náng chyáng zîng nyi bum é Yudaq byù bànshoq lé lhoqpyo pyám mù, Yudaq mau má nyi myìt gyó tô é bang lé lhoqhtûm pyám râ lhú?” ga tsik za haq taî ri.
16Nghut kôlhang, Ahikam é yhang zo Gedali-a gi, Kare-a é yhang zo Yohanan lé, “Nàng haû su hkâkut! Ishima-elaq eq séng luî nàng taî é hkyô gi, a têng é nghut lhê.” ga taî ri.
Currently Selected:
Yeremi-aq 40: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.