Yeremi-aq 50
50
Babelon Eq Sêng É Danglù
1Babelon wà mó eq Babelon byu pê é maumyî eq séng luî, myìqhtoi Yeremi-aq dông haû Yhûmsîng Garai taî é mungdang gi, shî su gâ ri;
2“Byù myû wui chyáng taî htoq taî pyo kyo kut keq;
donghkón tu toq mù, taî pyô keq;
haî le a myhit tô é za,
‘Babelon wà mó gi, zân ung yu pyâm é hui râ nghut lhê;
Bela hparà gi, hoq hpû é hui zo râ nghut lhê;
Mariduk hparà gi, gyùq chiq é hui râ nghut lhê.
Yhâng é hparà lhô pé gi, hoq hpû é hui zo mù,
yhâng é hparà hpôlhô pé gi, gyùq chiq é hui kôrâ nghut lhê.’ nghû taí keq.
3Mautsûng mâ é byù myû ra-myû gi, yhang lé lé htim râ nghut mù,
yhâng é maumyî gi, chamchyuîyuì tô sâ to râ nghut lhê.
Ó yùq le haú má lé nyî râ a nghut;
byù eq gaunyhaú pé gi, hpang byùq kôrâ nghut lhê.” gâ ri.
4Haû Yhûmsîng Garai shî su ga taî pyo ri;
“Haú buìnyì, haú ahkyíng pé má,
Isira-elaq byu pé eq Yudaq byu pé gi,
yhángmòq é Garai Gasang nghut é, haû Yhûmsîng Garai lé hô râ matú,
ngaùbyi ngaùnhap eq rahá ê kôrâ nghut lhê.
5Yhángmòq gi, Zi-un shut yhángmòq é myòqdong hû luî,
haú shut e é hkyô myi kôrâ nghut lhê.
Yhángmòq gi, lé lô mù, a ge tô-myhî pyám râ nghut é,
ahtum abyùq é dangshikaq má,
haû Yhûmsîng Garai eq xoq gîng to kôrâ nghut lhê.
6Ngá é byu pé gi, byùq byùq é sau dùt byùq bekô;
sau nghut é yhángmòq lé zúng é bang gi,
yhángmòq lé hkyô shuî nghoq kômù,
yhángmòq lé bùm pé shut lhâm kat akô nghut ri.
Yhángmòq gi, bùm zo bùm mó má yông wún kômù,
yhángmòq up lèq yu é jowò lé tô-myhî pyám bekô nghut ri.
7Yhángmòq lé htûng huî é bang gi, yhángmòq lé myhui pyám bekô;
yhángmòq é gye pé gi, ‘Yhángmòq é îchyí îwâ pê é myòqbyù jang,
haû Yhûmsîng Garai nghut é, yhángmòq jujúm nyì âng é Yhûmsîng Garai lé
yhángmòq mara kut shut bekô nghut é yánmai,
ngá-mòq chyáng mara a bò nghut lhê.’ ga taî akô nghut ri.
8Babelon wà mó mai hpang htoq keq;
Babelon byu pê é mau mai htoq ló mù,
bainám hpûng é hí má sô é bainám lo pé su dùt nyì keq.
9Hkâsu mù gâ le, Ngò gi, mautsûng mau mâ é wúm bo é byù myû wuì lé myìt nhaû toq byi mù,
Babelon wà mó má shuî lé râ nghut lhê.
Yhángmòq gi, wà haú lé htim râ matú jowò yù mù,
wà haú lé majan zân ung yù kôrâ nghut lhê.
Yhángmòq é myoshi gi, lòq díng é sârhe pé bìk é su,
akôm laî byùq é rahkat le bò râ a nghut.
10Haû mù, Babelon byu pé gi, wó zân lú yu é zè dùt byùq râ nghut mù,
wó zân lú yu é zè haú pé lé zô é bang bànshoq gyî bùm kôrâ nghut lhê.” ga,
haû Yhûmsîng Garai taî pyo ri.
11Hau htoq agó, “Ngá é silî wunlî lé lú kyaq myàq yu é bang ê,
núngmòq myìt ngón gabú byam chyu kô é yánmai le,
gùq nâng é no-pyá kâm é dông kut é eq,
wum bo é myang pé bo mying myhîng é yánmai le,
12núngmòq é înu nghut é Babelon gi, gyai yhang hoq hpû é hui mù,
núngmòq lé hku é sû gi, hoq hpû ngha byùq râ nghut lhê.
Yhang gi, byù myû wuì bànshoq mâ é je tiq sû dùt mù,
yòso, kyuq huî é maumyî eq se-muî jàng dùt byùq râ nghut lhê.
13Haû Yhûmsîng Garai nhikjum yô é yánmai, haú má byù wó nyî râ a nghut;
haû gi, chamchyuîyuì dùt shoq lhoqhtên pyâm é hui râ nghut lhê.
Babelon mau mai laî ló é bang gi, dan hong bùm mù,
yhang hui zô é ihkyùp é yánmai wú tiq pyâm é dang taí kôrâ nghut lhê.
14Laí chung é bang bànshoq ê,
Babelon wà mó lhînghkyùq má jowò yù keq.
Wà haû gi, haû Yhûmsîng Garai lé mara kut shut bê nghut é yánmai,
myoshi lé a ha bûn é za yhang lé bìk keq!
15Wà hau é lhînghkyùq mai garû gyun keq!
Yhang gi, sum bê hkyô lé yín yû bê nghut mù,
yhâng é mâchya pé gyòp lêng byùq luî,
yhâng é wàhkûm pé hpyoq hpyi pyâm é hui bê nghut ri.
Haû gi, Yhûmsîng Garai lató hpuq é hkyô nghut mù,
yhang lé lató hpuq keq;
góbang lé yhang kut laî é su,
yhang lé le kut byi keq.
16Kyô hkyó sû eq kyô shu nám lé zaiyik chung é sû lé,
Babelon wà mó mai lhoqhtûm pyám keq.
Zìk zo zìk shuq bâng é shâm lé gyùq chiq é yánmai,
yùq hkangmó gi, yhûmsing é byù myû wui chyáng lhing ló mù,
yhûmsing é mau má hpang ló ra kôrâ nghut lhê.
17Isira-elaq gi, hkanghkyî pê èq hkat pyo é hui mù,
byo myín byùq é sau hpúng dùt bê nghut ri.
Yhángmòq lé sânghi myhui pyâm é sû gi,
Asuri hkóhkâm nghut ri;
ló htáng má yhángmòq é showui pé lé lhoqhkyop pyám byî é sû gi,
Babelon hkóhkâm Nebuhkatneza nghut ri.” ga le taî pyo ri.
18Haû mù, Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri;
“Ngò gi, Asuri hkóhkâm lé mara dam byî é su,
Babelon hkóhkâm eq yhâng é mau lé le, mara dam byi râ nghut lhê.
19Nghut kôlhang, Ngò gi, Isira-elaq byu pé lé,
yhángmòq é mhan nú yô má shuî taû lò râ nghut lhê;
yhángmòq gi, Hkarimela bùm eq Bashan mau má mhan nú zo kôrâ nghut lhê.
yhángmòq gi, Ehprim bùm eq Gile-at bùm pé má,
nhik dìk shoq myàng zo kôrâ nghut lhê.” gâ ri.
20Haû Yhûmsîng Garai shî su ga taî pyo ri;
“Haú buìnyì pé, haú hkyíng má,
Isira-elaq kut shut é hkyô lé ho gôn wú kôlhang, myàng râ a nghut;
Yudaq má yubàk mara lé ho gôn wú kôlhang, myàng râ a nghut;
hkâsu mù gâ le, Ngò gi, Ngò nyhi myhit hkyô tô é bang lé,
mara hkyut pyám byi râ nghut lhê.
21Gumlau toq toq kut é mau#50:21 Gumlau toq toq kut é mau gâ é lé, Hebre dông, Merahtim gâ é nghut lhê. lé ê htim mù,
dam byi gíng é mau#50:21 Dam byi gíng é mau gâ é lé, Hebre dông, Pekot gâ é nghut lhê. má nyi é bang lé majan ê zan keq;
yhángmòq lé châng hkat sat mù, bànshoq lhoqhtûm pyám keq;
Ngò, núngmòq lé hkunmó hkyô é bànshoq kut keq.” ga,
haû Yhûmsîng Garai taî pyo ri.
22Hau htoq agó, “Haú mau má, majan htê eq,
lhoqhten lhoqhpyoq htê mó htoq nyi ri.
23Myìdàm htoq gón mâ é bàtdù gi,
gyuî gyòp byùq bê lhâ!
Babelon wà mó gi, byù myû wui chyáng
chamchyuîyuì dùt byùq bê lhâ!
24Babelon wà mó ê, Ngò gi, náng é matú dumzo htung tô é nghut mù,
nàng gi, a bûn nùng má myí bê nghut ri.
Nàng gi, haû Yhûmsîng Garai lé gumlau toq é yánmai,
gye pé gi, nang lé myàng ang mù, chyup yû bekô nghut ri.
25Haû Ahko Ahkáng lhúnglháng wó mù, Wum-o a-tsam dìk shoq bò Sû Yhûmsîng Garai gi,
Babelon byu pê é mau má kut râ múzó jòq é yánmai,
Yhûmsîng Garaî é gyèhking kat é yhûm hpóng mù,
Yhâng é nhikmó-yo hkyô nghu é shâm lhâm lé yu htoq bê nghut ri.
26Mau we mai yhang lé lé htim keq;
yhâng é gùqchyî pé hpóng keq;
yhang lé gùq bùm su bum zang to keq;
nyi myìt gyó tô é lháng a bò loshoq,
chyut lhoqhtûm pyám keq.
27Yhâng é nohtó zô pé bànshoq lé sat pyám keq;
sat râ jang má gyó ê kó sháng gàq!
Yhángmòq lé dam byi râ matú,
buìnyì ahkyíng pé jé bê nghut é yánmai,
yhángmòq gi, dingnyé wó ri!
28Babelon wà mó mai wó hpang lùt luî, hpang hkau nyi to bâng èq,
ngá-nhûng é Garai Gasang nghut é, haû Yhûmsîng Garai hkâsu kut lató hpuq é eq
Yhâng é noqkuq yhum é matú lató hpuq é hkyô lé,
Zi-un má taî pyo é htê gyo keq.
29Lai dàt lâng htûng bang nghut é lai bik bang bànshoq lé ji tsing mù,
Babelon wà mó lé htuqhtíng keq.
Wà haû lhînghkyùq má lóm to keq;
ó yùq lé le hkâhpâng nhâng kó.
Yhâng é hkyîzó lòqzó é matú lató hpuq keq;
yhang kut bê é eq rajung za taû kut byi keq.
Hkâsu mù gâ le, yhang gi, Isira-elaq é Chyoiyúng Sû nghut é,
haû Yhûmsîng Garai lé gyáng dang taí bê nghut ri.
30Haû mù, yhâng é zorâm wuì gi,
wà hkyô pé má lèqbàt tô bùm kôrâ nghut lhê;
yhâng é gyèzô bànshoq gi, haú nyí má,
lhoqzîm pyâm é hui kôrâ nghut lhê.” ga le,
haû Yhûmsîng Garai taî pyo ri.
31Haû Yhûmsîng nghut é, Wum-o a-tsam dìk shoq bò Sû Yhûmsîng Garai shi su ga taî pyo ri;
“Myìt myhâng nghutbun sû ê, wú aq; Ngò gi, nang lé htuqhtíng râ nghut lhê;
Nàng, mara dàm byî é hui zo râ ahkyíng nghut é,
náng buìnyì jé bê nghut ri.
32Myìt myhâng nghutbun sû gi, htûng htê lèqbàt râ nghut lhê;
yhang lé tu toq garúm râ byù nyì râ a nghut.
Ngò gi, yhâng é wà pé má myi tuq kat râ nghut mù,
yhâng é awui ayàm má nyi é bànshoq lé nyé gyó pyám nhâng râ nghut lhê.” gâ ri.
33Haû Wum-o a-tsam dìk shoq bò Sû Yhûmsîng Garai shî su ga taî ri;
“Isira-elaq byu pé eq Yudaq byu pé gi,
zìk zo zìk shuq é rahá huî nyi akô.
Yhángmòq lé chyup yu é bang bànshoq gi,
yhángmòq lé lhûng to mù, a nhang kat naû kó nghut ri.
34Nghut kôlhang, yhángmòq lé Hkyi xe yù Sû gi, wum bo ri;
Yhâng é myìng gi, Wum-o a-tsam dìk shoq bò Sû Yhûmsîng Garai gâ ri.
Yhang gi, yhángmòq é mau ra-mau gón wó bánno nhâng râ matú,
yhángmòq é hkyô lé hûng byi râ nghut lhê;
nghut kôlhang, Babelon wà mó má nyi é bang lé gi, bánno hkyô a byi râ nghut lhê.
35Shâm gi, Babelon byu pé lé htuqhtîng ri ô!
Babelon má nyi é bang lé le,
yhâng é zaugun wuì eq hpàqchyî bò bang lé le,
htuqhtíng sháng gàq.” gâ ri;
haû gi, Yhûmsîng Garai taî pyo ri.
36Hau htoq agó, “Shâm gi, yhâng é myìqhtoi pyoq pé lé htuqhtîng ri ô!
Yhángmòq gi, ngha bùm kôrâ nghut lhê.
Shâm gi, yhâng é sârhe pé lé htuqhtîng ri ô!
Yhángmòq gi, gyùq ngha bùm kôrâ nghut lhê.
37Shâm gi, yhâng é myang pé eq gyèlhêng pé,
yhángmòq chyáng bo nyi nyó tô é gó-mîng byù bànshoq lé, htuqhtîng ri ô!
Yhángmòq gi, myiwe su dùt kôrâ nghut lhê.
Shâm gi, yhâng é sùtdò pé lé htuqhtîng ri ô!
Haú pé gi, lú yu ló é hui râ nghut lhê.
38Kyuq huî é ihkyùp gi, yhâng é wuì pé má jé ri ô!
Haú pé gi, kân byùq bê nghut ri.
Hkâsu mù gâ le, mau haû gi, hparà hpôlhô byíng é mau nghut é yánmai,
byu pé gi, hparà hpôlhô pé lé gyùq chiq bûm mù, ngha byùq kôrâ nghut lhê.
39Haû mù, yòsô zè pé eq dànghkuî mó pé gi, haú má nyì mù,
hkungbup pé le haú má nyì kôrâ nghut lhê.
Haú má gi, hkâ-nhám le byù dum nyì râ a nghut mù,
pyàt pyàt zaí zaí ó yùq le nyì râ a nghut lo.
40Ngò gi, Sodom wà, Gomora wà eq
hau é ayàm pé mâ é wà pé lé chamchyuîyuì kut pyâm é su,
haú má byù rayùq le nyì râ a nghut;
haú má byù lé nyî râ le a nghut.” gâ ri;
haû gi, Yhûmsîng Garai taî pyo ri.
41Hau htoq agó, “Wú keq; gyè nghut é byù myû ra-myû gi,
mautsûng mau mai lé lo ri;
byù myû mó ra-myû eq hkóhkâm myo myo lé,
maumyî ló htâng é mai nhaû toq kat râ nghut lhê.
42Yhángmòq gi, lai eq shâm wun chung akô;
yhángmòq gi, byù jûm pé nghut mù, shogyo nhikmyin myìt a bò kó nghut ri.
Yhángmòq gi, myang jî tô bùm kô é nghut mù,
wuìshuq lung-aû mying hûm é htê su ga mying akô nghut ri;
Babelon byìzo ê, yhángmòq gi, majan mâ é byu pé su,
nang lé htim râ matú lé lo bum akô nghut ri.
43Babelon hkóhkâm hpó gi, yhángmòq eq sêng é lùdang lé wó gyo bê nghut mù,
yhâng é lòq nyhuî lhâng byùq bê nghut ri.
Myiwe rayùq zo hkû nò no é su,
hkê-nho é lé yhang hpuzo bê nghut ri.
44Gyai yùq yúng é mhan nú yô má lé htim râ matú,
Yodan làng yàm mâ é sik púng mai hkanghkyi dòq lo é su,
Ngò gi, Babelon mau mâ é byu pé lé, dàn lòq tung haú mau mai hkat htoq pyám râ nghut lhê.
Haú mau lé ùp râ matú, hkyin tô é hui sû lé Ngò wò byî to râ nghut lhê.
Ngò su dùt é eq Ngo lé htuqhtíng nau é sû gi, ó nghut lhê lhú?
Sau zúng sû ó yùq gi, Ngo lé wó htuqhtîng lhê lhú?
45Haû mù, haû Yhûmsîng Garai mai, Babelon mau lé htuqhtíng râ hen tô é hkyô lé le,
Babelon byu pê é mau lé htuqhtíng râ htung tô é hkyô lé le, gyo keq;
sau hpúng mâ é sau zô pé yhángmòq gi, she hkyut ló byùq é hui râ nghut lhê;
haû su dùt é yánmai, yhángmòq nyi é mhan nú yô gi, chamchyuîyuì dùt to râ nghut lhê.
46Babelon wà mó lé zân ung yu é htê yánmai,
myìdàm htoq gi, nán byùq râ nghut lhê;
yhángmòq wùt ngau garû é htê lé gi,
byù myû wui chyáng wó gyo râ nghut lhê.” le gâ ri.
Currently Selected:
Yeremi-aq 50: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.