Yohana 14
14
ɄYɨɨsʉ vɨ nzɨla ɨjilotsa kwa Ngʉlʉve
1“Muleke ʉkʉsʉsʉvala mu numbula tsiinyo, mukʉmwɨdɨka ʉNgʉlʉve, innyɨdɨkagi najyʉne.#14:1 Mukʉmwɨdɨka ʉNgʉlʉve, innyɨdɨkagi najyʉne Ʉvʉganulu ʉvʉnge wa mamenyu aga wiita imwɨdɨkagi ʉNgʉlʉve, innyɨdɨkagi najyʉne. 2Ʉvʉtaamo vʉvaha mu nyumba jya Daada. Ɨkaale ɨleke ʉkʉva wʉ jɨlɨwo, ndalɨno ndɨvavʉʉlile, manya ndɨlɨ mu nzɨla ʉkʉlʉta kukʉvanotsehetsa apoonu apakʉva ʉnyie. 3Wʉ ndɨlʉtile nʉ kʉvanotsehetsa, jʉndikilivuka ikange kukʉvatoola ʉnyie pakʉta apoonu ʉpwʉ ndiiva, najyʉnyie pwʉ muveetsage paninie nʉʉne. 4Ʉnyie mujɨmanyile ɨnzɨla ɨjilotsa ʉkwonu ʉkwʉ ndilʉta.”
5Pwʉ ʉTomasi akambʉʉtsa ʉYɨɨsʉ akata, “Gwe Ntwa, ʉwe natʉkʉmanyili ʉkwʉ wibɨha. Lɨno, jiweesekana ndeeti ʉwe ʉkʉjɨmanya ɨnzɨla ɨjilotsa ʉkwa?” 6ɄYɨɨsʉ akamwanda akata, “Ʉne neene nzɨla, neene lweli, ikange neene wʉʉmi. Nakʉli ʉmuunu ʉvaveetsaga ʉvɨ iweesa ʉkwitsa kwa Daada kɨtsila kʉgendela kwane. 7Ɨngave mummanyile ʉne, pwʉ mummanyile namwene ʉDaada. Ʉkʉtengʉla lɨno, mummanyile, ikange mumbwene.”
8Pwʉ ʉFilipo akadoova akata, “Gwe Ntwa, tukʉkʉdoova ʉtʉvonie ʉDaada, jiveetsaga jɨkwɨlye.” 9ɄYɨɨsʉ akamwanda akata, “Gwe Filipo, ndɨtaamile nʉʉnyie ʉnsɨkɨ mwongosu, paninie nɨɨlyo ʉpitsiige nʉmmanyili ʉne? Ʉmuunu ʉvaveetsaga ʉvɨ ambwene ʉne, ambwene najyʉ Daada. Pwʉ kɨki witsova wiita, ‘Ʉtʉvonie ʉDaada?’ 10Ndeeti, navukwɨdɨka ʉkʉta ʉne ndɨlɨ mu nʼgati mwa Daada, namwene alɨ mu nʼgati mwane? Amamenyu ʉgwʉ ndikʉvavʉʉla nanditsova kʉ vʉtavʉlɨlwa wango jyʉne, apeene ʉDaada ʉvɨ alɨ mu nʼgati mwane vɨ ivomba ɨmbombo jya mwene ʉkʉgendela mwane. 11Munnyɨdɨkage wʉ nditsova ʉkʉta ʉDaada alɨ mu nʼgati mwane, nʉʉne ndɨlɨ mu nʼgati mu mwene. Lɨno ɨngave ʉnyie namukʉnnyɨdɨka ʉne, ɨdɨkagi ʉkʉkongana ni mbombo itsʉ ndivomba. 12Jɨlweli ndikʉvavʉʉla, ʉmuunu ʉvaveetsaga ʉvɨ ikʉnnyɨdɨka ʉne, namwene ivombaga imbombo tsitsilya itsʉ ndivomba ʉne. Ikange ivombaga imbombo imbaha ʉkʉlʉtɨɨlɨla itsi, ʉlwakʉva ndilʉta kutaama nʉ Daada. 13Ɨngave jʉmudoovaga ɨkɨɨnu ɨkɨveetsaga ʉkʉgendela mu litaawa lyango, ʉne jʉndikʉvavombelaga ndʉwʉ mudoovile. Kʉ nzɨla ɨjyo, ʉwɨɨmɨkiwa wa Daada jʉvuvonekaga ʉkʉgendela mu Mwana va mwene. 14Pwʉ mudoovage ɨkɨveetsaga mu litaawa lyango, nʉʉne jʉndikʉvavombelaga ndʉwʉ mudoovile.”
ɄYɨɨsʉ itsova ʉkwitsa kwa Mepo ʉMbalatse
15“Ɨngave munganile, mutsikongage indagɨlo tsyango. 16Pwʉ nʉʉne jʉndikʉvadoovela kwa Daada avape ʉNtangɨli ʉjyʉnge, pakʉta ʉjwa ataamage paninie nʉʉnyie, nalavaleke lʉsiku. 17ɄNtangɨli ʉjwa vɨ Mepo ʉMbalatse. Ʉjwa jiikʉvamanyiisaaga avaanu ʉwajɨlweli. Avaanu ʉwʉ vikʉmʼbeela ʉNgʉlʉve navakaweese ʉkʉmwʉpɨlɨla ʉMepo ʉjwa, ʉlwakʉva navikʉmbona, ikange navammanyili. Lɨno ʉnyie mummanyile ʉMepo va Ngʉlʉve ʉlwakʉva itaama paninie nʉʉnyie, ikange jiiveetsaga mu nʼgati mwanyie.
18“Nandɨkavaleke nyɨ veene ʉta vaana vapɨɨna, jʉndikwitsa ikange kwanyie. 19Gʉsigye ʉnsɨkɨ nsupi vʉvʉle avaanu va kɨlʉnga ɨkɨ navakambone ʉne ikange. Lɨno ʉnyie jʉmukʉmbona ʉne ikange. Manya ʉkʉhʉmana nʉʉne ʉkʉva mwʉmi, pwʉ najyʉnyie mupiiva vʉʉmi. 20Ndɨva nditsʉʉka, mupikʉlʉmanya ʉkʉta ʉne ndɨlɨ mu nʼgati mwa Daada, ʉnyie mulɨ mu nʼgati mwane, nʉʉne ndɨlɨ mu nʼgati mwanyie. 21Ʉmuunu ʉvaveetsaga ʉvɨ ikwɨdɨka nʉ kʉkonga indagɨlo tsyango, ʉjwa vɨ mwene anganile. Nʉ mwene ʉmuunu ʉvɨ anganile, ʉDaada alanʼgana. Nʉʉne ndɨnʼganile, ikange ndikɨvonia kʉ muunu ʉjwa.”
22Pwʉ ʉnkongi mpamato ʉvɨ ɨlitaawa lya mwene vɨ Yuuda, ʉvɨ navɨ Yuuda Isikalioti, akavʉʉtsa kwa Yɨɨsʉ akata, “Gwe Ntwa, jiweesekana ndeeti ʉve ʉkwɨvonia kwawe, ʉleke ʉkwɨvonia kʉ vaanu avange vooni?” 23ɄYɨɨsʉ akamwanda akata, “Ʉmuunu ʉvaveetsaga ʉvɨ anganile, ikʉgakonga ʉgwʉ ndikʉndagɨla. Vʉvʉle vʉle ʉDaada alanʼgana, ikange ʉne nʉ Daada tukwitsa kʉ mwene, nʉ kʉtaama paninie nʉ mwene. 24Lɨno ʉmuunu ʉvaveetsaga ʉvɨ nikʉngana ʉne, nikʉtsikonga itsʉ ndikʉndagɨla. Ikange, itsʉ ndilagɨla natsyango, apeene tsihʉma kʉ mwene ʉvɨ ansuungʼile.
25“Ndɨvavʉʉlile gooni ago wʉ ndɨpitsiige ndɨlɨ paninie nʉʉnyie. 26Lɨno ʉNtangɨli ʉjwa, kwʉ kʉta ʉMepo ʉMbalatse, ʉvɨ ʉDaada jiikʉnsuungʼa kwanyie mu litaawa lyango, vɨ mwene jiikʉvamanyiisaaga gooni nʉ kʉvakʉmbʉsa gooni ʉgwʉ ndɨvavʉʉlile. 27Ndikʉvapelela muve nʉ lʉnotsehetso mu numbula tsiinyo, ʉlʉnotsehetso lʉlya ʉlwʉ ndɨlɨ nalwo mu numbula jyango lwʉ lʉʉlwa ndikʉvapelela najyʉnyie muve nalwo. Ʉlʉnotsehetso ʉlwa nalʉlɨ ndʉ lwa mu kɨlʉnga. Kwʉ baako ʉkʉsʉsʉvala mu numbula tsiinyo, ikange kwʉ baako ʉkʉdwada ɨkɨveetsaga. 28Mupʉliike ʉgwʉ ndɨkavavʉʉlile ʉkʉta, ‘Jʉndilʉta, ikange jʉndikwitsa kwanyie.’ Ɨngave jɨlweli munganile, mukaale muhekelaga ʉkʉpʉlɨka ʉkʉta ndilʉta kwa Daada, ʉlwakʉva ʉDaada vɨ mbaha ʉkʉlʉtɨɨlɨla kwane.
29“Ndɨvavʉʉlile gooni ago ʉnsɨkɨ ʉgʉ, wʉ ikulongwi itso tsikaanale ʉkʉhʉmɨla, pakʉta wʉ tsihʉmye jʉmunnyɨdɨke. 30Nandiweesi ʉkʉtsova nʉʉnyie ʉnsɨkɨ ntale, ʉlwakʉva ʉmbaha va kɨlʉnga ɨkɨ, kwʉ kʉta ʉSetano, ahegelye. Napeene nalɨ nago amaka kwane. 31Ʉgwʉ ndivomba gwʉ geene ʉgwʉ ʉDaada andagye ndɨvombage, pakʉta avaanu vooni valʉmanyingʼanie ʉkʉta ndɨnʼganile. Lɨno, ɨmagi tʉhege apa!”
S'ha seleccionat:
Yohana 14: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.