Lwiikö 16

Libhonʋnyɔzokwëa a ninea

1'Ylɩ ‑bhlʋ 'mö, Zezwii mɔɔ 'nyɛɛ 'ɔ ‑gänɩwaa wɛlɩ ‑bhlʋ. Ɔ lɛ naa: «Nɩkpɛ ‑bhlʋ mɔɔ ‑wʋä ‑lɛ. Wʋlʋ ɔ wʋlʋä. Ɔ kä libhonʋnyɔ 'kɔdɔ ‑bhlʋ. 'Mö ɔ 'zʋä 'ɔ monii 'wuë 'yli, ɔ 'kɛ libho 'wʋ nʋ. 'Ylɩ ‑bhlʋ 'mö 'n nɩkpa yoo 'dɩ 'nyɛ nɩɩ, 'ɔ libhonʋnyɔ 'la, ɔ'ɔɔ libho 'yli 'zʋnɩ, ‑maa monii, nyima ɔ nyimee. 2Wa 'nyɔɔ sa'a 'dɩɩ, 'n ɔ yoo wäzɩ, ɔ lɛ naa: 'Saa n 'nʋä ‑na dɛɛ, ‑tiamö bhä? Sɛ ‑n nʋmönʋmöä libhoo 'möö, nyɩaaa ‑ka ‑sɩbhä 'dɩ 'wë, n ‑kamö libho 'mö ‑sɛ. 3Ɔ 'bhidɩba 'nyɔɔ sa'a 'dɩɩ, ɔ dlɩ zɛmö a dɔ'wʋ ɔ lɛ naa: Na 'bhidɩba lɛ ɔ ‑kaa libho 'mö ‑sɛ. Sɛ n 'kä bhäa'a 'zʋ n 'kä li? N'n‑ä 'mö 'tɛɛ n 'kä 'kwlɛlibho nʋ, n 'kä'ɛ nɔnʋ a dɔ'wʋ nɩɩ, yɩ ‑bhöö zʋ 'wʋ tenyii. 4Ɔ 'pää dlɩ ‑këë, ɔ lɛ naa: N ‑yi sɛ n 'kä 'zʋ, wa ‑kaa libho 'mö ‑sɛ, 'n nɩkpa ‑mumuë ‑kaa pälaa. 5Nɩkpa 'wuë ‑wa kää ɔ 'bhidɩba a gɔgbɩɩ, 'n ɔ yuëë bhʋlʋbhlʋ wäzɩ. Tɛkänɔɔ yiɛ, ɔ lɛ naa: Na 'bhidɩba a 'saa ‑n kä bhä gɔgbʋ 'mö? 6Ɔ lɛ: Ɔ 'kpöbalie a gwlɩ ngbï 'mö n kää gɔgbʋ 'mö. Ɔ lɛ naa: Yɩ 'bɔgʋʋ muä dɛ'ɛ, ghlʋ 'mö. ‑Maa glɩ sɛ, ‑n 'kä ‑sɩkaa 'kpöbalie a gwlɩ 'sɔ 'kpöbalie kʋgbä a ‑nʋ 'cɛlɩ. 7‑Mɔmɔɔ yiɛ, ɔ lɛ naa: ‑Nmö ‑naa, 'saa ‑n kä bhä gɔgbʋ 'mö? Ɔ lɛ: Lile a ‑lɛgö a gwlɩ ngbï a gɔgbʋ n kää. Ɔ lɛ naa: Yɩ 'bɔgʋʋ muä dɛ'ɛ, ghlʋ 'mö. ‑Maa glɩ sɛ, n 'kä ‑lɛgö a gwlɩ ‑mʋäna a ‑nʋ 'cɛlɩ. 8Ɔ 'bhidɩba 'nʋä ‑lɛ a wɛlɩ 'laa, ɔ lɛ naa: Libhonʋnyɔzokwë nɩ, 'nyɩɛ ɔ 'nɛɛ. ‑Maa a yɩɛ, mä'ä 'pɩwʋ a nɩkpaa ‑waaa Lagɔ ‑yii, sa'a wa ‑yiɛ wa 'yize 'wa wɛlɩɩ a yɔwʋzʋnɩsɛ, 'n wa ziɛ Lagɔ a ‑nʋa 'wʋ.

Nɩkpɛ nɩ tɩ moni ɔ ‑lagɔ 'wʋ 'zʋa

9‑Amö na a, sɛ'ɛ n zʋanyɩɛ 'dɩ 'mö nɩɩ: Mä'ä 'pɩwʋ a wʋlʋnɔɔ ‑wʋ dulaa, a nɩ 'libhu 'wʋ a 'kä nɩkpa bhɛya 'wʋ köbhä, nzɩɩ 'a mä'ä 'pɩwʋ a ylɩɩ ‑kä bhɩɛ, Lagɔ 'kanyɩa ‑mä ɔ yɔwʋ 'bhle 'nyɛ.

10Nɩkpɛ a ‑mɔɔ ‑suä sasɛ ‑li 'tikïyie, 'mö wa bhɛnɩɛ wa 'kä ‑li 'kädɩ 'yli zʋ ɔ 'kɩ ‑su. ‑Maa nɩkpɛ a ‑mɔɔ 'nɩ ‑li 'tikïyie a ‑susɛ ‑yii, ɔ'ɔɔ bhɛnɩ ɔ 'kä ‑li 'kädɩ sasɛ ‑su. 11Zaa, mä'ä 'pɩwʋ a wʋlʋnɔɔ ‑wʋ dulaa, n‑n 'nu sasɛ ‑suu, ‑lii ‑yɩ kää tenyii dɛsɛ Lagɔ a 'yila 'klʋ a dɔ'wʋ, ‑yɩ 'naa 'kää 'yli bhɩɛɛ, ‑ɔ ‑kami bhä yowʋ 'nyɛ? 12Wa ‑kamö ‑n 'lilɛ a ‑lii 'yli zʋ, ‑n 'nɩ yɩ ‑su sɛ ‑yii, ‑ɔ ‑kamö bhä na ‑nɩ 'nyɛ?

13Nɩkpɛ 'nɩɛ bhɛnɩ ɔ 'kä 'bhidɩbawa 'sɔ 'ɔ dlɩɩ yowʋ 'nyɛ, ɔ 'kʋä 'gämö 'klʋkpamö 'zʋnɩ. ‑Bhlʋ ɔ 'kää ‑lɛ ‑sɛ, ɔ 'kä ‑bhlʋ nimï ‑sɛ. ‑Bhlʋ ɔ 'kää 'klʋkpamö 'zʋ, ɔ 'kä ‑bhlʋ 'ylimö fälanɩ. Sɛ ‑bhʋlʋ ‑kpɔ 'la, ‑sɩbhä a'aa bhɛnɩ a 'kä Lagɔ 'a dilaa yowʋ 'nyɛ, a 'kä'ɛ 'gämö moni 'a dilaa yowʋ 'nyɛ.»

Zezwii yɛ Falizɩɛwaa 'lʋnɩ

(Matie 11.12-13; 5.31-32; Maakö 10.11-12)

14Zezwii bhïlaa wɛlɩ 'la 'wuë, Falizɩɛwa ‑mumuë ‑pʋnɩmɔ a 'yukwli. ‑Maa moni wa ‑waa tenyii zaa, ɔ 'kää sa'a bhïlaa, gla wa pälɔɔ. 15'N Zezwii yuëë 'dɩ 'nyɛ, ɔ lɛ naa: «Abhʋa abhlɩ, nɩkpa a 'yila 'klʋ, ‑kpöö'wʋwʋli a nʋä 'fʋ, ‑maa Lagɔ ‑yi 'a 'mlɩ a dilaa. ‑Ɔ libhïä ɔnyɩ 'kɔdɔ 'mö 'wʋ nɩkpa a 'yila 'klʋʋ, ɔ'ɔɔ Lagɔ 'mäna 'wʋ ‑bhö 'lɩlɩlɩ. 16Bhla'mö a dɔ'wʋ, Moyizɩ 'a Gböö ‑nyɛ Lagɔ 'a 'möbhïlanɩwaa a 'cɩawɛlɩɩ 'sɔ, yɩ 'yize mɩɩ 'kämanɩ a‑a nɩkpa ‑gömö, ‑këë 'n Zaa Batisɩ a 'tɛnyɩɩ yiɛ ghlɛ. Ɛ 'plɩɛ 'wëë, 'n n yiɛ 'pɩwʋ mää Lagɔ 'kämanɩɛ a 'Mänatɩtɩ biaa yi. 'N nɩkpa pää bhʋlʋbhlʋ 'slɛlɛ, wa 'kä ‑mä ghlɩ klɩpaa. 17‑Sɩbhä yɩ ‑wʋ mö ‑maa, Moyizɩ 'a Gböö kä dɛsɛ 'yize. Zlɩɩ ‑nyɛ dʋdʋʋ 'sɔ, yɩ yi 'plɩ, ‑maa Moyizɩ 'a Gböö a 'ylɩlɩyeyike ‑bhlʋ a'bhë 'naa 'kä sɛ ylɛ 'lɩlɩlɩ.

18‑Ɔ ‑kä ɔ 'lɛnglɛ 'suë 'mö ‑sɛ, 'n ɔ ‑kä käbönɔ kwää, 'nyinyloli ɔ nʋä Lagɔ a 'yila 'klʋ a dɔ'wʋ. 'Nglɔ a ‑mɔɔ ɔ 'luwli ‑sɛɛ 'suë 'möö, nɩkpɛ a ‑mɔɔ ‑kɔɔ'ɛ kwää, 'nyinyloli ɔ nʋä.»

Wʋlʋnɩnyɔɔ ‑nyɛ Lazaa 'sɔ a ninea

19Zezwii mɔɔ bhïlaa 'Ylɩ ‑bhlʋ 'mö wɛlɩ, ɔ lɛ naa: «Nɩkpɛ ‑bhlʋ mɔɔ ‑wʋä ‑lɛ. Wʋlʋ ɔ wʋlʋä tenyii. Wʋlʋnɩbanɩ ‑yɩ 'tɛɛ tenyii 'pɛlʋʋ, 'mö ɔ ‑plaa 'kwädlɩ 'mö. 'Mäna 'käda ɔ nʋä 'kwädlɩ, lilili 'kädɩ nɩ 'mö ɔ liɛ. 20‑Maa ngäzɩnyɔ ‑bhlʋ ‑wʋmö a 'yɛ ‑lɛ. Ɔ nglɩɛ Lazaa. ‑Lɛ ɔ pöä 'kwädlɩ wʋlʋnɩnyɔ 'la a ngloluë 'wʋ. Ɔ 'wuë jɩɩ a dɔ'wʋ, ɔ'ɔ köbhänɩdɛ ‑kä. 21Ngɔmʋ a za, wʋlʋnɩnyɔɔ a ‑budu 'mö a lilea wa sɩɛnɩɛ, wa pää 'kwlɛ 'möö, ɔ yɩbhä a nyɩasɛ ɔ 'ka li, ‑maa wa'a 'nyɔnyɩ. ‑Yɩ ‑bhöä tenyii ngäzɩ 'wʋ a'bhë miɛ nɩɩ, gʋʋ mɩɩ yiɛ 'kwädlɩ 'ɔ jɩɩ 'ylimö mɛnɩɛ.

22'Ylɩ ‑bhlʋ 'mö, ngäzɩnyɔ 'la 'n ɔ yiɛ 'ku. Ɔ 'kuä, 'n Lagɔzuzuku yiɛ yi, 'n yɩ yiɛ 'ɔ 'wugaa 'wʋ 'libhï, ‑mä ghäyɩ 'wʋ, ‑aa dɩba 'kɔdɔ Ablaamö yɔwʋ, 'n yɩ yeaa ‑mä kwä. Ylɩ ‑mɛmɛɛ ‑bhlʋ 'mö, wʋlʋnɩnyɔ 'la 'n ɔ yi'ɛɛ ɔbhlɩ 'ku, 'n wa yoo ziza. 23'N ɔ yiɛ ‑mä 'kudu 'wʋ mö. ‑Mä ɔ 'yɩnɩɛ tenyii 'klɩ. Ɔ ‑wʋ 'klɩ 'yɩ dɔ'wʋʋ, ɔ lɛ zʋ a sɛ'ɛ, ‑mä ghäyɩ 'wʋ 'yuku 'yuku 'n ɔ yiɛ ‑mä Ablaamö 'ylɩmö. ‑Lɛ ɔ yɔwʋ Lazaa glɩ ‑lɛ. 24Ɔ 'yoo 'ylɩmö cuu, 'n ɔ yiɛ tenyii 'mö 'kpa, ɔ lɛ: ‑Atʋ Ablaamö aa, ‑yayaya 'pä yɩ na ngäzɩdlɩ aaa! Tie Lazaa ɔ 'kä ‑mä 'ɔ wïleyii 'nyu 'mö 'ngwa, ɔ 'kä yi ɔ 'kä 'na mɩɔɔ a 'yize ‑zlɛlɛ päla aaa! ‑Maa ‑kosu nɩ 'mö mä n ‑wʋä dɛ'ɛ, 'klɩ n yɩɛ tenyii aaa! 25‑Maa Ablaamö lɛ naa: Na 'yu, ‑na'bhë ‑n ‑yi sɛ, dɛ ‑n ‑wʋ a‑a ‑mä dʋdʋ 'wʋʋ, ‑li a ‑li a ‑bɛ ‑n ghlɩ a‑a, ‑maa Lazaa ɔbhlɩ, ngäzɩ a 'kädɩ ɔ ‑bhö a‑a 'wʋ. ‑Sɩkaa a dɔ'wʋ, 'ɔ 'yliyɔwʋsɩɔtɛnyɩɩ mɛɛ dɛ'ɛ, ‑nmö ‑naa, ‑na'a 'klɩyɩtɛnyɩɩ mɛ'ɛɛ dɛ'ɛ. 26‑Yɩ 'tɛɛ 'mö a'bhë miɛ nɩɩ, ‑a ‑nyɛ abhʋa 'sɔ a jijo'wʋ, 'bhʋkwa 'käda ma‑a ‑wʋä ‑lɛ. Zaa, nɩkpɛ ‑kä ɔ 'kä mä'ä 'bhöö, mä'a mä a ‑wʋä da'a ɔ 'kä ‑mä möö, ɔ'ɔɔ ghlɛnɩdɛ ‑kä. 'N nɩkpɛ 'nɩɛ'ɛ bhɛnɩ ɔ 'kä ‑mä'a 'bhöö ɔ 'kä mä'ä yi. 27Ɔ gbää sa'a, wʋlʋnɩnyɔɔ lɛ naa: 'Ɔ! Zaa, ‑Atʋ, yɩ ‑kä sa'a 'mö ‑wʋʋ, ‑yayaya tie Lazaa, ɔ 'kä ‑mä dʋdʋ 'wʋ 'bɩwʋ mö, ‑lɛ na dɩba a ‑kosu yɔwʋ, ɔ 'kä ‑lɛ mö. 28Na ‑daayuë ngbï ‑wʋ ‑lɛ. Ɔ 'kʋä 'dɩ kwä, ɔ 'kʋä ligbaa mö, nzɩɩ ‑zlɩ wa ‑kä 'kuu, mä n ‑wʋä dɛ'ɛ 'n n yɩɛ 'klɩɩ, wa tɩa ‑mä yi. 29Ablaamö lɛ naa: Ɛ kä ‑na ‑daayuë a ligbaligba dɔ'wʋʋ, Moyizɩ ‑nyɛ Lagɔ 'a bhla'mö a 'möbhïlanɩwaa 'sɔ, 'wa Lagɔbɔgwɩɩ, wa kɩ zaa, 'mö wa nɩ ‑pʋnɩ 'yukwli. 30Ɔ lɛ naa: ‑Atʋ Ablaamö, ‑mi'la 'wuë, yɩ'ɩɛ ‑zu, ‑maa nɩkpɛ ‑kä glu 'wlʋ, 'n ɔ ‑kʋä 'dɩ 'nyɛɛ möö, wa yi ligba wa yi 'wa ‑lizokuu kɛ'mö ‑sɛ. 31‑Maa Ablaamö lɛ naa: Moyizɩ ‑nyɛ Lagɔ 'a 'möbhïlanɩwaa 'sɔ, 'wa Lagɔbɔgwɩɩ 'n wa 'nɩ 'yɩbhä wa 'kɩ 'klʋkpamö zʋʋ, nɩkpɛ a'bhë yi glu 'wlʋ ɔ yuë 'dɩ 'nyɛɛ mö ‑kë, 'yukwli 'mö wa 'kää 'tɛmanɩ 'yize.»

S'ha seleccionat:

Lwiikö 16: bet

Subratllat

Comparteix

Copia

Vols que els teus subratllats es desin a tots els teus dispositius? Registra't o inicia sessió

Més informació sobre BdG2

Lwiikö 16

Versets bíblics populars de
Lwiikö 16

Escolta Lwiikö 16

La Bíblia:

Bété, Guiberoua

Versió: BdG2 - bet

Lwiikö 16

Lwiikö 16

Versets bíblics populars de Lwiikö 16

Escolta Lwiikö 16

La Bíblia:

Bété, Guiberoua

Versió: BdG2 - bet

Lwiikö 16

Versets bíblics populars de
Lwiikö 16