JUAN 10
10
Llama corralhuan yarichishpa yachachishcami
1Jesusca cashnami nirca: Na llullashpami cangunataca cashna nini: Llama corralman, na punguta yaicushpa, maitapash yaicuj runaca, shuhuajmi, macashpa quichushpa apajmi. 2Ashtahuangarin, punguta yaicuj runami llamacunata michij. 3Pungupi ricuj runa, punguta pascajpica, llamacunapash michij rimashcataca rijsinllami. Shina cajpimi michij runaca, paipaj llamacunataca shutipi cayashpa corralmanda llujchin. 4Paipaj llamacunata tucuillata llujchishpaca, ñaupashpa rinllami. Llamacunapash, michij runa rimajta rijsishpaca, catishpa rinllami. 5Na rijsishca runataca, na catinllachu, ashtahuangarin, na rijsishca shimita uyashpami, manllarishpa maitapash calpan” nijurcami.
6Paicunata yarichingapami, Jesusca cashna nijurca. Ashtahuangarin imamanda chashna nijujtapash, paicunaca na yacharcachu.
Jesusllami ali Michij
7Jesusca, cutinmi paicunataca cashna nirca:
“Napacha llullashpami cangunataca cashna nini: Ñucami, llamacuna yaicuna pungu cani. 8Ñucapaj punda shamujcunaca, tucuicunami shuhuacuna, huañuchijcuna carca. Ashtahuangarin llamacunaca, paicunataca na uyarcachu. 9Ñucallami pungu cani. Maijambash Ñucata catishpaca quishpiringami. Paicunaca, yaicushpapash, llujshishpapash, micunaguta taringallami.
10Shuhuaca, shuhuangapa, huañuchingapa, tucuchingapallami shamun. Ñucaca, causaita charichun, cushijushpa causaita charichun carangapami shamurcani. 11Ñucallami, ali michij cani. Ali michij cashpami, Ñucapaj llamacunamandaca huañusha. 12Ashtahuangarin, culquimandalla michij runaca, na Paipaj llamacuna cajpimi, na michijpacha cashcamandaca, atuj shamujta ricushpaca saquishpa calpanlla. Shina cajpimi, atuj shamushpa, llamacunata japishpa apashpa, shujcunataca caita chaita calpachin. 13Culquimandalla michij cashcamandami, chai runaca, llamacunaca imapash tucuchun saquishpa calpanlla.
14Ñucallami ali michij cani. Shina cashpami, Ñuca llamacunataca rijsini. Shinallata, paicunapash Ñucataca rijsihuanmi. 15Imashnami Ñuca Taitapash Ñucata rijsihuan, chashnallatami Ñucapash, Ñuca Taitataca rijsini. Ñuca llamacunamandaca huañushallami. 16Shinallata, na cai corralmanda shuj llamacunatapash charinirami. Paicunatapash pushamunami cani. Paicuna, Ñuca villajushcata uyashpa cazunajujpica, shujlla corralmi tiyanga. Shina tucujpimi, paicunataca Ñucalla michijusha.
17Chaimandami Ñuca Taitaca juyahuan. Paicunamandaca, huañushpapash cutinmi causarina cani. 18Ñucataca pipash na huañuchi ushangachu. Ashtahuangarin, Ñucallatami huañuchi tucungapa japi tucusha. Huañuchi tucungapapash, causaringapapash ushaita charinimi. Cai mandashcataca, Ñuca Taitamandami chasquircani” nijurcami.
19Shina nijpimi judiocunaca, paicunapura maitapash nirinajushpa cutin fiñanajurca. 20Paicunapuramandaca ashtacacunami:
“Cai runaca aya jundashca, juizu illajmari ¿imapata Paitaca uyanajunguichi?” ninajurca.
21Shina ninajujpimi huaquingunaca cashna ninajurca:
“Cai shimicunaca na ayamandachu, ayaca ¿ñausacunapaj ñavicunata pascai ushangallachu?” ninajurca.
Judiocunami Jesustaca na chasquirca
22Diosta yarina huasita, Diosman mingashcata yarishpami, Jerusalenbica cushijui punllata ruranajurca. Chai punllacunaca, tamia punllacunami carca. 23Jesusca, Diosta yarina huasi ucupi, Salomón rurashca portal quimiriapimi purijurca. 24Chaipimi judiocunaca, Jesusta chaupipi churashpa cashna ninajurca:
“¿Ima punllacamanda ñucanchi almata cashna manllachishpa purigringui? Canllata Cristopacha cashpaca, na pacashpa ñucanchiman villailla” ninajurcami.
25Shina nijpimi Jesusca, paicunataca cashna nijurca:
“Chaitaca cangunaman villajujpipash na crishpami causanguichi. Ñuca Taitapaj shutipi imatapash rurashcacunami Ñucamandaca ña villajun. 26Ashtahuangarin, Ñuca villashcashnallata, cangunaca, na Ñucapaj llamacuna cashpami na crishpa causanguichi. 27Ñucapaj llamacunaca, Ñuca rimashcata uyanmi. Ñucapash paicunataca rijsinimi, paicunami Ñucataca catinajun. 28Paicunamanmi, causaita causagrinataca carani. Shina cajpimi, napacha chingaita chingagringa. Ñucapaj maquimandaca pipash na quichui ushangachu. 29Paicunataca, Ñuca Taitami Ñucaman carahuarca. Paimi, tucuita yali ushaita charin. Shinamandami, Ñuca Taitapaj maquimandaca, pipash na quichushpa apai ushanga. 30Ñucahuan, Ñuca Taitahuanga shujllami canchi” nijurcami.
31Shina nijpimi judiocunaca, Jesusta huañuchingapa rumicunata cutin japinajurca. 32Shinamandami Jesusca, cashna nishpa tigrachirca:
“Ñuca Taita ushaita carajpimi, ashtaca juyailla ruraicunata rurashpa ricuchijushcani. Chaicunamandaca ¿maijan rurashcamandata rumicunahuan huañuchigrihuanguichi?” nijurcami.
33Shina nijujpimi judiocunaca, cashna ninajurca:
“Can alita rurashcamandaca, na rumicunahuan huañuchishunllu, ashtahuangarin, runa cashca jahua, Taita Diosta yangapi churashpa, Canllata diosmi cani nijushcamandami, huañuchingapa munanchi” ninajurcami.
34Shina nijpimi Jesusca, cashna nirca:
“Cangunata mandashpa quilcashcapica, ‘cangunaca dioscunami canguichi’ nishpa villajujtaca ¿nachu ricushcanguichi?. 35Taita Dios villashcata chasquijcunataca: ‘Cangunaca, dioscunami canguichi’ nishcami (chaimandami, Dios quilcachishcataca na yangapi churana). 36Ñuca Taitami, Ñucataca, Paipajlla cachun shicanyachishpa cai pachaman cachamuhuarca, chaimandami: ‘Taita Diospaj Churimi cani’ nijuni. Ashtahuangarin cangunaca: ‘Taita Diostami yangapi churajungui’ nishpachu ¿juchachihuanguichi? 37Ñuca Taita mandashcacunata na pactachijujpica, na crinachu cahuanguichi. 38Ashtahuangarin, Ñuca Taita mandashcacunatami rurajuni. Ñucata na crishpapash, Ñuca imata rurajujtaca crinami canguichi. Chaita crishpallami, Ñuca Taita Ñucahuan causajujta, Ñucapash, Ñuca Taitahuan causajujta aliguta yachanguichi” nijurcami.
39Shina nijpica, cutin japingapa munajpimi Jesusca paicunapaj maquimanda chingarca.
40Juan, punda bautizajushca Jordán yacu chimbaman cutin rishpami Jesusca chaipi saquirirca. 41Ashtaca gentecunami, Paipajman shamushpa cashna ninajurca:
“Juanga, na rurai ushanallacunataca na rurashpa ricuchircachu. Ashtahuangarin Jesusmanda, pai imata villajushcapash na llullachu cashca” ninajurcami.
42Chaipica, ashtaca gentecunami Jesustaca crinajurca.
S'ha seleccionat:
JUAN 10: QVI16
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.