JUAN 12
12
Betania pueblopimi mishquilla ashnajujta Jesuspaj umapi talishpa javishca
(Mat. 26:6-13; Mar. 14:3-9)
1Pascua punlla chayangapaca, sucta punllalla illajpimi Jesusca, Lázaro causajuj Betania puebloman shamurca. Paitami, huañushcacunapaj chaupimanda causachishca carca. 2Chaipica, chishi micuita ruranajushpami Martaca micunata carajurca. Shinallata, mezapi tiyanajujpurapica, Lazaropashmi Jesushuan pacta tiyajurca. 3Chaipimi, Mariaca ashtaca culquipaj jatuna mishquilla ashnajun nardo sisamanda llujchishcata, shuj libra canatashna apamurca. Chaihuanmi Jesuspaj chaquipi javishpa, paipaj ajchahuan chaquichijurca. Chai huasi ucuca mishqui mishquitami ashnajurca. 4Jesuspaj yachajujpuramanda, Simonbaj churi Judas Iscariotemi, Jesustaca japichina carca. Paica:
5“¿Imashpata chai mishquilla ashnajujtaca quimsa patsaj denario culquipaj jatushpa, huajchacunaman na carashcanga?” nijurcami.
6Paica, huajchacunata llaquishcamandaca na chashna nijurcachu. Ashtahuangarin paica, muchilapi churashca culquita apashpa purij cashpami, shuhuashpandi purij carca. 7Chaimandami Jesusca cashna nirca:
“Canga saquinallami cangui. Ñucata pambana punllapajmi paica chashna alichishpa charijushca. 8Huajchacunaca cangunapurapica tiyangallami. Ashtahuangarin, Ñucami cangunahuanga na unaicaman causajushalla” nijurcami.
Lazarotaca huañuchinami canchi ninajushcamanda
9Chai pueblopi, Jesús purijujta yachashpami, judiocunaca ashtacacuna chaiman shamunajurca. Paicunaca, na Jesusta ricungapalla shamunajurcachu, Lazarotapash ricungapami shamunajurca. Lazarotaca, huañushcacunapaj chaupimandami causachishca carca. 10Ashtahuangarin, mandaj sacerdotecunaca, Lazarotapash huañuchingapami ña parlashcalla carca. 11Lazarota causachinta ricushpami ashtaca judiocunaca, paicunata na catishpa, Jesustara crishpa catinajurca.
Jesusca, alicachi tucushpami Jerusalenman yaicushca
(Mat. 21:1-11; Mar. 11:1-11; Luc. 19:28-40)
12Chai cayandi punllami, cushijui punllaman shamushca ashtaca gentecunaca: Jesuspashmi Jerusalenman shamujun nijta uyanajurca. 13Paicunaca, quiru malquicunata cuchushpami, Jesusta tuparingapa llujshinajurca. Paicunaca cashna nishpami caparinajurca:
“¡Diosca ninanda alicachi tucushca cachun! ¡Jatun Diospaj shutipi shamuj, Israelcunata Jatun Mandajca aligumari cangui ni tucushca cachun!” ninajurcami.
14Dios quilcachishcapi nijushcashnami Jesusca, chairalla viñajuj shuj burrugupi tiyarishpa shamurca. Chai quilcashcapillatami cashna nijun:
15“Sion pueblopi causajcuna, na manllanachu canguichi.
Ricuichi, cangunata jatun Mandajmi,
chairalla viñajuj shuj burrugupi tiyarishpa shamujun” nijunmi.
16Callaripica, imamanda chashna tucujujtapash, Jesuspaj yachajujcunaca na yacharcachu. Ashtahuangarin, Taita Dios Jesusta causachishpa jatunyachishca jipami, Paimanda quilcashca pactashcata yacharca.
17Lazarotaca, Jesusmi huañushcacunata churana ucumanda cayachishpa causachirca. Chaita ricushca cashpami, shuj gentecunamambash villanajurca. 18Chashna, na rurai ushanallata rurashpa ricuchishcata yachashpami, ashtaca gentecuna Jesusta tuparingapa llujshimurca. 19Ashtahuangarin fariseocunaca, paicunapura parlarishpami:
“Ña ricunguichimi. Yanga saquishpaca, na imatapash rurai usharinllu. Ricuichi, tucui gentecunamari cunanga Paitalla catinajun” ninajurca.
Griego gentecunapashmi, Jesustaca mascanajushca
20Jerusalenbi, Taita Diosta jatunyachingapami, huaquin griego gentecunapash vichai rishca carca. 21Paicunami, Galilea llactapi tiyajuj Betsaida pueblomanda Felipepajman quimirishpa:
“Ñucanchipash, Jesusta ricungapami munapanchi, taitalla” ninajurca.
22Shina nijpimi Felipeca, Andresman villagrirca. Chai jipaca paicunaca ishcandimi Jesusman villangapa rirca. 23Paicuna villajpimi Jesusca:
“Runa Aichayuj tucushca Ñucataca, ninanda alicachina punllacunami ña chayamushca. 24Napacha llullashpami cangunataca cashna nini: Trigo muyu alpapi na urmashpa, na pambarishpaca, muyullata tiyajungallami. Ashtahuangarin, pambarishpa viñashpallami ninanda fucunga. 25Maijambash paipaj causaita juyashpaca, chingaitami chingagringa. Ashtahuangarin, cai pacha causaita millanayachishpaca, causaitami causagringa. 26Ñucata catingapa munashpaca, catihuaichilla. Ñucapajta rurajushcamandami, Ñuca maipi cajpipash Ñucahuan causagringa. Maijan ñucapajta rurajtami, Ñuca Taitaca ninanda alicachinga.
Jesusca, Pai huañuchi tucunatami villajushca
27Cunanga, Ñuca almapimi ninan llaquipacha cani. Cunanga ¿imatata nigrini? Ñuca Taitalla, quishpichihuailla, ¿nishachu imatayari? Ashtahuangarin, chai llaquitaca apanapacha cashpami cunangaman caipi cani. 28¡Ñuca Taitalla, Cambaj shutitaca ninanda alicachishca cachun!” nijujpimi, jahua pachamandaca cashna rimamuj uyarirca:
“Ñami ninanda alicachircani. Cutimbashmi ninanda alicachisha” nircami.
29Chashna rimajujtaca, chaipi shayanajuj ashtaca gentecunapashmi uyarca. Paicunaca:
“Rayumari culun nijun” ninajurcami.
Huaquingunaca:
“Angelmari rimamujun yarin” ninajurcami.
30Shina ninajujpimi Jesusca, cashna nirca:
“Ñucapaj ali cachunga, na cashna uyarimunllu. Ashtahuangarin cangunapaj ali cachunmi, cashna uyarimujun. 31Cai pachapajtalla rurashpa causajcunata llaquichina punllacunami ña chayamushca. Shinallata, cai pachapajtalla rurachun, mandajpash canllamanmi shitai tucunga. 32Caspi jahuapi huarcui tucushpaca, tucuicunatami Ñucapajman pushamusha” nijurcami.
33Chashna nishpaca, paillata imashna huañuchi tucunatami Jesusca villajurca. 34Shina nijpimi gentecunaca, cashna nirca:
“Mandashca shimipica: ‘Cristoca causaitami causanga’ nishpa villajujtami uyashcanchi. Cunanga ¿imashpata Runa Aichayuj tucushca Ñucataca, caspipimi huarcunga nijungui? Runa Aichayuj tucushca runaca, maijanda canga?” ninajurcami.
35Shina ninajujpimi Jesusca, cashna nijurca:
“Punchayachij michaguca, ashatallami cangunahuan caipi canga. Yana tuta ama ñapash cangunata japichunga, micha caipi cajpillatami chai michapi purina canguichi. Yana tutapi purijcunaca, maiman rijurijtapash na yachanllu. 36Micha caipi cajpillatami cangunaca, ucha Paita crina canguichi. Shina crishpami, michapaj huahuacuna tucunguichi” nijurcami.
Jesusca, chashna tucuita nishpallami, paicunapaj chaupimanda llujshishpaca, paicunamanda pacajushpa rirca.
Judiocunaca Jesusta na crishcachu
37Ashtahuangarin paicunapaj ñaupajpi, na rurai ushanallacunata rurashpa ricuchijpipash, Jesustaca na crinajurcachu. 38Profeta Isaías villashca pactachunmi, cashna nirca. Paica:
“Jatun Dioslla,
¿ñucanchi villashcataca, pita crishcayari?.
Jatun Diospaj ninan ushaitaca, ¿pita ricushcayari?” nijushcami.
39Paicuna imamanda na crinatapash, Isaiasllatami cashna nijurca:
40“Jatun Diosllatami, paicunapaj ñavitaca ñausayachirca.
Shinallata, paicunapaj shungutapashmi shinlliyachirca.
Paicunapaj ñavica ama ricuchun,
paicunapaj shungupash ama yachai ushachunmi, chashna rurarca.
Ñuca paicunata alichijpi ali tucungapapash,
ñucapajman na tigramunllu” nijurcami.
41Jesustaca, ninan ushaita charijta ricushca cashpami, Isaiasca chashna nishpa villajurca. 42Chashna cajpipash, mandajcunarami Jesustaca ashtacacuna crinajurca. Sinagogamanda, fariseocuna llujchishpa cachanata manllashpami, Jesusta crishcataca na villanajurca. 43Gentecunapaj ñaupajpi alipi ricuringapa ashtahuan munashpami,Taita Diosta catinajushcataca na villanajurca.
Jesús rimashca shimicunami gentecunataca llaquichinga
44Jesusca, caparishpami cashna nijurca: “Maijambash Ñucata crishpaca, na Ñucatalla crinllu. Ashtahuangarin, Ñucata cachamuj Taitatapashmi crin. 45Ñucata ricushpaca, Ñucata cachamuj Taitatapashmi ricujun. 46Ñucami, michagushna punchayachingapa cai pachaman shamurcani. Ñucata crishpaca, ama ashtahuan yana yana tutapishna causanajuchunmi shamurcani. 47Ñuca villajuj shimicunata uyashpapash na cazujtaca, na Ñuca llaquichishachu. Cai pachapi causajcunata llaquichingapaca, na shamurcanichu. Ashtahuangarin cai pachapi causajcunata quishpichingapami shamurcani. 48Ñucata na chasquishpa, Ñuca villashca shimicunata na crishpaca, Paita llaquichijtaca ñami charin. Paitaca, Ñuca villajushca shimicunami, imashna cashcata ricuchishpa llaquichinga. 49Ñucapaj munaica, na cashna villajunichu. Ashtahuangarin, Ñucata cachamuj Taitami imata nichumbash, imata villachumbash Ñucataca mandahuarca. 50Paipaj mandashca shimicunaca, causaita causagrinata caraj cashcatami yachani. Chaimandami Ñuca imata villashpapash, Ñucapaj Taita mandashcatalla villajuni” nijurcami.
S'ha seleccionat:
JUAN 12: QVI16
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.