JUAN 8
8
Cazarashca jahua shujhuan causajuj huarmimanda
1Chai jipami Jesusca, Olivo yuracuna tiyaj urcuman rirca. 2Chai cayandi tutamandaca, Diosta yarina huasimanmi tigrarca. Chaipimi, ashtaca gentecuna Paipajman shamujpi Jesusca, tiyarishpa yachachijurca. 3Chaipi cajpimi, mandashca Shimita yachachijcunapash, fariseocunapash, shuj huarmi huainayajushpa japi tucushcata apamurca. Chai huarmitaca, tucuicunapaj chaupipi shayachishpami.
4Cashna ninajurca:
“Yachachij, cai huarmica cazarashca jahuami shujhuan huainayajushpa japi tucushca. 5Moisés mandashca shimicunapica, cashna huarmicunataca rumicunahuan huañuchinguichi nijunmi. ¿Cutin, canga ima ninguita?” ninajurcami.
6Paicunaca, Jesús imata tigrachijpipash juchachingapami shina tapunajurca. Ashtahuangarin, Jesusca urai cumurishpami, alpapi maqui dedohuan quilcajurca. 7Paicuna cutin cutin tapunajujpimi cashna nijurca:
“Cangunapurapi maijambash jucha illaj tiyashpaca, cai huarmitaca rumihuan huañuchi callarichun” nijurcami.
8Shina nishpaca, cutin cumurishpami, alpapi quilcashpa catijurca. 9Ashtahuangarin chashna nijta uyashpami, paicunallata na ali carishcata yarishpaca, rucumanda callarishpa, chairalla viñaicunacaman, shuj shuj llujshishpa rinajurca. Shina llujshijpimi Jesusca, chaupipi shayajushca huarmihuanlla chaipi saquirirca. 10Shayarishpa Jesús ricushpaca, chai huarmilla shayajujta ricushpami cashna nirca:
“Canda na alicachijcunaca, ¿maitata rirca? ¿Maijambash nachu huañuchishun ninajurca?” nijurcami.
11Shina nijpimi chai huarmica:
“Pipash na imata nihuarcachu, mandaj Taitalla” nirca.
Shina nijpimi Jesusca cashna nijurca:
“Ñucapash na llaquichisha ninichu. Cunanga rilla, ama ashtahuan chashna juchacunataca rurashpa causanguichu” nijurcami.
Jesusca, cai pachapi causajcunapaj michami
12Jesusca, cutinmi cashna nishpa villajurca:
“Ñucami, cai pachapi causajcunapajca, punchayachij micha cani. Ñucata catijcunaca, na yana yana tutapishna causanajungachu. Ashtahuangarin, causaita causagrinata caraj michatami charinga” nircami.
13Shina nijpimi fariseocunaca cashna ninajurca:
“Canllata alipi ricuringapami, Canmandallata chashna villajungui, chai villashcacunaca llullapachami” ninajurcami.
14Shina nijpimi Jesusca cashna nirca:
“Ñucamandallata cashna villajushpapash, Ñuca villashca shimicunaca, napacha llullachu. Ñucami, maimanda shamushcatapash, maiman tigranatapash yachani. Ashtahuangarin cangunaca, Ñuca maimanda shamushcatapash, maiman rigrijujtapash, na yachashpami chashna ninajunguichi. 15Cangunaca ñavipi ricushpallami pitapash yangamanda juchachinguichi. Ashtahuangarin Ñucallami, pitapash na yangamanda juchachijuni. 16Ñuca llaquichinallata cashpaca, na yangamandaca llaquichishachu. Ashtahuangarin, na Ñucalla llaquichishpami, Ñucata cachamuj Taitahuan llaquichishun. 17Mandashca shimicunapica, cashna quilcashcami tiyajun: ‘Chashnapachami nishpa, ishcaipura runacuna villajpillami crina canguichi’ nijunmi. 18Shina cajpimi Ñucapash, Ñucamandallata villajuni. Shinallata Ñucata cachamuj Taitapash, Ñucamandami villajun” nijurcami.
19Shina nijpimi paicunaca:
“Cambaj Taitaca, ¿maipitayari?” nishpa tapunajurca.
Shina tapujpimi Jesusca, cashna nijurca:
“Cangunaca Ñucatapash, Ñuca Taitatapash na rijsishpami, chashna tapunajunguichi. Ñucata rijsishpaca, Ñuca Taitatapash rijsinguichimanmi” nircami.
20Jesusca, Diospaj huasi ucupi, ofrendacunata churana quimiriapimi, cai shimicunataca yachachijurca. Paita japina punllacuna nara chayajpimi, prezu japitaca pipash na usharca.
Ñuca rijuj llactamanga, cangunaca na shamui ushanguichica nishcami
21Jesusca, cutinmi paicunataca cashna nijurca:
“Ñuca rijpica, cangunaca mascahuanguichimi, ashtahuangarin cangunapaj juchapillatami huañunguichi. Shina cashpami cangunaca, Ñuca rijuj llactaman shamuitaca na ushanguichi” nijurcami.
22Shina nijujpimi judiocunaca, paicunapura cashna ninajurca:
“¿Paillata huañuchirina cashpachu: ‘Ñuca rijuj llactaman shamuitaca, na ushanachu canguichi’ nijun, imashi?” ninajurcami.
23Shina nijpimi Jesusca, cashna nijurca:
“Cangunaca, cai jucha pachamandami canguichi. Ñucaca, jahua pachamandami cani. Cangunaca, cai pachamandami canguichi. Ashtahuangarin Ñucaca, na cai pachamanda canichu. 24Chaimandami cangunataca: ‘Cangunapaj juchapillatami huañunguichi’ nircani. Ñucata canguna na crishpaca, juchahuanllatami huañunguichi” nircami.
25Shina nijpimi:
“Canga, ¿pita canguiyari?” ninajurca.
Shina tapujpimi Jesusca cashna nijurca:
“Callarimandapachami, cangunaman villajushcani. 26Cangunataca, ashtaca na alicunata ricushca cashpami imata ninatapash, llaquichinatapash charini. Ñucata cachamuj Taitaca, napacha llullachu. Shinamandami, Ñuca Taita ima nijujta uyashcata, cai pachapi causajcunaman villajuni” nijurcami.
27Taita Diosmanda chashna villajushcataca, pipash na yuyaipi japircachu. 28Shinamandami, Jesusca cashna nijurca:
“Cangunaca, Runa Aichayuj tucushcataca jahuapi huarcushpami, Ñuca cajtaca yachanguichi. Na Ñucapaj munaita imatapash rurajushpa, ashtahuangarin, Ñuca Taita yachachishcatalla villajujtami yachanguichi. 29Ñucata cachamuj Taitaca, Ñucahuanmi. Ñucaca, Pai mandashcatami pactachishpa causani, shina cajpimi, Ñucataca na saquihuashca” nijurcami.
30Chashna villachijujpimi, Paitaca ashtacacuna crinajurca.
Na llullashpa villajushcami, cangunataca cacharichinga
31Jesusca, Paita crishpa catinajuj judiocunatami cashna nijurca:
“Ñuca yachachishca shimicunata, canguna cazushpa catishpaca, Ñucapaj yachajujcunapachami canguichi. 32Shina cashpami, na llullashpa villajuj shimitaca rijsinguichi. Na llullashpa villajuj chai shimillatami, cangunataca cacharichinga” nijurcami.
33Shina nijpimi Jesustaca, cashna ninajurca:
“Ñucanchica, taita Abrahambaj miraicunamari canchi. Shina cashpami, na pipajpash gañan canchi. ¿Imashpata ñucanchitaca: ‘Cachari tucunguichimi’ nijungui?” ninajurcami.
34Shinamandami Jesusca, cashna nirca:
“Napacha llullashpami cangunataca cashna nijuni: Juchata rurashpa causajcunaca, tucuillami juchapaj gañan causanajun. 35Gañanga, amupaj huasipica na causajungallachu. Ashtahuangarin, amupaj churillami chai huasipica causajungalla. 36Shinamandami, Diospaj Churi cacharichijpica, ña cachari tucushcapacha saquiringuichi. 37Cangunataca, Abrahambaj miraicuna cajtaca yachanimi. Shina cashpapash, Ñuca villajuj shimicunata na chasquishpami, Ñucataca huañuchishunpacha nishpa purinajunguichi. 38Ñuca Taitahuan pacta cashpa, Ñuca ricushcatapachami villajuni. Ashtahuangarin, cangunapaj taita yachachishcata uyashpallami ruranajunguichi” nijurcami.
Cangunapaj taitaca diablomi nishcami
39Shina nijpimi:
“Abrahammi ñucanchipajca taita” ninajurca.
Jesusca, paicunataca cashnami nijurca:
“Cangunaca, Abrahambaj miraicuna cashpaca, pai rurashcatami ruranguichiman. 40Ashtahuangarin, Taita Diosmanda na llullashpa villajujpimi Ñucataca, huañuchingapa munashpa purinajunguichi. Abrahamga, na chashna rurarcachu. 41Cangunaca, cangunapaj taita imata rurashcatami rurashpa causanajunguichi” nijurcami.
Shina nijpimi, cashna ninajurca:
“Ñucanchica, na huainapaj huahuacunachu canchi. Ashtahuangarin shujlla Taitatami charinchi, paica ñucanchi Taita Diosmi” ninajurcami.
42Shina nijpimi Jesusca, paicunataca cashna nirca:
“Taita Dios cangunapaj Taita cajpica, Ñucataca ninandami juyahuanguichiman. Ñucallami, Ñuca Taitapajmanda llujshishpa shamurcani. Na Ñucapaj munaica shamurcanichu. Ashtahuangarin, Paimi cachamuhuarca. 43Ñuca villajuj shimicunataca, ¿ima nishpata na yuyaipi japinguichi? Ñuca villajujta uyangapa na munashcamandami chashna canguichi. 44Cangunapaj taitaca diablomi. Shinamandami, pai munashcata rurashpa causanguichi. Paica, callarimandapachami, huañuchijpash, llullashpalla causajpash cashca. Paica, llullapacha cashpami, paipaj munaita llullashpa rimajun. Llullapacha cashpami, llullapaj taita. 45Na llullashpa villajujpipash, Ñucataca na crishpami causanajunguichi. 46¿Cangunapuramanda maijanda Ñucataca: ‘Juchata rurashcanguimari’ ni ushanguichi? Shina na llullashpa villajujpipash, ¿ima nishpata na crihuanguichi? 47Taita Diospaj huahuacunaca, Diospaj Shimicunatami uyashpa causanajun. Ashtahuangarin cangunaca, na Taita Diospaj huahuacuna cashpami, Paipaj shimita uyangapaca napacha munanguichi” nijurcami.
Imapash nara tiyajpillatami, Cristoca ña causashca
48Shina nijpimi judiocunaca, cashna ninajurca:
“‘Candaca, aya jundashca runamari, Samaria llactamanda shamushcangui’ nishpaca, ali yachashpami nishcanchi” ninajurcami.
49Shina nijpimi Jesusca, cashna nirca:
“Aya jundashca runaca na canichu. Ashtahuangarin Ñucapaj Taitatami, ninanda alicachijuni. Cangunami, Ñucata na alicachishpa chashna nihuanguichi. 50Shina cajpipash Ñuca alicachi tucungapaca na munanichu. Ñuca Taitami Ñuca alicachi tucuchunga munan. Paimi, Ñucata na alicachijcunataca llaquichinga. 51Na llullashpami, cangunataca cashna nijuni: Ñuca villajushca shimicunata cazushpaca, napacha huañungachu” nijurcami.
52Shina nijpimi judiocunaca, cashna ninajurca:
“Aya jundashca cajtaca, cunanga alipachami yachanchi. Abrahambash, profetacunapash huañushcami. Canga: ‘Ñuca villajushca shimita cazushpaca, napacha huañungachu’ nijunguimi. 53¿Canga, ñucanchi huañuj taita Abrahamdapash ashtahuan yalichari cangui?. ¡Profetacunapash huañushcami! Canga, ¿maijan cani yanguita?” ninajurcami.
54Shina nijpimi Jesusca, cashna nishpa tigrachirca:
“Ñucamandallata alicachirishpa nijushpaca yangapachami canga. Ashtahuangarin Ñuca Taitami, Ñucataca ninanda alicachihuan. Paitami, cangunaca: ‘Ñucanchipaj Taita Diosmi’ ninajunguichi. 55Shina nishpapash cangunaca, Paitaca na rijsishpami causanguichi: Ñucallami paitaca rijsini. ‘Ñuca Taitata na rijsinichu’ nishpaca, cangunashnallata llullapachami caiman. Ashtahuangarin Paitaca rijsinipachami. Chaimandami, Paipaj mandashcatalla pactachijuni. 56Cangunapaj taita Abrahamga, Ñuca shamuna punlla chayamunata yachashpami cushijurca. Ña shamujta ricushpaca, ninandami cushijurca” nijurcami.
57Shina nijpimi judiocunaca cashna ninajurca:
“Picha chunga huatatapash, canga nara charinguichu. Shinachu, ¿‘Abrahamdaca ricurcanimi’ nijungui?” ninajurcami.
58Shina nijpimi Jesusca, paicunata cashna nijurca:
“Na llullashpami, cangunataca cashna nini: Abrahamga nara tiyajpillatami, Ñucaca ña tiyarcani” nircami.
59Shina nijpimi chai runacunaca, Jesusta huañuchingapa rumicunata japi callarinajurca. Ashtahuangarin, Jesusca pacajushpa, paicunapaj chaupitallata yalishpami, Diospaj huasimandaca llujshishpa rirca.
S'ha seleccionat:
JUAN 8: QVI16
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.