युहन्ना 15
15
अंङगुरक लति
1येसुजि यापन चेलवानिके कहलसि, “सदि अंङगुरक लति मुइ हखहि हसे मोर पिता किसान हखसि। 2जुन फेनुगा मोरमा रहके फर हइने फरोसइ उअ जम्मे फेनुगासभके हुने काटदेबसि हसे फर फरोलहर हरेक फेनुगासभके झन याको फरइ कहके हुने छाटके साफा करबसि। 3तोहरा मोर कहलि वचनवासे यगाहे सुद्ध भेसकल बडह। 4तोहरा मोरमा रहिह हसे मुइ तोहारमा रहबहिँ। जसने फेनुगा अंङगुरवाक लतियामा नाहिँ रहले यपनहिँ फर फरावे नाहिँ सकतइ, वसने तोहरा फेनि मोरमा नाहिँ रहले फर फरावे नाहिँ सकबह।
5 “अंङगुरक लति मोहिँ हखहि, तोहरा फेनुगासभ हखह। यगर कुनहुँ मोरमा रहतइ हसे मुइ वकरमा रहबहिँ जउँ, उअ बहुत फर फरोबिय, केहकेकि मोरसे यलग रहके तोहरा किहो करे नाहिँ सकबह। 6यगर कुनहुँ मोरमा नाहिँ रहतइ जउँ, उअ कटाइल फेनुगा नहिँया बाहरा फकेबिय हसे उअ सुखइबे करबिय। यसनुक फेनुगासभके मन्सावाह बटियोतइ हसे यगियामा फाँकदेतइ तके उअ फेनुगावा जरतइ। 7यगर तोहरा मोरमा रहबह हसे मोर वचनवा तोहारमा रहतइ जउँ, तोहरा जथि चाहसह उअ मङह, तोहराके उअ दियतइ। 8जब तोहरा बहुत फर फरोबह, तोहरा मोर यसल चेला हखबह हसे यकरेमा मोर पिताक महिमा हतइ।
9 “जसने मोर पिता मोरके प्रेम करससि, वसने मुइ फेनि तोहराके प्रेम करसहिँ। याबे तोहरा मोर प्रेममा रहिह। 10यगर तोहरा मोर आग्यासभ पालन करबह जउँ तोहरा मोर प्रेममा रहबह, जसने मुइ मोर पिताक आग्यासभ पालन करले बडहिँ हसे हुनेक प्रेममा रहसहिँ। 11मोर आनन्द तोहारमा रहइ हसे तोहार आनन्द पुरा हखइ कहके मुइ इअ बतवा तोहराके कहले हखहि।
12 “मोर आग्या इहे हखइ कि, जसने मुइ तोहराके प्रेम करलहिँ, तोहरा फेनि एक-दोसरि जनके वसने प्रेम करिह। #
युहन्ना १३:३४; १५:१७; १ युहन्ना ३:२३; २ युहन्ना ५ 13सबसे महान प्रेम कहले यापन सङहतियवानिक तहिँया यापन प्रान देवेके हखइ, यकरसे महान प्रेम त याको किहो हइने बडइ। 14यगर तोहरा मोर देलि आग्या पालन करबह जउँ, तोहरा मोर सङहतिया हखह। 15याबेसे मुइ तोहराके बहरिया नाहिँ कहबहिँ, केहकेकि मलिकवा कथि करइ बडिय कहके बहरियावाक थाह हइने रहसइ। बाकि मुइ तोहराके सङहतिया कहइ बडहिँ, केहकेकि मोर पितासे मुइ जथि सुनले बडहिँ उअ जम्मे बतवा तोहराके कहदेले बडहिँ। 16तोहरा मोरके हइने छानलह, बाकि मुइ तोहराके छानलहिँ। तोहरा जाह हसे सबदिन रहना फर फरोह कहके मुइ तोहराके नियुक्त करलहिँ। तब तोहरा मोर नाउँमा पितासाङे जथि मङबह हुने तोहराके देबसि। 17मुइ तोहराके इअ आग्या देइ बडहिँ कि, तोहरा एक-दोसरि जनके प्रेम करिह।
संसारक मन्सावाह चेलवानिके घिना करसइ
18 “यगर संसारक मन्सावाह तोहराके घिना करतइ जउँ, तोहारसे यागा हुनुका मोरके घिना करले हखइ कहके जनिह। 19यगर तोहरा इअ संसारक रहतह जउँ त, संसारक मन्सावाह तोहराके यापन कहके माया करतिय। बाकि तोहरा इअ संसारक हइने हखह। मुइ तोहराके संसारसे छानलहिँ, उहेसे इअ संसारक मन्सावाह तोहराके घिना करसइ। 20‘बहरियावा घरवाक मलिकवासे जबड हइने हसिय’ कहके मोर कहलि बतवा तोहरा सम्झिह। हुनुका मोरके सतोलइ जउँ तोहराके फेनि सतोतइ। यगर हुनुका मोर कहलि बतवा पालन करतइ जउँ, तोहार बतवा फेनि मनतइ।#मति १०:२४; लुका ६:४०; युहन्ना १३:१६ 21तोहरा मोरमा विस्वास करलेसे हुनुका तोहराके वसने व्यबहार करतइ, केहकेकि हुनुका मोरके पठोलहराके हइने चिनसइ। 22यगर मुइ याके हुनुकरसाङे बात नाहिँ कहले रहतहि हुनुका पापक दोसि नाहिँ हतिय, बाकि याबे यापन पापक तहिँया लाथ लगावेके हुनुकर ठउरि हइने बडइ। 23जुने मोरके घिना करसइ, उअ मोर पिताके फेनि घिना करसइ। 24मुइ हुनुकर बिचा जथि काम करले रहलहि, उअ काम कुनहुँ फेनि हइने करले बडइ। यगर मुइ उअ कमवा नाहिँ करले रहतहि जउँ, हुनुका पापक दोसि नाहिँ हतिय। बाकि मोर करलि यचम्मक कमवा देखके फेनि हुनुका मोरके हसे मोर पिता दुन्हुँ जनके घिना करसइ। 25बाकि ‘हुनुका मोरके बिना कारन घिना करलइ’ कहके हुनुकर व्यवस्थामा लिखलि वचनवा पुरा हखेके तहिँया इअ भेल हखइ।#भजन ३५:१९; ६९:४
26 “मुइ पिता वरिसे तोहार लघिना सल्लाह देलाहर पवितर-आत्माके पठादेबहिँ। हुने पितासे याइल सत्य आत्मा हखसि। हुने यइलेपर मोर बारेमा गवाहि देबसि। 27तोहरा फेनि मोर बारेमा गवाहि देबह, केहकेकि तोहरा सुरुहिँसे मोरसाङे बडह।”
S'ha seleccionat:
युहन्ना 15: CTHR
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. and Nepal Bible Society