युहन्ना 16
16
1येसुजि कहलसि, “तोहरा विस्वाससे पाछा झिन हटिह कहके मुइ इअ जम्मे बतवा कहले हखहि। 2हुनुका तोहराके सभाघरवासे निकडा देतइ। सदियो यसनुक समय यवइ बडइ, जब तोहराके हत्या करलहरा परमेस्वरक सेवा करइ बडहिँ कहके सोचतइ। 3हुनुका नत पिताके चिनले बडइ, न मोरके चिनसइ। उहेसे हुनुका यसनुक करतइ। 4बाकि इअ बतवा मुइ तोहराके कहले बडहिँ, ताकि जब इअ जम्मे घटनवा घटतइ, तब तोहरा मोर कहलि बतवा सम्झबह। मुइ तोहराके इअ बतवा सुरुहिँसे हइने कहले रहलहि, केहकेकि मुइ तोहारसाङे रहलहि।
पवितर-आत्माक काम
5 “याबे मुइ मोरके पठोलहराक लघिना जाइ बडहिँ। बाकि ‘यपनहुँ कहवाँ जाइबडहुँ?’ कहके तोहरा कुनहुँ फेनि मोरके हइने पुछसह। 6बरु मुइ तोहराके इअ बतवा कहलेसे तोहार हृदय सोकसे भरल बडइ। 7बाकि मुइ तोहराके सदियो कहबहिँ, मुइ यहवाँसे गेले तोहार तहिँया यसल हतइ। केहकेकि मुइ नाहिँ जेबहिँ जउँ तोहार लघिना सल्लाह देलाहर नाहिँ यबसि, बाकि मुइ जेबहिँ जउँ, हुनेके मुइ तोहार लघिना पठादेबहिँ। 8हुने यइलेपर संसारक मन्सावानिके पाप, धारमिकता हसे न्यायक बिसयमा हुनुकर करल गल्ति देखा देबसि। 9हुनुका मोरमा विस्वास हइने करलेसे पापि हखइ कहके हुने हुनुकर गल्ति देखा देबसि। 10धारमिकताक बिसयमा हुनुकर करल गल्ति हुने देखा देबसि, केहकेकि मुइ पिता लघिना जाइ बडहिँ हसे तोहरा फेरि मोरके नाहिँ देखबह। 11हुने हुनुकाके परमेस्वरक न्याय कथि हखइ कहके देखा देबसि, केहकेकि इअ संसारक सासक यगाहेसे दोसि ठहरसकल बडिय।
12 “मुइ तोहराके याको बहुत बातसभ कहेके बडइ, बाकि यखनि उअ बतवा तोहरा सहे नाहिँ सकबह। 13जब सत्यक आत्मा यबसि, तब हुने तोहराके जम्मे सत्यतामा डोरयोबसि। हुने यापनवरिसे नाहिँ फदकबसि। हुने जथि सुनबसि, उहे फदकबसि हसे तोहराके हखे यइना बातसभ कह देबसि। 14हुने मोर महिमा करबसि, केहकेकि हुने मोरसे जथि सुनबसि, उहे तोहराके कह देबसि। 15जथि पिताक हखइ उअ जम्मे मोर हखइ। उहेसे मुइ कहलहिँ कि, सत्यक आत्मा मोरसे जथि सुनबसि, उहे तोहराके कह देबसि।
चेलवानिक सोक हसे आनन्द
16 “एघरिक रहके तोहरा मोरके नाहिँ देखबह हसे वकरपाछा एघरिक रहके तोहरा फेरि मोरके देखबह।”
17तब येसुजिक कुनहुँ-कुनहुँ चेलवाह एक-दोसरि जनके यसके कहलइ, “‘एघरिक रहके तोहरा मोरके नाहिँ देखबह हसे वकरपाछा एघरिक रहके तोहरा मोरके फेरि देखबह’ ‘केहकेकि मुइ पिता लघिना जाइ बडहिँ’ हुनेक कहलि बतवाक यरथ कथि हखइ त? 18‘एघरिक रहके’ कहले कथि हखइ? हुने कथिक बारेमा कहइ बडसि हमरा हइने बुझसहुँ।”
19हुनुका इअ बतवाक बारेमा पुछे खोजइबडइ कहके येसुजिक थाह भेलइ। उहेसे हुने हुनुकाके कहलसि, “‘एघरिक रहके तोहरा मोरके नाहिँ देखबह हसे एघरिक रहके तोहरा फेरि मोरके देखबह’ कहलि मोर बतवाक यरथ कथि हखइ कहके कथि तोहरा एक-दोसरि जनके पुछइ बडह? 20मुइ तोहराके सदियो कहइ बडहिँ, तोहरा कनबह हसे विलाप करबह, बाकि संसार गगसबिय। तोहरा सोक करबह, बाकि तोहरा सोक करले फेनि पाछेसे आनन्दित हखबह। 21बाचा जरमोइखुनि जनिक दुःख हसइ, केहकेकि वकर बाचा जरमावेके जुन याइल रहसइ। बाकि जब उअ बाचा जरमोबिय, तब उअ दुःखवा बिसरोबिय, केहकेकि संसारमा एगुडा छोकनिक जनम भेलइ कहके उअ खुसि हसिय। 22तोहरा फेनि यखनि वसने सोक करबह, बाकि मुइ तोहराके फेरि भेटे यवइकि तोहार हृदय आनन्दित हतइ हसे तोहार आनन्द कुनहुँ फेनि तोहारसे निछुरके नाहिँ लिगतइ। 23उअ दिन तोहरा मोरके किहो फेनि नाहिँ पुछबह। मुइ तोहराके सदियो कहबहिँ, तोहरा मोर नाउँमा पितासाङे जथि मङबह हुने उअ तोहराके देबसि। 24यखनिलइ तोहरा मोर नाउँमा किहो फेनि हइने मङले बडह। मङह हसे तोहरा पउबह ताकि तोहार आनन्द पुरा हखइ।
25 “इअ जम्मे बतवा मुइ तोहराके दृस्टान्तमा फदकले बडहिँ। बाकि समय यवइ बडइ, मुइ तोहारसाङे फेरि दृस्टान्तमा नाहिँ फदकबहिँ, बाकि पिताक बारेमा तोहराके स्पस्टसे कहबहिँ। 26उअ दिन तोहरा मोर नाउँमा मङबह। मुइ तोहार तहिँया पितासाङे माङदेबहिँ कहके मुइ तोहराके हइने कहइ बडहिँ। 27बरु पिता यपनहिँ तोहराके प्रेम करससि, केहकेकि तोहरा मोरके प्रेम करले बडह हसे मुइ परमेस्वरसे याइल हखहि कहके तोहरा विस्वास करले बडह। 28मुइ पितासे संसारमा याइल बडहिँ हसे मुइ यखनि संसारके छाडके पिताक लघिना फेरि फिरके जाइ बडहिँ।”
29तब हुनेक चेलवाह यसके कहलइ, “यखनि यपनहुँ दृस्टान्त हइने देके स्पस्टसे फदकइ बडहुँ। 30याबे हमरा बुझलहुँ कि, यपनहुँ जम्मे बतवा जनसहुँ हसे यपनहुँके कुनहुँ प्रस्न पुछेके आवस्यक हइने बडइ। उहेसे यपनहुँ परमेस्वरसे याइल हखहुँ कहके हमरा विस्वास करसहुँ।”
31तब येसुजि हुनुकाके कहलसि, “कथि तोहरा याबे विस्वास करसह? 32बाकि समय यवइ बडइ हसे यासकल बडइ, तखनहिँ तोहरा जम्मे जन छाहरछिता हखबह। तोहरा यापन-यापन घर जेबह हसे मोरके यसकरे छडबह। ताफेनि मुइ यसकरे हइने बडहिँ, केहकेकि पिता मोरसाङे बडसि। 33तोहरा मोरमा रहके सान्ति पावे सकह कहके मुइ इअ जम्मे बतवा तोहराके कहले हखहि। इअ संसारमा तोहराके खाँ दुःख हतइ, बाकि सहास करह! केहकेकि मुइ संसारके जितले बडहिँ।”
S'ha seleccionat:
युहन्ना 16: CTHR
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. and Nepal Bible Society