A-pûn Awang 18
18
Byù Bíng Sum Yuq
1Haû Yhûmsîng Garai gi, nyí-káng u lé, Mamre gá su é jowò mâ é wàqmyòq gàm mó pê é nàm má, yhâng é zúm hkum má zung tô é Abraham lé, lé htoq shit ri. 2Abraham tu wú kat le, byù bíng sum yuq, yhâng é nàm má yàp tô é lé myang ri. Yhang gi, haú bang lé myang é hkûn, ê hui râ ga yhâng é zúm hkum mai hân hân ê mù, myigùng má ê ngóm gòp tô ri.
3Haû mù, yhang gi, “Ngá yhûmsîng ê, ngò gi, náng é myòq hí má myòqdong wó é nghut jáng, náng é duìnhâng zoshâng ngá chyáng mai hkâlaî ló byùq. 4Ngò, wuì ra-tsuí wàq lé lô bá; haú hkûn, núngmòq bànshoq bang hkyî wó chi mù, sikgâm ô shí má wó nô yù kó sháng gàq. 5Núngmòq gi, núngmòq é duìnhâng zoshâng ngá chyáng jé lé bekô nghut mù, ngò, zô jung ra-tsuí yu lé lô byi kó lé, haú hkûn, núngmòq gi, wum wó zô pyîng yù mù, núngmòq é hkyôwuì wó xoq e ló sháng gàq.” ga taî ri.
Yhángmòq gi, “Ge dik bê; nàng taî é dông kut àq.” ga taî akô.
6Haû mù, Abraham gi, zúm má lúng tô é Sara chyáng hân za din wang ló mù, “Hân àq; jé réng é súngsô mún nyhit joí kô yù mù, myhik nyhó luî, mùk long kut nyhîn nyhoq àq.” ga taî ri.
7Hau htâng, yhang gi, no jûm nyì jang má din ê mù, xu yúng é no bom zo lé hkyin yù luî, duìnhâng zoshâng rayùq lé shê byî ri; haú yùq le, hân hân sat lajang bê nghut ri. 8Hau htâng, yhang gi, no-naú chyîn, no-naú eq gaí ge to bê no bom zo sho pé lé, haú bâng é hí má lé htûng byî ri. Yhángmòq zô é hkûn, Abraham gi, yhángmòq é nàm, sikgâm ô má yàp tô ri.
9Yhángmòq gi, “Náng é yhûmsîng myhí Sara hká má lhú?” ga yhang lé myî akô.
Haú hkûn, yhang gi, “Hê, zúm hkaû má nyi tô ri.” ga taî kyô ri.
10Haú hkûn, yhángmòq mâ é rayùq#18:10 Yhángmòq mâ é rayùq gâ é le, ra-am gi, haû Yhûmsîng Garai ga hpuq tô lhê. gi, “Sa-nhik shí nám lé, Ngò, náng chyáng teng za dum taû jé lé râ nghut lhê; náng é yhûmsîng myhí Sara gi, yùqzo rayùq hkû râ nghut lhê.” ga taî ri.
Sara kúm gi, yhâng é nùnghtáng mâ é zúm hkum má gyô nyi ri. 11Abraham eq Sara gi, chyungxe i-pyàt ko bekô nghut luî, mâng byùq bekô nghut mù, Sara gi, zo hkû yòq laî byùq bê nghut ri. 12Haû mù, Sara gi, “Ahkuî, ngò mang nyhúng hkut nghut bê; ngá é yhûmsîng hpó le mang bê; haû sû é wá, ahkuî, ngò, ngón hkyô shî lé wó hkâm zo shirâ lhú?” ga myìt uchyang yhânggùng yhang wui ri.
13Haû mù, haû Yhûmsîng Garai gi, Abraham lé, “Haî mù, Sara gi, ‘Ahkuî ngò mâng byùq bê le wá, zoshâng ge wó râ lhú?’ ga wuì uchyang taî lhê lhú? 14Haû Yhûmsîng Garai a wó kut é rajung jung jòq ri lhú? Sa-nhik, ding tô é ahkyíng má, Ngò, náng chyáng dum taû jé lé râ nghut mù, Sara gi, yùqzo rayùq hkû râ nghut lhê.” ga taî ri.
15Sara gi, gyùq byùq é nghut mù, “Ngò a wuì.” ga mhaû taî ri.
Nghut kôlhang, haú yùq gi, “A nghut, nàng wui ri.” ga taî ri.
Sodom Wà Mó É Matú, Abraham Dûng Tôngbán Byî É Hkyô
16Byù bíng sum yuq gi, haú mai toq ló kô é hkûn, Sodom wà mó shut wú hkyô kat akô; Abraham le, yhángmòq lé radun zo ê châng dé kat râ matú, yhángmòq eq rahá châng sô e ló ri. 17Haû mù, haû Yhûmsîng Garai gi, “Ngò kut râ za nghut é hkyô lé, Abraham é hí má hkâsu ge zaú to râ lhú? 18Abraham gi, teng za, hkìk é eq a-tsam mó bo é a-myû dùt râ nghut mù, myìdàm htoq mâ é gótû byù myû bànshoq gi, yhang dông mai shimân byî é hui kôrâ nghut lhê. 19Hkâsu mù gâ le, haû Yhûmsîng Garai Ngò gi, Abraham eq séng luî byî tô é dangchyuq lé wó lhoqdìk sháng gàq nghû, Ngò gi, Abraham é zodù wuì eq yhâng htâng má nyi lé lô râ nghut é yhâng é yhûmbyù wuì mai, díngmán tengmán hkyô kut é dông, haû Yhûmsîng Garaî é hkyô lé châng nyì râ matú, yhâng èq hkyô shit yû sháng gàq nghû, yhang lé hkyin yù bê nghut lhê.” ga taî ri.
20Haû mù, haû Yhûmsîng Garai gi, Abraham lé, “Sodom eq Gomora wà mó lé mara hun garû é htê gi, lûm ko bê nghut é htoq agó, yhángmòq é yubàk mara gi, kô htáng htum bê nghut ri. 21Haû mù, Ngò gi, Ngá chyáng hkyang jé é garu garín htê gang eq rajung za nghut lhê lùq, a nghut é lùq, gyó e wú bá; a nghut jáng le, ngò sé râ nghut lhê.” ga taî ri.
22Byù haú bang gi, haú mai lhîng mù, Sodom wà mó shut e ló akô; nghut kôlhang Abraham gi, haû Yhûmsîng Garaî é hí má ru yap tô ashî nghut ri. 23Haú hkûn, Abraham gi, Yhâng chyáng huî ê mù, “Nàng gi, díngmán bang lé, haû agè ashop bang eq rahá lhoqhtên pyám râ lhú? 24Wà mó haú má díngmán bang 50 yùq nyi é nghut jáng, hkâsu kut râ lhú? Haú má nyi é díngmán bang haû 50 yùq é yánmai, wà mó haú lé a ge lhoqlhut to#18:24 Lhut to gâ é lé, mara hkyut ga le wó hpuq lhê. lo lhú? Gè gè yhang lhoqhtên pyám berâ lhú? 25Haû díngmán bang lé, agè ashop bang eq rahá sat pyâm é hkyô le, haû díngmán bang eq agè ashop bang lé rajung za kut pyâm é hkyô le, Náng chyáng mai wê gâng nyì sháng gàq. Gè gè yhang, haû gi, Nàng eq wê gâng nyì sháng gàq. Myìdàm gón é Târâ Agyì mó#18:25 Târâ Agyì mó gâ é lé, Ùp sû ga le wó hpuq lhê. gi, jo têng é hkyô kut râ a nghut lhí?” ga taî ri.
26Haû Yhûmsîng Garai gi, “Sodom wà mó má díngmán bang 50 yùq lé myang é ru nghut le gi, haú bâng é yánmai, Ngò, jowò haû bànshoq lé lhoqlhut to râ nghut lhê.” ga taî ri.
27Hau htâng, Abraham gi, “Ahkuî, ngò gi, hpuílhup eq myiwap za nghut kôlhang, Nàng Yhûmsîng lé wám taí râ za nghut lhê; 28haû díngmán bâng é byù du 50 yùq mai, 5 yuq yom tô é nghut jáng, hkâsu kut râ lhú? Haû 5 yuq yom é yánmai, rawà gón lé lhoqhtên pyám râ lhú?” ga dum taî ri.
Yhang gi, “Haú má 45 yuq lé myang é nghut jáng, Ngò, wà haú lé lhoqhtên pyám râ a nghut.” ga taî ri.
29Abraham gi, Yhang lé, “Haú má 40 yùq lé za myang é nghut jáng, hkâsu kut râ lhú?” ga radàm dum taî ri.
Yhang gi, “Haû 40 yùq é yánmai, Ngò, wà haú lé lhoqhtên pyám râ a nghut.” ga taî ri.
30Haú hkûn, Abraham gi, “Haû Yhûmsîng nhikjum a yo sháng gàq, ngò taí shi bá. Haú má 30 yùq lé za myang é nghut jáng, hkâsu kut râ lhú?” ga taî ri.
Yhang gi, “Haú má 30 yùq lé myang é nghut jáng, Ngò, wà haú lé lhoqhtên pyám râ a nghut.” ga tû taî ri.
31Abraham gi, “Ahkuî, ngò, Nàng Yhûmsîng lé wám taí râ za nghut lhê; haú má 20 yùq lé za myang é nghut jáng, hkâsu kut râ lhú?” ga taî ri.
Yhang gi, “Haû 20 yùq é yánmai, Ngò, wà haú lé lhoqhtên pyám râ a nghut.” ga taî ri.
32Haú htâng, Abraham gi, “Haû Yhûmsîng nhikjum a yo sháng gàq, ngo radàm za xoq taí lo bá; haú má 10 yùq lé za myang é nghut jáng, hkâsu kut râ lhú?” ga taî ri.
Yhang gi, “Haû 10 yùq é yánmai, Ngò, wà haú lé lhoqhtên pyám râ a nghut.” ga tû taî ri.
33Haû Yhûmsîng Garai gi, Abraham eq dáng ban nyò jáng ló byùq bê nghut mù, Abraham le yhûm shut taû ló bê nghut ri.
S'ha seleccionat:
A-pûn Awang 18: znot
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2025, Wycliffe Bible Translators, Inc.