Adnodau Beiblaidd Poblogaidd o Eseia 61

Rhanna

Mae Ysbryd fy Meistr, yr ARGLWYDD, arna i, am fod yr ARGLWYDD wedi fy eneinio i’w wasanaethu. Mae wedi fy anfon i gyhoeddi newyddion da i’r tlodion, i drin briwiau’r rhai sydd wedi torri eu calonnau, a chyhoeddi fod y rhai sy’n gaeth i gael rhyddid, ac i ollwng carcharorion yn rhydd; i gyhoeddi fod blwyddyn ffafr yr ARGLWYDD yma, a’r diwrnod pan fydd Duw yn dial; i gysuro’r rhai sy’n galaru – ac i roi i alarwyr Seion dwrban ar eu pennau yn lle lludw, ac olew llawenydd yn lle galar, mantell mawl yn lle ysbryd anobaith. Byddan nhw’n cael eu galw yn goed hardd, wedi’u plannu gan yr ARGLWYDD i arddangos ei ysblander.

Yn lle’r cywilydd byddwch chi’n derbyn siâr ddwbl, ac yn lle’r gwarth byddwch chi’n dathlu yn eich etifeddiaeth. Felly, byddan nhw’n etifeddu siâr ddwbl yn eu tir, ac yn profi llawenydd fydd yn para am byth.

Mae’r ARGLWYDD yn fy ngwneud i mor llawen, ac mae fy Nuw yn fy ngwefreiddio i. Mae e wedi fy ngwisgo ag achubiaeth a rhoi cyfiawnder yn fantell o’m cwmpas. Dw i fel priodfab yn gwisgo twrban hardd, neu briodferch wedi’i haddurno â’i thlysau.

Byddan nhw’n ailadeiladu’r hen hen adfeilion, yn codi lleoedd oedd wedi’u dinistrio, ac yn adfer trefi oedd wedi’u difa a heb neb yn byw ynddyn nhw ers cenedlaethau.

Fel mae planhigion yn tyfu o’r ddaear, a ffrwythau’n tyfu yn yr ardd, bydd fy Meistr, yr ARGLWYDD, yn gwneud i gyfiawnder a moliant dyfu yng ngŵydd y cenhedloedd i gyd.

Byddwch chi’n cael eich galw yn ‘Offeiriaid yr ARGLWYDD’, ‘Gweision Duw’ fydd y teitl arnoch chi. Byddwch chi’n bwydo ar gyfoeth y cenhedloedd ac yn mwynhau eu holl drysorau nhw.

Fi ydy’r ARGLWYDD; dw i’n caru cyfiawnder, ac yn casáu gweld lladrata’r offrwm sydd i’w losgi. Bydda i’n siŵr o roi eu gwobr iddyn nhw, a bydda i’n gwneud ymrwymiad gyda nhw fydd yn para am byth.