MAAK 8
8
Mee Lising Manrii Amamaar
(Met 15.32-39)
1Apha aasenru ing aanuwnache mee vakhae ing athar vokheh vaangkongreehsae. Changlaenche ensahfhuw omahsa, amana Jesu ing asebok aechu akuurting ve-een aeka eningna ariir, 2“Havana mee hangjaeh i kaning amanchuwhnah ae, enuw ing kakuurna engongnii inii nithumchak ahenphapa, ensahfhuwkho yntanga omahsa. 3Ki ing enuwchu enven ichaam ing engeenting mangkae ae ningve lamlah tanii mee topoh ynvaepae khaka, lamna venchaam ing itiih ynvae vaatae.”
4Sebok ae ing Jesu ningna embasang, “Hava pammfhuw nenche achuw ing enuw hangjaeh ichu thaemin pichehva takhang?”
5Jesu ing tar aajaeh nenchisa taka asii ae. “Sariimeh kenchisa,” ta aeka embasang. 6Amana Jesu ing mee vakhaechu ruwruwna ongruw taka ariir; amanche Jesu ing tar sariichu verika, Thangnang amanpah thoh ynruw ing tarchu bakhiika, mee vakhae ningna semruw taka asebok ae ningna jepika, amana enuw ing tarchu ensempa. 7Nga isiing topoh enchi chukho Thangnang manpahka, amana mee vakhae ningna semruw taka asebok ae ningna ariir. 8Amana enuw ing enven ynva ing ensahpa; abariichu emangkong tahnache buruk sarii sipsa. 9Amana asah mee aechu mee lising manrii vakhaepae. 10Amana Jesu ing enuwchu amangkae aethoh ruwkuwngna Dalmanutha ichii paamting asebok aethoh sisa.
Laetho Yndang Enjong
(Met 16.1-4)
11 #
Met 12.38; Luk 11.16 Pharisi aeng Jesu chu chaang ennii khaena thangbaen tanii laetho yndangnii aningtanii jong aeka vokhehkho chong hensii vesii embasen. 12#Met 12.39; Luk 11.29Changvakonchu Jesu ing abarungriirna abuw nakka ariir, “Hava suwnthar siti aenge ynchii khaena laetho yndangchu ajongpae? Ki ing neningna atatak ing kariirnah, amachuve, hava suwnthar siti ae ningne laetho mandang mahning.” 13Ama ing enuwchu maka athar vokheh ruwkuwng ting hangkarka chifhuw laar kahsa.
14Amana enuw ing tar ichi embahirpa, changvakonchu enuw ing ruwkuwng sungna tar yngkhehpang chuve enchi. 15#Luk 12.1Amana Jesu ing eningna chonghak apeeh ae, “Ynriim-ruw, vokhehkho Pharisi aere Herot chor khaena ynriimruw.”
16Enuw ing tar enchimah khaenache yngkheh yngkheh chong emanseer.
17Amachu Jesu ing amanghuw tahnache eningna ariir, “Nenuw ynchii khaena tar chimahsung tachuwka nemanseerva? Nenuw ataraen phanii ing nemanghuw mahriva? Nenuw nenbarungriir aajaehmeh ipirva? 18#Mk 4.12Nemik ombroh ing nemumahva? Nengana ombroh ing nensiimahva? Vokhehkho nenuw nengaansiimahva? 19Ki ing mee lising runga ae khaena tar runga kabakhiirae, buruk ajaeh-chak ynrii nemangkong?” Suum ariinii ta aeka embasang.
20Amanche mee lising manrii khaena tar sarii kabakhii raencha, baruk aajaehchak ynrii nemangkong? Sariimeh ta aeka embasang.
21Amana Jesu ing eningna ariir, “Ataraenpha nenuw ing nemanghuw mahriva?”
Betsaida na Mikchu Amandam
22Enuw ing vasi aeka Betsaida tungsae. Amana heong topoh aeng mikchu mee yngkheh veruw aeka atakchu iparnii khaena Jesu ningna enthamsah. 23Jesu ing amik ichuchu akikna bachuwka khuwsung tanii aruwpa, amana amikna bachirka vokhehkho ataklina akik asiih inuwna asii, “Ynchii namusa?”
24Ama ing hengenka ariir, “Ki ing mee ae kamusa; changvakonchu enuw ae i thing pangeng ichii ing hungsi vasi entu ing kamusa.”
25Amana Jesu ing athar vokheh amikna akik ynnii ing parka a-enteeh tahnache damsa vokhehkho peehchae aangkheng iseengkiir ing amuchehpa. 26Amana Jesu ing ama meechu eenting mangkaeka ariir, “Khuwruung sungting hungruwh mahra, vokhehkho khuwruung sungna achuw ningnakho riirmahra.”
Pitar ing Jesu chu Khrista chuva taka Ariir
(Met 16.13-20; Luk 9.18-21)
27Jesu ing asebok aethoh Kesaria Philipi paam thoh ynneeng khuwsung henjii aeka hungsiae; amana lam nache Jesu ing asebok ae ningna asii ae, “Mee aeng ki i achuwva ynchiinah ae?”
28 #
Mk 6.14,15; Luk 9.7,8 Enuw ing embasang, “Baptis Johon; areh aeng Elija; amana areh aenche jaephar yngkheh vachii enchiinah.”
29 #
Jhn 6.68,69 Jesu ing eningna asii ae, “Nenuw incha ki i achuwva ichii ing ymmanden nahchuw?” Pitar ing Jesu ningna abasang, “Nang i Khrista chuvachii.” 30Amana Jesu ing achuw ningnakho iriir rumahnii taka ipirpak ing ajeer.
Jesu ing Ijachaam phanaka Thikvachii Ajeer
(Met 16.21-28; Luk 9.22-27)
31Jesu ing Mee Sapa i ijachaam inempak phavaata, aanchungpuh ae, aanchung jaethiim ae vokhehkho thiimthang aeng rumah ae naka atakchu thehvaatae, amanche animan-thumnii inii nache hangring vaata taka eningna ynchuw abasenpa. 32Hava chong i Jesu ing eningna isajaeh ing ariir. Amana Pitar ing Jesu chu ruwka arakuhpa. 33Changvakonchu Jesu ing hunganlehka asebok aechu amuthoh, Pitar chu rukuhka aningna ariir, “Umlae, katuk nungting ong, nang i Thangnang khaena mandenmahchii, mee khaenapang namandensa.”
34 #
Met 10.38; Luk 14.27 Amana Jesu ing asebok aethoh ynruw ing mee vakhaechu eenka eningna ariir, “Achuw yngkheh ing kaanuw jiining tanave, ataksahchu ynrumah rasiing vokhehkho ataksah khros idomsana kaanuw ijiirasiing. 35#Met 10.39; Luk 17.33; Jhn 12.25Achuw yngkheh alaetha karningka achii mee chuve maangvaata, changvakonchu achuw yngkhehchu kakhaena vokhehkho isa chong khaena alaetha maangnave ikarpeeh phavaata. 36Laaruw paamna om peehchae aangkheng deenkhang nare, alaetha maangnacha ama ing ynchii atuungsahse? 37Vokhehkho ama ing alaethachu ynchiithoh amanteh chehse? 38Ichuwhmah ing vokhehkho isii icher ing isip suwntharne, achuw yngkheh ing kakhaena vokhehkho kachong khaena aning manjak nave, Mee Sapa ing alaar isa thoh ynruw ing, ynthiing vaarmee aethoh ajungthenglaenche ningjak phavaata.”
Dewis Presennol:
MAAK 8: MOYO
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.