MAAK 9
9
1Jesu ing eningna ariir, “Ki ing neningna atatak ing kariirnah, havane ingiir mee topoh ae inchembe Thangnang lipahchu ruwreng thoh ynruw ing ijungtheng emumahri raentaang ithii mumahnii ae.”
Jesu ing Amasak Auur
(Met 17.1-13; Luk 9.28-36)
2 #
2 Pit 1.17,18 Jesu ing inii niruk aanuwna Pitar, Jems vokhehkho Johon, enuw chupang yngkaangpak bung tingche asiksii ing aruwpae; amanache Jesu ing emaekungna amasak auurpa. 3Changlaenche Jesu peendiirchu ariirfhuwchah ing vaarsa, amachuve laaruw paamna peendiir arusuk mee rap ingkho changche manvaar chehmahnii. 4Amana Elija re Mosi ing eningnache yndang aeka enuw ing Jesu thohche chonghaksae. 5Changlaenche Pitar ing Jesu ningna ariir, “Aafhuw inuw ing hava minne ong ing sakvaata, vokhehkho inuw ing rumniitham ynthummeh, narutum yngkheh, Mosi rutum yngkheh amanche Elija rutum yngkheh seemtaruw.” 6Akhaechuve enuw inempak ynchiksae, amanche ama ing ynchii riirva kachiiva ichii manghuwcheh mahsa.
7 #
Met 3.17; Mk 1.11; Luk 3.22 Amana enuwchu ruwrduh ing abaruwpae, vokhehkho ruwrduh sungtanii iruur yngkheh ing ariir, “Havi kaning kamansiihpak kasapa chuva; ama ing ariirchu rungaeruw.” 8Aanuwdeh nache aruvaena engentah nache Jesu mahnaka achuw tikho mumahsae.
9Enuw ing bung tanii enjungchumrae, Mee Sapa ing ithii tanii ahangring mahtaang achuw ningnakho nemu chaapkha tongmahruw taka eningna ariir.
10Chutahnache ama ing ariir chongchu amanjiiae, changvakonchu ithii tanii ihangringchu ynchii achii-niiva ta aeka enareersahna ynsii ae. 11#Met 11.14Amana enuw ing Jesu ningna asii ae, “Ynchii khaena thiimthang aeng Elija inche maensa ing jungtheng vaata enchiiva?”
12Amana Jesu ing eningna ariir, “Elija ing amaensana juwngka peeh aangkhenglaang ajaenniivaang amang-om chirpa; amanche Mee Sapa ing ijachaam inempak khaangvaata, vokhehkho mee ing maniisa vaata ichii khaena ynsaangkhe ichii ing ynziihva? 13Changvakonchu ki ing neningna kariirnah, Elija chu thengsa, vokhehkho akhaena ynziih vaangche ichii ing enuw ing emanden chaap ataklina entupa.”
Umlae Ichuwng Naepang Amandam
(Met 17.14-20; Luk 9.37-43)
14Enuw ing sebok ae ningting enjuwng thoh, enuwchu mee vakhae ing ihir aeka vokhehkho thiimthang aethoh chong hungsii vaansii entuchu emupa. 15Amana mee vakhaengche Jesu chu emuthoh enruw riimpohsa vokhehkho Jesu kuurting vataen aeka embariimsahpa. 16Jesu ing eningna asii ae, “Nenuw ynchii nemanseerva?”
17Amana engkaar tanii mee yng-kheh ing ariir, “Oja, achong isuwhmah umlae ichuwng kasapa naningna kajeruwsahnah; 18Atak i umlae achuwngchak raenche bathiihka vokhehkho abaena por isuwh thoh aha iriirka ynlaap chehmahchak; amanche nasebok ae ningnakho ithurpeehruw ta ingka kariirsahva changvakonchu enuw ing chehmah ae.”
19Amana Jesu ing eningna ariir, “O thacha omah suwnthar siti ae, ki ing nenuwthoh apha aajaeh iseeh ing ongvakata khang? Ki ing nenuwthoh apha aajaeh khaangcheh vakate? Ama meechu kaningting henruwruw.” 20Enuw ing pasarti chu Jesu kuurting enghenruwpa; amana umlae inche Jesu amuthoh pasarti chu inukriika, vokhehkho abaena por isuwh ing ruwruwna bathiihka amanruppa. 21Jesu ing pasarti ampa ningnache asii, “Nasapa taklina isuwh havi apha aajaeh seehsa?” Ampa inche abasang, “Anaepang raenniiva.” 22“Pasarti i ama-maangnii ing mi sungting vokhehkho chii sungting aajaeh athahchak. Chutahnache Jesu nang ing ynchiiva natuchehchu, naning imanchuwh sanana ibomsara.”
23Jesu ing aningna abasang, “Nang ing rutaniive, thacha mee ningna chembe nong aangkheng itu arusa.” 24Aphanache naepang ampa ing uungka ariir, “Kathachanah; kathacha apirnii ing ibomsara.”
25Amana mee vakhae ing ihungtaen aechu Jesu ing amutah nache, ama ing umlaechu rukuhka ariir, “Achong isuwhmah vokhehkho aana iseeh umlae nang aningtanii taang hung-suwh, vokhehkho athar vokheh aningting varuwhmah ta ingka na-ningna kariirnah.”
26Chutahnache umlae inche uungka vokhehkho pasarti chu aanukrii aanuwna taang suwhsa, amana nae-pang chu ithii vaangkhe ichii ing yntorsa; changlaenche mee aanem inche naepang i thiksarammo ta aeka enriir. 27Changvakonchu Jesu ing akikna jebachuwka ahemangiirpa, amana naepang chu hangiirsa.
28Amana Jesu ing eensung tingche varuwhsa, ama inuwnache asebok aeng ynruwhjaeh ing ensii, “Kenuwcha ynchii taka umlaechu kenthurcheh mahva.”
29Jesu ing eningna ariir, “Hangchii ae i ithamsah mahnaka thurcheh mahtanuw.”
Jesu ing Thiknaka Hangringvachii Ajeer
(Met 17.22-23; Luk 9.42-45)
30Enuw ing ama mapham na ing siaeka Galili paam sung hungruwh aeka enghengaraenpa. Amachu Jesu ing achuw ingkho manghuw naka tamah; 31Akhaechuve Jesu ing asebok ae hemanchuwka eningna ariir, “Mee sapa i mee ae kikna pivaatae vokhehkho thehvaatae; amana inii nithum aanuwnache hangring vaata.” 32Changvakonchu enuw ing ynchii ariirniiva ichii manghuwmah ae, vokhehkho enuw ing Jesu ningna siiva enchii ynchik ae.
Achuwva Iruungsehchu
(Met 18.1-5; Luk 9.46-48)
33Enuw ing hungsi aeka Kaparnaum tungsae; amana Jesu ing een sungna aonglae eningna asii ae, “Lam nakhe ynchii nemanseerva?”
34 #
Luk 22.24
Changvakonchu enuw ing ba-sangmah ae; akhaechuve enuw ing lam nache enghungsirae achuwchu iruunghakva ta aeka emanseer tahnava. 35#Met 20.26,27; 23.11; Mk 10.43,44; Luk 22.26Amana Jesu ing ongka vokhehkho suum ariinii aechu eenka eningna ariir, “Achuw yngkheh ing maensa ningka tanave, ama meechu aangkhengna ningkuur va-chiiva, vokhehkho mee aangkheng rukuum tuvachiiva.” 36Amana naepang yngkhehchu jedomka arikna mangongka, vokhehkho abaen nache jebachuwka eningna ariir, 37#Met 10.40; Luk 10.16; Jhn 13.20“Achuw yngkheh ing karumingna naepang havi bariim nave, kichu ymbariimva; amanche achuw yngkheh ing kichu ibariimsa nave, ki ymbariimmahva changvakonchu ki ynjenchiir amachu abariimva.”
Ynru meechu Ymmeeva
(Luk 9.49-50)
38Johon ing Jesu ningna ariir, “Oja, narumingna umlae athur mee yngkheh kenuw ing mu ungka kengkhaam, akhaechuve ama eenuw ajii mee mahsa.” 39Changvakonchu Jesu ing ariir, “Ama meechu khaammahruw; achuw yngkheh ing karumingna laetho atucheh mee inche kakhaena isamah ing ichong chehmahnii. 40#Met 12.30; Luk 11.23Akhaechuve inuw ynru meechu ymmeeva. 41#Met 10.42Ki ing neningna atatak ing kariirnah, Khrista khaenava tanaka achuw yngkheh ing chii kam yngkheh neningna ipinave nongmenchu pharem vaata.”
Isiiting Buknii Batheem
(Met 18.6-9; Luk 17.1-2)
42“Havana naepang ae inge karumingna ynthacha aechu achuw yngkheh ing isiiting babuk nave, ama meechu ariingna rungsum yngkheh bakhae manuwka chifhuw ting iren ing sakseh vaata. 43#Met 5.30Amanche nakik ing nangchu isiiting ibabuknii vachii ing omnave nakikkha ten; nakik ynniimeh om ing ithiimah misung longkongting bukva nachii changve, nakik yngkheh omah ing iringniiting ivaruwh inche saksehna. 45Amanche nakhi ing isiiting ibabuk niivachii ing omnave, nakhikha ten; nakhi ynniimeh om ing longkongting bukva nachii changve, nakhi yngkheh omah ing iringniiting ivaruwh inche saksehna. 47#Met 5.29Amanche namik ing nangchu isiiting ibabuknii vachii ing omnave, namik kha ipherla; namik ynniimeh om ing longkongting bukva nachii changve, namik yngkheh-pang ing Thangnang lipah ting ivaruwh inche saksehna. 48Longkong ichii ive tangong rungi ithiimah ae, vokhehkho mi chuwhjaehka om paamva. 49Mee aangkheng bachii ijim vaangkhe mi sungna kaangvaata. 50#Met 5.13; Luk 14.34,35Bachii inche achiiniichu omahnave, ynsaangkhe manchiicheh vanenta? Nenuw netaklina bachii mangomruw, vokhehkho yngkheh re yngkheh idae ing ongruw.”#(Atiim 44 re 46 i atiim 48 thohne aantinjaeh tah nache Baibal aanri aeng aanemna manvaemah ae.)
Dewis Presennol:
MAAK 9: MOYO
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.