San Lucas 5
5
I-actangap may acs̈
1Cuandu Jesús itsʉ̱naj laguna-auni'c Genesaret, ayé jayaujuc ni-apila̱tcʉjʉu pa iguimaraugajawa'n Dios ipalabra. 2Mit Jesús i-is̈ mechc ajna'jat laguna-auni'c, mit ma̱cpajyat pichingaway mit icupujcanup itsamajcat. 3Mit Jesús tʉgʉy Simón i-ajni'c, mit inajau ma actʉgʉy s̈ʉ̱n ayé aj pa nʉ'jugum. Mit nitsʉ̱nda̱jcʉu ajni'c mit i-ajque's̈cʉs̈au jayaujuc tsʉ̱napay laguna-auni'c. 4Cuandu icʉs̈ cotspay, inajau Simón:
—Acyo'y ajna' pa mam más ijuqui mit ca'tstʉ́gʉyga intsamajcat pa inma̱jcawa'n.
5Mit Simón iguipo'n:
—Amayipay, najtsu' tʉyos̈wátcaj mit neti tʉnga-actangawu, po como mi̱ inyʉmp, tʉnca'tstʉgʉyáj ayʉ̱́j tsamac. 6Mit cuandu iguiwátcaj we'n, i-actangau tu'c acs̈juc mayway hasta ayé tsamac na̱tnupate. 7Mit iwatcajau seña icumpajlat tsʉ̱ngapay jatu'cway aj ma minga pa iguimajyigáj. Mit imíngaj, i-apatscau inimechquij ajna'jat mit acs̈ hasta nʉ'nʉcs̈o'jcʉjʉp ajna'jat. 8Igui-is̈ we'n Simón Pedro, nicos̈atenda̱jcʉu mam Jesús, mit inʉm:
—Señor, ʉ̱ tʉs̈camerecia̱tp is̈cutomiyáj ni'c ʉ̱ tʉma̱lo'c.
9Inʉm we'n ni'c je' ni-apʉ̱tijyʉu may mit we'ney nu'pʉjʉn jeme tsʉ̱ngaway mit je', ni'c mayo'c acs̈ igui-actángaj. 10Mit we'ney ni-apʉ̱tigʉjʉu Jacobo mit Juan, Zebedeo iwajyat, ni'c je'jat Simón icumpajlat. Po Jesús inajau Simón:
—Campʉ̱twit. As̈am is̈ma'c acs̈, wename-ey tʉ-actuche'ngʉs̈wa'n jayajwat pa ma tʉs̈cupʉjcac.
11Mit cuandu igui-acpíchingaj ajna'jat pa laguna-auni'c, iyajcau nu'pʉjʉn, mit inatspoguigau Jesús.
Tu'c jayau jeme ijtʉpay may lla̱gas
12Cuandu Jesús itsʉ̱naj en tu'c nʉ'jcopac, min tu'c jayau ijtʉpay may lla̱gas, mit igui-is̈ Jesús, nicos̈atenda̱jcʉu mam je', mit iyo'jtau, inʉm:
—Señor, te inwamp, oyap is̈ac-oytamp.
13Mit Jesús iyajcau icʉ', inʉjmau:
—Tʉnwamp. Mi-oytanáj.
Mit cʉs̈ iguitajyau jaran ayé lla̱gas. 14Mit Jesús inajau maganʉjma nepʉn. Mit inʉjmau:
—Nʉs̈ actu-e'p judíujat ipa̱nijat ni'c mi-oytanway, mit yac ayé ofrenda lo que imanda̱tway Moisés, pa jayajwat ma jawiga ni'c mi-oytanway.
15Mit jayajwat más imaraugau jʉmgapa'tu lo que iwatway Jesús, mit may jayajwat nigutomigʉjʉu pa iguimaraugawa'n je' mit pa i-oytangawa'n. 16Po Jesús nʉcs̈ pa mam igatsʉ̱na nepʉn, mit jem i-ora̱jt.
Jesús i-ac-oytamp tu'c paralíticu
17Mit tu'c s̈ʉjw cuandu Jesús i-ajque's̈, jemey itsʉ̱ngaj fariseujat mit jeme i-ajque's̈capay ley. Mit je'jat mingau nu'pʉjʉn nʉ'jcopajcat Galilea mit Judeajway na̱s̈, mit Jerusalén. Mit el Señor imoy poder Jesús ma oya i-ac-oytan. 18Mit una̱c jayajwat itsʉmdacmingau tu'c paralíticu ito'cni'c, mit iwangau iguimutʉgʉygawa'n tujugum pa iguiyajcawa'n mam itsʉ̱na Jesús. 19Po ca-oyawu iguicomga ni'c jem itsʉ̱naj mayo'c jayajwat. Mit cʉs̈ cu'tcau tʉcyucuinm mit idesteja̱tcau tu'c parte tʉjcopacni'c mit itʉydʉgʉygau mit nu'pʉjʉn ito'c, mit iyajcau es̈pu̱tum mam itsʉ̱na Jesús. 20Mit igui-is̈ Jesús ni'c cupʉjcap, inajau ayé paralíticu:
—Hombre, perdona̱tic itsʉ̱na nu'pʉjʉn mal inwatway.
21Mit jeme i-ajque's̈capay ley mit fariseujat ipensa̱tcau mal, mit inʉmgau: “¿Pʉna jayau ayʉ̱́j? Je' itucotsp Dios. ¿Pʉn oyap iguiperdona̱t ayé mal iwatcaway jayajwat? Solo Dios oyap.”
22Po Jesús ijawiu ni'c we'n ipensa̱tca, mit inʉmgʉs̈au:
—¿Tini'c is̈pensa̱tca mal injo̱tni'jcat? 23¿Jʉmay más fácil tʉs̈nʉjmawa'n ayʉ̱́j jayau: “Perdona̱tic itsʉ̱na nu'pʉjʉn mal inwatway”, o tʉs̈nʉjmawa'n: “Ca's̈ʉ'c mit yo'y”? 24Po tʉ-actujawigʉs̈áj ni'c ʉ̱ jeme tʉjatway jayau tʉnaguep derechu en ayʉ̱́j mundu pa tʉs̈perdona̱twa'n ayé mal iwatcaway jayajwat.
Mit cʉs̈ inʉjmau ayé paralíticu:
—Mi̱ tʉnʉjmap: Ca's̈ʉ'c, pʉc into'c mit nʉs̈ intʉcm.
25Mit je' ca's̈ʉ'c jaran mam igui-e'pca nu'pʉjʉn jayajwat, mit ipʉc ayé to'c itucʉmnapay mit nʉcs̈ itʉcm, mit i-oyninʉm Dios. 26Mit nigu-épigʉjʉu nu'pʉjʉn jayajwat, mit i-oyninʉmgau Dios, mit ni-apʉ̱tigʉjʉu, inʉmgau:
—Jinap nas̈acnigu-épigʉjʉp ayʉ̱́j cosajat.
Jesús iya̱s̈p Leví
27Mit ipichijn jem, i-is̈ tu'c que'chumpay inʉ'jyway Leví. Je' tsʉ̱nau pa̱nguni'c mam iguique'chúmga tumi̱n impuestu. Mit Jesús inajau:
—Natspoguiyac.
28Mit je' iyac nu'pʉjʉn, ca's̈ʉ'c mit inatspoguiu.
29Mit Leví iwajtau tu'c mʉjway cayna̱s̈ itʉcm, mit may que'chumpajyat mit japu̱t jayajwat tsʉ̱ngau me̱s̈ani'c mit je'jat. 30Mit jeme i-ajque's̈capay ley mit fariseujat niqueja̱tcʉjʉu mit Jesús ipʉctampajyat, inʉmgajau:
—¿Tini'c is̈mucáyga mit is̈mu-ú̱jca jeme ique'chumgapay demás, mit maljayajwat?
31Mit Jesús ipo'ngʉs̈:
—Jeme tsʉ̱ngapay oy iganesita̱tcap doctor, po jeme tu'nijatway inesita̱tcap doctor. 32Tʉgaminu tʉs̈che'ngʉs̈ jayajwat ni-oyninʉmgʉjʉpay, tʉmín pa tʉs̈che'ngʉs̈wa'n maljayajwat ma cuyaguiga ima̱lway to̱jwat.
Pa tioy na-ayuna̱twa'n
33Mit je'jat inʉmgajau:
—¿Tini'c Juan ipʉctampajyat ayuna̱tí̱jcap mit ora̱tcap, mit we'ney fariseujat ipʉctampajyat, po impʉctampajyat u̱jcap mit caygap?
34Mit Jesús ipo'ngʉs̈:
—¿Is̈jawiga oyáj is̈ac-ayuna̱tcʉs̈ jeme coygapay cʉ'pa'tni'c mientras ayé novio tsʉ̱nap mit je'jat? 35Po itáj s̈ʉjw cuandu novio igajatsʉ̱nawa'n mit je'jat, mit wejpu'n ayuna̱tcájama.
36Jesús inʉmgʉs̈au mechc ejemplujat pa ma jawiga ni'c magamotca ampay creencia mit ayé nam ama̱s̈an i-ajque's̈way Jesús, inʉm:
—Nepʉn igatsucp tu'c pedazu nam jamuc pa iguitunapwa'n tu'c ampay jamuc. Te iwatp we'n, ayé nam jamuc i-acna̱tpichináj ayé ampay jamuc, mit caservia̱táj. 37Mit nepʉn igacomp nam vinu ampay pa̱gas̈-acbolsani'c. Te iwatp we'n, timamp ayé vinu mit i-acpʉjtugáj ayé ampay bolsa mit cumuchigada'gáj ayé vinu mit togoyáj ayé bolsa. 38Po nam vinu nacomp nam pa̱gas̈-acbolsani'c mit oyap nas̈guarda̱t inimechquij. 39Mit nepʉn jeme i-u̱cpay ampay vinu igawa'náj nam vinu, ni'c inʉmáj ni'c más oy ampay vinu.
Dewis Presennol:
San Lucas 5: PSNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nuevo Testamento en Popoluca de Sayula © Sociedad Bíblica de México, [1969].