Mateo 3
3
Yowaho Batita mai‑ya hiyare
1Yowaho Batita Yodeya‑ka kabani‑ya tokawahe, Yodeya‑ya mai wi‑wina mai‑ya hiyare,
2“Dai ene amosawamahi. Neme‑ke ai nafi‑ka hidi kitabote tohawahebonane.” Yowaho Batita ati ne, ati damemarine.
3Hibati‑ya Yowaho tamine‑bona‑ya i‑di Isa·iya kanahano,
“Bofe‑ke mai‑ka owa kabani‑kaya ati yananeya,
‘Ai‑ka Hidi webote hawine‑bona dai namosahi.’ Ati nebonane.” Deoso ati ne, ati‑ya i‑di Isa·iya kanahanomatamonane.
4Kamero kone wamani‑ya Yowaho Batita weye, bani ataro wamani‑ya dosi‑ya sokinaki nemarine. Yowaho Batita yamata‑ya kihare, ti‑tiri mai‑ya kaba, mo‑mona mai fahi‑ya fawa nemarine.
5Yerosare‑ya mai wi‑wina mai toha, Yodeya‑ya mai wi‑wina mai toha, Yodaho Faha yakari‑ya mai wi‑wina mai toha, mai na, i‑di Yowaho‑ya mai tokomakemaroni.
6“Owa ene towe amani.” Mai ati na,
Yodaho Faha‑ya i‑di Yowaho Batita mai‑ya habanirisemarine.
7Fariseo mai toha, sadoseo mai toha, mai na, mai‑ya i‑di Yowaho awe,
“Maka ihi‑nima dai ene na, ebeni‑ke ati ene Deoso‑ya dai nayofiniti?
8Dai abarabone dai ati niya, dai ene amosawamiyahi.
9‘Abaraho‑ka nodi oda amani. Deoso oda‑ya sarikiterebonane.’ Dai ati riyahi.
Owati dai mitahi. Abaraho‑ka nodi mai one‑bone‑ya Deoso ati wamane‑mana, yati‑ya mai‑ya wamane nane.
10Awa bono bonora toha, awa bono kabi amosara toha na, ade ai kaana, ai sarikiteni. Fara‑nima Deoso bari‑ya maakani hawa tohane. Dai ene amosawami awiriya, awa kaana‑nima Deoso dai‑ya niwahebonane. Dai‑ya nanahabeya, dai‑ya sarikanebonane.
11Deoso‑ka Ka‑kadika ama·orani. Faha‑ya dai‑ya haba·onirisineni, dai ene amosawamabonehe. Kamaki‑bona kitabotebisa amane. Owa‑ta towebisa ama·oni. Amosabotebisa amane. Ati ene Deoso‑ka Doni dai one‑ya sawiwahebonane. Ai nafi‑ya kadikeya, ai one‑ya sarikanebonane.
12Tiriko atori abi hawa toha, atori ai sarikana‑nima mai ihi amosara mai‑ya sarikanebona, yama hirini fawateraboneni. Tiriko noki ai kayafi‑nima mai ihi amosa mai‑ya kayafebonane.” I‑di Yowaho ati nemarine.
Yowaho Batita Yeso‑ya habanirise
13Karireya‑kaya Yeso yanane, Yodaho Faha‑ya tokematane, i‑di Yowaho habahinirisebonaha.
14“Owa habatinirisabisahi.” Yowaho ati nematane.
15“Sibaraboneni. Owa habatinirisiya, Deoso ati‑nima ai teni.” Yeso ati nematane.
Ati ene Yowaho habahinirisematane.
16Yowaho habahinirise, tokomorosame, Deoso‑ka Doni neme‑ya kise, Yeso‑ya sawiwahe, wayomata awi‑nima awi ne‑ya Yowaho awematane.
17Neme‑ya ati kaki,
“Oka Dao amane. Oka Dao onofi nafineni. Ene amose, ene ya‑yai·oneni.” Ati nematane.
Dewis Presennol:
Mateo 3: jaaNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda