Yohana 2
2
Yeso è ken adi esǝ-ben a Kana mo Galili
1Tsǝnò adi e ta, esǝ-ben è no a eten nwofyan a bè fǝ́ anga Kana adi sǝnsen mo Galili. Ayi Yeso è no a zǝn. 2Bè bo Yeso ngge be etsonchi mbwe ken adi esǝ-ben hon gaten. 3Atan a mbǝ enabi mo esǝ hon è nyagu ara ángá, ayi Yeso è jan ye jan, “Be fwa be ngge mbǝ enabi efwe ra.”
4Yeso è janfwe ye jan, “Yaà, bwe engǝ o vǝ m shi anga adi fwa ena? Ekpengga mam chà bwa ye ra.”
5Tea ayi ye è jan be ya mochi a zǝn jan, “Nye e bwe mò e no engǝ ra a ge jan nye ángá.”
6Be hwapi chwen a ngǝ mo ten, yishwa a be ya a Yahuda ti nggwa mbǝ a be ti nacha bwi ju be, abu moefì mo be tú be anga evǝa Ehwya ge e cha be ángá, è fǝ́dwa a zǝn. Akan mo be hwapi hon a de abu galon mo mbǝ gwi fà ti ken gwi ta.
7Yeso è jan be ya mochi hon jan, “Nye nggwa mbo be hwapi e dwana ngge mbǝ.” Enona, bè nggwa mbo be hwapi hon ngge mbǝ gwa pishi a tón.
8Kǝnggwa gè jan be, “Asuswana nye tkyà ye ken no chu mo esǝ hon.”
Bè bwe enò. 9Atan a chu mo esǝ hon è mbwadi nó ángá, mbǝ hon è twafwe nga ara mbǝ enabi. Gè yi ye zǝn a bè ti nó bwa ángá ra. Tea be ya mochi hon è tkyà mbǝ hon bwa ye ángá è yi nó. Kǝnggwa gè fǝ́ edon-gwa hon dwa ken a buetkwa, 10nè jan, “Egwa egwa, kwafya ti mbǝ enabi e se ti ara ángá gwa anga a je sangǝ́, atan a be nobǝ ngǝ mbo ara, be chà a ti e se ye àywá ra ti a bwa anga. Tea ḿ mbo, o ti e se ti ara ti nyi seshi, o chà ti gwa a je asuswana.”
11Ena a moeditanm ekwafya a Yeso è bwe ángá. Gè bwe nó a Kana a sǝnsen mo Galili. A chu mo moeditanm ena gè fi tú egǝ̀n mbwe, ngge be etsonchi mbwe è tsǝ́ekǝ̀n a chu ye.
Yeso nyo be yajwa a Àtá mo Ehwya
(Matiyu 21:12-13; Marku 11:15-17; Luka 19:45-46)
12Chashin mo be mò ena, Yeso è shi chá Kapanahum ngge ayi ye tangge be nwenjwa ye ngge be etsonchi mbwe. Bè no a zǝn mo be tsǝnò nwofyan.
13Atan enò, ekpengga mo Esǝ mo Epenyim mo ya a Yahuda è bwa tén ara, enona, Yeso è vǝ́ a Urishelima. 14A tswa chuukwa mo Àtá mo Ehwya, gè ben be nobǝ è no jwade be ndwa, be son ngge be eba anga. Be ya ehwyà e chuno a zǝn be teboro nè no fwe tse anga. 15Tea gè fya se ti akpan mo dgomo nè ti nyo be vǝ́ gu a je mo Àtá mo Ehwya hon. Gè nyo be yajwa, be son tangge be ndwa vǝ́ a je, nè fkabwi gu be teboro mo ya è fwe fwentse anga nè tsǝ fwentse hon bushan gu a sen. 16Kǝnggwa gè jan be ya e jwade be eba anga jan, “Nye kpu be mò e dwana vǝ́ a je ana. Nye e ti e didi nye àtá mo Àtà m, ge e nga nye afyan jwa ra.” 17Atan a mò ena bwe ángá, be etsonchi mbwe è kaben Fwaebam, e jan, “Edgyanfim mo àtá mbo, mbo m tsuruku.”
18Tea be atkwen nobǝ mo ya a Yahuda ká ye eka jan, “Echi nwone a tú je jan o no ngge emwentì ti bwe be mò be moeditanm a o bwe anga ena no a che?”
19Yeso è janfwe be jan, “Kǝn bwi Àtá mo Ehwya ena, ma mbwe ye a nyi etkyen adi tsǝ ta.”
20Be atkwen nobǝ mo ya a Yahuda è tandwa jan, “Ano ré! Bè ti je gwi ndwe chu chwen a ngǝ (46), ti mbwe Àtá mo Ehwya ena, o jan wa ti tsǝ ta ti twanga a mbwe ye a nyi etkyen?” 21Tea Àtá mo Ehwya a Yeso è jan anga, a ekǝnjuju mbwe. 22Atan a Ehwya è ti ye nyi ara etkyen a dì ángá, be etsonchi mbwe è kaben jan gè jan di ara be fwa ena. Kǝnggwa bè tsǝ́ekǝ̀n a chu be mò a bè bá dwa a tswa Afketa mo Ehwya ngge fwa a Yeso è jan ángá.
23Asuswana, a gè no a Urishelima adi Esǝ mo Epenyim ángá, be nobǝ embo è tsǝ́ekǝ̀n a chu ye atan a bè di be moeditanm àywá a gè bwe ángá. 24Tea Yeso è ti chu ye du ye be a bu ra, adia ge yi tsuruku mo be nobǝ binbin ángá. 25Ge nda ye nobǝ akan e jan e tú ye abu nobǝ no anga ra, adia ge yi gu ara be mò e dwa a tsuruku mo nobǝ egwa egwa.
Dewis Presennol:
Yohana 2: ICH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2024 Luke Initiative for Scripture Translation