Yohana 3
3
Nikodimo è ken a zǝn Yeso
1Nobǝ akan, Farisi, bè fǝ́ ye anga Nikodimo, gè no akan a engga mo be Atkwentì mo be ya a Yahuda. 2Gè bwa a zǝn Yeso etsǝ nè jan, “Etumo, je yi jan wa etumo e vǝ a zǝn Ehwya bwa ángá. Adia nobǝ e bwe a ti be mò a o bwe anga fwa ye ra, kpwà tén ano Ehwya no ngge ge.”
3Yeso è janfwe ye jan, “Me e jan o ebi, ende a kwa a tswa zǝnotì mo Ehwya ángá fwa ye ra, kpwà tén ano be mbwa ara ye adi e fà.”
4Nikodimo è ká ye eka jan, “Bwe engǝ ba mbwa nobǝ efwe, a ge ke ara cho ángá? Ge twabǝ a kwa a dgèn mo ayi ye evǝa be e mbwa ye efwe?”
5Yeso è janfwe ye jan, “Me e jan o ebi, ende a kwa a tswa zǝnotì mo Ehwya anga fwa ye ra, kpwà tén ano be mbwa ara ye adi mbǝ ngge Engǝ́. 6Nobǝ a nobǝ mbwa a ge ángá, a nobǝ, tea nobǝ a Engǝ́ mbwa a ge ángá, a engǝ́. 7Enona, ge e no mbo mò ezǝzǝju adi fwa a m jan o jan, ‘Ge no kenm ba mbwa o efwe’ ángá ra. 8Fyo kpo ken anga chá ge dgyan anga. O fo kpé-ekǝnm mbwe anga, tea o yi mbo chá a gè vǝ bwa anga eno e ra chá a ge nya a ken anga ra. Ena abu ge no ngge egwa egwa a Engǝ́ mo Ehwya mbwa ye a ge ángá.”
9Nikodimo è ká ye eka jan, “Mò hon ena a bwe engǝ?”
10Yeso è jan, “A bo nwene e tú be ya a Esǝrela mò anga, tea a o hwayi mbo be mò e dwana ra? 11M jan o ebi, je jan fwa a je yi ngge je jantu nye mò a je di ara ngge fǝzǝn mo je, tea a nye be nobǝ, nye cha nye dwa ngge fwa a je jan nye anga ra. 12M̀ jan ara nye fwa a chu mo be mò e dwa a tswa zǝnchaje ena, nye tsǝ́ nye ekǝ̀n ra, bwe engǝ nya tsǝ́ekǝ̀n, ano m jan nye fwa a chu mo be mò ya e dwa a kpe ángá? 13Ende e vǝ́ di ara a kpe ángá fwa ye ra, kpwà tén ende akan hon è vǝ chá kpe shwa ángá, ga Nwen Nobǝ hon. 14Abu Mosa è kan mokan a bè bwe ngge tsemo a be fǝ́ anga tagula, etkyen a tswavǝ́n adi tuetsǝ́n ángá, ge no kenm, ba kan Nwen Nobǝ etkyen, 15evǝa egwa egwa e tsǝ́ ara ekǝ̀n a chu ye, a ben nya e no a fwa efwam ángá.
16“Adia Ehwya è dgyan be nobǝ mo zǝnchaje àywá, gè tson Nwen ye akan tete bwa, evǝa egwa egwa nwene e tsǝ́ekǝ̀n a chu Nwen hon, a tkò a didi ye ra, tea ga ben nya e no a fwa efwam ángá. 17Adia Ehwya e tson ye Nwen ye hon shwa ye a tswa zǝnchaje abu ge e kpèn be nobǝ mo zǝnchaje kǝ́nfǝ ra, tea adi efka mbwe be e ben ega. 18Egwa egwa e tsǝ́ekǝ̀n a chu ye, ba kpèn be ye kǝ́n ra, tea egwa egwa e tsǝ́ ye ekǝ̀n a chu ye ra, be kpèn fwa ara ye kǝ́n adia ge tsǝ́ ye ekǝ̀n a chu Nwen mo Ehwya, Nwen akan tete hon ra. 19Kǝ́n hon no a chu fwa ena: Enggasansan mo Ehwya shwa a tswa zǝnchaje, tea be nobǝ dgyan ti ara etwafǝfǝ chàshín enggasansan adia be mò a be bwe anga, a be mofǝ̀. 20Binbin mo be ya e bwe mofǝ̀ anga ze enggasansan hon, n ken be a zǝn enggasansan hon ena ra, adia be tsen anga jan be nobǝ a di be ebgen mo be. 21Tea be ya e bwe mò e no ebi anga, bwa anga a tswa enggasansan hon, evǝa be nobǝ ya ehwyà be e di jan, be bwe anga mò a Ehwya dgyan anga.”
Yohana ya Batisǝma è jan fwa echa a chu Yeso
22Chashin mo be mò ena, Yeso ngge ya è ba ye anga è nyagwa Urishelima nè ken a sǝnsen mo be ya a Yahudiya, zǝn a gè no dgyenfon ngge be nè bwe be nobǝ batisǝma ángá. 23Adi ekpengga ena, Yohana ya Batisǝma è no bwe be nobǝ batisǝma anga a eten Aino, tenten a zǝn Salim, adia mbǝ è no àywá a zǝn ngge be nobǝ embo è no bwa wi anga a zǝn ye evǝa ge e bwe be batisǝma. 24(Mò ena è bwe atan a bè chà fu Yohana kenpe be a àtá ehwyatu ra ángá.) 25Efyan etwam è nyi etkyen a engga mo ya ehwyà ya è ba Yohana anga ngge ende akan ya a Yahuda, a chu moefì mo ju egwacham mo be ya a Yahuda, a be ebǝ ata mo be è tú be ángá. 26Bè bwa a zǝn Yohana nè jan, “Etumo, nobǝ è no ngge bo jengǝ̀ mo Kǝn a Joda chá akan, nwene a ò jan je fwa echa a chu ye jan ga Etsǝpepe ángá, bwe be nobǝ batisǝma anga gaten. Be nobǝ egwa egwa ken anga a zǝn ye.”
27A chu fwa ena, Yohana è janfwe be jan, “Nobǝ a ben ye mò akan ra, kpwà tén ano Ehwya no ara ye nó a ge. 28A nye e chu nye, nye jan a yi jan, m̀ jan ara nye jan, ‘M fwa m Kristi hon ra, tea bè tson m me e kwafya mbwe.’ 29Endà-efwe hon, a ḿ mo edon-gwa hon. Shushwa edon-gwa hon nobà ge e fo aken mo edon-gwa hon. Ga no ngge vǝtsen àywá atan a ge fo ara aken mo edon-gwa hon ángá. Vǝtsen hon a ḿ mam ngge ge defǝ ara asuswana. 30Ge no kenm, ge e no tu e bi anga chafya chafya adi egǝ̀n, a me ma no vǝ́ anga eshin eshin.
31“Ende e shwa anga chá kpe twafǝ̀ egwa egwa. Ende e no anga a tswa zǝnchaje no ḿ mo zǝnchaje n jan fwa anga abu ende e vǝ cha zǝnchaje bwa. Ende e shwa chá kpe ángá, twafǝ̀ egwa egwa. 32Ge jan je anga mò a ge di n fo a kpe, tea ya e tsǝ́ekǝ̀n a chu fwa a ge jan anga fwa be embo ra. 33Tea egwa egwa e cha ara fwa mbwe hon ángá cha ara dwa jan Ehwya a ebi. 34Ende a Ehwya tson bwa anga jan anga fwa mo Ehwya, adia Ehwya no bwi ye Engǝ́ a be mbwadi a yi be nó ra. 35Àtà hon dgyan Nwen hon nè ti mò binbin du ara ye no a bu. 36Ende e tsǝ́ekǝ̀n no a chu Nwen hon ben ara nya e no a fwa efwam ángá, tea ende e segwa Nwen hon a di ye nya ra, tea engo mo Ehwya no a kpwà a chu ye.”
Dewis Presennol:
Yohana 3: ICH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2024 Luke Initiative for Scripture Translation