Yohana 21
21
Yeso è mbwibwa a zǝn be etsonchi chwen a fà
1Beti bishi efwe, Yeso è mbwibwa a zǝn be etsonchi mbwe, a tón edan a Tiberiya. Ena a abu gè mbwibwa a zǝn be ángá: 2Sima Bitru, Toma (a bè fǝ́ anga Ngǝfen), Nataniye ya Kana mo Galili, mbǝgya fà mo Zabadi ngge be etsonchi fà efki, è no abibi. 3Sima Bitru è jan be jan, “Ma nya adi gwejo efum.”
Be jan ye, “Ja nya ngge bo.” Bè ken kwa ngga nè tku ngga zǝn abu be e fu gwejo tea bè fuben be mò akan ra.
4Anofon tàtà enó, Yeso è ywano a tón edan hon, tea be etsonchi hon è diyi be jan na Yeso ra.
5Gè fǝ́ be dwa jan, “Shushwa m ya, nye fwa nye ngge gwejo akan ra?”
Be janfwe ye, “É yé. Je fwa je ngge nó ra.”
6Gè jan be jan, “Nye nggwa acha mo nye shi chá budgo mo ngga hon, nya fu gwejo ya ehwyà.” Atan a bè nggwa acha hon shi ángá, bè fu be gwejo àywá, nè vǝ acha hon gwa ti be a tswa ngga hon ra.
7Kǝnggwa etsonchi nwene Yeso è dgyan àywá ángá è jantu Sima Bitru jan, “A Etsodwe.” Kè akan abu Bitru è fo jan, “A Etsodwe” ángá, gè ti mokàn mbwe nggwa a ju (adia ge nggwa mò no ye a ju ra) nè fǝ efǝ shi a tswa mbǝ. 8Be etsonchi ya e dan shi ángá è no nyi ngga hon ken anga chá tón edan, nè no vǝ acha hon éè mbo ngge be gwejo ángá, ken anga ngge be, adia bè dgyen be zǝn ngge tón edan hon ra. Edgyenm mo nó e no abu mita gwé akan (100). 9Atan a bè vǝ́ngga a tón edan hon ángá, bè di fǝ̀ è no de anga a chu ká ngge gwejo è a chu mo nó. Bè di borodi è no a zǝn gaten.
10Yeso è jan be, “Nye kpu be gwejo ya ehwyà, ya a nye fu asuswana ángá bwa.” 11Enona, Sima Bitru è kwashi a tswa ngga hon nè vǝ acha hon vǝ́ tón edan hon. Gè mbo ngge be gwejo ekeke e kengga gwé akan ngge gwi chwen chu ta (153). Èé abu be gwejo hon è fí no ángá, acha hon e cha ye ra. 12Yeso è jan be jan, “Nye bwa nye e bwi echa.” Bè ben be akan mo be etsonchi hon e bon ti ekǝ̀n ká ye eka jan, “Abo wa ara, ra?” Bè yi jan a Etsodwe. 13Kǝnggwa Yeso è ti borodi hon ti no be, ge bwe enò ngge gwejo hon gaten. 14Ena a embwibwam mo Yeso adi e ta a zǝn be etsonchi mbwe, chashin a bè ti ye nyi ara etkyen a dì ángá.
Yeso è cha Bitru efwe
15Atan a bè de fwa ara mode ángá, Yeso è ká Sima Bitru eka jan, “Sima nwen Yohana, o dgyan m twafǝ̀ gu be ya ena?”
Bitru è chadwa jan, “Ee, Etsodwe, o yi ara jan m dgyan o.”
Yeso è jan, “Fyo be mbǝgya mo son mam.”
16Efwe Yeso è ká ye eka jan, “Sima nwen Yohana, O dgyan m anga eshwen?”
Gè chadwa jan, “Ee, Etsodwe, O yi jan m dgyan o anga.”
Yeso è jan, “We dgon be son mam.”
17Yeso è ká ye eka adi e ta jan, “Sima nwen mo Yohana, o dgyan m anga?”
Bitru è bgen nya adia Yeso è ká ye eka adi e ta jan, “O dgyan m anga?”
Gè jan, “Etsodwe, o yi gu ara be mò, o yi ara jan m dgyan o anga.”
Yeso è jan, “Fyo be son mam. 18M jan o ebi, atan a ò chà no ezon-nobǝ ángá, ò tsàn ju o abu ò dgyan anga, ò ken zǝn a ò dgyan anga. Tea atan a o ke ara cho, wa ywa be bu mbo a gwa a je, be nobǝ efki a tsàn o ju na ti o a ken chá zǝn a o dgyan mbo we ken ángá ra.” 19Yeso è jan fwa ena anga abu ge e tú yishwa fǝ a Bitru a fǝ evǝa Ehwya a ben egǝ̀n ángá. Kǝnggwa Yeso è jan ye, “Ba m.”
20Bitru è fǝ̀n shwa nè di etsonchi nwene a Yeso éè dgyan àywá ángá, no ba be anga chashin. (Ena a ende nwene è dwa vǝ́ no a ju Yeso atan a bè de mò anga adi Esǝ mo Epenyim, nè ká Yeso eka jan, “Etsodwe, ara tsǝ a du o a ge?”) 21Atan a Bitru è di ye ángá, gè ká Yeso eka jan, “Etsodwe, mò a ende ena no a bwe anga ángá a ano?”
22Yeso è janfwe ye jan, “Ano m dgyan ge e no ngge nya ti e ken atan a ma twabǝ a bwa ángá, fwa mbo angǝ̀ ani? Adi mbo, we ba m.” 23A chu fwa ena, asha mo fwa hon è kwa a tón mo be ya ekǝ̀n-etsǝ́m, jan etsonchi hon ena a fǝ ye ra. Tea Yeso è jan ye jan, etsonchi hon ena, na fǝ mo nó ra ra. Gè jan kpwà jan, “Ano m dgyan ge e no ngge nya ti e ken atan a ma twabǝ a bwa ángá, fwa mbo angǝ̀ ani?”
24Etsonchi ena a nwene è di be mò ena ngge fǝzǝn mbwe nè bá be ángá. Je yi jan be mò a ge jan anga no ebi.
25Yeso è bwe be mò àywá ya ehwyà. Ano, be è ma bá egwa egwa mo be mò a Yeso è bwe ángá, m di anga zǝnchaje binbin àa kǝn ye ge e kpu e gu be afketa a bà a bá ara ángá ra.
Dewis Presennol:
Yohana 21: ICH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2024 Luke Initiative for Scripture Translation