San Juan 13

Chꞌin Jesús kjo̱nimá to̱té ti sin kꞌuájiko

1Ti ó kuichjina ti kia Pascua la chꞌin Jesús ó nohe kixin ó kjuixraká ti hora tsíto̱he chꞌan chjasintajni ndá sátsji̱chréhe̱ chꞌan Itꞌé chꞌan. Jehe chꞌan la xráxín imá tjue̱he chꞌan ti sin kuènté chꞌan tjejó chjasintajni, a̱ndá ijie a̱ntsí tsja̱ko̱xi̱n chꞌan kixin imá tjue̱he chꞌan ti jehe sin.

2Ndá ti Jínahña tsíkꞌe̱tue̱hen a̱sén ti chꞌin Judas Iscariote, xje̱en chꞌin Simón, kixin sinchekji chꞌan ti chꞌin Jesús. 3Chꞌin Jesús la ó nohe kixin kui̱xi̱n chꞌan ti itjen Díos la ko xíkjan chꞌan sátsji̱chréhe̱ chꞌan Díos ínaá. La ko nohe chꞌan kixin Itꞌé chꞌan mé kjuajon kjuachaxin tsꞌe̱tue̱hen chꞌan kaín ti nkehe siín. 4Ndá na̱xa̱ tjejónie sin, ndá chꞌin Jesús kꞌuínkatjen chꞌan la kuakitsje chꞌan ti ika tꞌitsáte chꞌan la kuákja chꞌan ijnko ika xámáxin chojni ti ó tꞌónti, la kꞌuinkatꞌóxin chꞌan. 5Ndá kui̱ki̱a chꞌan ìnta̱ ijnko nkehe, ndá kjuankíxin chꞌan kjuínchekꞌónti chꞌan to̱té nkojnko ti sin kꞌuájiko chꞌan, la kjuínchexámáxin chꞌan ti ika kꞌuinkatꞌóxin chꞌan.

6Ndá ti ó kjuíji chꞌan ti itjen chꞌin Pedro, la chꞌin Pedro ndáchro:

―Ìnchéni, ¿nkekuènté jaha chrókjui̱nchekꞌontia to̱téni?

7Ndá kjuáte̱he chꞌin Jesús, ndáchro:

―Jaha la na̱xa̱ tiénxinhña ti nkehe tjétꞌa̱. Chrꞌéxi̱n ndá tsiénxian nkekuènté tjétꞌa̱ tíhi.

8Ndá ndáchro chꞌin Pedro:

―Náhí. Jaha la si̱nchekꞌóntihya ti to̱téni.

Ndá ndáchro chꞌin Jesús:

―Ti si̱ntakꞌóntihya ti to̱tá, la xrokjuahya tsochrehé ti janhan.

9Ndá chꞌin Simón Pedro, ndáchro:

―Ìnchéni. Ti xi̱kaha la jehya ti to̱téni ó chrókjui̱nchekꞌontia. Kja̱xin itjani la ko ikjani chrókjui̱nchekꞌontia.

10Ndá ndáchro chꞌin Jesús:

―Ti sin ó tsíkjixin tsíkꞌónti la ticháxi̱nhña kuenté sin tsꞌónti sin ínaá. Náhí. Jehó ti to̱té sin mé ticháxi̱n tsꞌónti kixin kuenté sin la ó tjóá sin. A̱ndá jaha la ó tjóá, kjánchó kaínhñara.

11Mé xi̱kaha ndáchro chꞌin Jesús kixin kaínhña sin tsíkótjóá sin kixin ó nohe chꞌan nkexro sinchekji ti jehe chꞌan.

12 # Lc. 22:27. *Ndá ti ó kjuixin kjuínchekꞌónti chꞌan to̱té sin, ndá kꞌuinkáya chꞌan ti ika tꞌinkáyate chꞌan ínaá, ndá kjuákꞌetja̱xi̱n chꞌan ti itjen mesa la ndáchro chꞌan:

―¿Á kíenxinra ti nkehe kjui̱tꞌa ní? 13Jahara la ndáchrora kixin janhan ti Maestro kuèntára la ko Ìnchára, la chaxín ndoá ndáchrora kixin janhan tíha. 14Mé xi̱kaha janhan ti Maestro kuèntára la ko Ìnchára kjui̱ntakꞌontia to̱tára la kja̱xin jahara xi̱kaha chrókjui̱nchekꞌontira to̱té ti kichuara. 15Janhan mé kjuáko̱xián kixin xi̱kaha chrókjui̱chꞌera éxi kjui̱tꞌa janhan. 16#Mt. 10:24; Lc. 6:40; Jn. 15:20.*Ijnko nkehe chaxín tso̱tjo̱nkara kixin ti sin chꞌexón ixra̱ mé tꞌe̱tua̱nhña sin éxi tꞌe̱to̱axín ti làmoé sin, la ko ti sin kꞌuáyéhe̱ ijnko ixra̱ la tꞌe̱tua̱nhña sin éxi tꞌe̱to̱axín ti nkexro kjuajon ti ixra̱. 17Ti chrókiénxinra nkehe tíhi la ko chrókjui̱nchexiteyára la a̱ntsí chrókócháhara.

18 # Sal. 41:9. *’Jehya kaínra ndáxrja̱nxia̱n tíhi. Ó nona nkexro kjuéyá janhan. Kjánchó ticháxi̱n tsoxiteyá ti nkehe tsíkjin sin ósé ndáchro: “Ijnko nkexro tjénie̱kian mé tsokjan tso̱nínkakona.” 19Mé xi̱kaha ndáxrja̱n senó kixin ti ó tsꞌatsínka kaín tíhi, ndá tsítekáonra kixin janhan mé ti nkexro xráxín itjen. 20#Mt. 10:40; Mr. 9:37; Lc. 9:48; 10:16.*Ijnko nkehe chaxín tso̱tjo̱nkara kixin ti tsjájonra kjuachaxin ndo̱ara tsito̱he ti nkexro ichrꞌán janhan, mé éxi chrókjuájonra kjuachaxin kixin janhan chrókuito̱na ndo̱ara, a̱ndá ti nkexro tsjajon kjuachaxin tsito̱na janhan la éxi chrókjuajon sin kjuachaxin chrókuíto̱he ti nkexro ichrꞌán ti janhan kꞌuinka ―ichro chꞌin Jesús.

Chꞌin Jesús chrónka kixin Judas sinchekji ti jehe chꞌan

(Mt. 26:20-25; Mr. 14:17-21; Lc. 22:21-23)

21Ndá ti ó kjuixin chrónka chꞌin Jesús xi̱kaha, ndá imá kóxakohen a̱sén chꞌan la ndáchro chꞌan:

―Ijnko nkehe chaxín tso̱tjo̱nkara kixin nkojinra tjejora ntihi mé si̱nchekjira ti janhan.

22A̱ndá ti sin kꞌuájiko chꞌan kjuankíxin komá kícho sin kixin noehña sin nkexro ti ndáchro chꞌan. 23Ndá ijnko ti sin kꞌuájiko chꞌin Jesús, imá tjue̱he chꞌan, itjen chjinaxón ti itjen chꞌan tjejónie sin. 24Mé kjuakuexín chꞌin Simón Pedro itja kixin chrókjuanchankí chꞌan nkexro tíha.

25A̱ndá ti nkexro a la a̱ntsí kóchjinehe chꞌan ti chꞌin Jesús, ndá kjuanchankíhi chꞌan ndáchro chꞌan:

―Ìnchéni, ¿xá nkexro tíha?

26A̱ndá kjuáte̱he chꞌin Jesús, ndáchro:

―Si̱ntakjata itꞌo̱ nio̱tja̱, a̱ndá ti nkexro tsotjahá ti nio̱tja̱ a, mé tíha ti nkexro a.

A̱ndá xi̱kaha kjuínchekjata chꞌin Jesús itꞌo̱ ti nio̱tja̱, ndá chjéhe chꞌan ti chꞌin Judas Iscariote, xje̱en chꞌin Simón. 27Ndá ti ó kuákja chꞌin Judas ti nio̱tja̱, ndá tuénxín kꞌuíxehen a̱sén chꞌan ti Jínahña. Ndá chꞌin Jesús ndáche ti jehe chꞌan:

―Ti nkehe tjinkaoan si̱chꞌe la jaí tóxakohan.

28Kjánchó nijnko ti sin tjejónie ntiha kienxínhña ti nkehe ndáchro chꞌan. 29Chꞌin Judas mé ti nkexro tꞌayakohen ti nkehe tjinká chichaon, méxra̱ iso sin kjuénka̱yáxin sin kixin chꞌin Jesús mé kꞌue̱tue̱hen ti chꞌin Judas kixin ichrén nkehe sátsjikꞌe̱na chꞌan kuènté ti kia, o̱ áchꞌe ichrén nkehe sincheki̱to̱nhe̱n chꞌan ti sin nóa. 30Ndá ti ó kuákja chꞌin Judas ti nio̱tja̱, la kꞌuaxrjexín chꞌan ntiha. La ó kꞌuíxin tie.

Ijnko nkehe ni̱xin kꞌue̱to̱an chꞌin Jesús

31A̱ndá ti ó kjuixin sátsíkji chꞌin Judas, ndá ndáchro chꞌin Jesús:

―Ijie tsꞌikonra ti kjuachaxin ijié kuènté ti Xje̱en Díos kꞌóna chojni la ko tsja̱ko̱xi̱n chꞌan ti kjuachaxin ijié kuènté Díos. 32La xi̱kaha ti Xje̱en Díos kꞌóna chojni mé tsja̱ko̱xi̱n ti kjuachaxin ijié kuènté Díos, ndá xi̱kaha Díos mé tsja̱ko̱xi̱n ti kjuachaxin kuènté ti Xje̱en, la tjoka tsoxiteyá tíha. 33#Jn. 7:34.*Xje̱eni, í séhya na̱xa̱ tsjakꞌé ntihi tsꞌejóni. Ndá jahara tsꞌájikjéyára ti janhan. Ndá éxi tja̱nka ti sin judío mé tso̱tjo̱nkara kja̱xin: Ninkexró xitjahya tsjiji ti sátsjia janhan. 34#Jn. 15:12, 17; 1Jn. 3:23; 2Jn. 1:5.*Ijnko nkehe ni̱xin tétua̱hanra ijie kixin chrótjue̱héra kichuara éxi tjua̱xinra xi̱kaha, mé xi̱kaha chrótjue̱héra kichuara. 35Ti tso̱tjue̱héra kichuara, ndá tso̱nohe kaín chojni kixin tinkachónkira ti janhan.

Chꞌin Pedro sinchemá kixin chónhña ti chꞌin Jesús

(Mt. 26:31-35; Mr. 14:27-31; Lc. 22:31-34)

36Ndá kjuanchankí chꞌin Simón Pedro ndáchro:

―Ìnchéni, ¿xá nketí sátsjia?

Ndá kjuáte̱he chꞌin Jesús ndáchro:

―Ti sátsjiá la xitjahya tsochrehéra jaí, kjánchó chrꞌéxi̱n tsjasánchrehéra ntiha.

37A̱ndá ndáchro chꞌin Pedro:

―¿Nkekuènté xitjahya tsochráha̱ ti jaha jaí? Kixin janhan tjínka̱oan tsochráha̱ ti jaha kjónté itsꞌen.

38Ndá kjuáte̱he chꞌin Jesús ndáchro:

―¿Á chaxín tjinkaoan kjónté itsꞌen tsochrehé ti janhan ní? Ijnko nkehe chaxín tso̱tjo̱nka kixin na̱xa̱ tsotsjehya ti kochi̱ntólá la ó si̱nchemá iní vece kixin chóxinhña ti janhan.

Zur Zeit ausgewählt:

San Juan 13: poeNTplus

Markierung

Kopieren