MARK 15
15
Pilat miki Jisu Bedarükhi
(Mt 27.1-2,11-14; Lk 23.1-5; Jhn 18.28-38)
1Yapsu nahde amükeam putungrübonü azothsürü le yakzan thsangyurü tüsho kiuthsübinkiu alala bebah küdangkhi la; tüsho arünü Jisu rhükbah bede yünü Pilat kilim jih. 2Judüki Pilatnü api ki keokhi, “Nü Jihudarü kiulongthsüpuh a de?” Tüsho apinü alo, “Nünü athakhi nangde ah.” 3Tüsho amükeam putungrübonü api amülim jihde ahihkhüh tha, tüshe apinü tümü malo. 4Judüki Pilatnü api ki keolo, “Nünü tümü she maloba de? Arünü küdükhüh nü azhihde thiyumütsan jihchonü kheahang!” 5Tüshe Jisunü judü lang tümü malo, jumonü Pilatnü müyinsah.
Jisu Sheshihkhi
(Mt 27.15-26; Lk 23.13-25; Jhn 18.39—19.16)
6Kheakü thünio abande mihtsürübonü amushukhi aramrü khülang arü kilim dükhepü yakli lakheah. 7Mihtsürü khülang Baraba de ajikhi neamneamruru ching mihlaksahkhi azhihrübo lung rihyam ching lakheah. 8Judüki apinü arü kilim kamruhroro rhimokhi nangde arhimoshihpü botonü api ki keokhipü tankih. 9Tüshe Pilatnü arü ki alojihde tha, “Nüsa kilim inü Jihudarü kiulongthsüpuh dükheshihpü mulongla shi?” 10Tümüde amükeam putungrübonü mükthsükhi hode api rama jihkheah de apinü mükheah. 11Tüshe apinü arü kilim Baraba dükheshihpü thsüde amükeam putungrübonü boto thurumusu. 12Tüsho Pilatnü arü ki thalo, “Judüasho nüsanü Jihudarü kiulongthsüpuh de ajikhi kheak inü tümü rhimoshihnela?” 13Arünü zhi, “Api yümkihang!” 14Judüki Pilatnü arü ki tha, “Tümü thsükhi, apinü amütsü tümü rhimoa la?” Tüsho arünü alü thsüde zhi, “Api yümkihang!” 15Jumonü Pilatnü boto asühshihpü arü kilim Baraba dükhe; tüsho apinü Jisu ju rhapbah sangkim ching yümkihshihpü jih.
Bonungrübonü Jisu Mükhemükimkhi
(Mt 27.27-31; Jhn 19.2-3)
16Judüki bonungrübonü khiunglün-yam ching bede yüzah, tüsho arünü bonungrü boto alala jimukhung. 17Arünü api kheak mürümmuchu khim phuyujih; tüsho arünü ayang kuthran rhode thsakhambah aku kheak thranjih, 18tüsho api ki, “Jihudarü kiulongthsüpuh, tsüde laang!” de akin jihpü tankih. 19Jushu arünü tsonü aku kheak rhap tüsho mükeke mukhiukkih; tüsho khukningde api kingaün. 20Tüsho küyimki arünü api mükhemürangkhea, arünü api kheaknü mürümmuchu khim yihkhibah anihbuh khimmih phuyujih, tüsho api yümkihshihpü bekhitbah yü.
Jisu Yümkihkhi
(Mt 27.32-44; Lk 23.26-43; Jhn 19.17-27)
21 #
Rom 16.13
Kheakü arünü Alexander le Rufus büne abuh, Serenerü Simon, lomi chingnü akhiukbah hode ayüchoki Jisu sangkim nimkih-a hanshih. 22Tüsho arünü Jisu ju Golgotha (amütsan kuro dangpung) de ajikhi dangpung ching bedarü. 23Judüki arünü asanke dungrubah api kilim kurungasoke duh, tüshe apinü ju muyung. 24Tüsho küyimki arünü api yümkihkhea, arünü api khimmihbo azan thsüde mihtsürü abande chama lu. 25Arünü api yümkihchoki yapsu 9 kingde alakheah. 26Tüsho api amülim jihkhi akumung thrüta zo: JIHUDARÜ KIULONGTHSÜPUH. 27Arünü api lung jangkhijangrarü mahne she khülang tsülim tüsho khülang ju huzulim de yümkih. 28Junangde amüsühyunü athakhi dünji, “Tüsho api ju athsümünimrü lung kheyuk.” 29#Mk 14.58; Jhn 2.19Tüsho tsahhode alarübonü api athrude arü ku angamde tha, “Aha! Arüngyam thsümünimbah nimung mahsam chingnü athsülopü labuh, 30nü küdah thsüde khümkhitang, tüsho sangkim chingnü akiang!” 31Junangde amükeam putungrübonü she yakzan thsangyurübo lung thsürubah mükhemükimde arü bolung thaachih, “Apinü püpürü khümkhitdo, tüshe aküdah thsüdüa mükhümkhitkhuk. 32Israel kiulongthsüpuh, Khrista kheakü sangkim chingnü akiang, junangde isanü angübah tüsho akin labah.” Tüsho api lung yümkih-a bahrünü she api mükhemükim thsü.
Jisu Shekhi
(Mt 27.45-56; Lk 23.44-49; Jhn 19.28-30)
33Küyimki animuro kamkhea, alomi alala ching amiting ju 3 king khiungde la. 34Tüsho 3 king ching Jisunü düsheak achangnü zhide tha, “Eloi, Eloi, lama sabakthani?” ju amütsan, “I Thrünpuh, I Thrünpuh, tümüde nünü I bahyukkhea?” 35Ju ki zhiprü khürünü ju sobah tha, “Kheahang, apinü Elija jichoh!” 36Khürünü nahde shande yübah minap hingkhi lu tüsho asanke ching thsambah dükheangmung mün kheaknü api duhde tha, “Api langzü zojang; api bekhipü Elija arünahnü isanü kheahanü.” 37Tüsho Jisunü düsheak achangnü zhibah api sheak akheam thsü. 38Judüki arüngyam zhindokhim akulimnü abolim khiungde mahne thsüde thorüp. 39Küyimki ju ki zhipbuh bonungrü torünü apinü hanangde zhibah sheak akheam thsükhi ngükhea, apinü tha, “Tsükjide ha mihtsürü Thrünpuh tsührü thsüa lah.” 40#Lk 8.2,3Ju ching aliberü khürü limshu chingnü kheahde alarü bolung Mari Magdalen, akheambuh Jakob tüsho Josep büne abe Mari, tüsho Salome lakheah, 41api Galilee ching lachoki arünü api yande yübah anihbuh rungkheah, tüsho api lung Jirusalem lim aturü aliberü ahihkhüh lakheah.
Jisu Mi Bahkhi
(Mt 27.57-61; Lk 23.50-56; Jhn 19.38-42)
42Küyimki arelim kamkhea, Amuni müngüh thsakhamthsayipü nimung lamonü, 43kiuthsü-binkiu ching adungto kheyukrü Arimathearü Josep, Thrünpuh kiulongthsü aleangde alabuhnü arübah mulong tode Pilat ki yü tüsho Jisu mi kheang. 44Pilatnü api sheabahkhi müyinsah, tüsho api nahde ashekhea shi yungnü bonungrü torü ki keokhi. 45Tüsho küyimki bonungrü torü kilimnü amütsankhea, apinü Jisu mi ju Josep kilim jihpü mülü. 46Judüki apinü khimthünak thulobah api yihkhi tüsho khimthünak ching hing. Tüsho apinü lung ching kiukhi kiuyuk ching api yapshih, tüsho kiuyuk mi kheak lung khülang lahkih-a zo. 47Tüsho Mari Magdalen le Josep abe Mari anenü Jisu yappung kheahde alakheah.
انتخاب شده:
MARK 15: YIMCBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.