MARK 16
16
Arhang Kamlokhi
(Mt 28.1-8; Lk 24.1-12; Jhn 20.1-10)
1Küyimki Amuni hokhea, Mari Magdalen, Jakob abe Mari tüsho Salome arünü Jisu pang kheak mujupü rhümthüneabe lubah arü. 2Amu-khip akhuhbe nimung, yapsu mükikde, ani akhiukchoki arünü kiuyuk ching arü. 3Tüsho arünü arü bolung thaachih, “Shepünü isa thsungkheak kiuyuk khimdopü kheaknü lung thülah-a bahba?” 4Tüshe küyimki arünü abinkih-a kheahkhea, lung ju thülah-a bah-a lakheah–tümüde ju khide ato lakheah. 5Kiuyuk ching yüzahchoki, athrününgtsüng mihtsürü khülang shulünkhim amüye yihbah tsülim binde arünü ngü; tüsho arübo arhunganim. 6Tüshe apinü arü ki tha, “Darhunganim. Nüsanü Nazarethrü Jisu, shepü ayümkihkheanü yimchoh. Api arhang kamlodo! Api ha ching müla. Arünü api yapshihkhi dangpung ching kheahang. 7#Mt 26.32; Mk 14.28Tüshe yüang tüsho api jingyanrübo, Peter pürü ki api nüsa müngüh Galilee ching yüchoh de thaang; apinü nüsa ki thakhi nangde ju ching nüsanü api ngübah.” 8Tüsho arünü wukhiukbah kiuyuk kinü alihde tso, tümüde arü ajan tüsho müyinsah. Tüsho atrekhi hode arünü she ki she tümü mütha.
Mari Magdalen ki Jisu Akhiukkhi
(Mt 28.9-10; Jhn 20.11-18)
9Küyimki api amu-khip akhuhbe nimung mükikde asürükhea, apinü amünean me thüne yankhitkhi Mari Magdalen ki akhiuka huh. 10Alibenü yü tüsho api lung lade arükhi, tüzhode tüsho tripde alarü ki thaa huh. 11Tüsho api arhang lah tüsho alibenü api ngüdo de arünü asochoki akin müla.
Jingyanrü Mahne ki Akhiukkhi
(Lk 24.13-35)
12Ju dunglim, lomi ching tsahde alachoki püpü phü chingnü ane mahne ki akhiuk. 13Tüsho anenü yübah aninga larü ki tha, tüshe arünü ane ki she akin müla.
Thürükheak Khülang ki Akhiukkhi
(Mt 28.16-20; Lk 24.36-49; Jhn 20.19-23; Yunir 1.6-8)
14Ju dunglim arü dükhüm ki binde alachoki apinü thürükheak khülang ki akhiuk; tüsho apinü arü mükinkhi le mulong müküpkhi dünkheak thürüh, tümütüsho api arhang kamlo dunglim sherünü api ngükheanü arünü akin müla. 15#Yunir 1.8Tüsho apinü arü ki tha, “Alomiküp alala ching yüang tüsho mihtsürübo alala ki thiyusheak-atsü thsangyuthsangraang. 16Shepünü kinde baptibanü akhümkhitbah; tüshe shepünü mükinnü abahyukbah. 17Tüsho sherünü akinbanü amütsan harü labah: I mung chingnü arünü amünean mebo yankhitbah; arünü püpürü yuthabo thabah; 18arünü phuruto thrüa lulu she, tüsho ashebe müzüm yungyung she arü müthsümüchih; arünü tukthsürü kheak arü khahnü aqiubah tüsho arü angubah.”
Jisu Yinmi lim Yükihkhi
(Lk 24.50-53; Yunir 1.9-11)
19 #
Yunir 1.9-11
Atungpuhnü arü ki asukachih dunglim, api yinmi ching yükih, tüsho Thrünpuh khah tsülim bin, 20Arünü yü tüsho Atungpuhnü arü lung rhimode tüsho khinthiyinbebo bede arü yu mütsanmükhi jihde lüpdükhi ching thsangyuthsangra.
انتخاب شده:
MARK 16: YIMCBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.