O Kandɔɔ 16
16
Violɔn Ismaɛl-lo
1Sarai, lanɔɔ Abram ndóò vilul Abram hɔ́ɔ́ le. Kɛ ndu Sarai ndóò nɔ cɛ laandoo pum o ba diolan Akar, Esiptenɔɔ o va ni. 2Mó dimul Abram pɔnɔ ndɔ aa: «Fallo, nɔm pila ce maa Mɛlɛka siinguu ya vana vilu loo. Lelan, lueinun cɛ ni laandoo ho coo, bɔɔle mì ndu vilul-la hɔ́ɔ̀.» Mí Abram cɛl sɔɛi laa ndɔ dimul ndu ken-nde. 3O kon, mí Sarai cua Akar cɛ ndɔ laandoo, mó hivi Abram pɔnɔ ndɔ kɔɔli. Abram ndóò cii nin vɔsilan tɔ́ o lɛŋnde Kanaan-nden nin ndon. 4Mí Abram bɔŋa nda Akar, mí Akar cua folio. Mɛɛ o ce maa o co hunɔɔ violɔɔ, mó kandu Sarai vana ndɔ bɛndu tɛɛndanndo. 5Mí Sarai dimul Abram aa: «Nɔm tosa ni mí cuaambɔɔ ho tɛɛndan ya. Ya hivi nɔm cɛ nuu kɔɔli ni, kɛ kabi o cennun nin maa a folio o co ni, o co pɛngi ya tɛɛndanndo le. Màá Mɛlɛka kiolu yamɛi naa tɛɛn naa nɔm!» 6Mí Abram mulul ndu aa: «Sumialii nɔm cɛ nɔmndo co ni, mɛɛ n tuu pɛ le biyɔɔ a ndu a bii a ndu lende.» O kon, mí Sarai kandu Akar saangiaa, o lo ndu mɔnɛi lueiyo lende háá mí Akar sɔndan. 7Mí mɛlɛkanɔ Hala-o komal ndu o soon kólaa ikɛi o lɛŋnde veselɛilen nin, o nɛi Sur-o coo. 8Mó ɲuna ndu aa: «Akar, cɛ Sarai-yo, kuɛɛ n cɛn yɛ? Kuɛɛ n co yɛ kɔlan?» Mó muli aa: «Sarai vana ni bɛndu ya co ɲaanɔnndo ni.» 9Mí mɛlɛkanɔ Hala-o dimul ndu aa: «Muungu vana nɔm bɛndoo o ibuŋ, mà kɔ tuisin ndu o labɛngunin.» 10Mó dimul ndu vɛlɛ aa: «I co nɔm cuavaa-imamaa yɔngu, a vanin sɛ́lɛ́ bɛndoo taw, vana nɔlanin nda cɔmndo le. 11Foli n nɔ hoo-o, vanapɔnɔɔ n co violɔɔ ni, mà ke ndu diolan aa Ismaɛl (kon co dimio ni aa ‹Hala tuɛi›), kani Mɛlɛka tuei nɔm kuŋndan o sanga nɔmndo nin. 12Po n co violɔɔ-o vanin maa sofɛlɛ yondo, o simulnin vannda kpow, mì vannda kpow a simul ndu. Kɛ ndu vanin ndu pilɛ teengen puapilɛa ndɔa kpow o hɔl.»
13Mí Akar pila ɲunan aa: «Mò va maa cɔu ya ce Hala co ya hoo cɔu nanu-o ni?» Mó ke Mɛlɛka diolan aa Ata-Ɛl-Royii (kon co dimio ni aa «Nɔm co Hala co ya cɔu-vo ni»). 14Lelan nda ke soon kólaa kon diolan ni aa: soon kólaa Vana yoomaa co ya cɔu-vo. Kadɛs a Berɛd tɛɛn soon kon co ni. 15Mí Akar vilul Abram hɔ́ɔ́ piaandoo, mí Abram ke ndu diolan aa Ismaɛl. 16Tuma Akar vilul kon Abram hɔ́ɔ́-o, Abram ndóò nɔ vɔsilan belaŋɔmaa a laŋɔmpum.
اکنون انتخاب شده:
O Kandɔɔ 16: BKG
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Alliance Biblique en Guinée