O Kandɔɔ 35
35
Yakɔb faŋan Sikɛm mó kɔ cal Betɛl
1Mí Hala dimul Yakɔb aa: «Faŋan nanu. Kɔnnun Betɛl mà kɔ cal lon, mà cow ya fonda-loamaa-lasálàá, ya Hala cɔmnun nɔm telen n va Esau bɛ nɔm ɲaanɔnndo-o pɛɛn.» 2O kon, mí Yakɔb dimul yungu ndɔɔ a vanaa va ndu o ba bɛngu-a kpede aa: «La faŋa piɔmaa co naa tɛɛn-nda naa tɛɛn few-few. La dindin, mì la mangala volɔɔla niaala cuɛinanndan. 3N co faŋan nanu mì n kɔɛ Betɛl. N tiiya pɛ lon, i cɔw fonda-loamaa-lasálàá le Hala mulul-la piɛilen lɔ́ɔ́ ya va o dɛnɛ palaa nin-ndo-o, ó lo ya ikɛi o kela nuu nin-ndo pɛɛn.» 4Má yɔngu Yakɔb piɔmaa va nda o ba-a a kelan sálàn va nda o lani-on kpede. Mí Yakɔb kumbu piɔmaa kan a kelan sálàn mun lɛŋ o yɔm bɛndu va Sikɛm ikɛi-yo bɛngu. 5O kon kɔɔli, má puusiaa dɔ́ɔ́ngɔ́ ndaa le kɔnndan. Mí Hala luei kobila balu lon-ndan siòònde taw háá vana-vana dim poaa Yakɔb-a le.
6Mí Yakɔb tiiya Lus nda vanaa va ndu kɔɔli-a kpow, Lus kon va Betɛl ni, o lɛŋnde Kanaan-nden nin. 7Mó cɔaw fonda-loamaa-lasálàá lon, mó ke fonda kon diolan aa Ɛl-Betɛl (kon co dimio ni aa «Hala Betɛl-lo»). Kani o fonda kon Hala cɔmnun ndu telen o va Esau bɛ ndɔ ɲaanɔnndo-o ni. 8Lon Debora, vana biyaa n'cuaw Rebeka-o vi ni, má kumbu ndu Betɛl ciee-lekɔɔ o yálánndo pum bɛngu. Kandɔɔ ɲinkon, má ke yɔm bɛndu kon diolan aa «Yɔm caŋndo.»
9Mí Hala ndóò cɔmnun vɛlɛ Yakɔb telen o va fulaa Padan-Aram-ndo, mó dɔaw ndu duaa.
10Mó dimul ndu aa:
«Diola nɔmndan aa Yakɔb.
Kɛ a nɔ lɛnin ladio lende le,
diola nɔmndan nin aa Israɛl»
11Mí Hala dimul ndu vɛlɛ aa:
«Ya co Hala Vana-Kpaayaa-Kpow ni.
Lelan, naŋ ipúlú mà sɔla cuavaa-imamaa taw.
Yungulan a vanaa-mangalaa-isɔɔa súúlan taw
a fulanin o polale nɔmnden nin.
Masaa fulanin o cuavaa-imamaa nɔmnda tɛɛn.
12Lɛŋnde ya yɔngu Abraham nda Isaak len,
i co nɔm nden yɔngu niaa cuavaa-imamaa nɔmnda nɔm kɔɔli.»
13O kon mí Hala faŋan ndu ikɛi nɛɛ o va sɔɛi o ndu lo-a. 14Mí Yakɔb baŋ pow sálàá o fonda Hala soo kon o ndu lo-o kpeekpei. Mó soli sálà mamɔiyo lon, mó cuiŋi mɔima man o pow sálà kon coo, mó tala cuɛiyan lecoo. 15Mí Yakɔb ke fonda Hala soo kon o ndu lo-o diolan aa Betɛl.
Violɔn Bɛnyamɛn-ndo a piɔ́m Rasɛl-lo
16Mí Yakɔb faŋan Betɛl a yungu ndɔɔ. Tiŋndo ndóò lo vɔ lándán le tiiyaa Efrata, mí Rasɛl vialu hɔ́ɔ́ piaandoo. Kɛ mó sanga taw o violɔɔ. 17Tuma nda sɔɔnguu ndu lekɔɔ mó va sanga vialaa kon-ndo, mí sokonɔ-vialaa dimul ndu aa: «Kindikindin, vanapɔnɔɔ n co vɛlɛ violɔɔ ho nuaa ni.» 18Kɛ mí Rasɛl can piɔ́mndo. Tuma o va le kɔllo malnɔnndo-o, mó ke hɔ́ɔ́ piaandu o velu kon-ndo diolan aa Bɛn-Oni (kon co dimio ni aa «Po dɛnɛ ni palaa»). Kɛ mí Yakɔb fuɲa ndɔ ke ndu diolan aa Bɛnyamɛn (kon co dimio ni aa «Po ba kɛndɔɔ#35.18 Po ba kɛndɔɔ Yakɔb mangala diola imɔnɔla Rasɛl laa ndɔ yɔngu poombɔɔ lan. Kani «Po dɛnɛ ni palaa» lan, diola imɔnɔlan la co ni. Mó ke ndu diolan aa: «Po ba kɛndɔɔ» lan , diola mayoomulan la co ni. Kani nuaa o ba kɛndɔɔ yoomuma vanndacieea taw ma co ni.»). 19Mí Rasɛl vu, má kumbu ndu o nɛi Efrata-o coo, Bɛtlɛhɛm pɛɛn. 20Mí Yakɔb baŋ pow sálàá o sɛi ndɔɔ coo, pow sálà biisi Rasɛl kon co vɔ háá paalen nden.
21O kon kɔɔli, mí Israɛl puusiaa dɔ́ɔ́ngɔ́ ndɔɔ o fonda kon, mó kɔ simi cɛi-kola-toandaa ndɔɔ Mikdal-Edɛr lekɔɔli. 22Tuma o va icali o tàndà kon nin-ndo, mí Rubɛn po ndɔ suunda a buɛi laandu Rasɛl-lo, Bilha pɛɛn, ó va nin hinilan fuɲa ndɔ kɔɔli-o. Mí Israɛl fuɲa ndɔ tuɛi sɔɛi ken.
Poaa Yakɔb velu-a
(1Dɛnnda lemasalan 2.1-2)
Yakɔb ndóò velu poaa tɔ́ a à ŋiɔn. 23Poaa Lea-a yɔŋnun haa ni: po tase Yakɔb-o yɔŋnun Rubɛn ni, a tɔ̀a va Simeɔn, Levii, Yuda, Isakar a Sabulɔn ni. 24Poaa Rasɛl-la yɔŋnun haa ni: Yosɛf nda Bɛnyamɛn. 25Poaa Bilha-a, buɛi laandu Rasɛl-lo yɔŋnun Dan nda Nɛftali ni. 26Poaa Silpa, buɛi laandu Lea-o-a yɔŋnun Kad nda Asɛr ni. Poaa Yakɔb velu telen o va Padan-Aram-ndo-a yɔŋnun kan ni.
Piɔ́m Isaak-o
27Mí Yakɔb muungu Isaak fuɲa ndɔ ikɛi Mamre, Kiriat-Arba ciee, ciee kon nɔ hau diolan ni aa Hebrɔn, lon Abraham nda Isaak kei calle ni. 28Isaak ciiyo vɔsilan kɛmɛ a belaŋɔmaa, 29mó vu. O yuuva fɔlɔn taw malan o diam fuɲaa ndɔa ciee-piɔ́m. Mɛɛ o vi, mí poaa ndɔa Esau nda Yakɔb a kumbu ndu.
اکنون انتخاب شده:
O Kandɔɔ 35: BKG
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Alliance Biblique en Guinée