Joyn 16
16
1“Mà gàʼa nyʉ̀ venə no ətsèm a ghə̀ŋ alə ndiʼ kə ghə̀ŋ na maʼa əbyɨmə ə ghəŋə. 2Və ne ndzɨ̀mə̀ shisə ghə̀ŋ fa aloʼ ntsèntə̀. Ma gàʼà nəmwèʼè la əzhʉ̀ ə tseghə na vi, a wìʼ ne zhwi ghə̀ŋ, ghə̀ sə kwoʼtə la ghə̀ nè shwèʼ Nyìngòŋ. 3Viʼi ə nà nè nyʉ̀ a venə a ghə̀ŋ byìʼàndo vəwenə ə ko kɨ mo, ko və kɨ Tìʼ. 4Mà shə̀ʼtə nyʉ̀ a venə a ghə̀ŋ alə, ku kətyiftə ndiʼ əzhʉ̀ na kwʉʼ, ghə̀ŋ sə nè, ghə̀ŋ ə̀ kwoʼtə ando mà tə shə̀ʼtə̀ a ghə̀ŋ.
Əshyèʼ kəzhwì kə Ŋwoʼkə
“Mà ko tə shə̀ʼtə̀ nyʉ̀ venə a ghə̀ŋ fa ambì byìʼàndo mà bo tə diʼ vəghəŋ amuʼ. 5Luwen ma dyʉ̀ a ben nə̀ wìʼ yi a ghə̀ tə tɨm mo, ali wìʼ fa ghə̀ŋ ə ko bèmə tebè la ma dyʉ̀ fè lò? 6Ma shə̀ʼtə̀ li nyʉ̀ venə a ghə̀ŋ, və sə ku ngəʼ a ghə̀ŋ. 7Alì, ma gaʼa to a ghə̀ŋ nəmwèʼè la, à diʼ njùŋ a ghə̀ŋ ando mà sə lu. Mà sətsen faŋ kə dyʉ̀, ko Ngyàmtə̀ a vì a ghə̀ŋ. Alì mu mà dyʉ̀, a mà dyʉ̀ tɨm ə wen a ghə̀ŋ. 8Ghə̀ a vì, ə diʼi nyʉ̀ vyi a və byifə kumə mbyɨsə viʼi mbyi ə diʼ jisə tɨməsə, be diʼ ji yì a Nyìngòŋ ə lu soʼ viʼi fa tsù a ghə̀ŋ. 9Ghə̀ diʼi kənyʉ̀ kì a kə byɨfə kumə mbyɨ byìʼì ando viʼi ko byɨmə a mò, 10ə diʼ jisə tɨməsə byìʼàndo mà sə dyʉ̀ a ben ə Tìʼ ghom, ko ghə̀ŋ be ə diʼ ə yen mo. 11Ghə̀ a diʼ ji yì a Nyìngòŋ ə lu soʼo mbyi fa tsù byìʼì ando fòyn yi a ghə̀ soʼo mbyi ghèn sə diʼ mù ghə̀ fəŋ li nsòʼ.
12“Mà bò kiʼi nyʉ̀ ə gàʼ a ghə̀ŋ to kədə̀ŋ, ali mu ghə̀ŋ sətsèn əzhʉ̀ luwen, və a ku ngəʼ a ghə̀ŋ. 13Alì, kəzhwì kə Ŋwoʼkə kì a kə diʼi nəmwèʼè a vi tisə ghə̀ŋ, ghə̀ŋ kɨ no tèbe kənyʉ̀ kə kò ki a kə diʼi nəmwèʼè. Ghə̀ a vi, ko ghə̀ lu gaʼa tebè nyʉ̀ ə ngeŋ wen; ghə̀ a vì ə shə̀ʼtə̀ to nyʉ̀ mu və gàʼ gaʼa a wen, ə shə̀ʼtə̀ nyʉ̀, və bò diʼ ə ne fʉ̀. 14Ghə̀ a vi ə nè ghə̀ŋ kɨ nyʉ̀ ə vwomə, be nè a ji a ghèn, ghə̀ŋ yen kədyòʼ kì a ma kiʼi. 15Nò əfo ə Tìʼ ghom ə tsèm diʼ vwomə. A lə kənyʉ̀ ki a mà gàʼa la kəzhwì kə Ŋwoʼkə na vì, ə nlyɨ̀ nyʉ̀, a diʼ vwomə ə nè ə ghə̀ŋ kɨ.
Ə kusə shinsə nə̀ saŋlə
16“Ghə̀ŋ laʼtə to alə̀, kò ghə̀ŋ be ə yen mo, ə laʼtə to alə be bwensə yen mo.”
17Ndzɨ̀mtə̀sə bàm wen sə tsensə sə bèmə a vəwenə a ntìntìn la, “Ghə̀ tə gàʼ la, ‘Ghə̀ŋ laʼtə to lə kò və be a yen mo ə laʼtə to alə̀ ə bwensə yen mo,’ kə diʼ la ghò? Ghə̀ lə gàʼ alə̀ la, ‘Byìʼàndo ma dyʉ̀ a ben Tìʼ,’ kə diʼi la ghò?” 18Vəwenə sə kayntə to kayntə bèmə la, “Mə laʼtə a ghèn a ghə̀ gaʼa diʼ la ghò? Vəghəŋ ko kɨ la ghə̀ gaʼa la gho lò.”
19Yesò ə kɨ la vəwenə sə kəŋ ə bèm kənyʉ̀ a kènkə a wen ə mu gàʼ a vəwenə la, “A ghə̀ŋ kayntə̀ kənyʉ̀ kì a mà gàʼ la, ‘Kə laʼtə to lə̀ ko ghə̀ be a yen mo, ə laʼtə to lə ə bwensə yen mo.’ 20Ma gaʼa a ghə̀ŋ to no nəmwèʼè la, ghə̀ŋ ə̀ dì no nànto, mbi saŋlə sàŋlə. Ghə̀ŋ nè sə kusə shinsə, ali ə kusə ə shinsə a yi kaʼkə a saŋlə. 21Wùwì nə̀ sə kəŋ mbwi, ghə̀ sə zhʉ kəzaf byìʼàndo zhʉ̀ kwʉ̀ʼ li la ghə̀ bwi, ali na bwi, ghə̀ lyesə kəzaf na ki byìʼì saŋlə ando wàyn sə diʼ a kəvu. 22Kə lə diʼ to ndə̀ŋndəŋ luwen a ghə̀ŋ, ando ghə̀ŋ kusə shinsə, ali ma diʼ ə ne be ə yen ghə̀ŋ la ghə̀ŋ, ghə̀ŋ ə̀ saŋlə, ko wìʼ diʼ ə nè la kə ghə̀ŋ be sàŋlə.
23“Kətsi na kì ə na kwʉ̀ʼ, a ghə̀ŋ faŋ kò ghə̀ lə be bèm kənyʉ̀ a mò. Ma gaʼa a ghə̀ŋ to no nəmwèʼè la, Tìʼ ə na ku no tèbe ghò yi a ghə̀ŋ bèmə chò fa mo a əzhiʼ. 24Ə zàʼa fa luwen, ghə̀ŋ ko bèmə kəfo chò fa mo əzhiʼ. Ghə̀ŋ bèm, a ghə̀ŋ a kiʼi, ə kiʼi saŋlə, ghə̀ŋ kuʼ kwʉ̀ʼ.
Yesò ə shə̀ʼtə̀ la ghə̀ soʼ li zhɨ mbyi
25“Mà temlə nyʉ̀ to tèmlə a ghə̀ŋ ali əzhʉ̀ diʼ ə vì a mà ko be a ngàʼà a ghə̀ŋ a ji ghèn. Ma na shə̀ʼtə̀ mwetə nyʉ̀ kumə Tìʼ a ghə̀ŋ. 26Kətsi na kì na kwʉ̀ʼ, a ghə̀ŋ ne bèmə əfo a Tìʼ ghom chò fa mo əzhiʼ, to fa ghə̀ŋ a ngeŋsə. Ma ko gàʼà la, a na ə be bèmə mò bèmə kəfo fa Tìʼ a ghə̀ŋ akəshi. 27Jòʼ. Tìʼ no fa wen a ngeŋ ne kòŋ ghə̀ŋ byìʼàndo ghə̀ŋ kòŋ li mò, be byɨmə la mà lù fa ben nə̀ Tìʼ. 28Mà tə lù fa ben nə̀ Tìʼ mibu vi a mbyi, bwenə dyʉ̀ a ben nə̀ Tìʼ.”
29Yesò ə gàʼa ali, ndzɨ̀mtə̀sə bàm ə wensə gàʼ la, “Wù sə gàʼà to no a ndayn luwen, ko wu be tèmlə nyʉ̀ tèmlə. 30Yès yen li luwen la wù kɨli no nyʉ̀ ə tsèm, ə yen la wìʼ ə ko diʼ ə mbe bèmə kənyʉ̀ bèmə fa wù. Nakènkə nè li yès ə byɨmə la wù lù vì fa ben ə Nyìngòŋ.”
31Yesò ə bwensə bèm a vəwenə la, “A ghə̀ŋ byɨmə li luwen? 32Əzhʉ ne vì, ma gàʼà ali mu à sə diʼ to no wenə ghə̀ lə, ghə̀ŋ diʼ ə ghəsə ə no ndò ə phwò. Ghə̀ŋ wʉ̀sə mò, a mà sə diʼ to mo nyɨŋ, ali ko ma laynsə diʼ to mò nyɨŋ byìʼì ando Tìʼ ə diʼ yo wen. 33Mà shə̀ʼtə nyʉ̀ a venə a ghə̀ŋ alə̀ ndi ghə̀ŋ faŋ to mò, ə kiʼi mbwaʼmə. Ghə̀ŋ na kiʼi ngəʼ a mbyi ashə. Alì kə wìʼ na bwaʼ! Ma to li chò mbyi.”
انتخاب شده:
Joyn 16: bbkDBLnt
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید