Jɔ̃́ɔ́ 1
1
Fɛ̀ɛ̀-wùɖùɔ̀ jè
1Hwɛ̀ ɓɛ́ ɖɛ séín ké ma nìɛɛ, Wuɖuɔ̀ nì ma. Wuɖuɔ̀ nì ma ɓó Gèɖèpɔ́ɔ̀ gbo, ké ɔ kè Gèɖèpɔ́ɔ̀ mɔ̀ ma nyɔ dyúáɖò. 2Ɖé ɖɛ dè gbɔɔ̀ múɛɛ, Wuɖuɔ̀ nì ma ɓó Gèɖèpɔ́ɔ̀ gbo. 3Ké dyììn ɖé ɔ múɛɛ, Gèɖèpɔ́ɔ̀ nyu ma ɖɛ séín. Ɔ se ma mú nìǐn, Gèɖèpɔ́ɔ̀ se ma ɖɛ ɓě ɓɛ́ ɔ nyu ma kà kɛɛ dyúáɖò nyuɛ ɓɛ́ìn. 4Fɛ̀ɛ̀ nì ma ɖé Wuɖuɔ̀ mú, ké fɛ̀ɛ̀ɔ̀ nyuɛ ké nyɔǔn-dyù ɓéɖé ma ce. 5Ceɔ̀ fã̀ìn ɖé tíe-kpòɔ̀ mú, ké tíe-kpòɔ̀ seɛ mɔ́ìn ɓɛ́ìn.
6Gèɖèpɔ́ɔ̀ tò ma gàa ɖò kɔ̃̀ nyɛ́nɛ́ mɔ̀ ma Jɔ̃́ɔ́ kɛ. 7Ɔ dyi, ɓɛ́ ɔ ké ma ceɔ̀ jè nyɔ ɓěɔ̀ gbo cɛ̃. Ɔ dyi, ɓɛ́ ɔ kéɛ ma wa gbo cɛ̃, ɓɛ́ nyɔǔn séín kéɛ ma wɔ̃́, ɓɛ́ wa kéɛ ma hwìɖǐǐ taɓa. 8Ɔ mìɔùn se ma ceɔ̀, kɛɛ ɔ dyi, ɓɛ́ ɔ ké ma ceɔ̀ jè cɛ̃. 9Ɖɛ nìà kɛ mɔ̀ ma ce jɛ́ɛ́ɔ̀. Ɔ mɔ̀ ce ɓɛ́ ɔ dyi ɓóɖó-kpàà kɔ̃, ké ɔ fã̀ìn nyɔǔn séín nyɛ.
10Wuɖuɔ̀ nì ma ɓóɖó-kpàà kɔ̃. Gèɖèpɔ́ɔ̀ nyu ma ɓóɖó-kpàà dyììn ɖé ɔ mú, kɛɛ ɓóɖó-kpàà se ma ɔ dyí dyuò. 11Ɔ dyi ma ɔ mìɔùn ɓíɖí, kɛɛ ɔ mìɔùn nììn nyɔ ɓěɔ̀ se ma ɔ jè dyi kpɔ̃. 12Kɛɛ nyɔ ɖíɛ́ ɓě kpɔ̃ ma ɔ jè dyi, ké wa taɓa ma ɔ hwìɖǐǐ. Ɔ jèɛɛ, ɔ nyí ma wa kpé, ɓɛ́ wa ké ma Gèɖèpɔ́ɔ̀ dyú ɓě jǔ. 13Wa se ma wóɖó kà dyú tɔ̀ɔ̀ ɓě wóɖóà kɛ. Nyɔǔn-dyùɛ̀ mɔ́ɔ́-ɖɛ̀ seɛ ma nyu ɓɛ́ wa ké ma Gèɖèpɔ́ɔ̀ dyú ɓě jǔ, kɛɛ Gèɖèpɔ́ɔ̀ mìɔùn mɔ̀ nyɔ nyu wa ɔ dyú ɓě mú.
14Wuɖuɔ̀ zɛ̃̀ìn ma nyɔǔn-dyù mú, ké ɔ cĩ́ ma ɖé à hwìɛ̀. Mana nì ma ɔ kɔ̃ mìɔ, ké ɔ mɔ̀ ma jǎà-nyɔ̀. À dyé ma ɔ dĩ́ín-dĩ̀ìnɔ̀. Ɔ mɔ̀ dĩ́ín-dĩ̀ìn ɓɛ́ ɔ Ɓǎ nyí ma ɔ, sepóɛɖé ɔ mɔ̀ ma Dyú-gàà dyúáɖòɔ̀ jèɛ.
15Jɔ̃́ɔ́ cɛ̃ ma ɔ jè. Jɔ̃́ɔ́ páná ma mú, ké ɔ ɖá, “Ti ḿ cɛ̃ɛ ma kà, ké ḿ dyi ma kà níiń, ‘Nyɔ kɔ ɓó ḿ ɖeín dyíɛɛ kpé ɓúá dyí, ké ɔ zi ḿ níǐnɔ̀ dyí, sepóɛɖé ɔ nì ma kĩ́ín hwɛ̀ ké mɔ́ún nì maa,’ ɔ kɛà kɛ̀.”
16Mana nì ɔ kɔ̃ɛɛ ɓúá kpéín, ké ɔ nyí ma à mɔ̀ùn mana sɔ̀ìn ɖé ɔ nììn manaɔ̀ mú. Ɔ kpa à mana deìn kɔ̃in nyíɛ kánáá pū. 17Gèɖèpɔ́ɔ̀ tò ma gmaɔ̀ dyììn ɖé Mózè mú, kɛɛ mana kè jǎà dyììn ma ɖé Jízɛ̀ Kɛ́ɖɛ́ì mú. 18Nyɔ ɖò séè Gèɖèpɔ́ɔ̀ dyé ɖò. Ɔ Dyú-gàà dyúáɖò ɓɛ́ ɔ nìà ɖé Ɓǎɔ̀ wáún wɛ̃ɛ ɖǎa nyu ké nyɔǔn-dyù ɖǎ ɔ dyí dyuò.
Jɔ̃́ɔ́ nyɔ-níɔ-po-nyɔ̀ɔ̀ Gèɖèpɔ́ɔ̀-wùɖù wáɖá-wáɖá
(Máfíò 3:1-12; Máà 1:1-8; Ɖúù 3:1-18)
19Ɖɛ Jɔ̃́ɔ́ cɛ̃ ma ti ɓɛ́ Júù-nyɔ̀ ɓě nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ ɖoɓo ma sáa-zà-nyɔ̀ ɓě kè Ɖíìváà-nyɔ̀ ɓě ɖé ɔ gbo, ɓɛ́ wa ké ma ɔ dyi diè, ɓɛ́ wa ké níiń, “M̀ mɔ̀ nyɛ́ kɛ́?” kɛɛ kɛà kɛ̀.
20Jɔ̃́ɔ́ se ma nɔ́ɔ̀ ɓɛ́ ɔ ké ma ɖé wuɖu zà, kɛɛ ɔ cɛ̃ɛ ma wáɖáá, ké ɔ ɖá, “Ḿ se Kɛ́ɖɛ́ìɔ̀.”
21Ké wa diè ma ɔ dyi, ké wa ɖá, “Nìí, m̀ mɔ̀ nyɛ́ kɛ́? M̀ mɔ̀ Ìɖáájɔ̀ɔ̀?”
Ké ɔ ɖá, “Gbào. Ḿ se ɔ mɔ̀.”
Ké wa ɖá, “M̀ mɔ̀ Kpáá-ɖɛ̀-cɛ̃-nyɔ̀ɔ̀?”
Ké ɔ ɖá, “Gbào.”
22Ké wa cɛ̃ɛ ma ɔ gbo, ké wa ɖá, “Cɛ̃ nyɔ m̀ jǔ kɛɛ à gbo. À ɓéɖé ɓɛ́ à ké nyɔ m̀ jǔ kɛɛ jè nyɔ ɓě ɖoɓoà à kɛɛ gbo cɛ̃. Xwɛ̌ m̀ ɖá ɓó m̀ mìɔùn jèɛ́?”
23Ké Jɔ̃́ɔ́ ɖá, “Kpáá-ɖɛ̀-cɛ̃-nyɔ̀ Àzédyà cɛ̃ɛ zɔ̃̌ɔ̀, ké ɔ ɖá,
‘À wɔ̃́ nyɔ ɖòɛ̀ wuɖu ɖé gbǎùn-fúɖúáɔ̀ kɔ̃, ké nyɔɔ̀ ɖá,
“Ɓě nyu hwìè sɛ́ɖɛ́ìn dyí ɖò ɓó Bounɓoɔ̀ bìì.” ’
Mɔ̄ kɔ̃̀ wuɖu kɔ̃̀ jè ɔ cɛ̃à kɛ̀.”
24Fáɖòsíì-nyɔ̀ ɓěɔ̀ mɔ̀ nyɔ ɖoɓo ma nyɔ ɓěɔ̀. 25Wa diè ma Jɔ̃́ɔ́ dyi, ké wa ɖá, “Ɔ jǔ ké m̀ se Kɛ́ɖɛ́ìɔ̀ mɔɔ Ìɖáájɔ̀ mɔɔ Kpáá-ɖɛ̀-cɛ̃-nyɔ̀ɔ̀ ní, nìí, ɖɛ́ kɔ̃̀ jè m̀ nìà nyɔǔn níɔ poɛń nyɛ́?”
26Ké Jɔ̃́ɔ́ zà ma ɖé wuɖu, ké ɔ ɖá, “Ḿ po nyɔǔn níɔ. Kɛɛ nyɔ ɓɛ́ ɓě seà dyí dyuò wɛɛ nyànà dà ɓě hwìɛ̀ dyi. 27Ɔ kɔ ɓó ḿ ɖeín dyí, kɛɛ ḿ se ɖɛ kpa, ɓɛ́ ḿ ké ɔ bǎ-ɖúú buɛ̀ dyɛ mɔ̀ùn.”
28Ɖɛ ɓě nìà kɛ kpá ma ɖé Bɛ́fènì-hwɔ̀ɖɔ̀ɔ̀ mú, ɖé Jɔ́nì-nìɔ̀ ɖeín, dɛ̀ ɓɛ́ Jɔ̃́ɔ́ nì ma nyɔǔn níɔ poɛń nyɛ.
Gèɖèpɔ́ɔ̀ Ɓáɖáá-dyùɔ̀ jè
29Wéɔ̀ nyɔ kɔ ma ɓó dyíɛɛ, Jɔ̃́ɔ́ dyé ma Jízɛ̀ ɔ gbo dyiɛ, ké ɔ ɖá, “Ɓě gmɔ̀ ɖéa, Gèɖèpɔ́ɔ̀ Ɓáɖáá-dyù mɔ̀ nyɔ zàà ɓóɖó-kpàà nyɔ ɓě nàmàǔn bũ̌in nyɛɛ nìàǒ wɛ̀. 30Ti ɓɛ́ ḿ cɛ̃ɛ ma kà, ɓɛ́ ḿ dyi ma kà níiń, ‘Gàa ɖò kɔ ɓó ḿ ɖeín dyí, ké ɔ kpé ɓúá dyí, ké ɔ zi ḿ níǐnɔ̀ dyí, sepóɛɖé ɔ nì ma kĩ́ín hwɛ̀ ké mɔ́ún nì ma’ kɛɛ, ɔ kɛà kɛ̀. 31Ḿ se ma nyɔ ɔ ké ma jǔɛ muɛɛ dyí dyuò, kɛɛ ḿ dyi, ké ḿ po nyɔǔn níɔ, ɓɛ́ ɔ kéɛ nyu ɓɛ́ Éézùɖùɛ̀-nyɔ̀ ɓěɔ̀ ké ma ɔ dyí dyuò.”
32Zàse ɓɛ́ Jɔ̃́ɔ́ nyu ma kɛɛ kɛà kɛ̀. Ɔ ɖá, “Ḿ dyé ma Zùùɔ̀, ké ɔ sɔ̀ìn ma ɖé dyɔún kà gbúɛ́ nìà kɛ, ké ɔ dyi ma ɓíɖíi ɓó nyɔ nìà kɛ kɔ̃. 33Ḿ se ma ɔ dyí dyuò, kɛɛ Gèɖèpɔ́ɔ̀ mɔ̀ nyɔ ɓɛ́ ɔ ɖoɓo ma kà ḿ, ɓɛ́ ḿ ké ma kà nyɔǔn níɔ po kɛɛ cɛ̃ɛ ma ḿ gbo, ké ɔ ɖá, ‘Nì mu Zùùɔ̀ dyéìn, ké ɔ mu ɓíɖíi dyiìn, ké ɔ mu gàa ɖò kɔ̃ dyiìn. Gàaɔ̀ mɔ̀ nyɔ poà nyɔǔn Zùù Hwɛ̀ǐn-hwɛ̀ǐnɔ̀ múɛ̀.’ 34Ḿ ɖǎ ɔ dyé, ké ḿ cɛ̃ɛ ɓě gbo kà nyɔ nìà kɛ mɔ̀ Gèɖèpɔ́ɔ̀ Dyú-gààɔ̀ kɛ.”
Jízɛ̀ɛ̀ ɖeín-nà-nyɔ̀ kĩ́ín-kĩ́ín ɓěɔ̀
35Wéɔ̀ nyɔ kɔ ma ɓó dyíɛɛ, Jɔ̃́ɔ́ kè ɔ ɖeín-nà-nyɔ̀ ɓěɔ̀ sɔ̃́ nyànà ma ɓó dà ɖò dyi. 36Ti ɓɛ́ Jɔ̃́ɔ́ dyé ma Jízɛ̀, ké ɔ nì ma nàà kpauń wɛ̃ɛ, Jɔ̃́ɔ́ ɖá, “Ɓě gmɔ̀ ɖéa, Gèɖèpɔ́ɔ̀ Ɓáɖáá-dyùɔ̀ nìàǒ wɛ̀.”
37Ti Jɔ̃́ɔ́ɛ̀ ɖeín-nà-nyɔ̀ sɔ̃́ ɓěɔ̀ wɔ̃́ ma ɔ ɖɛa cɛ̃ɛ kɛɛ, wa sí ma Jízɛ̀ kíɖíí. 38Ké Jízɛ̀ cɛ́ɛ̀ ma xwa, ké ɔ dyé ma wa ɔ kíɖíí síɛ. Ké ɔ diè ma wa dyi, ké ɔ ɖá, “Ɖɛ́ ɓě mɔ́ dyiɛ́?”
Ké wa diè ma Jízɛ̀ dyi, ké wa ɖá, “Wáɖábà, dɛ̌ m̀ cĩ́ kɛ́?” (Wáɖábà-nyɛ̀nɛ̀ɔ̀ xwíníín mɔ̀ nyɔ-ɖɛ-tɛ̀mɛ̀ìn-nyɔ̀.)
39Hwɛ̀ ké ɔ cɛ̃ɛ ma wa gbo, ké ɔ ɖá, “Ɓě dyi, ɓɛ́ ɓě kéɛ dyé.” Ɔ jèɛɛ, wa kèɔ̀ kè mu ma, ké wa dyé dɛ̀ ɔ cĩ́ ma kɛ, ké wa kèɔ̀ kè nì ma ɖé, ké tíe kpɔ̃ ma. Ti wa dyi ma kà ɔ gboɛɛ ɓɛ́ìn ma zii-dyòɖò-gbo-dyòɖòàǔn jǔɛ.
40Nyɔ sɔ̃́ ɓě ɓɛ́ wa wɔ̃́ ɖɛ Jɔ̃́ɔ́ cɛ̃ ma kà, ké wa kè Jízɛ̀ mu ma kà kɛɛ dyúáɖò mɔ̀ ma Ã́dòɖò ɓɛ́ ɔ mɔ̀ ma Sã́ɓò Píɖɛ̀ɛ̀ ɖíí-gàà kɛ. 41Ti ɓɛ́ Ã́dòɖò ɖǎ ma Jízɛ̀ dyéɛɛ, ɔ dyé ma ɔ ɖíí-gàà Sã́ɓò, ké ɔ cɛ̃ɛ ma ɔ gbo, ké ɔ ɖá, “À ɖǎ Mɛ̀sádyàɔ̀ dyé.” (Mɛ̀sádyà-nyɛ̀nɛ̀ɔ̀ kè Kɛ́ɖɛ́ì-nyɛ̀nɛ̀ɔ̀ ɓéɖé xwíníín dyúáɖò.) 42Púɛɛ, ɔ kpa ma Sã́ɓò Jízɛ̀ gbo. Ké Jízɛ̀ gmɔ̀ ma ɔ dya, ké ɔ ɖá, “M̀ mɔ̀ Sã́ɓò mɔ̀à Jɔ̃́ɔ́ɛ̀ dyú-gààɔ̀ kɛ. Nì nyɛ́nɛ́ mu Sífà jǔùn.” (Sífà-nyɛ̀nɛ̀ɔ̀ kè Píɖɛ̀-nyɛ̀nɛ̀ɔ̀ ɓéɖé xwíníín dyúáɖò. Wa xwíníín mɔ̀ sɔ́ɔ́-kpò.)
Jízɛ̀ ɖá Féɖò kè Nàtánìò
43Wéɔ̀ nyɔ kɔ ma ɓó dyíɛɛ, Jízɛ̀ poɛ ma gbɔ, ɓɛ́ ɔ ké ma ɖé Gáɖàɖíì-ɓòɖòɔ̀ kɔ̃ mu. Ké ɔ dyé ma Féɖò, ké ɔ cɛ̃ɛ ma ɔ gbo, ké ɔ ɖá, “Dyi, ɓɛ́ ḿ kè mɔ̀ ké mú naìn.” 44Féɖò sɔ̀ ma ɖé Bɛ̀séɖà-hwɔ̀ɖɔ̀ kɔ̃̀ mú ɓɛ́ Ã́dòɖò kè Píɖɛ̀ sɔ̀ ma kɛ. 45Ti ɓɛ́ Féɖò ɖǎ ma Jízɛ̀ dyéɛɛ, ɔ dyé ma Nàtánìò, ké ɔ cɛ̃ɛ ma ɔ gbo, ké ɔ ɖá, “À ɖǎ nyɔ kɔ̃̀ jè Mózè céè zɔ̃̌ɔ̀ kà ɖé gma-cèè-ɖɛ̀ɔ̀ mú, ɓɛ́ kpáá-ɖɛ̀-cɛ̃-nyɔ̀ ɓěɔ̀ céè zɔ̃̌ɔ̀ kà kɛɛ dyé. Ɔ mɔ̀ Jízɛ̀ mɔ̀à Jòséɛ̀ dyú-gàà, sɔ̀à ɖé Názɛ̀ɖɛ̀-hwɔ̀ɖɔ̀ɔ̀ múɛ.”
46Ké Nàtánìò diè ma ɔ dyi, ké ɔ ɖá, “Ɖɛ nɔ̀mɔ̀ dyíin ɖò ɓɛ́ìn ɖé Názɛ̀ɖɛ̀-hwɔ̀ɖɔ̀ɔ̀ mú sɔ̀ɔ̀e?”
Ké Féɖò ɖá, “Dyi, ɓɛ́ m̀ ké ɔ dyé.”
47Ti Jízɛ̀ dyé ma Nàtánìò ɖé ɔ gbo dyiɛ kɛɛ, ɔ cɛ̃ ma ɔ jè, ké ɔ ɖá, “Ɓě gmɔ̀ ɖéa, Éézùɖùɛ̀-dyù jɛ́ɛ́ɔ̀ nìàǒ wɛ̀. Ɔ mɔ̀ nyɔ kɔ̃̀ mú nyɔ-cá-cá ɖò seà nìɛ.”
48Ké Nàtánìò diè ma ɔ dyi, ké ɔ ɖá, “Xwɛ̌ m̀ nyu ḿ dyí dyuòɛ̀ kɛ́?”
Púɛɛ, Jízɛ̀ zà ma ɖé wuɖu, ké ɔ ɖá, “Ḿ dyéɔ́ má m̀ ti ɓɛ́ m̀ nìɔ̌ kà ɖé féè-cùɔ̀ xwíɖíi, hwɛ̀ ɓɛ́ Féɖò ɖáɔ́ má kà m̀ wɛ̃.”
49Ké Nàtánìò zà ma ɖé wuɖu, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, m̀ mɔ̀ Gèɖèpɔ́ɔ̀ Dyú-gààɔ̀. M̀ mɔ̀ Éézùɖùɛ̀-nyɔ̀ ɓěɔ̀ Kã́áɔ̀.”
50Ké Jízɛ̀ ɖá, “M̀ ɓéɖé hwìɖǐǐ-taɓa-taɓa, sepóɛɖé ḿ cɛ̃ɛ kà ḿ dyéɔ́ m̀ ɖé féè-cùɔ̀ xwíɖíiɛɛ jèè? Nì mu ɖɛ kpa ɖɛ ɓě ɓɛ́ wa zi ɖɛ nìà kɛ dyíɛɛ dyéìn.” 51Ké Jízɛ̀ cɛ̃ɛ ma wa gbo, ké ɔ ɖá, “Ḿ cɛ̃ ɓě jǎà gbo, ɓě muɛ dyéìn, ké dyɔɔ̀ mu kaàùn, ké Gèɖèpɔ́ɔ̀ ínjà ɓěɔ̀ mu dyáùn sí nyuɛń nììn ɓó mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ kɔ̃.”
انتخاب شده:
Jɔ̃́ɔ́ 1: ƁB02
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bassa Bible © Bible Society Liberia, 2002.