Zɔ̃̀ɔ̃́ 1
1
Wéé lɛ́ à kɛ̀, tó mia wáà kɛ̀ɓe sɔ̀lɔ̀ ɓòa
1Kɛɛ pɛ séĩ́ é tĩã́ kɛɛ̀ ɓea, Wééa e kɛ ɓe. Wéé e kília e kɛ Wálà píé, ɛ̃́ɛ̃́ e kɛ Wálà ká. 2Wéé e kília e kɛ Wálà píé pɛ séĩ́ gã̀-gbɛ̃̀pìà. 3Wééa kolo làa lɛ́ Wálà e pɛ séĩ́ kɛɛ. Pɛ séĩ́ lɛ́ e ɓea dò wá ɓe kɛ à kɛɛ̀ é gɔ̃́ kɛɛ̀á à kolo là. 4Kɛ̀ɓe e kɛ Wééa yí. Kɛ̀ɓe e kília e kɛ lɛ̀ fɔ̀nɔɔ̀ɔ ká mia lɛ̀ɛ. 5Lɛ̀ fɔ̀nɔɔ̀ɔ e kília, lɛ́ɛ̀ lɛ̀ fɔ̀nɔ bĩ́ tii bà, ɛ̃́ɛ̃́ bĩ́ tii e kília à kɔ̀ lɛ̀ɛ́ die do lɛ̀ fɔ̀nɔɔ̀ɔ là.
6Gɔ̃ doó lɛ́ ò si Zɔ̃̀ɔ̃́ɔ e kɛ ɓe. Wálà lɛ́ e à vɔɔ. 7Zɔ̃̀ɔ̃́ e kília e nu kɛ é lɛ̀ fɔ̀nɔɔ̀ɔ e kília wɔ̃̀ gèe mia lɛ̀ɛ. E nu kɛɛ á gèe mia lɛ̀ɛ, kɛɛ zò-dɔ̀à-mɔ̀ é kɛ mia séĩ́ yí à kolo là zàá. 8À dìè lɛ̀ɛ́ gbaa kɛ lɛ̀ fɔ̀nɔɔ̀ɔ e kília ká. Kɛɛ e nu kɛ é wɔ̃́ lɛ́ à gbɛ̃̀ɛ̃̀ lɛ lɛ̀ fɔ̀nɔɔ̀ɔ ɓɛ mɔ̀ɔ gèe. 9Lɛ̀ fɔ̀nɔɔ̀ɔ e kília lɛ́ e lɛ̀ fɔ̀nɔɔ̀ɔ kpó-kpóa káa. Lɛ̀-fɔ̀nɔ-kɔ̀ lɛ́ è lɛ̀ fɔ̀nɔ mia séĩ́ bà, lɛ́ e kɛ nupìà kpóṹ là zèea, lɛ́ ɓɛ.
10E kɛ kpóṹ là zèe. Wálà e kpóṹ là zèe kɛ à kolo là, kɛɛ kpóṹ là zèe lɛ̀ɛ́ gbaa dɔ. 11Wééa e nu e dìè pà, kɛɛ à dìè-tĩ́ pà-mìà òó gbaa o kɔ̀ yà à wì. 12Kɛɛ o dò o o kɔ̀ yà à wì, ɛ̃́ɛ̃́ o o zò dɔ à mɔ̀. À mɔ́ɔ̀ wɔ̃̀ mɔ̀ɔ, a mɔ́ɔ̀ yíkɛ̀ gáàa nɔ ɓo o lɛ̀ɛ kɛɛ ó kɛ Wálà là nɔ́ɔ̀ ká. 13Kɛɛ lɛ̀ɛ́ gbaa o ye zi lɛ́ mia ɓéèe ò nɛ́ yeáa ká. Lee wà gɔ̃ o kɛ̀ o kíe píé lɔ̀ lɛ́ è o kɛ̀ɛ, wà gɔ̃ zò-kṹ-wɔ̃̀ lɛ̀ɛ́ gbaa à kɛ, kɛ ó kɛ Wálà là nɔ́ɔ̀ ká. Kɛɛ Wálà lɛ́ a kɛ lɛ́ o kɛɛ̀ e kɛá là nɔ́ɔ̀ nì káa.
14Wééa e kɛ gbaa mi ɓéèe ká, ɛ̃́ɛ̃́ e e yàlà kṹ ko bà zèe. Ko à zì kɛ̀-kpànazɛ̀-kɔ̀ gɛ̃̀. À paà e kɛá zò-kɛ̀-sɛ̀ wà wánà-wɔ̃̀ ká. Kɛ̀-kpànazɛ̀ kɔ̀ e kília lɛ́ e kɛ kɛ̀-kpànazɛ̀-kɔ̀ lɛ́ e à sɔ̀lɔ̀ ɓo à kɛ̀ mia Dàa ɓɛ Gbe nɔ́ doó e à kɛ̀lɛ̀ɛ káa káa.
15Zɔ̃̀ɔ̃́ e à wɔ̃̀ gèe. A gèe lòũ̀ ká weeá kélɛ̀, “Mi lɛ́ m kɛ à wɔ̃̀ gèepìà ka lɛ̀ɛ, lɛ́ ɓɛ. M kɛ à gèepìà kélɛ̀, ‘Lɛ́ɛ̀ lo tóò m ko mɔ̀, kɛɛ lɛ kpànazɛ̀ é dieá m là, ɓii e kɛ ɓe bèĩzɛ̀ m mɔ̀.’ ”
16À paà e kɛá zò-kɛ̀-sɛ̀ ká, ɛ̃́ɛ̃́ aà dò sí, áà lúà kpɔ̀á ko séĩ́ ko mɔ̀. E ló à kɛ̀á sí kíli teele. 17Wálà e Lɔ́ɔ̀ɔ kpɔ́ Móózè kɔ̀ yí lɛ́ a nɔ ko lɛ̀ɛ. Kɛɛ zò-kɛ̀-sɛ̀ wà wánà-wɔ̃̀ɔ kpɔ́ɔ̀ e kɛá Zízɛ̀ Kɛ́lɛ̀ì yí zàá, lɛ́ e kɛ ɓea. 18Mi nɔ́ɔ fé lɛ̀ɛ́ Wálà gɛ̃̀ do. Kɛɛ Mi nɔ́ doó, lɛ́ wà Wálà o doó, lɛ́ lɛ e Dàa kɔ̀ sɛ̃́ĩ́a, lɛ́ aà e Dàa wɔ̃̀ kɛ lɛ́ mia waà à dɔɔ.
Wɔ̃́ lɛ́ Zɔ̃̀ɔ̃́ mia bàtáì-kɛ-mì a gèea
(Máfìù 3.1-12; Máà 1.1-8; Lúù 3.1-18)
19Zúù-mìà lɛ́ o kɛ Zùlúsàlɛ̀ɛ o sálà-ɓò-Wálà-mɔ̀-mìà wà Lííváì sùu-là-mìà vɔ Zɔ̃̀ɔ̃́ píé, kɛ ó wɛ̃́ĩ́-lɔ̀ɔ kɛ à kɛ̀lɛ̀ weeá kélɛ̀, “Dé e i ká?”
20Zɔ̃̀ɔ̃́ lɛ̀ɛ́ gbaa kɛ́í kɛ o wéè yí zṹũ̀ mɔ̀. Kɛɛ e wéé wɔ̃́ mɔ̀ o séĩ́ o wɛlɛ mɔ̀. Kélá-wè lɛ́ a ɓoa, gɛ̃̀ e ké. “Ma wá Kɛ́lɛ̀ì ɓɛ ká.”
21O à wɛ̃́ĩ́-lɔ̀ɔ kɛ kélɛ̀, “Dé mɔṹ e i ká? Ìláyà lɛ́ e i káa?”
A gèe, “Gbàaò. Ma wá à ká.”
Wa gèe zeĩ́ à lɛ̀ɛ, “Dɔ̀-Wálà-lé-là-mì dè lɛ́ e i káa?”
A gèe zeĩ́, “Gbàaò.”
22Lɛ̀ e kɛ kília, wa gèe kélɛ̀, “Mí mɔṹ e i káa, ì à gèe ko lɛ̀ɛ. Lɛ ko mɔ̀ kó ló wɔ̃́ dò lɛ́ kò lo à gèeè mia lɛ́ o ko vɔɔ lɛ̀ɛ ká ko mɛ̀ĩ́. Wɔ̃́ kpɛɛ̀ lɛ́ e i lé é gbɛ̃̀á i dìè mɔ́ɔ̀ wɔ̃̀ mɔ̀?”
23Zɔ̃̀ɔ̃́ a gèe o lɛ̀ɛ, “Wálà là dɔ̀-lé-là-mì Ààzáyà a gèe mɔ́ kélɛ̀,
‘Mi dò gbɛ́ɛ́-wè lɛ́ɛ̀ dɔ yɛ̀í là, áà gbɛ̀ɛ̀ weeá kélɛ̀,
Kà zi lɛ́ ko Dàa-mì è lo tóò à píéa kɛ é dɔ kpeĩ.’
Ma lɛ́ m mi lɛ́ e kɛ à wɔ̃̀ gèepìàa káa.”
24Fálásíì-mìà lɛ́ o míá o kília vɔɔ. 25O Zɔ̃̀ɔ̃́ wɛ̃́ĩ́-lɔ̀ɔ kɛ weeá kélɛ̀, “Yé mɔṹ ɓi wá Kɛ́lɛ̀ì, ɛ̃́ɛ̃́ Ìláyà, e bɛ̀i dɔ̀-Wálà-lé-là-mì dè káa, mɛ́ mɔṹ e kɛ lɛ́ ì mia bàtáì kɛ̀?”
26Zɔ̃̀ɔ̃́ e à là nìɛ̀ weeá kélɛ̀, “Ḿm̀ mia bàtáì kɛ̀ yíí ká. Kɛɛ mí kàá à dɔɔ, lɛ dɔ̀á ka bà. 27À ye lɛ́ è lo tóò m ko mɔ̀ɔ. Kɛɛ ma wá bɛ̃̀ɛ̃ kpeĩ kɛ ḿ là bàá ɓɛ̀lɛ̀ fóló bɛ̃̀ɛ̃.”
28Wɔ̃́ nì e kéa séĩ́ kɛɛ̀ e kɛá Bɛ́fénì lɛ́ e Zɔ́dã̀-yìì mɛ̀ĩ́, lɛ́ Zɔ̃̀ɔ̃́ e kɛ mia bàtáì kɛpìà yia mɔ̀.
Wálà là Ƃáá Nyɔ̀nɔ́
29À lɛ̀ kpɛ̀iì gbɛɛ káa, Zɔ̃̀ɔ̃́ e Zízɛ̀ gɛ̃̀, áà nù à píé. Zɔ̃̀ɔ̃́ a gèe kélɛ̀, “Kà lɛ̀ gɛ̃̀. Wálà là Ƃáá Nyɔ̀nɔ́ lɛ́ è kpóṹ là zèe zì kɛ-wɔ̃̀ yɔɔ ɓo à mɔ̀ɔ, gɛ̃̀ e yí. 30Mi lɛ́ m kɛ à wɔ̃̀ gèepìà máà gèè kélɛ̀, Gɔ̃ doó lɛ tópìà m ko mɔ̀, kɛɛ lɛ kpànazɛ̀ é dieá m là, ɓii e kɛ ɓe bèĩzɛ̀ m mɔ̀ɔ,’ lɛ́ ɓɛ. 31M dìè m̀ḿ gbaa mi lɛ́ è lo kɛɛ̀ à káa dɔ. Kɛɛ m nu mia bàtáì kɛ̀á sí yíí ká, kɛ ḿ à kɛ Éézɛ̀lɛ̀-mìà ó à dɔ.”
32Kélá-wè lɛ́ Zɔ̃̀ɔ̃́ a ɓoa, gɛ̃̀ e ké. A gèe kélɛ̀, “M Gɛ̀ɛ̀ Púlúa gɛ̃̀, e gó lɛ̀í, áà nù à là kélɛ̀ tèŋè lɛ́ ɓe. Ɛ́ɛ̃́ e tó à là. 33M̀ḿ gbaa kɛ à dɔpìà, kɛɛ Wálà lɛ́ e m vɔ kɛ ḿ ló mia bàtáì kɛɛ̀ yíí káa, a gèe m lɛ̀ɛ kélɛ̀, ‘Íì lo Gɛ̀ɛ̀ Púlú gɛ̃̀ɛ̃̀, áà nù tã́ã̀ gɔ̃ dò là, ɛ̃́ɛ̃́ lɛ́ɛ̀ lo tóò à là. Gɔ̃́ e kília lɛ́ è mia bàtáì kɛ̀ Gɛ̀ɛ̀ Púlú káa.’ 34Maà wɔ̃́ e kília gɛ̃̀, ɛ̃́ɛ̃́ ḿm̀ gèe ka lɛ̀ɛ kélɛ̀ gɔ̃́ e kília lɛ Wálà Gbe ká.”
Zízɛ̀ là tòà-píé-mìà bèĩzɛ̀
35À lɛ̀ kpɛ̀iì gbɛɛ káa, Zɔ̃̀ɔ̃́ wà là tòà-píé-mìà pèèlɛ o kɛ lɛ̀ e kília mɔ̀ zeĩ́. 36E Zízɛ̀ gɛ̃̀ táápìà. A gèe, “Kà lɛ̀ gɛ̃̀. Wálà là Ƃáá Nyɔ̀nɔ́ɔ gɛ̃̀ e yí.”
37Là tòà-píé-mìà pèèlɛɛ o wɔ̃́ lɛ́ Zɔ̃̀ɔ̃́ a gèea ma, o tó gbaa Zízɛ̀ píé. 38Zízɛ̀ e nìɛ̀, e o gɛ̃̀ wáà tò à píé. A gèe o lɛ̀ɛ kélɛ̀, “Mɛ́ kà nàà ɓɛ?”
Wa gèe kélɛ̀, “Lábàì, mɛ́ɛ lɛ́ ì yìì yi?” (Lábàì yí lɛ́ e kélɛ̀ pɛ-zɔ̃̀ɔ̃̀-mì.)
39A gèe o lɛ̀ɛ kélɛ̀, “Kà nu ká lɛ̀ mɔ̀ gɛ̃̀.” Lɛ̀ e kɛ kília, wà ye nì o ló, o lɛ̀ lɛ́ è yìì yia gɛ̃̀, wà ye nì o kɛ yí é tóá kíli nyɛ́nɛ́ é ló. Lɛ̀ o ɓɔ yía, e kɛ lèĩ nyɛ́nɛ́-tɛ̃́-nyɛ̀nɛ̀ ká gbaa.
40Mia pèèlɛ lɛ́ o wɔ̃́ lɛ́ Zɔ̃̀ɔ̃́ a gèea ma, lɛ́ o tó Zízɛ̀ píéa, o doó-mì e kɛ Áã́dùlù, lɛ́ e kɛ Sáímɔ̀ Pílɛ̀ lèe-gé káa ká. 41Wɔ̃́ bèĩzɛ̀ Áã́dùlù a kɛɛ, lɛ́ e kélɛ̀, e e lèe-gé Sáímɔ̀ naa, a gèe à lɛ̀ɛ kélɛ̀, “Kɔaà Mɛ̀sáyàa gɛ̃̀.” (Mɛ̀sáyà yí lɛ́ e kélɛ̀ Kɛ́lɛ̀ì.) 42Lɛ̀ e kɛ kília, e ló Sáímɔ̀ ká Zízɛ̀ píé.
Zízɛ̀ e lɛ̀ gɛ̃̀ à là, áà gèè kélɛ̀, “I Sáímɔ̀ lɛ́ e Zɔ̃̀ɔ̃́ gbe káa ká. Kɛɛ óò lo gbaa i síì Sífà.” (Sífà tɔ̀ lɛ́ zeĩ́ e tɔ́ Pílɛ̀. Tɔ́ e kília yí lɛ́ e kélɛ̀ gɛ̀lɛ̀.)
Zízɛ̀ e Félè wà Nàtánìà o súo kɛ
43À lɛ̀ kpɛ̀iì gbɛɛ káa, Zízɛ̀ a yà e gé kɛ é ló Gálàlíì. E Félè gɛ̃̀, a gèe à lɛ̀ɛ, “Ì nu kɔ́á tàà-kíe-píé kɛ.” 44Félè pà e kɛ Bɛ̀sádà-pɛ̀lɛ̀ lɛ́ Áã́dùlù wà Pílɛ̀ ò go à yía yí. 45Félè e Nàtánìà naa, a gèe à lɛ̀ɛ, “Kɔaà mi lɛ́ Móózè e à wɔ̃̀ bɛ̃̀ɛ̃ Lɔ́ɔ̀ kiia yí, ɛ̃́ɛ̃́ lɛ́ dɔ̀-Wálà-lé-là-mìà wa mɔ́ɔ̀ wɔ̃̀ bɛ̃̀ɛ̃ gɛ̃̀. Óò à si Zízɛ̀. Lɛ Zósɛ̀ gbe ká, ɛ̃́ɛ̃́ lɛ́ɛ̀ go Názàlɛ̀.”
46Nàtánìà a gèe à lɛ̀ɛ kélɛ̀, “Ƃáà yí dɔ pɛ yiè nɔ́ɔ fé lɛ́ɛ̀ bɛ̀i góò Názàlɛ̀?”
Félè a gèe à lɛ̀ɛ, “Ì nu ɓá gɛ̃̀.”
47Lɛ̀ Zízɛ̀ e Nàtánìà gɛ̃̀, áà nù à píéa, e à wɔ̃̀ gèe weeá kélɛ̀, “Éézɛ̀lɛ̀ mi kpó-kpó gɛ̃̀ e ké. Nɛ̀ gbɛɛ wá à yí.”
48Nàtánìà a gèe à lɛ̀ɛ, “E dɔ kpɛɛ̀ lɛ́ ì m dɔ?”
Zízɛ̀ a là nìɛ̀ kélɛ̀, “Lɛ̀ lɛ́ i kɛ dɔ̀á féè-yìlì wì, kɛ Félè é tĩã́ i súo kɛɛ̀ɛ, m i gɛ̃̀.”
49Nàtánìà a gèe à lɛ̀ɛ, “Tísɛ̀, i Wálà Gbe ká. I Éézɛ̀lɛ̀-mìà Líé-sí-mì ká.”
50Zízɛ̀ a gèe, “Zò-dɔ̀à-mɔ̀ lɛ i yí, ɓii ma gèe i lɛ̀ɛ m i gɛ̃̀ lɛ̀ lɛ́ i kɛ dɔ̀á féè-yìlì wìa mɔ́ɔ̀ wɔ̃̀ mɔ̀? Íì lo wɔ̃́ kpànazɛ̀ gɛ̃̀ɛ̃̀, é dieá à yéa là.” 51A gèe à lɛ̀ɛ, “Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Káà lo lɛ̀í lé ɓoòa zɛ̀ gɛ̃̀ɛ̃̀. Ɛ́ɛ̃́ tó káà Wálà là vɔ-mìà gɛ̃̀, wáà lò lɛ̀í, ɛ̃́ɛ̃́ wáà nù tã́ã̀ Mi Gbe là.”
انتخاب شده:
Zɔ̃̀ɔ̃́ 1: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mann New Testament © Bible Society in Liberia, 1978.