Zɔ̃̀ɔ̃́ 2
2
Lee-sí-kpìlì lɛ́ e kɛ Kénàa
1Lɛ̀ lúó pèèlɛ e diea, lee-sí-kpìlì dò e kɛ pɛ́lɛ lɛ́ ò si Kénà, lɛ́ e kɛ Gálàlíìa yí. Zízɛ̀ lòóò e kɛ à lɛ̀ mɔ̀. 2Zízɛ̀ wà là tòà-píé-mìà o súo kɛɛ̀ e kɛá kpílì e kília là. 3Lɛ̀ lɛ́ míáa o wã́ã́ĩ̀a séĩ́ mia, Zízɛ̀ lòóò a gèe à lɛ̀ɛ, “Wã́ã́ĩ̀ aà nyɛ o kɛ̀lɛ̀.”
4Zízɛ̀ a gèe à lɛ̀ɛ, “Lee, yékɛ̀ í m kpɔ́ m kɛ-yɛ̀lɛ̀ mɔ̀. M zì lúó lɛ̀ɛ́ ɓɔ nɛ́.”
5Zízɛ̀ lòóò e à gèe gbaa yɛɓo-kɛ-mìà lɛ̀ɛ, “Kà wɔ̃́ nɔ́ɔ fé lɛ́ à gèe ká kɛɛ kɛ.”
6Lɔ́ɔ̀ doò do e kɛ Zúù-mìà kɛ̀lɛ̀ é gbɛ̃̀á pɛ mɛ́ pɛ́lɛ̀ mɔ̀. Wɔ̃́ e kéa mɔ́ɔ̀ wɔ̃̀ mɔ̀ɔ, yíí-yàà-yí gbɔɔ, lɛ́ à kɛɛ̀ e kɛá gɛ̀lɛ̀ káa, sáláádo e kɛ yàá yi. Yíí tíà sáláádo ɛ̃́ɛ̃́ sálápèèlɛ lɛ́ɛ̀ bɛ̀i lóò à doó yí. 7Zízɛ̀ a gèe yɛɓo-kɛ-mìà lɛ̀ɛ, “Kà gbɔɔ nì e kéa pa yíí ká.” O à pa à lé ká nyɛ̀nɛ̀ɛ̀ le. 8Lɛ̀ e kɛ kília, Zízɛ̀ a gèe o lɛ̀ɛ, “Kà yíía dò sí gbaa, ká ló à ká kpílìa wũ-là-mìa píé.” O ló à dò ká à píé. 9E yíí lɛ́ aà lùá gbaa wã́ã́ĩ̀ yía dã́. Lɛ̀ɛ́ gbaa lɛ̀ lɛ́ wã́ã́ĩ̀a e gó yia dɔ. Kɛɛ yɛɓo-kɛ-mìà lɛ́ o yíía sía wa dɔ. Lɛ̀ e kɛ kília, e lee-sí-gɔ̃̀ɔ súo kɛ, 10áà gèè à lɛ̀ɛ, “Mia séĩ́ óò wã́ã́ĩ̀ yiè-mì yí gìnì nɛ́ mia mɔ̀. Yé lɔ̀ɔ̀-mìà waà mi, lɛ́ aà bɛ̀i o mɔ̀ɔ, kɛ ó tĩã́ à kpɔ̀nɔɔ̀ɔ zɛ̀ɛ yí gìnì. Kɛɛ ɓi yee, ɓaà wã́ã́ĩ̀ yièa tó zízàá.”
11Zízɛ̀ e là lé-pa-wɔ̃̀ bèĩzɛ̀ e kéa kɛ Kénà lɛ́ e Gálàlíìa mɔ̀. À lɛ̀ mɔ̀ lɛ́ e lɛ́ɛ́ ɓo e zì kɛ̀ kpànazɛ̀ là yia. Ɛ́ɛ̃́ là tòà-píé-mìà o o zò dɔ à mɔ̀.
12Lɛ̀ e kɛ kília, Zízɛ̀ wà e lòóò, e bɛ̀i à lèe-gé gɔ̃à zɛ̀, é dàá là tòà-píé-mìà bàa o ló Kàpɛ́nìɛ̀. O kɛ yí lúó zààle píé.
Zízɛ̀ e ló Wálà-kà wì
(Máfìù 21.12-13; Máà 11.15-17; Lúù 19.45-46)
13Zúù-mìà zì Dìè-mia-là Kpílìa lúó e kɛ nupìà kɔ̀ɛ́ gbaa. Zízɛ̀ a mɔ́ɔ̀ ló ɓo Zùlúsàlɛ̀. 14Lɛ̀ Zízɛ̀ e ló sálà-ɓò-Wálà-lɛ̀ɛ-kà wìa, e mia gɛ̃̀ yi, wáà dìì ɛ̃́ɛ̃́ ɓáá, e bɛ̀i tèŋè nì lɔ̀ɔ̀ dɔ̀ yi. Pɛlèe mɛ́-vɔ̀ɔ-mìà bɛ̃̀ɛ̃ o kɛ yàá o zì téɓò mɔ̀. 15Zízɛ̀ e ɓɛ̀lɛ̀-gbàtò dò kɛ, áà míáa, e bɛ̀i ɓáá wà dìì nìa yí lùò à ká, wáà gò Wálà-kàa wì. E pɛlèe mɛ́-vɔ̀ɔ-mìàa wà téɓòa nìɛ̀, à gã̀ e dɔ lɛ̀í. Ɛ́ɛ̃́ e pɛlèea wɛ̃̀ĩ píé. 16A gèe gɔ̃à lɛ́ o kɛ tèŋèa lɔ̀ɔ̀ dɔpìàa lɛ̀ɛ, “Kà pɔɔ̀ɔ sí é gó lɛ̀ɛ mɔ̀. Yékɛ̀ ká m Dàa là káa kɛ lɔ́ɔ́ dɔpìà ká.” 17Là tòà-píé-mìàa o zò e vùò wɔ̃́ lɛ́ à bɛ̃̀ɛ̃ɛ̃̀ e kɛá Wálà kiia yía ká. Ye lɛ́ e kélɛ̀, “Ƃà káa mɔ́ɔ̀ wɔ̃̀ diè lɛ m zò ká, tó áà kɛ̀ m zò áà gèlè m gé.”
18Zúù-mìà wa gèe gbaa à lɛ̀ɛ, “Lé-pa-wɔ̃̀ sùu kpɛɛ̀ lɛ́ ì bɛ̀i à mɔ̀ ɓá kɛ, kɛ á zɔ̃̀ɔ̃̀ ko lɛ̀ɛ kélɛ̀ yíkɛ̀ gáàa lɛ i kɛ̀lɛ̀ kɛ í wɔ̃́ sùua kɛ?”
19Zízɛ̀ a là nìɛ̀ weeá kélɛ̀, “Kà sálà-ɓò-Wálà-lɛ̀ɛ-kà e kéa wí tã́ã̀. Lɛ̀-kpɛ̀iì yààka gílìa, ḿm̀ lo à dɔɔ̀.”
20Lɛ̀ e kɛ kília, Zúù-mìà wa gèe kélɛ̀, “E mia sí kɛ̀ɛ̀ vũ̀ yììsɛ wɛ́lɛ́ sáláádo ká kɛ ó káa dɔ. Ye lɛ́ ɓà gèe kélɛ̀ íì lo à dɔɔ̀ lɛ̀-kpɛ̀iì yààka gílìa?”
21Kɛɛ Wálà-kà lɛ́ Zízɛ̀ a mɔ́ɔ̀ wɔ̃̀ gèea, lɛ́ e kɛ à gbĩ-kpàla káa. 22À mɔ́ɔ̀ wɔ̃̀ mɔ̀ɔ, lɛ̀ à wɛ̀lɛɛ̀ e kɛá ga kɛ̀lɛ̀ɛ, là tòà-píé-mìà zò e vùò wɔ̃́ lɛ́ a gèe kília mɔ́ɔ̀ wɔ̃̀ ká. Ɛ́ɛ̃́ o Wálà kiia wà wɔ̃́ lɛ́ Zízɛ̀ aà gèea gɛ̃̀ wánà ká.
Zízɛ̀ lɛ́ɛ̀ mia séĩ́ dɔ sɛ̀
23Lɛ̀ Zízɛ̀ e kɛ Zùlúsàlɛ̀ Dìè-mia-là Kpílìa làa, mia búnùzɛ̀ o o zò dɔ à mɔ̀ lɛ̀ lɛ́ o lé-pa-wɔ̃̀ lɛ́ e kɛ à kɛpìàa gɛ̃̀ɛ ká. 24Kɛɛ Zízɛ̀ lɛ̀ɛ́ gbaa e dìè nɔ o lɛ̀ɛ, ɓii lɛ́ɛ̀ mia séĩ́ dɔ sɛ̀ɛ mɔ́ɔ̀ wɔ̃̀ mɔ̀. 25Lɛ̀ɛ́ gbaa kɛ mi nɔ́ɔ fé dò mɔ̀ kɛ é mia kɛ-kɔ̀ zɔ̃̀ɔ̃̀ à lɛ̀ɛ, ɓii e kɛ pɛ lɛ́ e kɛ o géa dɔpìà.
انتخاب شده:
Zɔ̃̀ɔ̃́ 2: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mann New Testament © Bible Society in Liberia, 1978.