Lúù 22
22
O o wũ dũ Zízɛ̀ mɔ́ɔ̀ wɔ̃̀ ká
(Máfìù 26.1-5; Máà 14.1-2; Zɔ̃̀ɔ̃́ 11.45-53)
1Belè lɛ́ belè‐fɔ̀ɔ‐pɛ̀ wá à bàa, mɔ́ɔ̀ kpílì lúó e kɛ ɓɔpìà kɔ̀ɛ́. Kpílì e kília lɛ́ ò à si Dìè‐mia‐là Kpílìa. 2Sálà‐ɓò‐Wálà‐mɔ̀‐mìà kpànazɛ̀ ɛ̃́ɛ̃́ Wálà kii‐dɔ‐mìàa o kɛ zi naapìà ó Zízɛ̀ zɛ. Ƃii o kɛ túópìà míáa lɛ̀ɛ.
Zúdà e wéé à mɔ̀ é Zízɛ̀ nɔ mia lɛ̀ɛ
(Máfìù 26.14-16; Máà 14.10-11)
3Lɛ̀ e kɛ kília, Sétɔ̃̀ e wàà gbaa Zúdà, lɛ́ ò si Ɛ̀sɛ̀kélìàa yí. Gɔ̃́ e kília e kɛ Zízɛ̀ là tòà‐píé‐mìà vũ̀ doó wɛ́lɛ́ pèèlɛɛ doó‐mì ká. 4Lɛ̀ e kɛ kília, Zúdà e ló sálà‐ɓò‐Wálà‐mɔ̀‐mìà kpànazɛ̀ɛ píé. Zúdà wà míáa nì, ɛ̃́ɛ̃́ nyìɛ‐kɛ̀‐Wálà‐kà‐mɔ̀‐mìà wũ‐là‐mìà nì o ló wũ‐dũ yí, kɛɛ é zi lɛ́ è lo Zízɛ̀ nɔɔ̀ à ká o lɛ̀ɛ wɔ̃̀ gèe. 5O gé kpó‐kpó e kɛ lipìà. O o wè dɔ kɛ ó pɛlèe nɔ Zúdà lɛ̀ɛ. 6Zúdà e wéé à mɔ̀. E gbɛ̃̀ gbaa, áà zi lɛ́ è lo Zízɛ̀ lé góòá, tó mi gbɛɛ lɛ̀ɛ́ à yí dɔɔ nàà.
Zízɛ̀ e e dìè pɛ̀ kɛ, kɛ é Dìè‐mia‐là Kpílì mɔ́ɔ̀ pɛ ɓèlè
(Máfìù 26.17-25; Máà 14.12-21; Zɔ̃̀ɔ̃́ 13.21-30)
7Belè lɛ́ belè‐fɔ̀ɔ‐pɛ̀ wá à bàa mɔ́ɔ̀ kpílìa, lúó lɛ́ e kɛ o mɔ̀ ó ɓáá nyɔ̀nɔ́ nì zɛ à ká Dìè‐mia‐là Kpílìa wɛ̃́ĩ̀a, e ɓɔ. 8Lɛ̀ e kɛ kília, Zízɛ̀ e Pílɛ̀ wà Zɔ̃̀ɔ̃́ o vɔ, áà gèè, “Kà lo ká kɔa zì Dìè‐mia‐là Kpílìa mɔ́ɔ̀ léɓèlè pɛ̀ kɛ, kɛ kɔ́á ɓèlè.”
9Wa gèe à lɛ̀ɛ, “Mɛ́ɛ lɛ́ ɓà nàà kó à pɛ̀ kɛ yí?”
10Zízɛ̀ a gèe o lɛ̀ɛ, “Kà ka tóó kɛ m mɔ̀. Yé kaà kɛ ɓɔpìà pɛlɛía, gɔ̃ doó lɛ́ɛ̀ lo gbɛ̃̀ɛ̃̀ ka mɔ̀. Múnú pà yíí ká zɛ̀, lɛ́ɛ̀ lo kɛɛ̀ à kɛ̀lɛ̀, áà lò à ká. Kà tó à píé, ká ló ká lɛ́ è lo wàà à wìa wì, 11ká à gèe káa dàa‐mì lɛ̀ɛ kélɛ̀, ‘Tísɛ̀ láà gèe i lɛ̀ɛ, À zì lɔ̀ɔ̀‐mi‐kà lɛ́ wà là tòà‐píé‐mìà ò lo Dìè‐mia‐là Kpílìa mɔ́ɔ̀ pɛ ɓèlè yia, lɛ mɛ́?’ 12Lɛ́ɛ̀ lo lɛ̀ gbùò dò zɔ̃̀ɔ̃̀ ka lɛ̀ɛ lɛ̀í‐kàa yí. Kɛ́ì‐pɔ̀ɔ̀ lɛ à lɛ̀ mɔ̀. Kà pɛ séĩ́ pɛ̀ kɛ à lɛ̀ mɔ̀.”
13Lɛ̀ e kɛ kília, o ló. O pɛ séĩ́ gɛ̃̀ nɔ́ lɛ̀ zí Zízɛ̀ a gèe à ká o lɛ̀ɛ lɛ́ ɓe. Yé e kɛ kília, o Dìè‐mia‐là Kpílì mɔ́ɔ̀ léɓèlè ò lo à ɓèlèa, pɛ̀ kɛ à lɛ̀ mɔ̀.
Óò belè ɓèlè
(Máfìù 26.26-30; Máà 14.22-26; 1 Kɔ̀léĩ́tĩ̀ã̀ 11.23-25)
14Lɛ̀ lúó e ɓɔɔ, Zízɛ̀ wà là àpɔ́sɔ̀lɔ̀ vɔ̀ o yà téɓò mɔ̀. 15Zízɛ̀ a gèe o lɛ̀ɛ, “Maà naa à ká nyɔ́ɔ̀ɔ kɛ kɔ̀à ɓi nì kɔ́á Dìè‐mia‐là Kpílì e kéa pɛ̀ ɓèlè e kíe là kɛ ḿ tĩã́ wɔ̃́ nyɔ́ɔ̀ɔ gɛ̃̀ɛ̃̀. 16Kɛɛ ḿm̀ gèe ka lɛ̀ɛ, m̀ḿ ló à ɓèlè, é tóá kíli à yí kpó‐kpó é kɛ à mɔ̀ lɛ̀ lɛ́ Wálà tóò lɛ mia là yia mɔ̀.”
17Lɛ̀ e kɛ kília, e kɔ̀ɛ̀ɛ sí, e Wálà zúo ɓo, áà gèè, “Kà pɛ́ e kéa sí, ká yí gìnì ka kíe mɔ̀. 18Ƃii ḿm̀ gèe ka lɛ̀ɛ, é kã́ pɛ́nɛɛ mɔ̀, é ló líéa, m̀ḿ ló ɓɛ̀lɛ̀‐wɛ́lɛ́ ɓɛɛ yíí e kéa miì gbaa é tóá kíli Wálà zì tò‐mia‐là lùò é ɓɔ.”
19Lɛ̀ e kɛ kília, e bɛ̀i, e belèa sí, e Wálà zúo ɓo, a kpuú yɛ́ kélé kélé, a nɔ o lɛ̀ɛ, áà gèè, “M gbĩ‐kpàla [lɛ́ à nɔɔ̀ lɛ ka mɔ́ɔ̀ wɔ̃̀ mɔ̀ɔ, gɛ̃̀ e ké. Kà wɔ̃́ e kéa kɛ, kɛɛ ka zò é vùò m mɔ́ɔ̀ wɔ̃̀ ká.” 20Zi doó e kília káa, e kɔ́pòa nɔ o lɛ̀ɛ lɛ̀ lɛ́ o nyɛ o lé ɓèlèaà mɔ̀ɔ ká, áà gèè, “Kɔ́pò e kéa lɛ́ e Wálà zì wè‐dɔ‐wè dɛɛ lɛ́ m léà lɛ́ à káà lɛ tã́ã̀ ka wɛ̃́ĩ̀a, lɛ à wɛ́lɛ́ káa káa.]
21“Kà lɛ̀ gɛ̃̀. Mi lɛ́ è lo m lé góòa, kò ye nì ko téɓòa mɔ̀. 22Ƃii Mi Gbe lɛ́ɛ̀ lo gaà lɛ̀ zí Wálà aà gèe é kɛáa lɛ́ ɓe. Kɛɛ gɔ̃ lɛ́ è lo à lé góòa, é ké nìé, gɔ̃́ e kília mɔ́ɔ̀ wɔ̃̀ lɛ́ɛ̀ lo kɛɛ̀ yéĩ̀zɛ̀ò.”
23Lɛ̀ e kɛ kília, o gbɛ̃̀ gbaa, wáà wɛ̃́ĩ́‐lɔ̀ɔ kɛ̀ o dìè píé píé kélɛ̀ dé è bɛ̀i à mɔ̀ é kɛ wɔ̃́ sùua kɛ‐mì ká.
O tèé dà mi lɛ́ lɛ kpànazɛ̀ɛ mɔ́ɔ̀ wɔ̃̀ ká
24Tòà‐píé‐mìàa o gbɛ̃̀ wáà wéé dɔ̀ o kíe nì ká, wáà gèè, “Deĩ̀ kpó‐kpó lɛ́ ò lo à gɛ̃̀ɛ̃̀ mi kpànazɛ̀ ká ko bà?” 25Zízɛ̀ a gèe o lɛ̀ɛ, “Sɛ́lɛ́ líé‐sí‐mìà wà yíkɛ̀ gáàa lɛ wà mia nì là gágà. Ɛ́ɛ̃́ mia lɛ́ o o làa, óò o si Gbũ̀‐sɛ́lɛ́‐mɔ̀‐mìà. 26Kɛɛ zí e kéa ye wá à ká ka ká. Kɛɛ mi lɛ́ lɛ ka bà lɛ́ lɛ kpànazɛ̀ɛ, lɛ à mɔ̀ é kɛ lɛ̀ nɛ́ tèáà là lɛ́ ɓe. Ɛ́ɛ̃́ mi yé è líé si ka káa, è kɛ lɛ̀ yɛɓo‐kɛ̀‐mia‐mɔ̀‐mì lɛ́ ɓe. 27Dé e kpànazɛ̀, mi yé è yà tã́ã̀, áà pɛ ɓèlèa lɛ, ɛ̃́ɛ̃́ kɛ̀ yɛɓo‐kɛ‐mì yé è nu là léɓèlè káa lɛ? Ḿ gɔ̃̀, à yé è yà tã́ã̀a lɛ? Kɛɛ ma ké m ka fĩ̀ã̀a lɛ́ m kélɛ̀ yɛɓo‐kɛ‐mìa.
28“Ka lɛ́ ka mia lɛ́ kaà kɛ m píé m zì yí‐dã́‐wɔ̃̀ séĩ́ yía káa. 29Zi lɛ́ m Dàa aà yíkɛ̀ gáàa nɔá m lɛ̀ɛ kɛ ḿ kɛá mia làa, zi nɔ́ doóa ḿm̀ lo à kɛɛ̀á ka ká. 30Káà lo pɛ ɓèlè, káà pɛ mì m̀ téɓò mɔ̀ lɛ̀ lɛ́ m tóò lɛ mia là yia mɔ̀. Ɛ́ɛ̃́ káà lo yàà dɔ‐táŋáná là, káà mɛ̀ĩ́‐sà dɔ̀ mia sùu doò do vũ̀ doó wɛ́lɛ́ pèèlɛ lɛ́ o Éézɛ̀lɛ̀‐mìà káa mɔ̀.
Zízɛ̀ a gèe Pílɛ̀ lɛ́ɛ̀ lo à gèeè làá dɔ
(Máfìù 26.31-35; Máà 14.27-31; Zɔ̃̀ɔ̃́ 13.36-38)
31“Sáímɔ̀, Sáímɔ̀, ì i tóó dɔ. Sétɔ̃̀ aà yíkɛ̀ gáàa sɔ̀lɔ̀ ɓo, kɛ é ka séĩ́ ka pìè lɛ̀ zí mia ò ɓu pìèáa lɛ́ ɓe. 32Kɛɛ maà sɛ̀nɛ ɓo i mɔ́ɔ̀ wɔ̃̀ mɔ̀, yékɛ̀ i zì zò‐dɔ̀à‐mɔ̀ é kɛ tɛ́ɛ́‐tɛ̀ɛ̀. Kɛɛ yé ɓaà nìɛ̀ zeĩ́, ɓaà nu m píéa, ì i lèe‐gé vɔ̀ wɛ́lɛ́ dà o yí.”
33Pílɛ̀ a gèe kélɛ̀, “M Dàa‐mì, m pɛ̀ kɛɛ̀ lɛ, kɛɛ kò ɓi kó ló bĩ́‐kɛ̀ì, ɛ̃́ɛ̃́ kò ɓi ko gaà mɔ́ɔ̀ wɔ̃̀ mɔ̀.”
34Zízɛ̀ a gèe kélɛ̀, “Pílɛ̀, ḿm̀ gèe i lɛ̀ɛ, íì lo à gèeè pɛ́nɛɛ e kíe yí yààka kélɛ̀ ìí m dɔ, kɛ tɔ̀ɔ̀ é tĩã́ wéè.”
Pɛlèe kàà‐yí‐pɛ̀, e bɛ̀i, gbòṹ ɛ̃́ɛ̃́ gèlè‐gɔ̃‐làà
35Lɛ̀ e kɛ kília, Zízɛ̀ a gèe o lɛ̀ɛ, “Lɛ̀ lɛ́ m ka vɔ, lɛ́ pɛlèe kàà‐yí‐pɛ̀, ɛ̃́ɛ̃́ lɛ́ gbòṹ, e bɛ̀i sàkpà, òó gbaa kɛ ka kɛ̀lɛ̀ɛ, lɛ̀ e kɛɛ, pɛ dò sã̀ã̀ dàaà e kɛá ka mɔ̀ kàáà?”
Wa gèe à lɛ̀ɛ, “Gbàaò. Pɛ sã̀ã̀ dàaà lɛ̀ɛ́ gbaa kɛá ko mɔ̀.”
36Zízɛ̀ a gèe kélɛ̀, “Kɛɛ mi lɛ́ pɛlèe kàà‐yí‐pɛ̀, ɛ̃́ɛ̃́ gbòṹ lɛ à kɛ̀lɛ̀ɛ, è à sí gbaa. Ɛ́ɛ̃́ zeĩ́, mi lɛ́ gèlè‐gɔ̃‐làà wá à kɛ̀lɛ̀ɛ, lɛ à mɔ̀ é e mɔ̀‐sɔ̀ lɔ̀ɔ̀ dɔ, á doó lɔ́. 37Ƃii ḿm̀ wɔ̃́ e kéa gèe ka lɛ̀ɛ. Ye lɛ́ e kélɛ̀, wɔ̃́ lɛ́ à bɛ̃̀ɛ̃ɛ̃̀ lɛ Wálà kii yí, lɛ́ e kélɛ̀, ‘Wa dà kɛ‐pɛ̀ yɔɔ kɛ‐mìà bàa,’ lɛ à mɔ̀ m mɔ́ɔ̀ wɔ̃̀ á kɛ, é kɛ wánà zɛ̀. Ƃii wɔ̃́ lɛ́ à bɛ̃̀ɛ̃ɛ̃̀ lɛ, lɛ́ à gbɛ̃̀ɛ̃̀ lɛ m mɔ̀ɔ, lɛ kɛpìà wánà ká.”
38Là tòà‐píé‐mìàa wa gèe à lɛ̀ɛ, “Ko Dàa‐mì, lɛ̀ gɛ̃̀, gèlè‐gɔ̃‐làà pèèlɛ gɛ̃̀ e ké.”
Zízɛ̀ a gèe, “Aà bɛ̀i gbaa.”
Zízɛ̀ e sɛ̀nɛ ɓo Ɔ́lè‐tɔ̃̀ũ̀ wĩĩ́
(Máfìù 26.36-46; Máà 14.32-42)
39Zízɛ̀ e gó pɛ́lɛɛ yí, e ló Ɔ́lè‐tɔ̃̀ũ̀ wĩĩ́, lɛ̀ zí à kɛ̀á teelea lɛ́ ɓe. Wà là tòà‐píé‐mìàa nì o ló. 40Lɛ̀ e ɓɔ lɛ̀ e kília mɔ̀ɔ, a gèe o lɛ̀ɛ, “Kà sɛ̀nɛ ɓo, yékɛ̀ yí‐dã́‐wɔ̃̀ é ɓɔ ka mɔ̀.”
41Lɛ̀ e kɛ kília, e gó gbaa o píé, e ló o ká gbèĩ, lɛ̀ zí mi ì bɛ̀i à mɔ̀ í gɛ̀lɛ̀ dùò à káa zì lò‐gbèĩ‐kɔ̀ lɛ́ ɓe. E káá gbaa e kpuò là, áà sɛ̀nɛ ɓò weeá kélɛ̀, 42“M Dàa, é kɛ̀á i zì nàà‐ká‐wɔ̃̀ káa, ì wɔ̃́ nyɔ́ɔ̀ɔ kɔ̀ɛ̀ e kéa ɓo m là. É kɛ bɛ̃̀ɛ̃ kília, ì wɔ̃́ lɛ́ ɓà nàà à káa kɛ. Kɛɛ yékɛ̀ í m zì nàà‐ká‐wɔ̃̀ kɛ.” [ 43Lɛ̀ e kɛ kília, Wálà là vɔ‐mì doó e gó lɛ̀í, e ɓíé à là, e à mɛ́ kɛ gágà. 44Zò‐dà‐zízàá e kɛ Zízɛ̀ mɔ̀ kpó‐kpó ɓo yɔɔ. À mɔ́ɔ̀ wɔ̃̀ mɔ̀ɔ, a mɔ́ɔ̀ sɛ̀nɛ ɓo zeĩ́ mɛ́ gágà zɛ̀. À mɔ̀‐zũ̀ e kɛ lɛ̀ léà‐kpùlù lɛ́ ɓe, áà bã̀ tã́ã̀.]
45Lɛ̀ Zízɛ̀ e nyɛ sɛ̀nɛ ɓoò mɔ̀, lɛ́ e wɛ̀lɛ̀ɛ, e ló e mɛ̀ĩ́ là tòà‐píé‐mìàa píé, e o gɛ̃̀ yi bà. Zò kɛ̀ yéĩ̀zɛ̀ a kɛ o káá yi ká. 46A gèe o lɛ̀ɛ kélɛ̀, “Mɛ́ e kɛ lɛ́ kà yi zɛ ké? Kà wɛ̀lɛ̀, ká sɛ̀nɛ ɓo, yékɛ̀ yí‐dã́‐wɔ̃̀ é ɓɔ ka mɔ̀.”
O Zízɛ̀ kṹ
(Máfìù 26.47-56; Máà 14.43-50; Zɔ̃̀ɔ̃́ 18.3-11)
47Zízɛ̀ e kɛ tĩã́ wéépìà lɛ̀ lɛ́ mia kù o nu yía ká. Zúdà lɛ́ e kɛ tòà‐píé‐mìà vũ̀ doó wɛ́lɛ́ pèèlɛɛ doó‐mì káa, e kɛ o líé sípìà. E ló Zízɛ̀ ká kɔ̀ɛ́, kɛ é e bè gbɛ̃̀ à kpéĩ́ mɔ̀. 48Kɛɛ Zízɛ̀ a gèe à lɛ̀ɛ kélɛ̀, “Zúdà, íì Mi Gbe lé go i bè gbɛ̃̀ à kpéĩ́ mɔ̀ ká?”
49Lɛ̀ lɛ́ tòà‐píé‐mìà yé o kɛ Zízɛ̀ sɔ́nɔ́ɔ, o wɔ̃́ lɛ́ e kɛ lópìà kɛɛ̀ɛ gɛ̃̀ɛ, wa gèe kélɛ̀, “Ko Dàa‐mì, kó yà‐ɓo kɛ kò gèlè‐gɔ̃‐lààa ká?” 50Yé e kɛ kília, o doó‐mì e sálà‐ɓò‐Wálà‐mɔ̀‐mìà wũ‐là‐mì là lùò yà e tóó mɔ̀. E à kɔ̀ yiè tóó e kília kã́ pɛ̃ĩ le.
51Kɛɛ Zízɛ̀ a gèe kélɛ̀, “Gbɛɛ áá gbaa kɛ.” E pá gɔ̃́ɛɛ tóó mɔ̀, e kɛ e kɛ‐zì ká.
52Lɛ̀ e kɛ kília, Zízɛ̀ a gèe sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ nyìɛ‐kɛ̀‐Wálà‐kà‐mɔ̀‐mìàa wũ‐là‐mìà, e bɛ̀i, mia dìè‐dìè vɔ̀, lɛ́ o nuù e kɛá yi kɛ ó à kṹa lɛ̀ɛ kélɛ̀, “Káà nu gèlè‐gɔ̃‐làà wà mia mɛ̀‐yìlì‐kpuú nì ká, lɛ̀ mi lɛ́ è nu mi dà‐luú‐là zɛ̀ kṹũ̀? 53M kɛ ka píé lúó búnù‐búnùzɛ̀ ká sálà‐ɓò‐Wálà‐lɛ̀ɛ‐kà wì. Kɛɛ kàá gbaa m kṹ. Kɛɛ ka bɛ̃̀ɛ̃, ka zì lúó wà lúó lɛ́ yíkɛ̀ gáàa lɛ à ká bĩ́ tii kɛ̀lɛ̀ mia làa lɛ́ ɓɛ.”
Pílɛ̀ a gèe lɛ̀ɛ́ Zízɛ̀ dɔ
(Máfìù 26.57-58, 69-75; Máà 14.53-54, 66-72; Zɔ̃̀ɔ̃́ 18.12-18, 25-27)
54O Zízɛ̀ kṹ, o ló à ká sálà‐ɓò‐Wálà‐mɔ̀‐mìàa wũ‐là‐mìa píé kɛ́ì. Pílɛ̀ e kɛ Zízɛ̀ ká gbèkèni, áà tò à píé. 55O tíé dà gàlà lɛ́ e ká e kília mɔ̀ɔ yí. Pílɛ̀ e dà gbaa mia lɛ́ o kɛ yàá tíé e kília mɔ̀ɔ bà. 56Lɛ̀ yɛɓo‐kɛ‐loàa doó‐mì e Pílɛ̀ gɛ̃̀ yàá tíé mɔ̀ɔ, e lɛ̀ gɛ̃̀ à wɛlɛ yí sĩ́ĩ́ le, áà gèè, “Gɔ̃́ e kéa e kɛ à píé nɔ́ kíli.”
57Kɛɛ Pílɛ̀ a tèé ɓo, áà gèè, “Lee, m̀ḿ à dɔ fèle ɓo.”
58Lɛ̀ à lɛ̀ e túó ɓéĩ́ ɓoa, gɔ̃ doó bɛ̃̀ɛ̃ e à gɛ̃̀, áà gèè, “I o dò ká nɔ́ kíli.”
Kɛɛ Pílɛ̀ a là nìɛ̀ weeá kélɛ̀, “Gɔ̃, ye wá kíli.”
59Lɛ̀ pɛ́ è kɛ̀ kélɛ̀ áwà doóa e diea, gɔ̃ dò e mɛ́ĩ́ ɓo zeĩ́ gágà kélɛ̀, “Gɔ̃́ e kéa e kɛ à píé wánà kpó‐kpó ká, ɓii lɛ́ɛ̀ go Gálàlíìa mɔ́ɔ̀ wɔ̃̀ mɔ̀.”
60Kɛɛ Pílɛ̀ a gèe kélɛ̀, “Gɔ̃, wɔ̃́ ɓà gèea, m̀ḿ à yí dɔ.”
Lɛ̀ e kɛ nɔ́ kíli, lɛ́ Pílɛ̀ e kɛ tĩã́ wéépìàa, tɔ̀ɔ̀ áà wèè gbaa. 61Ko Dàa‐mì e nìɛ̀, e Pílɛ̀ gɛ̃̀. Lɛ̀ e kɛ kília, Pílɛ̀ zò e vùò wɔ̃́ lɛ́ ko Dàa‐mì aà à gèe à lɛ̀ɛ ká gbaa. Wɔ̃́ɔ lɛ́ e kélɛ̀, “Kɛ tɔ̀ɔ̀ é tĩã́ wéè pɛ́nɛɛ̀ɛ, íì lo à gèeè e kíe yí yààka kélɛ̀ ìí m dɔ.” 62Lɛ̀ e kɛ kília, Pílɛ̀ e gó gbaa yí, áà gbóó ɓò gbaa wɛlɛ yɔɔ zɛ̀.
O yéí sí Zízɛ̀ mɔ̀, wáà mɛ̀
(Máfìù 26.67-68; Máà 14.65)
63Gɔ̃à lɛ́ o kɛ o nyìɛ kɛpìà Zízɛ̀ mɔ̀ɔ, o yéí sí à mɔ̀, wáà à mɛ̀. 64O sɔ kùnù à nyìɛ là, wáà gèè à lɛ̀ɛ, “Dé e i mɛ̀ ɓɛ? Mí e i mɛ̀ɛ tɔ́ gèe.” 65Ɛ́ɛ̃́ o o wè sí à mɔ̀ píé.
Zízɛ̀ lɛ dɔ̀á mɛ̀ĩ́‐sà ɓo‐mìà wɛlɛ líé
(Máfìù 26.59-66; Máà 14.55-64; Zɔ̃̀ɔ̃́ 18.19-24)
66Lɛ̀ lɛ̀ e kpɛ̀ia, Zúù‐mìà dìè‐dìè vɔ̀, ɛ̃́ɛ̃́ sálà‐ɓò‐Wálà‐mɔ̀‐mìà kpànazɛ̀, e bɛ̀i, Wálà kii‐dɔ‐mìàa o pá o kíe mɔ̀. Lɛ̀ e kɛ kília, o ló Zízɛ̀ ká wà mɛ̀ĩ́‐sà ɓo‐mìà wɛlɛ mɔ̀. 67Wa gèe à lɛ̀ɛ kélɛ̀, “É kɛ̀á ɓi lɛ́ i Kɛ́lɛ̀ì káa, ì à gèe ko lɛ̀ɛ.”
Zízɛ̀ a gèe o lɛ̀ɛ kélɛ̀, “Ḿ gèeá ka lɛ̀ɛ, kàá ló m wúú gɛ̃̀ wánà ká. 68Ɛ́ɛ̃́ ḿ wɛ̃́ĩ́‐lɔ̀ɔ kɛ̀á ka kɛ̀lɛ̀ɛ, kàá ló à yí ɓoò. 69Kɛɛ é kã́ pɛ́nɛɛ mɔ̀ é ló líéa, Mi Gbe lɛ́ɛ̀ lo kɛɛ̀ yàá Wálà lɛ́ yíkɛ̀ gáàa lɛ à kɛ̀lɛ̀ɛ kɔ̀ yiè yí.”
70O séĩ́ wa gèe kélɛ̀, “Ƃi lɛ́ i mɔṹ Wálà Gbe káa?”
Zízɛ̀ a gèe o lɛ̀ɛ, “Káà à gèe m à ká.”
71Lɛ̀ e kɛ kília, wa gèe kélɛ̀, “Mɛ́ kò mɔ́ɔ̀ kélá naa ɓo ɓɛ? Ko séĩ́ kɔaà à dìè lé‐wè ma.”
انتخاب شده:
Lúù 22: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mann New Testament © Bible Society in Liberia, 1978.