YOHANES 5
5
Karaul᷊e su rano Betesda
1Bou e'e pia sal᷊iwang tau Yahudi, kute I Yesus natamai nakoa sarang Yerusalem. 2Su Yerusalem masandighu “Tukari Domba” pia kolam simbau,#5:2: masandighu “Tukari Domba” pia kolam simbau: arako masandighu “Kolam Domba” pia simabu tampa. ko surudato ngu Ibrani i sigho “Betesda.”#5:2 Betesda: pirambau wohe horo: Betzata. Su se'e pia poresi l᷊ima. 3Suapang poresi e'e napene u taumata masaki kal᷊al᷊oka; pia ko wuta, pia ko pengkadi, pia ko kesohi. [I sire kaul᷊ie kapangampal᷊e ake su kolam, e'e magholang. 4Watu'u tahaghisa mal᷊aikat u Mawu l᷊umintu su l᷊al᷊ung u kolam e'e dang munggolang ake e'e. Dang taumata masaki ko kahorokange l᷊umintu su kolam e'e su tempo pughagholang u ake sarung maul᷊e bou mutatahang u haghing saki.] 5Su tampa e'e pia tau koese singkatau ko seng tilumpul᷊o wal᷊u su taunge kal᷊iwuange masaki. 6I Yesus nakawua i sie kal᷊al᷊oka pai se'e, dang seng matitong himoneu i sie seng mal᷊iwue kahingang masaki; kute I Yesus nukina si sie, “Mo ikau maul᷊e?”
7Tau masaki e'e nusumimbahi, “Tuang, takoae taumata si'i ko mupal᷊intu sia su l᷊al᷊ungu kolam e'e su tempong ake e magholang. Dang su tempo ngu ia wuhue matamai sarang kolam e'e, taumata kowal᷊inge seng nakahoro l᷊umintu.”
8Kute I Yesus nangul᷊i si sie, “Wangungte, hengke tupihiu dang ral᷊engte.” 9Singkatempo e'e l᷊ai tau e'e naul᷊e. I sie nuhengke tupihi e dang dingang nul᷊umal᷊eng.
Hal᷊i e'e nariadi so l᷊ou Sabati. 10#Neh. 13:19; Yer. 17:21Ual᷊ingu e'e manga mangangawasa ngu tau Yahudi nangul᷊i su taumata ko wuhue naul᷊e bou saki e'e, “L᷊ou i'i l᷊ou Sabati; i kau ta botonge muhengke tupihi.”
11Kateho tau e'e nusumimbahi, “Taumata ku nupakaul᷊e ngu ia kanini nuparenta si sia puhengke tupihi dingang nundoi u ia paral᷊eng.”
12“Isai I Sie ko nangoro si kau puhengke tupihi dingang u paral᷊eng?” Kakina i sire.
13Kateho taumata ko naul᷊e e'e wugha i sai taumata e'e, ual᷊ingu I Yesus nailang su tal᷊oara u taumata ko maul᷊i e'e.
14Bou e'e I Yesus nusuma u tau e'e su l᷊al᷊ungu wal᷊engu Mawu; dingang nu nangul᷊i si sie, “Orasi i'i ikau seng naul᷊e bou saki u. Kumbahang sau mukoa dosa, tadeau ta kahombangeng u hal᷊i ko lebe dal᷊ai.”
15Kute tau e'e natamai nurumal᷊eng wuhue nuhabari su manga mangangawasa ngu tau Yahudi himoneu ko nupakaul᷊e sie e'e ko I Yesus. 16Dang ual᷊ingu e'e i sire nanita nupakasusangi Yesus, watu'u i sie nupakaul᷊e ngu taumata masaki su l᷊ou ngu Sabati.
17Kateho Yesus nangul᷊i si sire, “Yamang-Ku kapuhal᷊i e turusi sarang orasi i'i, dang Ia l᷊ai mambeng muhal᷊i.”
18Apang didato e'e kasaunge nakakoa apang manga mangangawasangu tau Yahudi mukakal᷊ika mundea ral᷊enge mamate si Sie. E'e koateng i sire, wal᷊inge kitang ual᷊ingu I Sie l᷊umawang atorang u agama hal᷊i l᷊ou ngu Sabati, kateho ual᷊ingu I Sie l᷊ai nangul᷊i uare Mawu Ruata e'e ko Yamang-E; mangal᷊enge I Sie mupusul᷊ungu watangeng-E dingang u Mawu Ruata.
Kawasangu Ana
19I Yesus nusumimbahi keri i sumanga taumata e'e, “Pangimangte Ana ta makakoa manga apa dingang u kawasange sisane. I Sie kitang mukoa apang ko nikawuang-E, watu'u ko koateng I Yamang, e'e l᷊ai koateng u Ana. 20Watu'u Yamang kumindaghi u Ana ringang mupatode kaul᷊i e si Sie apa koseng nikoa-E sisane. Katewe Yamang borong l᷊ai mupatode si Sie hal᷊i ko napal᷊iu l᷊abo, hakiu i kumu maherang. 21Yamang e'e mupuwangung u taumata ko nate, dingang mangonggo u puwawiahi kahingang dingang u kakal si sire; kere l᷊ai Ana mangonggo u puwawiahi kakal su taumata ko mo ionggol᷊ang-E puwawiahi. 22Yamang si sane ta muhukung sai-sai. Kaul᷊i u kawasangu muhukung seng nisarakang su Ahus-E. 23Yamang nukoa e'e, tadeau apang taumata kaul᷊ie mangadati Ana kere i sire mangadati si Yamang. Taumata ko ta mangadati Ana ta mangadati l᷊ai si Yamang ko nundoi u Ana.
24Tinga-tingari apang didato-Ku i'i: Taumata ko musumpi u manga didato-Ku, dang mangimang si Sie ko nundoi si Sia, pia puwawiahi kahingang dang kakal. I sie sarung ta ihukumang; i sie nal᷊iu bou papate dang makahombang puwawiahi. 25Pangimangte: Sarung sumongo temponge dang – seng nurating temponge – taumata ko nate sarung makaringihi tingihu Ahusu u Mawu Ruata. Dang taumata ko makaringihi e'e sarung muwiahi. 26Musul᷊ung I Yamang sisane ko pungu puwawiahi, I Sie nukoa Ahus-E l᷊ai pungu puwawiahi. 27I Sie seng nangonggo su Ahus-E e'e haki guna ngu muhukung, watu'u I Sie ko Ahusu Taumata. 28I kumu kumbahang maherang makaringihi hal᷊i i'i, watu'u sarung sumongo temponge himoneu apang taumata ko seng nate makaringihi tingihi-E, 29#Dan. 12:2bou e'e sumuwang bou l᷊al᷊ungu kubul᷊i. Taumata ko seng nukoa ko mapia sarung muwangung guna ngu puwiahi. Arawe taumata ko nukoa ko dal᷊ai sarung muwangung tadeau ihukung.”
Karal᷊ahe u hal᷊i I Yesus
30“Ia ta makakoa manga apa bou kao-Ku sisane. Ia kitang muhukung tumuhu apang ko niparentang u Mawu Ruata. Dang putusang-Ku adili, watu'u Ia ta mukoa tumuhu kaoku sisane, kateho kao I Yamang ko nundoi u Ia.
31Bou kirapa ia mangonggo kasaksiang hal᷊i watangengku sisane, kasaksiang e'e ta ipangimaneng. 32Kateho pia taumata ko wal᷊inge musaksi ngu Ia, dang Ia matitong kasaksiange e'e tingari. 33#Yoh. 1:19-27, 3:27-30I kumu seng nundoi u taumata patamai sarang koa i Yohanes, dang i sie nangonggo u kasaksiang ko tingari bou hal᷊i u Ia. 34Ia muhabaru hal᷊i i'i, wal᷊inge ual᷊ingu ia mundea kasaksiang bou taumata; kateho tadeau i kumu i pakasal᷊amati. 35I Yohanes e'e musul᷊ungu sol᷊o kahenange dang mupasinangu suange. Su l᷊al᷊ungu singkodo tempo i kumu l᷊umiaghi manarima u kasasuange e'e. 36Arawe kasaksiang-Ku lebe l᷊abo bou kasaksiang i Yohanes. Apang daku koateng su orasi i'i, e'e ko hal᷊i niparentang I Yamang si sia, mupakal᷊ahe u himoneu Yamang seng nundoi u Ia. 37#Mat. 3:17; Mrk. 1:11; Luk. 3:22Dang Yamang ko seng nundoi u Ia, seng musaksi ngu Ia l᷊ai. I kumu borong ta nakaringihi tingihi-E arako nakawua ghahi-E 38Apang didatonge ta nireso su l᷊al᷊ungu naung i kumu watu'u i kumu ta mangimang si Sia ko niroi-E. 39I kumu nangundung Buki Susi watu'u i kumu manika ual᷊ingu e'e i kumu managhuang puwawiahi kahingang dang kakal. Dang Buki Susi sisane e'e nangonggo kasaksiang hal᷊i u Ia. 40Kateho i kumu mandiri sumongo sarang koa-Ku tadea u makahombang puwawiahi kakal.
41Ia ta mundea dal᷊o bou taumata. 42Ia matitong i kumu. Ia matitong i kumu ta kumindaghi u Mawu Ruata su l᷊al᷊ung u naung i kumu. 43Ia nusumongo dingang u kawasa-Ngi Yamang-Ku, kateho i kumu ta manarima u Ia. Arawe boko taumata ko wal᷊inge nusumongo dingang u kawasange sisane, i kumu mo manarima i sie. 44Kirapawe i kumu makapangimang, boko i kumu mundea dal᷊o bou sinsul᷊ungu, dang ta mutatitehi mundea dal᷊o bou Mawu Ruata ko mang simbau? 45Kumbahang manika u Ia mo mupusal᷊ang i kumu e'e su saruang I Yamang. Arawe ko sarung mupunsal᷊ang i kumu ko i Musa, i sie puharapeng i kumu. 46Bou kirapa i kumu mangimang si Musa, i kumu mangimang si Sia, ual᷊ingu i sie namohe hal᷊i u Ia. 47Arawe bokoi kumu ta mangimang su ko niwohe i Musa, kirapa wue i kumu makapangimang suapang ko Daku i ul᷊i?”
انتخاب شده:
YOHANES 5: LAISXN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2014 Indonesian Bible Society (Lembaga Alkitab Indonesia)